موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



+ الرد على الموضوع
صفحة 1 من 4 1 2 3 ... الأخيرةالأخيرة
النتائج 1 إلى 15 من 56
Like Tree0Likes

الموضوع: جــــــودهــــــا اكـــــبــر : ومحاولة لصنع فيلم إسطوري

  1. #1
    الصورة الرمزية mohamed_a_d
    تاريخ التسجيل
    Jun 2005
    المشاركات
    3,686

    جــــــودهــــــا اكـــــبــر : ومحاولة لصنع فيلم إسطوري




    مبدئيا هواه الطوب و الزلط من اولها كده كيلو الطماطم اللي هيتحدف بيه الموضوع من علي حسابي

    بعد قراءه العديد و العديد و العدييييييييد من اراء النقاد علي الفيلم خدت انطباع انه اما فيلم راااائع قوي اما فيلم واااااقع قوي و في حاله مجامله عاليه له بسبب اسماء النجوم و المخرج و باقي الكاست المميز ممن وراء الكاميرا ( الله ركها رحمن - جافيد اختر للأغاني مثلا)

    بعد مشاهده الفيلم .. الاراء النقديه في وجهه نظري مزيج من هذا و ذاك ..شويه نفاق علي شويه اراء سليمه





    و بعيد عن الكلام المنمق عشان انا بكتب الموضوع ده و انا لسه شايف الفيلم حالا و معنديش حيل للكلام المنمق الانيق.. و ده انطباع مبدئي عن الفيلم ... الفيلم راعي حاجات كتير.. شله البنات بتوع ثانوي اللي عايزين يشوفوا العيون الخضر الدبلي لهرثيك روشان هيلاقوا اللي عايزينه و دول اكتر ناس طلعوا كسبانين من الفيلم.. هواه الفخامه و الثراء البصري سواء في ديكور او ملابس او مجوهرات هيلاقوا اللي عايزينه برضه ، هواه المعارك و الاكشن ..هيلاقوا كل اللي نفسهم فيه كذلك ، هواه الاغاني الناعمه .. لا يعلي علي الحان الله رخا رحمن اساسا ، هواه الأستعراضات مش هيلاقوا و ده من حسنات و عيوب الفيلم و هنتكلم في النقطه دي بعدين ، اما هواه الفرجه علي الجمال الاسطوري لأيشواريا راي - و انا منهم بالمناسبه- .. دول اللي هيطلعوا خايبين الرجا


    ************************
    ************************


    القصه معروفه طبعا للجميع من كتر الدعايه اللي اتعملت للفيلم .. زواج السلطان جلال الدين اكبر من اميره هندوسيه و محاولاته لكسب قلبها .. الخ و يتخلل ذلك صراعات من العزول و عدد من الصراعات السياسيه

    الفيلم مدته تلات ساعات و تلت تقريبا .. عابه طوله الرهيب اللي يكسر ظهرا لمشاهد من كتر الجلوس امامه .. السيناريو متماسك جدا بس طبعا مقدرش احكم علي الحوار دلوقت نظرا لأن الترجمه المتوفره سيئه جدااااااااااا .. عاب الفيلم بعض الاطاله في عدد من المشاهد (بصراحه منتهي الاستفزاز ان احد الشخصيات هيدخل قاعه مثلا عشان المشهد يتم و يبتدي الحوار فالمشاهد يتمشي مع الشخص ده 100 متر تقريبا لحين الوصول لهدفه!!!!!) .. اعتقد لو اختصرنا شويه في مشاهد التمشيات في الفيلم ممكن نقلل تلت ساعه مثلا .. كذلك مشاهد الصلوات الهندوسه الطوييييييييييييييييله قوي.
    لكن عموما يظل كل الشكر للمخرج انه رحمنا من فكره الدين الالهي اللي عملها اكبر و تجاهل عرضها تماما







    ****************************


    لو جينا للممثلين بقي و الكلام عليهم شكلا و اداءا لأن في حاله بعضهم الشكل كان له تأثيره علي الاداء




    ايشواريا راي مكانش لها الشكل الامثل لتصوير كتير من المشاهد.. خصوصا في النصف الاول من الفيلم ..شكلها في حاله شحوب مرضي و هالات سوده ضخمه و انتفاخات تحت عنيها يخلي المشاهد اول حاجه يفكر فيها ان عندها انيميا حاده !! او في خلل بالغده الدرقيه نظرا لحاله الجحوظ اللي فيها عنيها




    .. طبعا في البدء تخيلت ان ده بسبب عدم التعود علي شكلها بالعدسات الغامقه واللي بالمناسبه .. مره واحده تخلت عنها في النصف الثاني من الفيلم !!!! و اكتفي المخرج ببعض العاب الاضاءه لتظهر عنيها داكنه
    مشهد المبارزه بتاعها (واضح انه من اوائل المشاهد اللي اتصورت ) لا يمكن تصديق ان واحده بالهزال ده ماسكه سيف و بتبارز شخص له البنيان العضلي لهرثيك روشان و تتغلب عليه في بعض المرات !! غير ان تصميم المبارزه نفسه مش قوي بالدرجه




    لكن يظل من اجمل تعبيرات قدمتها في الفيلم و الغل و الغيظ اللي بتبارز بيه يشد عين المشاهد معاها طول الوقت
    مجملا مقدرش اقول ان الفيلم افضل اداء لها لكن مبدئيا هو مش الاسوأ لكن هي مش في احسن حالاتها لا الصحيه و لا التمثيليه و لا الشكليه

    ..يمكن لها مشاهد مميزه قوي (مشهد رؤيتها لأحد عمليات القتل في القصر) لكن ده غير كافي.. طبعا انا عارف ان في ناس هتتكلم علي صدق ادائها ..بس بصراحه محستوش طول الفيلم الا في مشاهد قليله.


    هرثيك روشان لا بأس واضح ان النقاد جاملوه قوييييي .. مع الاسف مالوش الهيبه القويه اللي الواحد كان بيتمناها لدور ملك زي ده و الكلام بصوت تخين لا يفي بالغرض و لايصنع هيبه..مجملا اداءه جيد جدا لكن له بعض مشاهد قليله اسلوبه اقرب لطفل بيقلد ممثله المفضل امام مرآه..خصوصا مشاهده و هو بيصلي او بيدعي كذلك مشهد الاغنيه بتاعت خوجا .. و هو بيلف مع الدراويش..تعبيرات وشه لا تدل اطلاقا علي حاله الصوفيه المطلوبه في هذه اللحظه لكن تدل علي انه واحد من مجاذيب السيده بالكتير قوي

    له مشاهد حلوه خصوصا في التعبير عن الغضب.. الوجه المكفهر لما سمع ان جودها لها شروط عشان تتجوزه و بعدين لما فهم انها بتحاول تحط له العقده في المنشار زي ما ما بنقول في المثل المصري و تطفشه من الجوازه.

    تعبير وجهه بعد زواجهم و اول دخول له في الخيمه بعدين محاولته لمس ايديها و نظره الاستمتاع علي وجهه لما سحبتها في الغالب لتفسيره

    ذلك بنوع من الخجل بعدين تحول الاستمتاع ده لغضب لما فهم انها نافره منه لما انكمشت بمجرد ما لمس كتفها.



    مشهد تدريبه وحده علي السيف .. و طبعا هنا المخرج قام بالواجب عشان يستعرض القوام و البناء العضلي المميز لهرثيك عشان البنات اللي في تانيه ثانوي و العذاري الحسان لما يشووفوه يغمي عليهم علي طول علي رأي نيها .. هنا لما حس انها بتتفرج عليه و ابتدي فعلا يستعرض في نفسه قدامها .

    مشهد مميز مع اعتراضات الشيوخ المسلمين علي زواجه منها و التداعيات السياسيه و الدينيه للموقف و اعتراضهم علي وجود معبد هندوسي

    في المنزل و نظره التردد علي وجهه و قبل ما يرد يبتدي يعلي صوت غنائها بترانيم العباده و التساؤل اللي بيظهر علي وجوه كل الموجودين ساعتها و هو ماشي ورا الصوت بعدين ينتبه و يلف بأرتباك للموجودين و يقول لهم ان الاجتماع انفض.


    **************************


    الممثلين الثانويين


    اغلبهم كويس خصوصا المربيه ..جبااااااااره لو هختار لها مشهد واحد يدل علي ادائها.. مشهد طردها و من التجبر الي الذل ثم التوسل بالنظرات في ثوان معدوده

    سونو سوود في دور اخو جودها (معلش مش فاكر الاسم)انا شايف ان دوره جيد و انه عمله حلو ما عدا مشهد الوفاه (محدش بيعرف يموت زي شاروق برضه الظاهر ان ده تخصصه لوحده)

    الام (Suhasini Mulay) معجبنيش اداءها لا هي و لا شقيقه جلال الدين (Punam Sinha) و لا اللي مثل شريف الدين (Nikitin Dheer)




    **************************


    الموسيقي


    من الذي لا يعشق الله رخا رحمن و موسيقاه ؟؟

    رائعه .. قويه فخمه عند المعارك او مشاهد الغضب .. ناعمه رقيقه كالحرير عند مشاهد الحب او التفكير في الحبيبه خصوصا في مقطوعه قصيره جدا امتداد اغنيه الترانيم الهندوسيه اللي جودها بتغنيها و بعدين لما تلتفت فجأه تجد اكبر ناظر لها و الارتباك علي وجهها ثم وقوفهم امام بعض و هو مش عارف هي مفروض تعمل ايه بالطبق اللي فيه النار المقدسه بتاعتهم و باصص له في حيره شويه و هي مش عارفه تتصرف كأي زوجه هندوسيه و تباركه بيها و لا لأ.. الموسيقي شالت كتير قوي من تعبيرات الممثلين الضعيفه في المشهد ده و كانت البطل الاول و الاخير فيه في لحظات الصمت طوال المشهد ..


    لكن عوده لأداء هرثيك تعبيره الصامت بعد انتهاء المشهد ده و خروجه من عندها ..جميل جدا شئ من النشوه و الانبهار علي وجهه محتمل بسبب رؤيه و جهها لأول مره او لأن بدأ أول احساس حب ناحيتها و ده الغالب.. ايا كان المقصد من وراءه علي غير العاده هرثيك عرف يعمل تعبير نشوه مميز جدا وصل للمشاهد بسلاسه غريبه عليه و علي اداءه المفتعل في الحالات اللي زي دي في ادواره السابقه .. تطور يحسب له بالمناسبه.. و يحسب من سحر المشهد اللازمه الموسيقيه لأغنيه Mann Mohana بصراحه مقطوعه حسستني اني فوق السحاب



    *****************************


    الاغاني




    مبدئيا انا معرفش اغنيه Khwaja Mere Khwaja ايه الهدف منها !!! لا تصوير مميز و لا حركات و لا اي حاجه تقريبا ..و طويييييييله جدا يعني يمكن الشئ المميز الوحيد فيها حركه ايدي المطربين و تصفيقهم بتنغيم و حركه معينه مع الموسيقي ..غير كده الكاميرا و تركيزها العجيب علي وجوه المطربين الثلاثه الفاتنه لدرجه عد حب الشباب او الوحمات و النمش في وجوههم و الله يعين اللي شافوا المنظر ده سنيما




    اغنيه Azeem-O-Shaan Shahenshah فيها شويه زوايا تصوير لا توصف سوي بالغباااااااااااااااء بجد تشويه للأغنيه ..استفدت ايه انا لما اتفرجت علي شويه جونلات رجالي و رجلين بتمشي و تتنطط حتي مش حركه سيقان متناسقه سوا عشان تقدم حاجه او تناسق عضلي او اي حاجه كده ..لا دي زاويه عجيبه كده مفهمتش منها حاجه.. علي ما يبدو ان تصوير الرقصات خصوصا اللي فيها عدد ضخم من الراقصين مش المنطقه اللي ممكن اشوتوش جواريكر يقدر يلعب فيها براحته (مش زي كاران جوهر و سانجاي ليلا بنسالي مثلا اللي عندهم قدره غريبه علي التحكم في اعداد ضخمه من الراقصين ) يعني مالوش فيها قوي .. يعني في افلامه السابقه زي لاجان مثلا كان عدد الراقصين اقل او الرقصات فرديه فيسهل التصوير بدون بعككه زي اللي حصل هنا.. يمكن عشان كده حاول يلهي المشاهد بالالوان المتعدده
    و المنوعه.. يعني قدم متعه لونيه و تصوير فاشل للرقصه و تصميم حركي غير مميز لها الا في اجزاء بسيطه قوي منها (حركه الدوائر البشريه حول اكبر و هو علي ظهر حصانه)

    اغنيه In Lamhon Ke Daaman Mein اولا الاغنيه سماعها في حد ذاتها لهواة الموسيقي الشرقيه ..متعه ما بعدها متعه .. و كخلفيه للمشهد العاطفي في الفيلم تعتبر موفقه الي حد كبير جدا لكن عيبها بس انا في مناطق حماسيه عاليه شويه فيها لدرجه اني فكرت انها متاخده من السلام الوطني البلغاري .. عامة المشهد العاطفي في الفيلم طويل زياده (حوالي السبع دقايق المحذوفين من نسخ كتير قوي و انا شخصيا شفته في نسخه تانيه بدون ترجمه) منكرش اني مليت شويه و انا بشوفه خصوصا انهم جابوا الاغنيه كامله فيه لكن ارجع و اقول ان وسط كل الرغي السياسي الطويييييييييييييل جدا و اللف و الدوران فيه و الخناق اللي شغال طول الفيلم دي ممكن كتير يعتبروها منطقه ترفيه شويه في الفيلم.





    اغنيه Jashn-e-Baharaa طبعا احنا مش مختلفين علي جمال الاغنيه و اجمل ما فيها انها كانت خلفيه رائعه و موفقه جداااااا لمشاهدلقصه الحب و بداياتها و تطورها بين اكبر و جودها خاصة من ناحيه اكبر اولا .

    طبعا اغنيه الترانيم الهندوسيه Mann Mohana دي مالناش دعوه بيها دي حاجه كده لازم تنحشر و خلاص عشان حضرته يعرف انه بيحبها او يبتدي يحبها كأن مكانش في اسلوب تاني يقابل بيه مراته اللي عايشه معاه في نفس القصر و لو صدفه .. لكن اسجل اعجابي العميق بصوت المطربه..علي الاقل مش زي الاصوات المسرسعه المعتاده للمطربات الهنود و اللي معرفش تقييمهم لجمال الصوت الانثوي بيتم علي اساس ايه بالظبط.



    ******************************


    طبعا الفيلم فيه مشاهد مميزه كتير.. يعني السيناريست تقريبا مكانش وراه حاجه غير انه يعمل مشاهد مفصليه او مميزه في مواقفها بحيث انها تعلق في الذهن لسبب او لآخر..

    مشهد الوليمه الملكيه مشهد فعلا يفكرك بالمثل المصري واحد اتكبس دمه اتحبس طق مات ..جودها طبخا الوليمه له و المربيه اصرت انها تاكل الاول للتأكد ان الطعام غير مسمومو احرجت الملك انه لازم يوافق علي انها تاكل الاول.. ثم اكلها و رده بعد كده كأكرام لجودها انه طلب ياكل من نفس الاطباق اللي هي اكلت منها (كبسسسسسه للمربيه و تعبر وجه مكفهر و محرج و غاضب منها يستاهل انها تاخد جائزه احسن ممثله مساعده السنه الجايه) تلي ذلك اللؤم الانثوي اللي مفيش فايده فيه ابدا : و صياح جودها المفاجئ : لا تأكل من هذا الصنف



    الترقب اللي ظهر علي وجوه المدعوين مع الموسيقي المثيره ..بعدين المبرر المضحك ..ملحه ناقص ثم نظره كلها لؤم وخبث و سيطره من جودها للمربيه اللي تعبير وشها كالعاده يدل علي الكبسه.

    استكمال للخبث الانثوي .. لما خلت كل جواري و نساء القصر يقفوا مغطيين و جوههن و دخوله و الابتسامه الدبلوماسيه المعتاده علي

    وجهه رغم ان عنيه بتلف في كل واحده و بتدور عليها (مفيش فايده في الستات) لكن يظل اجمل ما بالمشهد الموسيقي الرائعه لـ الله رخا رحمن و اللي لتاني مره هي بطل المشهد مش الممثلين.


    ***************************





    طبعا انا من اشد معجبي و محبي اشوتوش جواريكر.. و عارف انه قعد 9 سنين بيعد للفيلم .. و سنه و نصف تصوير.. طبعا قدره هائله علي التحكم في التفاصيل و اختيار موفق لغالبيه الممثلين.. و فعلا تحس انه مالك ادواته ..

    لكن مش كلها..في طبعا هنات ..بتظهر في بعض المشاهد خاصه في مشاهد المعارك و اللي ظهر فيها افضل و اسوا مشاهد الفيلم في رأيي ..طبعا بالاضافه لمشاهد اخري بصراحه مفهمتش فيها بعض النقاط او حسيت ان فيها عيوب معينه




    مشهد اكبر و هو بيكلم مربيته العجوز و شايف جودها من بعيد و سرح فيها..ده مشهد غبي لأن الكاميرا لما ركزت عل صوره جودها كانت صورتها هي مشوشه في حين صوره المربيه عليها التركيز رغم ان مفروض يكون العكس علي الاقل لمده اطول من الفمتو ثانيه اللي اتعملت .


    مشهد الصلاه قبل اعلانه قبول الزيجه .. و هو بيصلي قدام حيطه او نافذه مخرمه و مليانه شرايط سود مربوطه فيها ... ايه ده؟؟؟ يعني تخميني الشخصي ان الجهل المعتاد بتاعهم ان الله لازم يكون مرئي النتيجه ان زي ما بيركزوا علي الاله بتوعهم في اوقات الصلاه بتاعتهم ... ركز علي الشباك العجيب ده و لو ان ده مفسرش ليا الشرايط السوده !!

    مشهد الفيل ..مفترض انه عشان ملك راجبوت ينبهر بشجاعه و اقدام اكبر لكن ظروف اخراج المشهد و اسلوب التصوير فيه تكفل بأنه يكون اكثر مشاهد الفيلم سذاجه و غباء و تخلف .. و اصلا شكل هرثيك و هو بيتنطط امام الفيل شكله زي البرغوت و مش لاقي وصف تاني غير كده و اللي رافع الطوب ده ينزله مش وقت تحديف بيه دلوقت

    المعارك .. المبارزات الفرديه غالبا جيده الي جيده جدا يمكن فيها بعض الهنات و الضعف في عدد منها

    لكن مبارزات المعارك دي بقي زي ما تكون مبارزات بإبر تريكو مش بسيوف .. و اكيد كلنا لنا ذكريات الطفوله و المبارزه بإبره تريكو مع اخواتنا ..مشاهد المعارك دي بقي رجعتني سنين لورا لما كنت ببارز اخواتي بأبره !!!.. واضح ان المخرج اهتم بتدريب ابطاله الاساسيين و نسي تماما الكومبارس او علي الاقل اللي هيركز عليهم منهم .. يعني المعارك اقوي مشهد فيها مشهد الالتحام الاول و بعد كده بخخخخخخخخخ ... مفيييييييييييييش

    لكن احلي ما في المعركه الاولي .. لحظه جري الجيشين علي بعض ثم الصمت المفاجئ للموسيقي اثناء هذا العدو و بعدين عوده الموسيقي مر واحده قبل التحام الجيشين مباشره ..حركه خلت المشاهد في ترقب للحظه تلاقي الجيشين.





    افضل معركه .. اخر مبارزه خالص بين اكبر و شريف الدين .. اجمل ما بها .. ان الضرب حقيقي ..مفيش نظريه الحبال اللي بتطير الخلق و السخافه اللي زرعها فيلم ماتريكس في كل افلام و مشاهد الاكشن بلا ادني استثناء .. الي حد ما فكرتني شويه بمعركه هكتور و اخيل في فيلم تروي ... و ن كانت هنا اكثر ادميه (صحيح فيها حته هتش كده ..يعني مش ممكن اني ارزع واحد بوكس في بطنه و هو لابس درع حديد و يحس بيه و انا اللي ايديا متتكسرش)



    الديكور و الملابس


    انا شخصيا مظنش الناس دي تعبت كتير في حاجه ماشاء الله القصور الهنديه الحقيقيه اللي جابوها تكفلت بأطلاق المقوله الشهيره جتنا نيله في حظنا الهباب من جوايا بحراره .. يعني بأختصار رائع رائع رااااائع و خاصه اشكال العروش و المقاعد(دي عندي شئ من الخلفيه عنها من تصفحاتي المحدوده في كتب الكليه بتاعت اختي) فعلا منتهي الاتقان... لكن مش متعه بصريه





    المتعه البصريه في فيلم زي ساوريا او زي ديفداس ..ممكن في اومراو جان .. هنا الديكورات عباره عن الفخامه التي تخطف الانفاس ..لكن مش الجمال اللي يخطف الانفاس زي الافلام السابقه



    الملابس .. انا مش خبير ملابس طبعا لكن الفخامه في الفيلم كله هتخلي واحد مبياخدش باله حتي من الهدوم اللي هوا لابسها زي حالاتي ياخد باله من تكلفه الملابس العاليه جدااااااا و تكلفه المجوهرات و اللي في العادي برضه استحاله انتبه لها لكن هنا شكلها و فخامتها تخلي الاعمي نفسه يفتح عشان يشوفها.



    المكياج


    مظنش ان كان في ماكيير اصلا في الفيلم

    اللي يخلي هرثيك روشان مغولي اشقر بعيون خضر و شعر كيرلي معرج

    و يخلي واحده شكل ايشواريا راي تطلع بكل هذا الشحوب و القبح و الجحوظ العجيب بدون حتي محاوله اخفاء كل ده

    يبقي النتيجه اللي تطلع بيها ان اكيد مكانش في ماكيير



    ***************************



    اخيرا ..جودها اكبر فيلم تاريخي سخي الانتاج .. و اعتقد انه من الافلام اللي هتترك علامه في تاريخ السنيما الهنديه عن كيفيه صناعه فيلم بدون قصص جانبيه و بدون حشر توابل و بهارات كتير بداع و بدون

    اعتقد اني قلت اغلب اللي فاكره من انطباعاتي عن الفيلم ..معلش الكلام مش مرتب ..بس معلش بقي
    التعديل الأخير تم بواسطة mohamed_a_d; 03-04-2008، الساعة 08:39 PM
    -


    نحن نؤمن بالحوار المتحضر الديموقراطي

  2. #2
    الصورة الرمزية ود الشماليه
    تاريخ التسجيل
    Sep 2005
    المشاركات
    115
    مرسي على الكلام المش منبق ههههههههههههههههههه

    دا كله ومش منمق طب لو كان منمق كنت حتعمل فينا إيه مشكوووووووووووووووور





  3. #3
    الصورة الرمزية tarek roka aror
    تاريخ التسجيل
    Jun 2005
    المشاركات
    2,867
    بصراحه بحسدك يا محمد على انك بعد مشاهدتك لفيلم بالطول ده يجيلك القدره انك تكتب مقاله نقديه بالشكل الجميل ده
    ولا تفصص كل جزء فى الفيلم
    عموما الفيلم من كثرة الجدال عليه من حالة السخط من الهنود على عدم الدقه فى الاحداث التاريخيه لحياة الامبراطور العاطفيه خلانى انتظر نزوله بفارغ الصبر
    واللى ضايقنى اكتر ان اتأجل نزوله اكتر من مره
    عموما انا بدأت احمله دلوقتى ولى عوده بعد مشاهدته ان شاء الله

    لكن فى معلومه حبيت اقولها كده By the way ان الفيلم اتكلف 10 ملايين دولار
    يعنى حوالى 55 مليون جنيه مصرى
    وده بصراحه اكبر رقم سمعته عن تكلفة فيلم فى بوليوود
    وده عنصر تانى يخاينى اتشوق اكتر لمشاهدة الفيلم

    عموما شكرا يا محمد على المقال ولى عوده مره اخرى للمناقشه

  4. #4
    الصورة الرمزية angel_eye1234
    تاريخ التسجيل
    Sep 2005
    المشاركات
    5,726

    تقرير ولا اجمل ولا أروع

    ولا حتى .. حد يقدر يعمله غير محمد

    زي ما الكتاب بيقول

    تسلم ايديك


    MEMO











  5. #5
    الصورة الرمزية اشواق الخرج
    تاريخ التسجيل
    Aug 2004
    المشاركات
    1,378
    مبدئيا هواه الطوب و الزلط من اولها كده كيلو الطماطم اللي هيتحدف بيه الموضوع من علي حسابي
    ومين حيحذفك بس دى هنا كل الديمقراطيه واحترام الرأي التاني


    هواه الفخامه و الثراء البصري سواء في ديكور او ملابس او مجوهرات هيلاقوا اللي عايزينه برضه ، هواه المعارك و الاكشن ..هيلاقوا كل اللي نفسهم فيه كذلك ، هواه الاغاني الناعمه .. لا يعلي عيل الحان الله رخا رحمن اساسا ، هواه الأستعراضات مش هيلاقوا و ده من حسنات و عيوب الفيلم و هنتكلم في النقطه دي بعدين ، اما هواه الفرجه علي الجمال الاسطوري لأيشواريا راي - و انا منهم بالمناسبه- .. دول اللي هيطلعوا خايبين الرجا
    طب وهواة البحث عن الحقيقه التاريخيه زي ثقيلين الدم والطينه الي زيي يشوفوه والا يوفرو على انفسهم ضياع ثلاث ساعات وشويه من اعمارهم

    لكن عموما يظل كل الشكر للمخرج انه رحمنا من فكره الدين الالهي اللي عملها اكبر و تجاهل عرضها تماما
    كتر خيره والله ابن حلال مجبش سيرة الفتره الرزله دي الهند مش ناقصه حروب طائفيه

    مشهد المبارزه بتاعها (واضح انه من اوائل المشاهد اللي اتصورت ) لا يمكن تصديق ان واحده بالهزال ده ماسكه سيف و بتبارز شخص له البنيان العضلي لهرثيك روشان و تتغلب عليه في بعض المرات
    وايه لزمته المشهد دى يعني ايه يجبها بتبارز ايه الفكره الي عايز يوصلها المخرج دنى قريت مره من فتره بعيده كدا انه في عصر المغول منعت المرأه من ركوب الخيل ودي طالعه تبارز بالسيف طيب وايه الي يجبر اميره على تعلم المبرزه بالسيف وقت فراغ عايزه تضيعه والسلام ؟؟؟
    هرثيك روشان لا بأس واضح ان النقاد جاملوه قوييييي
    من يوم يومه والنقاد بيجملوه على ايه مش عارفه

    مشهد تدريبه وحده علي السيف .. و طبعا هنا المخرج قام بالواجب عشان يستعرض القوام و البناء العضلي المميز لهرثيك عشان البنات اللي في تانيه ثانوي و العذاري الحسان لما يشووفوه يغمي عليهم علي طول
    ربنا يخرب بيت البنات دول مع الحسان الهبل ويغمى عليهم مره وحده وميفئوش ابدا ونرتاح من المشاهد الي زي دي لو خلصنا منها الفيلم تقصر مدته شويه ويوفرو علينا وقت مشاهده

    في المنزل و نظره التردد علي وجهه و قبل ما يرد يبتدي يعلي صوت غنائها بترانيم العباده و التساؤل اللي بيظهر علي وجوه كل الموجودين ساعتها و هو ماشي ورا الصوت بعدين ينتبه و يلف بأرتباك للموجودين و يقول لهم ان الاجتماع انفض.
    ياقوة الله بص انا مشفتش الفيلم بس الي في بالي دلوئتي ازاي سمعو صوتها هو الاجتماع دى كان فين اصلا اكيد حيكون بعيد وهي حتكون بعيده اوي ازاي سمعو صوتة غناها بتغني بيكرفون يعني
    نورني الله يخليك

    الموسيقي
    الله رخا رحمن
    كفايه اسمه بس وحنعرف ان الموسيقى اخر روعه

    مشهد الفيل ..مفترض انه عشان ملك راجبوت ينبهر بشجاعه و اقدام اكبر لكن ظروف اخراج المشهد و اسلوب التصوير فيه تكفل بأنه يكون اكثر مشاهد الفيلم سذاجه و غباء و تخلف .. و اصلا شكل هرثيك و هو بيتنطط امام الفيل شكله زي البرغوت و مش لاقي وصف تاني غير كده و اللي رافع الطوب ده ينزله مش وقت تحديف بيه دلوقت
    انا شفت مقابله لرتك في احد القنوات وتكلم عن المشهد دى وقال انه من اخطر مشاهده لانه بيخاف اصلن من الفيل وان دى رعب حياته زي مافهمت من كلامه وانه هوا زات نفسه مش عارفه ازاي مثل الفيلم دى لانه كان خايف اوي ان الفيل تتفك صواميل دماغه ويروح دهسه تحت رجليه بالظاهر انه شاف مشهد لفيل دهس راجل قدام عينه ومن يومها هوا بيخاف منه

    الديكور و الملابس
    لا تعليق عليها واضح الفخامه والتكلفه العاليه فيها دنى ساعات بحس هيا الملابس والديكورات بطلة الفيلم كله

    المكياج


    مظنش ان كان في ماكيير اصلا في الفيلم

    اللي يخلي هرثيك روشان مغولي اشقر بعيون خضر و شعر كيرلي معرج

    و يخلي واحده شكل ايشواريا راي تطلع بكل هذا الشحوب و القبح و الجحوظ العجيب بدون حتي محاوله اخفاء كل ده

    يبقي النتيجه اللي تطلع بيها ان اكيد مكانش في ماكيير
    مفروغ منه المكير بتاعهم من ابو ربع جنيه


    واخيراً يعطيك الف عافيه على التقرير الهايل ومتعودين منك مثل هالتقارير وعذرا اني مش مشاركه معاك في منقشت الفيلم وتقييمه لاني ما شفته

  6. #6
    الصورة الرمزية neeha
    تاريخ التسجيل
    Mar 2005
    المشاركات
    903
    اولا انا طبعا مش هاناقشك فى رؤيتك النقديه للفيلم لان انا مش مختلفه معاك خالص بالذات فى المجاملات الزياده عن اللزوم لريتيك روشان عمال على بطال حتى لو كان اللى بيقدمه مايستهلش لكن ...
    فيلم بالحجم ده و الضجه الاعلاميه اللى اتعملت عليه و الامكانيات الانتاجيه اللى توافرت له و زمن العرض الكبير ده يخلينى اقف شويه عند نقطه مهمه . كل ده اتعمل علشان يقدم قصه حب ام المفروض ان كل ده كان الهدف الاساسى منه عرض فتره تاريخيه مهمه و حافله فى تاريخ الهند او عن سيره ذاتيه لملك شهدت فى عصره تغيرات تاريخيه جزريه حتى و ان كنا مش من المعجبيين بهذا الرجل .
    على فكره انا لسه ماشوفتش الفيلم الى الان و التصور اللى كان فى دماغى عنه انه فيلم تاريخى تتخلله قصة حب لزوم التحابيش و الاسبايسى الهندى لكن ان الفيلم كله عن قصة حب و شد و جذب بين زوجيين مش عارفه
    كتير اوى تلات ساعات و نص
    على العموم لنا عوده بعد ما اشوفه اه باتلمناسبه دى يا دكتور محمد ممكن حضرتك ترسينى على بر و تقولى على مدة الفيلم بالظبط لان للاسف فى نسخ كتير اوى نزلت بعضها 3 ساعات و 13 دقيقه و نسخ تانيه 3 ساعات و 25 دقيقه و نسخ تالته 3 ساعات و 31 دقيقه و كل واحد منزل نسخه يكدب الباقى و ياكد على انه هو النسخه الاصليه راسينى الله يعمر بيتك عايزه احمل الفيلم
    [CENTER]
    قالولى عليك مصدقتش..لحد ما شفت بعيونى..
    انا الى عمرى معشقتش..عشقت عنيك وسحرونى

    يا اجمل حب عشت انا فيه..بحبك وانت عارف ليه..

    عشان جمبك حبيبى لقيت انا.. كل الى بحلم بيه


  7. #7
    الصورة الرمزية mohamed_a_d
    تاريخ التسجيل
    Jun 2005
    المشاركات
    3,686


    انت بتقولي لي حضرتك ليه؟؟؟!!!!!!!!!!!
    بصي النسخه اللي نازل معاها ترجمه هي
    Jodhaa Akbar (2008) Pre-DVDRIP_XviD-AbcD.avi

    دي مدتها تلات ساعات و 13 دقيقه تقريبا بس الترجمه الانجليزي بتاعتها زفتتتتتتتت و ناقصه و توقيتها مش مظبط بالمره علي الله بس المترجمه تعدل الكلام ده في العربي

    انضف نسخه كصوره

    Jodhaa Akbar 2008 Pre-DVDRip XviD ~Team BMB~.avi

    مدتها تلات ساعات و تلت بالظبط بس مع الاسف مالهاش ترجمه حاليا

    بس مبدئيا سيبك من اي نسخه مكتوب عليها اسم مايك خان mike khan لأنها دايما بتبقي ناقصه و ناقصه كتير قوي كمان

    و ملاحظه اخيره لك عشان دي عرفتها متأخر قوي بعد ما طلع عيني تحميل في تلات او اربع نسخ مختلفه عشان اشوف الفيلم .. اللي فهمته كده ان في نسخ ناقصه شويه و دي للعرض الخارجي يعني اللي اتعرضت في انجلترا و امريكا اقل حوالي عشر دقايق معرفش حصل فيهم ايه (بتغاظ قوي من الموضوع ده من الهنود قبل كده نزلت سلام عشق و كان زياده 40 دقيقه كامله عن النسخه اللي نازل لها الترجمه هنا في المنتدي و اضطريت انزله تاني)

    بالنسبه بقي ان الفيلم كله قصه حب ..لا طبعا ..في سياسه كتير بس كلها لت و عجن و عجن و لت و تحسسك كده انك بتدوري في دواير مفرغه في اوقات كتير قوي يعني خلاص عرفنا ان شريف الدين بيتآمر علي جلال و ان جلال علي شئ من الجهل بامور كتير و علي شئ من الهبل في البدايه بعدين بيتعدل شويه بعد ما بيفهم لعبه الحكم كويس بس ده خد مشاهد كتير قوي قوييييييييييييييييييي من غير ما الكابتن شريف الدين ده ياخد خطوه ايجابيه في طريق ربنا يقوينا علي الشر بتاعه
    التعديل الأخير تم بواسطة mohamed_a_d; 24-02-2008، الساعة 02:11 AM

  8. #8
    الصورة الرمزية mohamed_a_d
    تاريخ التسجيل
    Jun 2005
    المشاركات
    3,686
    اقتباس المشاركة الأصلية كتبت بواسطة اشواق الخرج مشاهدة المشاركة


    طب وهواة البحث عن الحقيقه التاريخيه زي ثقيلين الدم والطينه الي زيي يشوفوه والا يوفرو على انفسهم ضياع ثلاث ساعات وشويه من اعمارهم

    لا هواه البحث عن الحقيقه التاريخيه مسكتهم بجمله في اول الفيلم ان الفيلم كله قائم علي احد وجهات النظر التاريخيه لكن التاريخ دائما يحتمل وجهات نظر مختلفه


    دنى قريت مره من فتره بعيده كدا انه في عصر المغول منعت المرأه من ركوب الخيل ودي طالعه تبارز بالسيف طيب وايه الي يجبر اميره على تعلم المبرزه بالسيف وقت فراغ عايزه تضيعه والسلام ؟؟
    هي مفترض انها مش مغوليه هي من راجبوت و ان اخوها دربها علي المبارزه ليه معرفش بصراحه بس ممكن تحطي تفسير ده تحت بند المخرج عايز كده


    ياقوة الله بص انا مشفتش الفيلم بس الي في بالي دلوئتي ازاي سمعو صوتها هو الاجتماع دى كان فين اصلا اكيد حيكون بعيد وهي حتكون بعيده اوي ازاي سمعو صوتة غناها بتغني بيكرفون يعني
    نورني الله يخليك
    هو ده سؤال محترم علي فكره هو مفروض ان الصوت كان واصلهم ضعيف شويه بس بصراحه برضه بعد المسافه كان فعلا غريب انهم يسمعوها !!!
    قوه ملاحظه حلوه يا ااشواق

    انا شفت مقابله لرتك في احد القنوات وتكلم عن المشهد دى وقال انه من اخطر مشاهده لانه بيخاف اصلن من الفيل وان دى رعب حياته زي مافهمت من كلامه وانه هوا زات نفسه مش عارفه ازاي مثل الفيلم دى لانه كان خايف اوي ان الفيل تتفك صواميل دماغه ويروح دهسه تحت رجليه بالظاهر انه شاف مشهد لفيل دهس راجل قدام عينه ومن يومها هوا بيخاف منه
    استني لما تشوفي المشهد و ابقي قرري هل حلو و لا لأ.. انا مختلف عليه مع واحد صاحبي ..مقتنع بيه قوي و عمال يقولي هايل و عظيم و محصلش ..بس يعني هرثيك خاف من الفيل ؟؟!! امال الكومبارس اللي صوروهم فيالاول و المفروض ان الفيل بيدهس صدورهم و يقتلهم دول حسوا بأيه؟

  9. #9
    الصورة الرمزية mrwan__anaconda
    تاريخ التسجيل
    Feb 2004
    المشاركات
    1,095
    واللة يا محمد انا مستنى الترجمة عشان فى حوالى 10 عوزين يشوفو الفيلم معايا و لازم اكون انا كمان مشفتوش لكن بصراحة تقريرك ريحنى شوية انو قضى على بعض الفضول الى عندى دة بس و متهيالى ان الفيلم مجملا هيكون ظريف يعنى برغم العيوب الى فية
    التعديل الأخير تم بواسطة mrwan__anaconda; 24-02-2008، الساعة 06:19 PM


    Every man dream...but not equally

  10. #10
    الصورة الرمزية حنوون71
    تاريخ التسجيل
    Jun 2007
    المشاركات
    218
    والله محمد مشاء الله عليك انك عندك قدرة فى الكتابه والنقد بطريقه تعيشنى فى الفيلم من غير ما انا اشوفو
    انا عيزة اقلك انى قراءة التحليل فى ساعه بجد ساعه لانى كنت مهتما جدا افهم وجه نظرك فى الفيلم مع انى لسه مشفتوش
    لكن تاكد انى ها قارن النقد وهقلك
    تقرير ونقد ممتاز جعلنى افكر انى مشفش الفلم لانك عيشتنى فى الفيلم مجهود جميل ورائع
    مشكووووووووووووووور اخى

  11. #11
    الصورة الرمزية so2006zan
    تاريخ التسجيل
    Dec 2005
    المشاركات
    1,224
    ما شاء الله يا محمد
    مجهود و لا أروع
    شوقتني انو شوف الفلم
    لسا ما لقيتو لحتى اشتريه و جهازي خربان شوي
    لهيك مش قادرة نزلو

    بس عنجد يسلم هالديات
    و الله يعطيك العافية
    بس مدة الفلم بتخوف

    ليش كل هاد الناس بتقول نقصو من طول الفلم
    و هما بيزيدو
    ليش







    اللهم بلغنا رمضان...كل عام و انتم بخير

  12. #12
    الصورة الرمزية ewg
    تاريخ التسجيل
    Sep 2005
    المشاركات
    1,661
    بعد التحليل الجامد دة منقدرش نقول غير انك فعلا تشتاهل لقب خبير الافلام الهندية
    بس يا ريت اكرمكم اللة لو امكن الترجمة العربى للنسخة دى
    Jodha.Akbar.2008.Pre.DVDRip[Desithunder.com]
    فى اسرع وقت
    هى دى النسخة اللى انت حاطط التورنت بتاعها وغالبا النسخة اللى نزلها ترجمة انجليزى
    منتظرينكم بفارغ الصبر
    وربنا يعينكم
    متى يصل العطاش إلى ارتواء .... إذا استقت البحار من الركايا
    ومن يثنى الأصاغر عن مراد .... إذا جلس الأكابر فى الزوايا
    يا جبل مايهزك ريح
    نعيب زماننا والعيب فينا ومالزماننا عيب سوانا
    لسانك لا تذكر به عورة امرئ فكلك عورات وللناس السن

    الحمد لله على نعمة الكثيرة واقلها الصحة والشباب اللذان لا يقدران بمال
    عاشق البراءة

    هوبة الاعجوبة

  13. #13
    الصورة الرمزية mohamed_a_d
    تاريخ التسجيل
    Jun 2005
    المشاركات
    3,686
    رغم ان باين قوي ان ردك العسل ده غرضه السؤال علي الترجمه ( الرحمه يا رب) بس لك ان تزغرد ... الترجمه لسه نازله حالا في قسم الترجمه
    التعديل الأخير تم بواسطة mohamed_a_d; 27-02-2008، الساعة 01:39 AM

  14. #14
    الصورة الرمزية abeeressa
    تاريخ التسجيل
    Aug 2004
    المشاركات
    423
    السلام عليكم

    أنا اليوم سهرانة للفجر ...

    قرأت تقريرك الآن ولأول مرة لأنني كنت مشغولة في الأيام السابقة بالترجمة للفيلم


    في عندي نقاط كثير أناقشك فيها ، لكن بصراحة تعبانه الحين .

    لكن في نقطتين بصراحة ما اقدر إني ما أصحح سوء الفهم عنهم :-

    مشهد الصلاة :-

    أكبر صوفي وفي هذا المشهد هو يصلي أمام قبر الولي خواجه متشفعاً به إلى الله لتلبية دعواته بتوحيد الهند .

    والمناديل السوداء هي ربطات يربطها الزوار للقبر حتى تتحقق دعواتهم .


    الديكور :-

    لقد تم تصوير الفيلم في استوديوهات ضخمة والتي بنيت خصيصاً من أجل الفيلم و فيها القلاع والقصور وكل ما شاهدتموه في الفيلم .

    اسمها استديوهات نيتن ديساي

    The majestic sets of Ashutosh Gowariker's historical Jodhaa Akbar have been the topic of discussion, within and outside the industry.

    The magnificent palaces and forts, the grandeur, the splendor, the opulent look seems to have caught the attention of moviegoers within and outside the country.

    That, in turn, has prompted its makers and also the creator of those sets, Nitin Chandrakant Desai, to open the gates of the studio (ND Studios, where the film was shot) for public.

    "I decided against dismantling the sets after Devdas," Nitin Chandrakant Desai tells me.

    "After having watched the sets on screen, a lot of people were keen to visit the studios and watch them in real. It's also heart breaking to dismantle the sets that have been painstakingly created over a period of time. That's when I decided to retain the sets of Jodhaa Akbar and throw open the gates of the studio for tourists, on the lines of Universal Studios in Los Angeles."

    Although the gates of N D Studios aren't open for tourists yet, they might be in due course of time. After paying a nominal fee, the tourist would be able to visit the sets of Jodhaa Akbar that were witnessed on the 70mm
    وهي حالياً ستفتتح كمنطقة سياحية

  15. #15
    الصورة الرمزية mohamed_a_d
    تاريخ التسجيل
    Jun 2005
    المشاركات
    3,686

    اممممم.. هو تفسير منطقي لموضوع الشرايط السوده و الصلاه ..لكن بصراحه يظل واحد من اسوء مشاهد هرثيك في الفيلم كأداء من وجهه نظري

    انا عارف معلومه الاستوديوهات دي بس بصراحه حسيت انهم ناقلين شكل قصر معين موجود بالفعل معرفش ليه..او علي الاقل مشاهد محدوده قوي اللي متصوره داخل قاعات مبنيه فعلا لقصر .. يعني المشهد العاطفي ده معتقدش انه متصور في استوديو .. و الانطباع ده جالي لأن في مشاهد كتير من اللي اتصورت في القاعه دي الصوت له رنين شويه .. انا عارف ان في اجزاء كتير من الفيلم معموله dubbing يعني الصوت متركب علي الصوره مش متسجل في المشهد نفسه .. بس انا اعرف ان اشوتوش جواريكر غالبا ما بيستخدم syncronizing cameras مش متأكد من اسمها بالظبط بس المهم يعني ان الصوت يتسجل اثناء تصوير المشهد ... انا برضه قريت من فتره ان الفيلم اتصور في كتير من قصور ولايه راجستان ( تقريبا الاسم كده مش متأكد بصراحه منه)

    و ايا كان سواء في استوديوهات او في قصور هو لوكيشن مميز جدا للتصوير
    عموما شكرا يا عبير علي المعلومه

    التعديل الأخير تم بواسطة mohamed_a_d; 27-02-2008، الساعة 05:58 AM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك