موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



+ الرد على الموضوع
النتائج 1 إلى 2 من 2
Like Tree0Likes

الموضوع: قصيدة جميله جدا للشاعر جمال بخيت بعنوان (مـــــدد)

  1. #1
    الصورة الرمزية gerrard8
    تاريخ التسجيل
    Oct 2006
    المشاركات
    1,970

    قصيدة جميله جدا للشاعر جمال بخيت بعنوان (مـــــدد)

    باموت يا مصر المتباعة
    باموت يا مصر المنهوبة
    شمسك تسير عكس الساعه
    والعين عالعمى مغصوبة
    الصفر خيم على زمنك
    وعروق رقابتك مطلوبة
    على الحدود قتلوا ولادك
    وتقفى ساكته ...ومرعوبة
    مدد يا هيكل ...يا ضميرى
    مدد يا كامل يا زهيــــرى
    مدد يا قاضى يا خضيرى
    مدد يا مكى يا زكريا
    يا جورج اسحاق
    يا مسيرى
    يا بسطويسى....يا حرية
    مدد يا أجمل أعصايرى
    مدد يا قلب الوطن الحر
    مدد يا سيرة عوض المر
    مدد يا ندهة كمال خليل
    مدد يا حلم ندى القصاص
    مدد يا خط رؤوف عياد
    شقيان وماشى بكل عناد
    مدد يا قمح سكينه فؤاد
    مدد يا بنت يا مصرية
    يا جميله يا أخت بهيه
    مدد يا شعر العاميه
    مدد يا صاحبى اللى قاسمته
    مدد يا علم اتعلمته
    من عم عودة وصدقى عزيز
    شباب لبس وش عواجيز
    مدد يا سورة اخلاصى
    مدد يا خويا وتاج راسى
    يا معصراوى ...يا حسينى
    مدد يا ست نهى الزينى
    يا فجر صبح على عينى
    صالح ما بين نفسى وبينى
    وقاللى دى الست القاضية
    كشفت عن الالوان زيفها
    وخلت الورده الزاهية
    تعيش على وش خريفها
    مدد يا فادى يا اسكندر
    على خطى محمد الاشقر
    على طريق ابن أبو عيطة
    جمع مظاهراتنا مشاعر
    ويغير من الهتافات شاعر
    يحفظ ديوان لأمين الادب
    يلاقى شعب كأنه أديب
    عندك فى شعره
    بلاد ....تقاسيم
    عندك حجازى
    وعمرو سليم
    والنكته بوزاره تعليم

    باموت يا مصر المتباعة
    باموت يا مصر المنهوبة
    شمسك تسير عكس الساعة
    والعين عالعمى مغصوبة
    مدد يا وائل ويا عيسى
    مصر الشباب عالترويسة
    فضحوا الوحوش السعرانة
    أكلتنا جامع وكنيسة
    مدد يا وائل ويا عيسى
    مدد يا غد ويا كفاية
    أبو العلا ..ماضى..معايا
    ف طريق ما يعرفش نهاية
    الا بميلاد مصر الحرة
    الا بميلادنا ...ومددنا
    وكرامة تفضل لولادنا
    مدد يا آية فى سوره العصر
    مدد يا تمثال نهضة مصر
    مدد يا فيلم صلاح الدين
    مدد يا حماد ...ويا حمدين
    متصدرين باسم الامة
    للمجزره ....وقوانين سكاكين
    للمبخره.....وقوانين زنازين
    باموت يا مصر ومخنوقلك
    عبد الحميد شتا مشنوقلك
    ميت عشان فرصته بتضيع
    لولاد كلب وولاد جرابيع
    ثابتين على عرش فشلهم
    نايمين على وش عسلهم
    سرقوا الرغيف والحريه
    سرقوا السياسة الخارجيه
    ادوا الحرامى....بنوك الوز
    وادوله مصنع طعمه يلذ
    وادوله فندق لجل يهز
    وادوا الحديدلاولاد العز
    والبورصه محشورة فى جيبهم
    والسد لو كنا نسيبهم
    بميته وبكهربته
    بكره هايدخل فى نصيبهم
    مدد يا صوت عبد الناصر
    مدد يا شيخ حسن البنا
    نفسى فى شىء قبل الجنة
    يقوم بأه حزب وطنا
    ونقضى على مسرطنا
    الليل يتوب عن كوابيسه
    وأشوف فى مصر رئيس سابق
    والجى ميكونش وريثه
    مدد يا يحيى حسين يا أمين
    بيخصخصوا الهوا والميادين
    بيمصمصوا الناس والفدادين
    باعوا الطريق الصحراوى
    وباعوا احلام الجامعه
    وهتكوا عرض الشرقاوى
    وعملوا بيصلوا الجمعه
    باعوا وباعوا وهايبيعوا
    شيخ الوطن ولا رضيعه
    وباعوا صوت عبد الباسط
    وشهر يوليه واسابيعه

    باموت يا مصر المتباعة
    باموت يا مصر المنهوبة
    شمسك تسير عكس الساعة
    والعين عالعمى مغصوبة
    هاتى المدد يا منى الشاذلى
    لا تخافى يوم ولا تتنازلى
    وصورى مصنع غزلى
    ف الاعتصام العمالى
    انا كنت رب العوم ..مالى ؟؟
    مقتول غريق ويا آمالى
    آدى الغريق....
    والقاتل فين ؟؟
    مدد ياعبدالغنى يا حسين
    صورلى مصر المحتارة
    صورلى غرقى العبارة
    مالهومش حد ينجيهم
    غرقوا بحاضرهم وماضيهم
    البحر مفيهوش قشاية
    والملح نار جوه عيونهم
    وعيون بلدهم نساية
    ومنارة الشط تخونهم
    باموت يا مصر الغرقانة
    باموت يا مصر المنكوبة
    طعم الحياة كلها اهانة
    وانتى عالنيل مصلوبه

    مدد يا بنت الايه يا آلاء
    يا حصه الوطن المشتاق
    الاولى فى علم التغيير
    بشرى..بألوان الطباشير
    راسمه العلم فى الصفحه أسير
    وبتعلنى بقلب الموجوع
    ان الوطن ميادين ونجوع
    تعبان من الحرمان والجوع
    عين المراقب ..غفلانة
    عن العيون الانسانة
    بنت الخمستاشر احساس
    بنت الخمستاشر تفكير
    بنت الخمساتشر غنوة
    على وتر علم التعبير
    عين الملاحظ بتلاحظ
    ان العقول جوه قوالب
    مفيهمش خنساء ولا جاحظ
    عين المصحح مبهوتة
    من الخطوط المفلوتة
    المصحح:يا نهار مقندل مش فايت
    مش دى الاجابه المظبوتة
    اضبط يا ناظر واتصرف
    الناظر: يا نهار مزفت ومدوحس
    مش دى الاجابه العلميه
    شيلونى هيلا يا افندية
    نوصل لحد المديرية
    المدير: أنا مش مدير فى القصه دى
    وعينيا مش شايفه قصادى
    سؤالنا مفيهوش أمريكا
    والبنت هى المحقوقة
    وضرورى ...قطعا مزقوقة
    يا اما حزب الله فى لبنان
    يا اما سوريا او طهران
    او المقاومه العراقية
    قوموا بينا نعملها قضية
    (ومن الادارة التعليمى الى الادارة الامنية )
    آدى سين سؤال
    انطقى يا آلاء
    منين عرفتى أساس الداء ؟
    مين بلغك ان المأمور
    بيبوس فى رجلين الاعداء ؟
    مين جندك للشيوعية
    ولبسك اخوانجيه ؟
    انا ؟!
    أنا بنت مصر الحرية
    يا ديول ديول الحرامية
    سرقتوا فرحتى بشبابى
    سرقتوا بهجتى بكتابى
    سرقتوا من لغتى الاولى
    سطور فى كشكول التعبير
    خدوا منى صفر على غباكوا
    وألف صفر لكل جبان
    ما ذاكرش درسه عن الاوطان
    بتتبنى بفكر وايمان
    بتتبنى بدفتر مواليد
    فيه الشهيد قبل الفنان

    ***********
    شكر واجب:
    فلنشكر كل مخبر
    مبلغ عن آلاء
    من أول المصحح
    للناظر..للوزير
    كشفوا معدن ولادى
    وبلغوا الحبابيب...
    وبلغوا الاعادى
    ان النشيد مازال
    هو نشيد....بلادى

    القصيده نشرت فى جريدة الدستور فى صفحه كامله

  2. #2
    الصورة الرمزية vengada2010
      vengada2010 غير متصل أبو مــــــحمـــــــــــــــد
    تاريخ التسجيل
    Jul 2005
    المشاركات
    10,929
    يا جامد

    من امتي يا عم الحاجات الحلوة دي ؟؟؟؟



    [SIZE="5"][COLOR="DarkRed"]تركوك تحارب وحدك ثم عادوا ليقتلوك على شجاعتك



    ابدا لن ننساك يا عميد
    [/COLOR][/SIZE]

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك