موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



+ الرد على الموضوع
النتائج 1 إلى 7 من 7
Like Tree0Likes

الموضوع: دين أبوهم إسمه إيـه // الشاعر جمال بخيت

  1. #1
    الصورة الرمزية مـوجـة بـحـر
    تاريخ التسجيل
    May 2008
    المشاركات
    3,447

    12 دين أبوهم إسمه إيـه // الشاعر جمال بخيت

    . . .

    :: قصيدة دين أبوهم إسمه إيـه // للشاعر جمال بخيت ::








    دين أبونا يا مسلمين

    في يقيني
    أعز دين
    كلمة النور الأمين
    كلمة الحق المبين
    حكمة يكتبها الإله
    فوق جبين الطيبين
    دين أبونا يا محمد
    انت سره
    ومبتداه
    انت إحساسه ومداه
    دقة عارفينها في قلوبنا
    لما نخشع للإله
    لما نطلب يوم رضاه
    لما نركع
    لما نسجد
    لما نفرح بالحياة



    دين أبونا إبراهيم
    رش جمر النار حنين
    ع الخرايط والأماكن
    اتولدنا طوافين
    ذاكرين



    دين أبويا لو مسيحي
    رحمة لاجل العالمين
    نصرة لاجل المظلومين
    كلمة الحب اللي بايس
    الصليب جوه الكنايس
    ندهة الأجراس لمريم
    والآمان للمجدلية
    رحمة ليكوا
    ورحمة ليا
    المسيح شايل آلامنا
    لاجل يهدينا السلامة
    خد أيمن
    خد أيسر
    العبادة مهيش كلام
    عيش بإسم الإنسانية
    وانسى نية
    تدفعك للإنتقام




    دين أبويا دين إلهي
    أينما كان اتجاهي
    حتى لو كان دين يهودي
    احنا مش ضد اليهود
    موسى في القرآن وليد
    يحضنه نيل الخلود
    بين إيديه
    تسعى عصاته
    حيه
    وجدودنا شهود
    سحرة آمنوا برب موسى
    انقسم له بحر عاتي والجبل عرف السجود
    رجعت الحية عصاية
    حضنت التوراة وصايا
    إوعى تقتل
    إوعى تسرق
    إوعى تزني
    إوعى تقبل بالخضوع
    بحر خير الكون يواتي
    لما نفرد له القلوع
    والجحيم ياكل سنينكم
    لو فقير فيكم يجوع
    الوصايا هي هي
    أرتضيها زي ما هي
    في ضميري وفوق شفاهي



    دين أبويا دين إلهي
    أينما كان اتجاهي
    حتى لو كان مش إلهي
    المجوسي يترعب من النار ويعبد
    الإله اللي فـِ خياله
    ليه حرامه وليه حلاله
    تسمعه فـِ معبد دعاء
    تلهمه رعشة رجاء
    للبقر ناس يعبدوه
    ويدينوله بالولاء
    مش غباء
    تعرفوا في البقرة إيه بيقدسوه ؟
    العطاء



    دين أبويا
    أي دين
    فيه عصاه أو مخطئين
    بس فـِ نهاية المطاف
    فيه ملايكه ومؤمنين
    ولرضا للصالحين
    والهنا للصابرين
    فيه مالاذ للعابدين الشاكرين
    المشتاقين رغم الضياع
    لليقين



    دين أبويا
    أي دين



    اللي انا بقى معرفوش
    الوحوش
    الكروش
    اللي لو طالوا رقابينا
    بينهشوا مبيرحموش
    دين أبوهم إسمه إيه ؟
    اللي داسوا فوق رؤوسنا بالبيادة
    اللي مشيوا بالببلاد للبلادة
    اللي فتاويهم فساد للعقل
    يقضي على العبادة
    اللي مسحوا من الآيات معنى الشهادة
    دين أبوهم اسمه إيه؟



    لوثوا الدم فـِ عروقنا
    سدوا عين الشمس فوقنا
    سرقوا ضوئنا
    صادروا نيلنا
    ودفـّعونا تمن وضوئنا
    دين أبوهم اسمه إيه؟
    اللي باع وطن بحاله
    خضرته وصفرة رماله
    نسوته وشهوة رجاله
    بهجته ودمه وعياله
    خطوته وسنين نضاله
    ثورته ضد احتلاله
    دين أبوهم اسمه إيه؟




    مين إلهه ؟
    مين رسوله ؟
    فين كتابه ؟
    فيه ملايكه وللا غابوا ؟
    فيه شياطين وللا تابوا ؟
    لما شافوا التابعين
    شرهم زاد عن جهنم شر لا يمكن حسابه
    دين أبوهم اسمه إيه؟




    حتى فرعون اللي صَدَق
    انه من نسل الإله
    واللي قال إنه الإله
    كان بيبني الأهرامات للممات قبل الحياة
    كان له بعث ويوم حساب
    كان له دولة
    حضور
    إدارة
    كان منارة ترشد الكون للحضارة
    كان له جيش فارض وجوده
    كان محارب بين جنود
    واما يتجاوز حدوده
    كان له رب يغرقه وينقذ يهوده



    حتى فرعون اللي صَدَق
    انه من نسل الإله
    واللي قال انه الإله
    كان له كهنة في العلوم
    يقروا فـِ كتاب الكواكب
    يرصدوا سير النجوم
    يفتحوا له سكك بيبان
    في سراديب الزمان
    ويقولولو ازاي يدوم
    حنطوه
    خلدوه
    بالمعاني والمباني والرسوم
    كانوا كهنة مؤمنين
    خلوا كلمة مصر دين
    حاضرة في العهد القديم
    حاضرة في العهد الجديد
    حاضرة في القرآن حضور
    الآيات فيها تدور
    مفردة عز وجلال
    معلنة وبين السطور
    تخترع
    ثانية وشهور
    تخترع شعر وبحور
    حتى فلاحها الفصيح
    شكوته بتشع نور



    إيه يا مصر
    إيه يا أرض الطبيبين
    اللي حكموا في الزمان ده يبقوا مين ؟
    دين أبوهم اسمه إيه؟
    حد يعرف فيكوا دين
    كل أتباعه لصوص أو قوادين ؟
    في المعاصي مولودين
    في الكراسي مأبدين
    في التفاهة معدودين
    في السفاهة مفرودين
    ع البلاهة مسنودين
    للشراهة مجندين
    ع القرف متعودين
    ع الشرف متمردين
    ع الوطن متنمردين
    بالخيانة موحدين
    اللي يعرف دين كده يقوللي عليه
    دين أبوهم اسمه إيه ؟


    ___________________


    للإستمـاع إلى القصيدة إضغط هنـا

    . . .




    التعديل الأخير تم بواسطة ألبارون; 17-10-2011، الساعة 08:42 AM
    . . .

    . . .

  2. #2
    الصورة الرمزية ألبارون
    تاريخ التسجيل
    Jul 2009
    المشاركات
    16,005
    ههههه
    الراجل ده شكل كَفَر
    واختيار رائع رائع رائع
    تسلم الايادي يا موجة وجاري الإستماع للفيديو

    مثبت

    بسم الله الرحمن الرحيم
    وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ *
    مُهْطِعِينَ مُقْنِعِي رُءُوسِهِمْ لاَ يَرْتَدُّ إِلَيْهِمْ طَرْفُهُمْ وَأَفْئِدَتُهُمْ هَوَاء
    صدق الله العظيم






    هي الدنيا تقول بِملء فِيِها ... حذار حذار من بطشي وفتكي
    فلا تغتر من حُسن ابتسامي ... فقولي مُضحكٌ والفِعل مُبكـي





  3. #3
    الصورة الرمزية khaled_dwidar
    تاريخ التسجيل
    Oct 2007
    المشاركات
    494
    الله الله الله القصيدة دية من اجمل ما كتب جمال بخيت بجد القصيدة مش عارف اوصفها لانها متتوصففش

    اختيارك اكتر من رائع ياموجة احييكى علية





  4. #4
    الصورة الرمزية بنت بورسعيد
    تاريخ التسجيل
    May 2008
    المشاركات
    1,852
    جميلة واختيار موفق موجتى
    سمعتها بصوته
    وحسيت بالقهرة فى صوته
    سلمتى

  5. #5
    الصورة الرمزية مـوجـة بـحـر
    تاريخ التسجيل
    May 2008
    المشاركات
    3,447
    اقتباس المشاركة الأصلية كتبت بواسطة ألبارون مشاهدة المشاركة
    ههههه
    الراجل ده شكل كَفَر
    واختيار رائع رائع رائع
    تسلم الايادي يا موجة وجاري الإستماع للفيديو

    مثبت

    جزيل الشكر يا عمرو على التثبيت
    والإلقاء له عامل كبير في فهم القصيدة
    تسلم لتشجيعك
    ورودي






  6. #6
    الصورة الرمزية مـوجـة بـحـر
    تاريخ التسجيل
    May 2008
    المشاركات
    3,447
    اقتباس المشاركة الأصلية كتبت بواسطة khaled_dwidar مشاهدة المشاركة
    الله الله الله القصيدة دية من اجمل ما كتب جمال بخيت بجد القصيدة مش عارف اوصفها لانها متتوصففش

    اختيارك اكتر من رائع ياموجة احييكى علية

    يكفيني ردك ويكيفيني قراءتك لها
    جزيل الشكر على وجودك هنا يا خالد
    تحياتي
    و
    ورودي





  7. #7
    الصورة الرمزية مـوجـة بـحـر
    تاريخ التسجيل
    May 2008
    المشاركات
    3,447
    اقتباس المشاركة الأصلية كتبت بواسطة بنت بورسعيد مشاهدة المشاركة
    جميلة واختيار موفق موجتى
    سمعتها بصوته
    وحسيت بالقهرة فى صوته
    سلمتى


    بفرح بوجودك دائماً يا بيرو
    أدام الله تواجدك وتواجد حرفك بيننا
    ورودي






ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك