موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



موضوع مغلق
صفحة 1 من 48 1 2 3 11 ... الأخيرةالأخيرة
النتائج 1 إلى 15 من 720
Like Tree69Likes

الموضوع: كل شئ عن تركيا(اقامة-عمل-سكن) تجرية شخصية

  1. #1
    تاريخ التسجيل
    Jul 2011
    المشاركات
    101

    27 كل شئ عن تركيا(اقامة-عمل-سكن) تجرية شخصية

    بسم الله الرحمن الرحيم

    السلام عليكم ورحمة الله وبركاتة...احب ابدأ كلامى بذكر افضل الخلق والمرسلين سيدنا محمد رسول الله عليه افضل الصلاة والسلام.

    اولا
    : احب اشكر ادارة المنتدى الكرام على هذا المنتدى الاكثر من رائع وادعو الله ان يكون هذا الموقع بمثابة علم ينتفع به وصدقة جارية فى ميزان حسناتهم.
    واحب اشكرايضا اعضاء المنتدى اللى ساعدونى كتير وردوا على اسألتى واستفسارتى بالتفصيل جزاءهم الله كل خير.
    تجربتى فى تركيا من الالف الى الياء
    :فى البداية اعرفكم بنفسى اخوكم مصطفى من اسرة متوسطة طموح جدا و شاب زى اى شاب فيكم حلمى انى احسن مستواية ومستوى عائلتى واعمل فنى صيانة كمبيوتروكنت بشتغل فى شركة مصر امريكا بمصر وشركتنا كانت عبارة عن شركة استيراد اجهزة من الخارج وصيانتهم وبيعهم والحمد لله كان مرتبى كويس وكنت مبسوط فى الشغل عشان كنت بحبة . لحد ما قامت ثورة 25 يناير وشركتنا حالها وقف بسبب انى الاستيراد وقف فمشيت من الشركة شهر 2 تقريبا ودورت على شغل فى نفس المجال مالقتش. لقيت انى الحل هو السفر والعمل فى الخارج وكنت بدور على السفر ده بجنون لدرجة انى بقيت بدفع فلوس لناس معرفهاش على اساس انها هتجبلى عقد عمل برة مصر وكمان دفعت فلوس فى شركات توظيف العمالة فى الخارج وبعد ما تدفع الفلوس اللى يقولك تعالى استلم العقد كمان شهر تروح بعد شهر يقولك لا معلش تعالى كمان 3 اسابيع عشان حصل تعديل فى عقود العمل برة وهكذا ويقعدوا يشدوا فلوس منك واللى يقولك الدور لسه مجاش عليك هتستنى شوية وياريت حاجة بتم وفى الاخر تطلع كلها شركات نصب وخسرت حوالى 1000 جنية على الكلام الفاضى ده. فقررت انى مدفعش لفلوس لاى حد تانى وقولت انا هشتغل لنفسى وفعلا اخد خطوة ايجابية وصليت صلاة استخارة واتوكلت على الله وقدمت على تأشيرة تركيا وخصوصا انى عرفت من الموقع بتاعكم انها سهلة اليومين دول والحمد لله اخدتها شهر 7 اللى فات وحجزت على طيران شارتر تبع شركة سياحية اسمها كرافت للسياحة والتذكرة كانت سعرها حوالى 1750 والعودة كانت بعد 10 ايام ومحجزتش اى فندق بصراحة ومعرفش اى حد هناك وقولت سبها لله ان شاء الله ربنا هيسهلها وكنت ناوى بصراحة ادور على شغل ولوربنا كرمنى ولقيت شغل هحاول اظبط ورق الاقامة بتاعى عشان انا بحب امشى قانونى ولو مالقتش شغل يبقى هرجع وربنا يعوض عليه وجية ميعاد السفر بتاعى وحضرت حاجتى وسلمت على اهلى وروحت للموقف عشان اخد السوبر جيت من اسكندرية للقاهرة ووصلت للمطار القديم وركبت الطيارة وبصراحة اصطدمت فى الطيارة بصراحة زى كأنها مشروع وانها متصممة عشان تأخد اكبر عدد من الركاب ومش مهم راحة الركاب ده السوبر جيت اللى انى واخدة من اسكندرية للقاهرة انطف على الاقل فيه تكييف قولت يالا مش اشكال على قد فلوسى وكلها ساعتين وهيعدوا والحمد لله الطيارة وصلت بالسلامة الساعة 11 فى مطار صبيحة وركبت الباص لاكسراى ب9 ليرةوكنت مرهق جدا فقولت هنزل فى اى فندق حتى لو غالى لحد ما استريح شوية واشوف انا هعمل ايه المهم حجزت 4ايام فى الفندق وقولت انا هتفسح اول يومين وبعد كدة هدور على شغل ورحت اماكن كتيرة وجميلة بصراحة زى االسلطان احمد _السلطان ايوب_ بايزيت _جراند بزار_فاتح_تقسيم وكلهم حلوين اوى المهم عدى اول يومين قولت تالت يوم هدور على شغل وكنت اتعلمت ازاى اسأل عن الشغل بالتركى وقابلنى مواقف غريبة بصراحة زى مثلا سألت واحد كردى بيكلم عربى عن شغل قالى انت مصرى يبقى مش هتلاقى شغل لانى المصريين حالهم واقف هنا قولتلة ليه يعنى قالى لانهم مصريين قولتلة مالهم المصريين احسن ناس وانا بفتخر انى مصرى وكفاية انى احنا عملنا ثورة العالم كله شهد بيها ووقف وسقفلنا وحتى رئيسكم انبهر بينا واحنا اللى علمنا الناس ايه معنى الحضارات وايه معنى الشغل وسبتة ومشيت "
    وكمان قابلت واحد مصرى باين من لهجتة انه من بورسعيد شغال فى محل بيع دلايت سالته عن شغل قالى معرفش طيب مش اشكال متعرفش اى سكن كويس او فندق يكون سعرة كويس عشان انا نازل فى فندق غالى قالى معرفش وقابلنى مقابلة زى الزفت وكان ناقص يطردنى وبعد كدة روحت الفندق قولت بكرة رابع يوم وكان يوم الاحد وان شاء الله هلاقى شغل وقولت يارب بكرة الاقى شغل ونمت وصحيت تانى يوم وقولت المرة ديه هدور فى تقسيم عشان قريت يفت مكتوبة بالعربى قولت ممكن محتاجين حد بيكلم عربى وانجليزى ودورت مالقتش بردة قولت وبعدين بقى ايه العمل
    ارجع وخلاص وكنت مضايق جدا وخصوصا انى كنت جاى وانا كلى امال واحلام و مواعد اهلى انى هبعتلهم فلوس طيب يا ترى الناس هيبوصولى ازاى على انى فاشل طبعا ومعرفتش اعمل حاجة من السفر. قولت مش هيأس وقولت يارب ساعدنى انا هنا ماليش غيرك وفعلا وزى ما يكون ربنا استجاب لداعية قابلت 4 شبان من اسكندرية زى الورد ماشين بيضحكوا وبيهزروا قولتلهم انتوا من مصر قالولى ايوة من اسكندرية وانت منين قولتلهم من اسكندرية زيكم منين من اسكندرية وانتوا منين منها المهم اتعرفنا على بعض وقولتلهم انتوا سياحة ولا شغالين قالولى احنا شغالين هنا قالتلهم طيب متعرفوش اى شغل ليه اصلى انا بدور على شغل ومش لاقى قالولى فى حد يدور على شغل فى تقسيم قالولى استحالة تلاقى شغل فى تقسيم هنا فى كنترول وبلدية 24 ساعة قالولى خد تلفونا وبكرة اتصل بينا الصبح بدرى وتعالالنا فاتح واحنا هنشفلك شغل جنبنا وفعلا صحيت ورحتلهم وشفولى شغل فى مطعم كبير حاجة بسم الله ما شاء الله 3 ادوار كأنة مطعم فرنساوى ودخلت اول يوم شغل الساعة 8.30 ولقيت ناس كتير قاعدين بيفطروا وصاحب المطعم قاعد بيفطر معاهم سالنى انت اسمك ايه ومنين من مصر وبصراحة راجل محترم جدا وقالى كلنا هنا مسلمين وكويسين وكلنا ايد واحدة واسرة واحدة ومفيش حد هنا هيأكل فلوسك وفعلا ناس كويسة وبيعاملونى معاملة كويسة جدا زى كأنى اخوهم الصغير وكل شوية حد يٍسألنى انت كويس اقول الحمد لله يقولوا اى والله ما شاء الله ماشاء الله وانا قعد اضحك عشان الكلمة دى بتفكرنى بمصر وبالنسبة لنطام شغلى الشغل بيبدأ الساعة 8 وبيخلص 5.30 وليك 3 وجبات فى اليوم ويوم الاحد اجازة ومتوسط المرتبات فى المطعم او تركيا عموما من 200 الى 400 ليرة فى الاسبوع وده بيتحدد حسب اللغات اللى معاك وشغلك عامل ازاى وكمان الشغل كام ساعة
    الاقامة فى تركيا
    انت بتاخد ميعاد فى الامنيات وبتكون مجهز 4 صور وكفيل تركى وورقة انك بدلت 1000 دولار من اى مصرف ب20 ليرة وصورة التأشيرة وبتروح الميعاد بتاعك وان شاء الله تأخد الاقامة وانت لوربنا كرمك ولقيت شغل صاحب الشغل هيظبطلك الكفيل وهيساعدك بأذن الله والموضوع كله هيكلف 250 ليرة
    السكن فى تركيا:
    هو السكن فى تركيا صعب شوية بالنسبة لو انت عازب اصحاب الشقق بيخافوا يأجروا للشباب بالذات بس انا الحمد لله لقيت سكن مع ناس مغربة وجزائريين محترمين جدا البيت ب600 ليرة 4 اوض كل واحد فى الشهر حوالى 100 ليرة بالمياة والكهربا بس ممكن تلاقى سكن اوضة وصالة من 200 الى 250 ليرة فى الشهر وممكن تأخد فردين ولو حد عايز فنادق كويسة ورخيصة يروح فاتح اليوم ب15 ليرة لو معاك حد او ممكن 20 ليرة لو لوحدك
    الحياة فى تركيا :
    الحياة فى تركيا عامة رخيصة يعنى مثلا الوجبة ب5 ليرة او 7 ليرة وانا عن نفسى بجيب اكل الشهر كله ب100 ليرة بس المواصلات تعتبر غالية وخاصة التاكسى
    اجمل حاجة فى تركيا:
    1- المساجد هنا جميلة اوى تخش تصلى فيها تحس انك فى مصر تسابيح واذكار بعد كل صلاة وكفاية انى الواحد بيسمع الاذان 5 مرات.
    2-البلد كلها منظمة وكله بيحترم الطوابير جدا وبيحترموا اشارات المرور وانا عمرى ما شفت عسكرى مرور اصلا

    3-البلد كلها بتنام بدرى يعنى الساعة 11ماتلقيش حد صاحى والساعة 7 الصبح تلاقى كله صاحى والاتراك بصراحة بتوع شغل وبيحبوا بلدهم بجد

    احذر فى تركيا:

    1-احذر المشى فى الشوارع الجانبية من شارع الاستقلال فى تقسيم هناك الانحراف جامد اوى وممكن تقع فى الزنا والعياذ بالله

    2-احذر المشاكل والمعاكسات والكلام الفاضى ده لان الشعب التركى غيور جدا وحاول متكلمش مع حد كتير وبالذات الايام ديه عشان من اسبوعين تقريبا واحد ليبى قتل واحد تركى فى اكسراى فحاول تقلل من الكلام يعنى لوحد سألك سؤال رد على قد السؤال متحاولش تفتح كلام كتير

    3-احذر المهربين لليونان والكلام الفاضى ده ونصيحة من اخ لو حد ناوى يهرب لليونان ياريت يفكر كويس وبلاش يعمل الحوار ده وحتى لوالمهرب قالك خلى الفلوس متأمنة مع اى حد تعرفة فى اسطنبول ولما توصل اليونان كلم اللى تعرفة يدينى الفلوس والمشكلة الحقيقية مش فى فلوسك المتأمنة المشكلة الحقيقية فى روحك اللى مش متأمنة وهو اساسا مش هيسيبك غير لما يأخد الفلوس ده عندة استعداد يعمل اى حاجة دى مافيا تجارة البشر فخلى بالك من الحوار ده بالذات لو كنت عايز ربنا يكرمك فى تركيا.....

    انا كدة خلصت موضوعى وربنا يوفق الجميع واى استفسار انا فى الخدمة والسلام عليكم ورحمة الله وبركاتة
    التعديل الأخير تم بواسطة ,KING; 21-12-2011، الساعة 01:33 AM

  2. #2
    تاريخ التسجيل
    Jan 2011
    المشاركات
    9
    ربنا يوفقك فى الحياة فى تركيا زبط امورك فى تركيا وحاول تتطلع الى اوربا وتحياتى لك

  3. #3
    تاريخ التسجيل
    Aug 2011
    المشاركات
    41
    شكرا على المعلومات القيمه دى بايت من كلامك انك انسان محترم طيب متساعد اخوك وتشوفلى شغلانه معاك فى المطعم ده يبقا عملت فيه جميله عمرى محنسهالك

  4. #4
    الصورة الرمزية essam_010
    تاريخ التسجيل
    Sep 2009
    المشاركات
    374
    ربنا يوفقك أنت انسان طيب و تستاهل كل خير
    جزاكم الله على الموضوع الرائع

    One Team .... One Dream
    ITI .... I Will Be There isa

  5. #5
    الصورة الرمزية MR D I A A
    تاريخ التسجيل
    Jul 2007
    المشاركات
    3,197



    بالتوفيق ان شاء الله وربنا معاك فى الغربة يا مصطفى باشاا

  6. #6
    الصورة الرمزية punisherbb
    تاريخ التسجيل
    Feb 2009
    المشاركات
    296
    بسم الله الرحمن الرحيم
    أولا:تسمحلى أديلك لقب (أخويا) يا disha elsegawy
    ثانيا:انا طول عمرى ضد فكره العمل خارج مصر بل انى من المتشددين فى الموضوع ده.لإنى ديما واخد مبدأ:بلدك أولى بيك
    ثالثا:و ده الأهم:انا بجد فخور بيك و فرحان جدا و بصراحه محترمك جدا بالنسبه للجانب الأخلاقى و السلوكى إلى انت ماشى بيه فى بلاد الغربه....و حاسس انك مع مر الايام ان شاء الله حترفع راس المصريين عاليا فى تركيا ده بسبب احترامك لنفسك و للناس و البلد الى انت فيها و اخلاقك.....
    رابعا:انت بإذن الله حتكون امتداد ليا فى تركيا عشان انا لما سافرت من 3 شهور سياحه و كنت ساكن فى سلطان احمد...كنت الحمد لله محترم نفسى و سلوكى كويس جدا فى الكلام مع الكل لدرجه انى اخر يوم ليا موظفين الفندق اخدونى بالحضن و ودعونى جامد و قالولى بالحرف الواحد........masry good
    و قالولى كمان:good bye brother
    اسف عشان طولت عليك و بإذن الله نسمع اخبار جديده عنك حلوه
    يا أيــها الملك الـذي لمـــعالم الصلبــان نـــكّس
    جـــاءت إليك ظلامةٌ تسعى من البيت المقدس
    كل المساجد طُهِّرت وأنا علــى شـرفي مُنجَّس

  7. #7
    تاريخ التسجيل
    Jul 2011
    المشاركات
    101
    اقتباس المشاركة الأصلية كتبت بواسطة سليم الفلسطينى مشاهدة المشاركة
    ربنا يوفقك فى الحياة فى تركيا زبط امورك فى تركيا وحاول تتطلع الى اوربا وتحياتى لك
    وربنا يوفقك انت كمان ويسهلك امورك .....والله ان شاء الله هطلع على اوربا بس اجمع مبلغ كويس عشان اعرف اسافر بية يا مسهل الحال ...متشكر على النصيحة وربنا يجزيك خير

  8. #8
    تاريخ التسجيل
    Jul 2011
    المشاركات
    101
    اقتباس المشاركة الأصلية كتبت بواسطة ahmed medo 222 مشاهدة المشاركة
    شكرا على المعلومات القيمه دى بايت من كلامك انك انسان محترم طيب متساعد اخوك وتشوفلى شغلانه معاك فى المطعم ده يبقا عملت فيه جميله عمرى محنسهالك
    لا شكر على واجب ده واجبى تجاه اخواتى ...انتوا ساعدونى كتير ودلوقتى جيه وقت رد الجميل

  9. #9
    تاريخ التسجيل
    Jul 2011
    المشاركات
    101
    اقتباس المشاركة الأصلية كتبت بواسطة essam_010 مشاهدة المشاركة
    ربنا يوفقك أنت انسان طيب و تستاهل كل خير
    جزاكم الله على الموضوع الرائع
    جزاءك الله كل خير ومتشكر على ردك

  10. #10
    تاريخ التسجيل
    Jul 2011
    المشاركات
    101
    [QUOTE=diaa4free;1084753375]بالتوفيق ان شاء الله وربنا معاك فى الغربة يا مصطفى باشاا[/QUOTE
    امين يارب العالمين...متشكر على ردك الجميل وجزاءك الله كل خير

  11. #11
    تاريخ التسجيل
    Jul 2011
    المشاركات
    101
    اقتباس المشاركة الأصلية كتبت بواسطة punisherbb مشاهدة المشاركة
    بسم الله الرحمن الرحيم
    أولا:تسمحلى أديلك لقب (أخويا) يا disha elsegawy
    ثانيا:انا طول عمرى ضد فكره العمل خارج مصر بل انى من المتشددين فى الموضوع ده.لإنى ديما واخد مبدأ:بلدك أولى بيك
    ثالثا:و ده الأهم:انا بجد فخور بيك و فرحان جدا و بصراحه محترمك جدا بالنسبه للجانب الأخلاقى و السلوكى إلى انت ماشى بيه فى بلاد الغربه....و حاسس انك مع مر الايام ان شاء الله حترفع راس المصريين عاليا فى تركيا ده بسبب احترامك لنفسك و للناس و البلد الى انت فيها و اخلاقك.....
    رابعا:انت بإذن الله حتكون امتداد ليا فى تركيا<img alt="" title="Yes" border="0"> عشان انا لما سافرت من 3 شهور سياحه و كنت ساكن فى سلطان احمد...كنت الحمد لله محترم نفسى و سلوكى كويس جدا فى الكلام مع الكل لدرجه انى اخر يوم ليا موظفين الفندق اخدونى بالحضن و ودعونى جامد و قالولى بالحرف الواحد........masry good<img alt="" title="Great" border="0">
    و قالولى كمان:good bye brother
    اسف عشان طولت عليك و بإذن الله نسمع اخبار جديده عنك حلوه
    انا اتشرف انك تكون اخ ليه لانك انسان محترم وبتساعد الناس لوجه الله تعالى::::وانا معاك انى بلدك اولى بيك بس للاسف مالقتش فرصة تانية والظروف بتحكم والحمد لله على اى حال وان شاء الله مصر فى الفترة الجاية هتبقى احسن ومحدش هيحتاج يسافر برة ::::: وانت كلامك صح 100%واحسن حاجة لما الواحد فى بلاد الغربة يمشى عدل ودوغرى ويحترم سلوكة ومعاملتة مع الناس عشان اى حاجة بيعملها بتعكس صورة بلده فى الخارج وبجد هنا الناس بيحبوا المصريين اوى الحمد لله ....وربنا يجزيك خير على ردك ويوفقك فى حياتك

  12. #12
    الصورة الرمزية mido750
    تاريخ التسجيل
    Sep 2009
    المشاركات
    628

  13. #13
    تاريخ التسجيل
    Jul 2011
    المشاركات
    101
    اقتباس المشاركة الأصلية كتبت بواسطة mido750 مشاهدة المشاركة
    ربنا يوفقك ان شاء الله
    ولكل مجتهد نصيب
    الله يخليك وربنا يوفقك

  14. #14
    الصورة الرمزية nasrhelal
    تاريخ التسجيل
    Jun 2010
    المشاركات
    143

    السلام عليكم

    ربنا ان شاء الله يوفقك ويكرمك.. ان شاء الله انا مسافر تركيا في يناير الجاي ... يا ريت تدلني علي فنادق رخيصة هناك وشكرا


  15. #15
    تاريخ التسجيل
    Jul 2011
    المشاركات
    101
    [QUOTE=nasrhelal;1084767105]ربنا ان شاء الله يوفقك ويكرمك.. ان شاء الله انا مسافر تركيا في يناير الجاي ... يا ريت تدلني علي فنادق رخيصة هناك وشكرا[/Q
    فى فنادق رخيصة وكويسة فى فاتح زى مثلا فندق اسمه(بيكال) اليوم ب20 ليرة لو لوحدك ولو معاك حد يبقى اليوم ب15 ليرة وفى فندق تانى اسمة (azmir) نفس السعر تقريبا .وفى فندق كويس فى تقسيم اسمة (weng) اليوم ب 20 ليرة انت شوف المناسب ليك واللى هيكون اقرب للبرنامج بتاعك وبالتوفيق ان شاء الله وتكون رحلة سعيدة

موضوع مغلق
صفحة 1 من 48 1 2 3 11 ... الأخيرةالأخيرة

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك