موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



+ الرد على الموضوع
صفحة 1 من 28 1 2 3 11 ... الأخيرةالأخيرة
النتائج 1 إلى 15 من 416
Like Tree0Likes

الموضوع: @@ طرق صيد الاسماك في الاسكندرية @@

  1. #1
    الصورة الرمزية شراغيش
    تاريخ التسجيل
    Sep 2008
    المشاركات
    217

    @@ طرق صيد الاسماك في الاسكندرية @@

    بسم الله الرحمن الرحيم
    السلام عليكم ورحمة الله وبركاته

    اخواني الافاضل
    دي اول مشاركة لي في المنتدى
    وقسم صيد الاسماك هو اللي خلاني اسجل فيه
    احب اعرفكم بنفسي الاول
    الاسم: مصطفى
    السن: 34 سنة
    الهواية: الصيييييييييييييييد
    انا اسكندراني حتى النخاع بس مقيم حاليا في الكويت
    اكل العيش بقى هههههههههه
    اتعلمت الصيد من والدي ربنا يديلة الصحة ويطول عمرة
    اول مرة امسك فيها بوصة واصطاد وانا عندي 6 سنين
    واول مرة انزل اصطاد لوحدي وانا عندي 8 سنين كنت بنزل على بلوكات سيدي جابر قبل ما يوسعوا الكورنيش
    ولغاية وقتنا هذا مبطلتش صيد
    ولا عمري حبطل ان شاء الله
    المهم
    المقصود من الكلام الطويل ده كله
    اني عايز بعد اذنكم طبعا
    اني اشارك بخبرتي المتواضعة معاكم
    كل يوم ان شاء الله حنتكلم عن نوع سمكة من الموجودين في البحر (اسكندرية طبعا)
    ونقول ازاي نصطادها وايه الطعم بتاعها ولو بالليل نعمل ايه ولو بالنهار نعمل ايه
    ولو اي حد عنده استفسار عن اي نوع سمك انا مش حتأخر لو اعرف
    ولو حد عايز يضيف عليا او يعدل اهلا وسهلا
    انا عايز افيد واستفيد من الكل

    انا فكرت ابتدي باي نوع
    تبتدي بايه يا درش
    تبتدي بايه يا دروش
    تبتدي بايه يابو دريش (زي ما اخوانا السوريين بيقولولي)
    لقيت ان افضل حاجه نبتدي بيها هي
    البطاطا
    توكلنا على الله
    كله يجهز العدة بتاعته وياللا بينا

    سمكة البطاطا

    مش عارف ليه سموها بطاطا بس في الخليج اسمها الصافي
    وهي من اسماك البحر الاحمر والخليج
    وعبرت للبحر المتوسط من قناة السويس
    زمان على ما اتذكر ان الموسم بتاع البطاطا كان اول يوليو لغاية اخر اغسطس بس
    بس دلوقتي موجوده طول السنة
    موسم التفريخ بيكون في بداية ابريل
    وهي سمكة نهارية يعني مش موجوده بالليل
    الطعم المفضل
    اولا العجين
    سواء عجينة عيش او دقيق
    المهم انها تكون عجينة ناشفة

    ثانيا الجمبري (البرغوت)
    انا ليا طريقة خاصة مع البطاطا
    اني ازفر بعيش واصطاد ببرغوت
    وازفر معناها اني ابل العيش لغاية ما يبقى مفرول وابتدي ارمية في المية على شكل كورة
    ثالثا الخضرة الشعر
    بس من ساعة ما حصلت التوسيعات في الكورنيش قلت جدا الخضرة على البلوكات علشان كده مبقاش حد بيستخدمها كتير
    من حوالي 15 سنة كده كانت الخضرة اولا

    نيجي دلوقتي مع طريقة الصيد
    صيد البطاطا بيكون بالبوصة اليد مش الماكينة
    مع العلم ان فيه ناس اصطادتها بالماكينة بس صدفة

    فيه كذا طريقة لصيد البطاطا بالبوصة
    اولا
    بالفلة او الغماز او العوامة
    الشعر او الخيط الاساسي يكون نمرة 25
    والفروع نمرة 20 او 18
    بس نمرة 18 مش بيستخدمة الا الخبير لانة ضعيف
    ومعروف عن البطاطا انها سمكة قوية وخصوصا الاحجام الكبيرة

    السلاح او السنارة نوعين
    اما السنارة العادية وتكون نمرة 20 او 22 او 24
    ونمرة 24 تسمى رجل الدبانة وتخيلوا حجمها

    او الشلاليط وهي سلاح من 3 سنانير ملحومين في بعض زي الهلب
    المهم
    الفروع تكون قصيرة يعني بالكتير 20 سم

    الفلة صغيرة والرصاص او التقل خفيف

    العيار (ارتفاع الفلة عن الرصاص ) يكون حوالي ثلثين ارتفاع المية عن الارض
    مع الوقت وخبرتك في المكان حتعرف المية عمقها قد ايه

    حط العجينة وارمي
    اول ما الفلة تغمز نص غمزة الطشها وادعيلي

    ثانيا
    الصيد من غير فلة (حساس)
    وهو نوعين
    طريقة اسمها الربع او المشنقة
    وهي طريقة مش كل الناس بتقبل عليها لانها متعبة شوية

    الشعر زي ما اتفقنا 25
    طول الشعر حوالي ثلثين عمق المية
    يعني لو بترمي على قرار 3 متر يكون طول الشعر 2 متر
    ويفضل استخدام بوصة قصيرة نوعا يعني 4 او 5 متر

    السلاح مكون من 6 او 7 سنانير
    كلهم نفس الطول اللي هو حوالي 5 سم تحت الرصاصة
    ما عدا 2 منهم بيكون طولهم 10 سم
    حجم السنانير يكون كبير مثلا نمرة 16 او 14
    الرصاص شريط وثقيل يعني لف ثلاث او اربع لفات كده
    حط العجينة على الرصاصة ونزلها المية حتلاقي الوحوش بتشدك
    الطريقة دي بنستخدمها للبوري برضة

    الطريقة الثانية في الحساس هي السبحة
    وسموها السبحة لان عدد السنانير بيكون كتير وفوق بعض زي شكل السبحة
    ودي بيكون فيها طول الشعر زي طول البوصة
    نحط رصاصة بلحة نمرة 1 في اخر الشعر من تحت
    وفوق الرصاصة نربط من 7 ل 12 سنارة
    الفروع طولها حوالي 10 سم
    حط عجينة او جمبري ونزلها المية
    حتلاقي وحوش تانية بتشدك برضه

    دلوقتي نيجي لافضل اماكن تلاقي فيها البطاطا
    حتلاقيها في البحر في اي مكان
    بس فيه اماكن مشهورة بالاحجام الكبيرة
    السلسلة
    لسان الجامعة
    كليوباترا
    سيدي جابر
    لسان جليم الثاني
    سان ستيفانو
    امام المحروسة
    المنتزة
    ملحوظة هامة:
    احذروا اشواكها لانها بتسبب الم رهييييييييييييب
    ارجو اني اكون وصلتلكم المعلومة بشكل واضح
    وارجو اني مكونش طولت عليكم ولا اكون نسيت حاجه
    اللي عنده اي تعديل ياريت يعدل عليا علشان كلنا نستفيد
    من بكرة ان شاء الله حنتكلم عن السمكة اللي انتو عايزنها
    بمعنى ان اللي عايزنا نتكلم عن سمكة معينة يا ريت يقول
    وانا تحت امرة
    سلام مؤقت
    التعديل الأخير تم بواسطة شراغيش; 25-09-2008، الساعة 03:59 AM

  2. #2
    الصورة الرمزية Amie007
    تاريخ التسجيل
    Sep 2007
    المشاركات
    197
    شكرا جدا ليك


    JuSt SaY Amie007 Is The BeSt
    موقعى الخاص : www.Amie-cafe.piczo.com

  3. #3
    الصورة الرمزية محمد مطرود
    تاريخ التسجيل
    Jun 2007
    المشاركات
    1,623
    اولا بشكرك علي المشاركه .. و ثانيا بحييك جدا و شكلنا كده هنستفيد منك كتييير
    ارجوا انك تكمل الموضوع لأن واضح انك خبره و علي فكره انا شكلي هحب الصيد


    Mohammad matroD
    Ornamental Fish Keeping

  4. #4
    الصورة الرمزية شراغيش
    تاريخ التسجيل
    Sep 2008
    المشاركات
    217
    بسم الله الرحمن الرحيم
    احب اشكر كل واحد رد على الموضوع
    واشكر كل اللي مروا وما ردوش
    المهم ان يكون فيه استفادة

    وطالما ان مفيش حد طلب مني نوع سمك معين نتكلم عنه
    يبقى انا اللي حختار
    وحنتكلم النهاردة عن سمكة انا عن نفسي بعشقها
    وهي
    الشراغيش والتيس


    الشرغوش وهو صغير بنسمية جنشور وهو اللي بيبقى لغاية حجم الكف كده
    بعد كده بيبقى شرغوش
    والتيس شبة الشرغوش بس لونة بيج ومخطط بني
    وسموه تيس لانه اول ما يطلع من الماية مش بيتحرك بيتيس يعني
    وغير كده انه سمكة غبية جدا وقوية جدا ولما تيجي تطلعة مش بيتحرك من مكانه لغاية لما نفسه يتقطع ويبتدي يطلع بس بيكون عدمك العافية
    ياللا بينا نبتدي على بركة الله

    موسم الشراغيش
    موجوده طول السنة
    ولكن
    طول الصيف بتكون قليلة جدا
    موسم التفريخ بيبتدي شهر سبتمبر
    واحلى شراغيش تصطادها من نص اكتوبر لغاية شهر فبراير
    موسم طويل مش كده

    حنحضر معانا النهارده البوصة اليد والبوصة بالماكينة
    لان الشراغيش ممكن تصطادها كده او كده
    وممكن تصطادها بالنهار او بالليل
    لو بالنهار بيكون لغاية اول ما الشمس تضرب في الماية
    لان الشراغيش بتحب الماية الباردة
    اول ما الماية تسخن تهرب للاماكن العميقة
    ولو باليل يبقى عندك من المغرب للصبح
    براحتك يعني

    احب اقولكم الاول اماكن تواجد الشراغيش
    الشراغيش بتحب الوعر (الصخور)
    بتعيش حول الوعر وبتهرب داخله
    وسمكة الشراغيش بتعيش في مجموعات
    يعني لو اخدت منها واحده ان شاء الله ربنا حيكرمك بغيرها


    نبتدي دلوقتي بطرق الصيد

    صيد الشراغيش بالبوصة اليد

    الشعر الاساسي 25 او 30
    وانا بنصح المبتدئين بالشعر ال30
    والفروع 25

    فيه بعض المتخصصين في صيد الشراغيش بيستعملوا شعر 25 اساسي
    والفروع 18
    وبيسحبوا بيه شراغيش تعدي الكيلو ونص
    احتراف بقى

    الصيد يكون بالفلة وتكون من الحجم الوسط
    الرصاصة تكون اكتر من ميزان الفلة بحاجة بسيطة
    بمعنى
    ميزان الفلة بيكون مخلي الجزء الفاصل للفلة هو سطح الماية (نصها فوق ونصها تحت الماية)
    احنا نخلي الجزء اللي تحت الماية اكتر شوية يعني الثلث فوق والثلثين تحت
    ودي نقدر نظبطها بتقل الرصاصة
    حد يسالني ليه نعمل كده؟؟؟
    اقولكم انا
    لان الشراغيش من الاسماك اللي بتاكل الطعم وتجرة
    علشان كده احنا مش عايزنها تحس بمقاومة الفلة ليها وتاكل براحتها
    احنا بنحب نريح الزبون

    نيجي دلوقتي للفروع
    السنانير تكون نمرة 8 او 7
    ولو عارف ان فيه احجام كبيرة تستخدم نمرة 5 او 6
    طول قرمة الفروع واحده متر ونص والتانية متر وربع
    يااااااااااه كل ده
    ايوه لان ده بسببين
    الاول ان الشراغيش زي ما اتفقنا بتاكل وهي جنب الوعر
    يبقى احنا عايزين الطعم يكون عايم فوق الوعر

    الثاني ان الشراغيش بتاكل وتجري
    يبقى احنا عايزينها تاكل براحتها

    العيار يكون تقريبا قد عمق الماية
    بمعنى انك تخلي السنارة الطويلة يا دوب تحف في القرار

    لما ترمي والسمكة تاكل معاك
    مش اول ما الفلة تغمز تشد انت
    لا
    سيبها لانك بعد كده مش حتشوف الفلة اساسا
    ساعتها شدها وانت مطمن
    باذن الله بتاعتك
    وتخلي بالك لان الشراغيش الكبيرة ليها حركات مفاجئة
    بمعنى انها تكون واخداك يمين وانت معاها
    مرة واحدة تضرب شمال
    لو انت مش صاحي ليها تقطع على طول

    نيجي دلوقتي للطريقة الثانية
    وهي
    البوصة بالماكينة

    الشعر الاساسي او شعر الماكينة يكون نمرة 40
    الرصاصة زي انت بتفضل او زي ما بتوزن معاك البوصة
    الفروع شعر 30 او 35
    انا عن نفسي افضل ال35 لانة بيستحمل شوية لو السمكة دخلت الوعر
    السنار 4 او 5 بكرش
    الفروع يكونو فرعين واحد فوق الرصاصة وواحد تحتها
    او الاتنين تحت الرصاصة
    ترمي وما تلمش البوش يعني ما تخليش الشعر مشدود
    وده لانك بترمي على وعر لو الرصاصة اتحركت حتدخل الوعر
    لما السمكة تاكل معاك
    سيبها تضرب اول ضربة
    وفي التانية رد عليها وبقوة علشان لو سيبتها وحست بالسنارة حتدخل منك الوعر
    وان شاء الله السمكة بتاعتك لان الشراغيش نفسها قصير
    مش بتقدر تقاوم مده طويلة
    صيدها بالماكينة بيكون اسهل من البوصة اليد
    دلوقتي بقى نتكلم عن

    انواع الطعم للشرغوش

    الجمبري النطاط
    الجمبري البرغوت
    دود البحر
    الدود الاسمعلاوي
    الجرايات (نوع من الكابوريا الصغيرة)

    اشهر اماكن صيد الشراغيش في الاسكندرية

    ميناء الاسكندرية
    ميناء الدخيلة
    الميناء الشرقي
    حاجز امواج القاعدة البحرية براس التين
    السلسلة
    الشاطبي
    لسان الجامعة
    كامب شيزار
    كليوباترا
    لسان جليم (الاول والثاني)
    سان ستيفانو
    لوران
    المنتزة
    ميناء ابو قير

    ارجو اني اكون وفيت سمكة الشراغيش حقها
    لاني بحب صيد السمكة دي فعلا
    اراكم مع سمكة تانية ان شاء الله

    التعديل الأخير تم بواسطة شراغيش; 26-09-2008، الساعة 04:43 AM

  5. #5
    تاريخ التسجيل
    May 2007
    المشاركات
    144
    موضوع جميل جدا ومميز والف شكر على التوبيك الجميل دة

  6. #6
    الصورة الرمزية otacon323
    تاريخ التسجيل
    Sep 2006
    المشاركات
    646
    ya basha eih el kalam el gamil dah we el shar7 el wafi dah

  7. #7
    الصورة الرمزية شراغيش
    تاريخ التسجيل
    Sep 2008
    المشاركات
    217
    اقتباس المشاركة الأصلية كتبت بواسطة otacon323 مشاهدة المشاركة
    ya basha eih el kalam el gamil dah we el shar7 el wafi dah
    السلام عليكم
    من بعض ما عندكم يا باشا
    بس مش عارف ليه الناس مش عايزة تشارك معانا
    المهم ان الناس كلها تستفيد
    ولسة مستني ان حد يقولي عن سمكة معينة يكون عايزها
    شكرا يا باشا على مشاركتك
    وانتظروا الباقي ان شاء الله

  8. #8
    تاريخ التسجيل
    Jan 2005
    المشاركات
    474
    مشكورررررررررررررررررررررررر

  9. #9
    تاريخ التسجيل
    Dec 2005
    المشاركات
    179
    موضوع جميل جدا ومميز و ياريت تكمله وتقولنا باقى أنواع السمك
    إذا ضاقت بك الدنيا واشتدت عليك الهموم فلا تقل يارب عندي هم كبير بل قل يا هم عندي رب كبير

  10. #10
    الصورة الرمزية شراغيش
    تاريخ التسجيل
    Sep 2008
    المشاركات
    217
    بسم الله الرحمن الرحيم
    اخباركم ايه يا صيادين
    الحمد لله ان كله تمام
    فكرت كتير نتكلم عن ايه النهارده
    وتوصلت لايه ؟؟؟؟؟
    بما ان موسم الدنيس على الابواب
    يبقى نتكلم عنه ونحضرله
    مش كده ولا ايه؟؟؟؟؟
    توكلنا على الله

    سمك الدنيس

    موسم الدنيس من نص اكتوبر تقريبا لاخر فبراير
    ولكن
    وقت الدنيس الصح ديسمبر ويناير
    تاخد منه الكيلوات
    الدنيس الصغير يسمى فلّيجس
    والكبير دنيس
    وفيه نوع بنسمية الملك
    وده بيكون فيه لطشة صفرا على خيشومه
    وده بقى ربنا يكرمكم وتشدوا منه
    تستمتعوا بيه

    اماكن تواجد الدنيس
    الدنيس بيحب الوعر وبيعيش حواليه في مجموعات
    وبيحب برضه الارض الخشنة
    يعني لو المكان اللي بترمي فيه مفيش فيه وعر
    ورملته خشنة (حصى) حتلاقي الدنيس موجود
    وزي ما قلنا انه بيعيش في مجموعات
    ودايما بيتحرك في المنطقة في شكل دواير علشان يدور على الاكل
    ولو اخدت منه واحده وغاب عليك بعد كده متقلقش حيلف ويجيلك تاني ان شاء الله

    طرق صيده
    1- بالبوصة الماكينة

    الشعر الاساسي 40
    الفروع 35 او 30
    انا عن نفسي بعمل الشعر الاساسي 40 على فروع 40 برضه

    السلاح
    لو فيه فليجس في الماية يبقى السلاح نمرة 5 او 4 او 3 بالكتير
    ويفضل بكرش
    ولو بترمي على تقايل يبقى السلاح نمرة 01 او 02 او 03

    بنعمل سلاح واحد بس تحت الرصاصة ويكون متوسط الطول
    توكل على الله وارمي
    لم البوش شوية بس متخليش الشعر مشدود
    حيضربك الاولى سيبه ولا كأنك تعرفه
    التانية انتبهله
    التالته مترحمهوش رد فيه بقلب جامد
    ولما ترد وقف ايدك شوية لغاية ما يبتدي يعافر وبعدين لمه
    حد يسألني ليه؟؟
    اقولك
    لان الدنيس من السمك العفي جدا
    لما بترد فيه بيقف مكانه شوية
    لو ايدك رخت او حس ببوش في الشعر حيديلك ضهره ويجري
    وفي الحالة دي يبقى السمكة راحت لو مش بالعة
    مع الدنيس التقيل اللي بيعدي الكيلو ونص والاتنين كيلو
    لما بنرد فيه وميرضاش يتحرك
    بنريح ايدينا بالبوصة سنة صغيرة علشان يحس بالراحة ويبتدي يتحرك
    وبعدها نبتدي نتعامل معاه

    ساعات الدنيس بياكل بخباثة
    ازاي؟؟؟
    تلاقيه الشعر بيبوش لوحده من غير ضرب ولا حاجه
    في الحالة دي تلم البوش بحذر
    لانه لو حس بالسلاح حيجري العكس ويقطع
    وزي ما قلتلكم ان الدنيس سمكة عفية جدا
    كفاية اني اقول انه بيكسر الجلاجولة بسنانة
    معلش حخرج شوية عن الموضوع واقولكم ايه اللي كان بيحصل معانا مع الدنيس
    كنا بنرمي بتكنيات ( كابوريا لونها اسود بنطلعها من بين البلوكات) وفيه ناس بتقول عليها العفاريت
    المهم
    كان يضرب علينا ياخد الطعم ويجري
    لغاية لما واحد بيصطاد معايا ربنا يمسية بكل خير اسمة عم منير
    حط القراص بتاع الكايوريا وقال اهو حاجه تستحمل شوية
    ويادوب الرصاصة نزلت من هنا ولقينا زلزال في البوصة
    الحق يا عم حاسب يا منير وهو طبعا صياد من الصيادين التقال
    حوالي نص ساعة بيعافر مع السمكة لغاية ما وصلت تحتنا
    بس طبعا علشان ارتفاع البوكات ميقدرش يرفعها
    المهم نزلت لقفتها
    بسم الله ما شاء الله
    دنيسة ملكة طولها نص طولي
    عرفت بعد كده انها 3 كيلو ونص
    وبعد كده ابتدينا نرميله يالقراص واخدنا صيده يومها اصغر سمكة كيلو الا ربع

    المهم نرجع للموضوع

    نيجي دلوقتي للطريقة الثانية

    2- البوصة العادية
    وفيها طريقتين
    الحساس
    وهو نفس الصيد بالماكينة بس بالبوصة العادية

    الصيد بالفلة

    وده لازم يكون على قرار عالي
    لان الدنيس دايما ماسك الارض

    وبتعمل الشعر الاساسي 35
    والفروع 30
    السلاح لا يقل عن نمرة 6

    والفروع بتعمل فرع متر وربع والتاني متر

    وطبعا الصيد بالليل
    ويفضل والبحر هادي او مريح
    لان الدنيس بيسرح والبحر هادي
    ركب الفلة الفوسفور وتوكل على الله وارمي
    بس لو حسيت ان السمكة تقيلة عليك ومش عارف تتعامل معاها
    متعافرش معاها ولو قطعت متزعلش
    ملكش نصيب فيها
    وفكر دايما ان بوصتك لو اتكسرت مش حتعرف تعوضها
    لكن السمكة لو راحت فيه غيرها كتير

    نيجي دلوقتي للطعم

    الجرايات
    تكني- جرايات خضرا - خلخل
    مع ان الدنيس دلوقتي مش بياكل غير التكني ومش بيضرب على الجرايات الخضرا الا في الغرب وابوقير
    والخلخل بقى انقرض لان مبقاش فيه رملة على الشط وهو جحرة كان بيبقى حفرة في الرملة
    فين ايام الخلخل كنا بنقول لو رميت بخلخل في بانيو حتاخد بيه دنيس وقاروس

    السردين والسردينيلا
    السردينيلا هو السردين الروسي بيبقى مجمد ومش بلاقيه الا عند واحده اسمها ام احمد في سوق باب عمر باشا

    الدود
    اسمعلاوي – قراص – دود بحر
    بس القراص ودود البحر بيلم عليك السمك الرفيع

    الجلاجولة
    اسمعلاوي – بلدي – بشبش
    واللي مش عارف الجلاجولة هي نوع من القواقع البحرية ليها صدفة قوية جدا وبتكون مليانة لحم من جوة احنا بقى بنصطاد باللحم اللي جوة ومتنساش تاخد معاك شاكوش علشان تكسرها
    والبشبش هو ذكر الجلاجولة


    الجمبري
    نطاط – عقر – بلنص – شطنارة – برغوت
    البرغوت للبوصة اليد لانه مش بيستحمل الماكينة

    دلوقتي اقولكم كل طعم بنستخدمة امتى
    الشتاء (موسم الدنيس)
    الجرايات – الجلاجولة – السردينيلا
    الصيف
    الدنيس بيكون موجود بس صغير (فليجس)
    الدود – الجمبري
    بمعنى
    في الصيف طعم طري وفي الشتاء طعم ناشف

    اماكن تواجد الدنيس في الاسكندرية
    اشهر اماكن تصطاد منها الدنيس

    ميناء الاسكندرية
    ميناء الدخيلة
    السلسلة (الازريطة امام الملاهي)
    الشاطبي ( بس خلي بالك من الوعر لانة جامد)
    كامب شيزار
    سبورتينج
    كليوباترا
    سيدي جابر
    كوبري ستانلي (فيه فليجس كتير)
    لسان جليم التاني
    سانستيفانو امام سوميد
    العصافرة
    المنتزة
    ميناء ابو قير

    وبكده نكون خلصنا الدنيس
    ارجو اني اكون وصلت المعلومة كويس
    والى اللقاء مع سمكة تانية ان شاء الله
    سلام
    التعديل الأخير تم بواسطة شراغيش; 28-09-2008، الساعة 04:28 AM

  11. #11
    تاريخ التسجيل
    Dec 2005
    المشاركات
    101
    السلام عليكم
    موضوع اكثر من رائع يا أستاذ شراغيش و مفيد جدا و منتظرين المزيد.

  12. #12
    الصورة الرمزية Amie007
    تاريخ التسجيل
    Sep 2007
    المشاركات
    197
    طب نفسى أعرف الكابوريا و الجمبرى و طرقة صيدهم فى الأسكندرية

  13. #13
    الصورة الرمزية شراغيش
    تاريخ التسجيل
    Sep 2008
    المشاركات
    217
    اقتباس المشاركة الأصلية كتبت بواسطة Amie007 مشاهدة المشاركة
    طب نفسى أعرف الكابوريا و الجمبرى و طرقة صيدهم فى الأسكندرية

    السلام عليكم
    معلش انا اتاخرت عليكم شوية بس شوية مشاغل
    بس ان شاء الله بحضر للسمكة الجاية
    وبالنسبة لسؤالك اخي العزيز
    لو انت تقصد الجمبري والكابوريا اللي بتتاكل
    فدي ليها شباك صيد خاصة وبتكون من عرض البحر
    بس الكابوريا ساعات بتطلع عادي معاك في البوصة بس مش كتير طبعا

    اما لو كنت بتسأل عن الجمبري والكابوريا للصيد
    (الجمبري النطاط والجرايات)
    فدي بقى ممكن تلقفها من بين البلوكات على البحر
    وبتعملها ملقاف مخصوص
    عبارة عن عصاية طويلة وفي اخرها حلقة خرزان
    وبيتركب في الحلقة دي شبكة تكون ضيقة
    وبتنزل بالليل ومعاك كشاف (بطارية)
    بتضرب الكشاف في المية بين البلوكات
    الجمبري بتلاقي عنيه منورة
    تنزل الملقاف بالراحة وتلقف الجمبري
    اما بالنسبة للجرايات فبتلاقيها على جنب البلوك مش في المية
    اول ما تشوفها تنزل الملقاف بالراحة وتخليه تحتها
    وترفع ايدك بالملقاف من غير ما تبعدة عن البلوك
    لانك لو ايدك بعدت الجراية حتقع في المية مش في الملقاف
    الموضوع سهل جدا بس عايز ممارسة
    يعني متزعلش لو نزلت تلقف وماجيبتش حاجه
    في المرة التانية حتجيب
    وبعد كده حتلقف ليك ولاصحابك
    بس متنساش تلبس حزاء كاوتش علشان متتزحلقش
    اتمنى اني اكون جاوبتك
    ولو عايز اي استفسار تاني انا تحت امرك
    سلام
    التعديل الأخير تم بواسطة شراغيش; 03-10-2008، الساعة 01:22 AM

  14. #14
    الصورة الرمزية ashour.hesham
    تاريخ التسجيل
    Feb 2006
    المشاركات
    1,752
    الف شكر بس انا ليا استفسار انا اول مرة ونفسى اصطاد بس انا مش معايا صنارة ياريت تقولى اداوت الصيد الصنارة بكام تكون اتعلم عليها واجيب الدود من فين يعنى ابد من الاول والف شكر ليك

    اشهر الالعاب الاونلاين:

    طريقك لمعرفةBitefight


    طريقك لمعرفة حرب الملوك



    طريقك لمعرفة Gladiatus




    التوقيع مخالف لقوانين المنتدى الرياضى

    اداره المنتدى

  15. #15
    الصورة الرمزية شراغيش
    تاريخ التسجيل
    Sep 2008
    المشاركات
    217
    بسم الله الرحمن الرحيم

    اخباركم ايه يا صيادين
    الحمد لله؟؟؟
    كل عام وانتم بخير بمناسبة عيد الفطر المبارك


    ياللا بينا نكمل المشوار مع انواع الاسماك
    وطرق صيدها

    ايه رايكم النهارده نتكلم عن
    برنس الاسماك
    السمكة اللي كل الصيادين بيسعوا وراها

    القاروس

    قبل ما نبتدي احب اقولكم حاجه مهمة
    القاروس ليه طرق كتيرة جدا لصيدها ولكن انا مش عارفها كلها
    او بمعنى اصح مش متمرس فيها
    علشان كده انا حتكلم عن اللي انا متمرس فيه واستخدمته
    ياللا بينا نبتدي على بركة الله

    اولا لازم نعرف شوية معلومات عن سمكة القاروس

    سمكة القاروس من الاسماك اكلة الاسماك مش معنى كده انها بتاكل سمك بس
    ولكن بتحب الاسماك

    ولازم نعرف معلومة مهمة جدا ان القاروس ممكن يضرب على طعمك حتى لو انت مش بترمي عليه مخصوص
    وده كتير بيحصل

    مواسم القاروس

    القاروس ليه موسمين

    الاول : من اول يوليو حتى نهاية سبتمبر (بيكون ضعيف واحجامه صغيرة )
    الثاني: من اواخر اكتوبر لاواخر يناير

    طرق صيد القاروس

    البوصة اليد

    بصراحة انا شخصيا القاروس ضرب عليا على البوصة اليد وبالبرغوت وكانت قاروسة كيلو نص ومرة تانية نص كيلو ولكن لو عايز تنزل على القاروس بالبوصة اليد يبقى مافيش غير طريقة واحدة وان شاء الله اقل سمكة تضرب عليك مش اقل من كيلو

    الشعر الاساسي نمرة 40
    الصيد من غير فلة
    الرصاصة بلية صغيرة جدا
    شعر الفروع : لا يوجد
    محدش يستغرب لانك حتصطاد من غير طعم ولا سنانير
    اللي حتصطاد بيه ريشة
    ايوة ريشة
    علشان كده الطريقة دي اسمها الترييش
    زي ما قلنا الشعر الاساسي 40
    وتركب الرصاصة وتحتها الريشة ودي بتكون ريشة فراخ عادية وبنختارها تكون من الريش الداخلي يعني المتغطي
    بنجيب الريشة ونربط معاها سلاح نمرة 01 وبعد كده نربط سلاح تاني ونسيب شعر حوالي 2 او 3 سم
    ونربطة معاهم ونيجي على مكان ربط الشعر وناف عليه شعر حرير (دور واحد ) وفوقهم شيكرتون ونلاحظ اننا واحنا بنربط السلاح التاني نخلي حتة شعر طويلة ونعملها خية لان منها حنوصلها في الشعر الاساسي
    وكمان يكون اتجاه الريشة مع اتجاه السلاح بمعنى ان الجزء اللي فيه الريش يكون مع دوران السلاح

    جهزنا البوصة والسلاح يبقى مش فاضل غير السمك
    القاروس سمكة عايمة بتدخل مع الموج
    يبقى كده احنا عايزين موج
    نختار مكان يكون فيه موج عالي ونقدر نقف فيه وكل ما عليك انك ترمي في الموجه وتسحب ايدك معاها ولازم وانت بيسحب ايدك توقفها كل شوية علشان تخايل السمكة وتشوف الريشة وهي بتتحرك
    بتلاقي (لو ليك نصيب طبعا) عيل صغير بيسحب منك البوصة
    اتعامل معاه بقى
    بس الطريقة دي مفيش ناس كتير بتستخدمها لانك لازم تنزل تقف في المية في عز الشتا وتخيل بقى شتا ومية ساقعة وموج عالي
    بس سمكتها بتنسيك كل ده

    الصيد بالبوصة الماكينة
    القاروس بالماكينة ليه طرق اشكال والوان بس برضة ارجع واقول ان القاروس بيضرب على اي طعم طول ما هو موجود في المية
    لو انت بتصطاد الصبح يبقى ارمي للقاروس بالراباللا
    ودي صور لشوية انواع راباللات بتستخدم لصيد القاروس

    ده طبعا جنب الطعم
    يعني لو رميت بالطعم الصبح عادي حيضرب عليك بس مش زي الراباللا
    والصيد بالراباللا سهل كل ما عليك انك تركبها في الشعر وترمي وتجر بسرعة متوسطة السمكة حتضرب عليها كأنها سمكة بتجري

    لو بتصطاد بالليل يبقى حترمي بالطعم عادي ولو موجود في المية قاروس حيضرب عليك
    وحاول تستخدم سلاح كبير يعني نمرة 01 او 02 او 03
    وتعمل سلاحين واحد فوق الرصاصة والتاني تحتها ويكون طولة كبير يعني متر الا ربع تقريبا
    ولازم تخلي بالك واوعى تسيب البوصة وتستنى السمكة لما تضرب
    لازم تفضل ماسكها لان القاروس من السمك اللي بيجر يعني يحط الطعم في بقة ويجري

    دي الطرق اللي اعرفها في صيد القاروس بس فيه طرق تانية كتير جدا وكل منطقة في مصر على ساحل البحر المتوسط ليهم طريقة في صيد القاروس ياريت لو حد يوضحهالنا

    نيجي دلوقتي للطعم المفضل للقاروس

    الجمبري
    نطاط – عقر – بلانص – شطنارة

    الدود
    قراص – قراص صخر – حنش الطين (بيستخدم في الطرح ) – دود بحر -اسمعلاوي

    الجرايات
    جرايات خضراء (كبيرة – بندقة ) – تكنيات – بشبش
    السردين والسردينيلا
    وفيه طعم تاني اول ما شفتة استغربت جدا بس لما استخدمتة لقيت انه جميل جدا وفعال ومش مكلف
    شفت صيادين خلف ميناء بتروجيت بيصطادو القاروس بفتلة حرير لونها احمر بعد ما سالت عرفت انها بتنزل المية تتحرك زي الدوده والقاروسة ياعيني مش فاهمة بتاكل وخلاص
    استخدمت الطريقة دي مرتين واخدت بيها قاروس

    اشهر اماكن صيد القاروس

    ميناء الاسكندرية

    ميناء الدخيلة
    الميناء الشرقي
    السلسلة
    الشاطبي
    سبورتينج
    سيدي جابر
    سان ستيفانو
    المنتزة
    الطرح (مصرف المية السخنة)
    المعدية
    ميناء بتروجيت (للعاملين فقط)
    خلف ميناء بتروجيت (مفتوح)
    ميناء ابو قير

    ملحوظة مهمة : فيه سمك من عيلة القاروس بس مش بيكبر اكبر حجم ليه قد الكف اسمة نقط بضم النون وهو شبه القاروس بالظبط بس فية نقط على ضهره وده بتصطادة من الطرح والمعدية وبيكون عايم

    وبكده نكون خلصنا القاروس
    اراكم مع سمكة تانية ان شاء الله

الكلمات الدلالية لهذا الموضوع

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك