موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



+ الرد على الموضوع
النتائج 1 إلى 5 من 5
Like Tree0Likes

الموضوع: فوت ستار ، كن نجم عالمي والعب مع منتخب مصر في كأس العالم

  1. #1
    الصورة الرمزية Dr_saycovich
    تاريخ التسجيل
    Aug 2007
    المشاركات
    154

    Flag Egypt فوت ستار ، كن نجم عالمي والعب مع منتخب مصر في كأس العالم

    نفسك تبقى لاعّيب كورة جامد وتلعب في أكبر أندية العالم؟


    لو نفسك تبقى لاعيب كورة جامد وتلعب في أكبر أندية العالم وكمان تلعب في المنتخب ! خش على موقع www.footstar.org , وده باختصار موقع برتغالي بيلعب فيه الآلاف من اللاعبين في العالم في أندية مختلفة والمتميزين فقط بيمثلو بلادهم دوليا والمنتخبات الافضل بتصعد لكأس العالم. كل اللي عليك إنك تنمي مهاراتك عشان تيجي لك عروض من أكبر الأندية في اللعبة . واللعبة مدعومة دعم كامل بالعربي بالشرح كمان.

    بدايتك في اللعبة

    - هتدخل على الموقع وتضغط على "تسجيل" , وهتلاقي خانات مطلوبة للتسجيل , حاول تحط اسم حقيقي ليك مش "اسم دلع" , ممكن اسم الدلع ده تحطه في النيك نيم بتاعك , وكمان حاول تحط شكل صحيح للعنوان !مش شرط تحط عنوان صحيح , بمعنى إنك تحط عنوان كامل لأي مكان والمكان ده مش لازم يكون عنوانك الحقيقي , يعني مثلا تحط 22 شارع النصر , المعادي , القاهرة. وفيه مجموعة خيارات تانية زي اللغة والبلد , ودي مهمة جدا إنك تسجل في البلد اللي إنت عايش فيها .

    - متحاولش تسجل أكتر من لاعيب واحد , لأن دي تعتبر من طرق الغش في الموقع وده مش مسموح بيه أبدا من الإدارة , ولو تم اكتشاف ده هتتوقف كل الحسابات , واحتمال كمان يتم حظرك نهائيا.

    - بعد ما تسجل في اللعبة هستتنى حوالي يومين لغاية ما يتم الموافقة على حسابك , بعدها هتيجي لك رسالة تطلب منك الدخول واختيار لاعب ! بعد الدخول , هيكون عليك إنك تختار اسم لاعيب ليك بشكل تخيلي من أسماء اللاعبين المتوافرين , ودي حاجة مهمة جدا لأنك مش هينفع ترجع تاني ! وكمان هيطلب منك شوية اختيارات تانية لكن أهم حاجة هو القدم اللي هتلعب بيها الشمال أو اليمين .

    - كل اللاعيبه هتبدأ المسيرة الاحترافية وعندها 17 سنة وكل ما يعدي موسم (الموسم 112 يوم) هيزيد عمرك سنة , وكل مهاراتك هتبقى 0 وإنت طبعا هتنميها , و مفيش خيار تقدر تختار منه مركز اللاعب ! لأن اللاعب هيتحدد مركزه حسب المركز اللي هيلعب فيه وكمان على المهارات اللي هتتمرنها , وطبعا إنت من الأول هتكون محدد المركز اللي هتلعب فيه.

    التدريبات

    - بعد ما تكمل خطوة اختيار اللاعب هيكون عليك تظبيط التدريب بتاع اللاعيب وعشان ميضيعش عليك تدريب ! انضم لفريق "آلي" , يعني فريق مبيدربوش واحد وبيتم إداراته بشكل آلي , وده هتعرفه من كتابته بلون رفيع لو دخلت على جدول الدوري في بلدك , وبعدها هتلاقي قائمة فيها جدول للتدريب بتاعك تقدر تظبطها.وحاول تدور على فريق بيدربه شخص تنضم ليه , وده من خلال إنك تروح على منتدى الإعلانات , وتكتب بالإنجليزي إنك ناشئ وعاوز تنضم لنادي وتلعب في مركز كذا , واختيار الفريق بيعتمد على بعض العوامل ! منها المرتب والمهارات اللي بيدربها النادي ولما تيجي لك عروض اختار أحسنها بالنسبة لك .

    - بالنسبة للتدريب ! فيه 3 تدريبات يوميا , الساعة 2 بالليل بتوقيت مصر والساعة 10 الصبح والساعة 6 بالليل وطبعا اختيار المهارات بيعتمد على المركز اللي هتلعب فيه , والأفضل طبعا إنك تختار تدريب لمهارة واحدة في اليوم الواحد والأفضل أكتر إنه يبقى زي التدريب العام اللي بيتدربه الفريق لأنك هتتمرن بنسبة 100% في الحالة دي , وحاول في الأول تعرف المهارات المطلوبة للمركز اللي هتلعب فيه , عشان متتمرنش مهارة ملهاش لازمة .

    - لما بتتمرن تمرين زي التدريب العام للفريق بتاخد 100% من التدريب لكن اللياقة بتقل 2% عن كل تمرين , ولو التدريب غير التدريب العام للفريق بتاخد 75% بس من كفاءة التدريب , وفي الحالة دي بتقل اللياقة 1% بس , ولو اتمرنت الثلاث تمرينات في اليوم الواحد زي بعض هتاخد زيادة أكبر بمعنى إنك لو هتاخد في التدريب الواحد 10% فإنت هتاخد في التدريب الأول 8% , هيكون التدريب التاني فيه زيادة 10% تانية , والتمرين التالت هيزيد بنسبة 12% , باختصار لو اتمرنت الثلاث تدريبات زي بعض هتاخد 30% من المهارة (المهارة دي بتكون من 0 لـ 20) , ولو اتمرنت 3 مهارات مختلفة هتاخد 8% بس من كل مهارة .

  2. #2
    الصورة الرمزية Dr_saycovich
    تاريخ التسجيل
    Aug 2007
    المشاركات
    154

    Great



    دي صورة من داخل اللعبة لاحد نجوم منتخب مصر للشباب تحت 21 عام

  3. #3
    الصورة الرمزية Dr_saycovich
    تاريخ التسجيل
    Aug 2007
    المشاركات
    154
    المنتخب وكاس العالم

    - طبعا تمرينك لازم يكون بكفاءة عالية , عشان تقدر تلعب في المنتخب (فيه 3 منتخبات , المنتخب الأول ومنتخب الشباب تحت-21 سنة ومنتخب الناشئين تحت-18 سنة ) ولعبك في المنتخب هيزود خبرتك , والخبرة دي ليها مستويات وبتأثر على أدائك في الملعب .
    منتخب مصر في اللعبة بيافس في المجموعة الثامنة لتصفيات كأس العالم ومركزنا الثالث بفرق ثلاث نقاط عن التاني وبيصعد الاول والتاني من كل مجموعة.

    - قبل ما تعدي على أي خطوة مش فاهمها وعاوز تستفسر عنها وتاخد استشارة من اللاعيبه القديمة في اللعبة , روح على المنتدى المصري وأي سؤال أو استفسار خش اسأل عنه بدون أي خوف والرد إن شاء الله هيكون سريع , وكمان حاول تقرأ كل قواعد اللعبة وتفهمها كويس عشان تبقى لاعيب جامد زي ماقولنا في الأول , هتقدر تخش التحدي ده ؟ وتبقى لاعيب جامد وتبرز قدراتك في مهارة كرة القدم . وده عنوان المنتدى المصري http://www2.footstar.org/jornal.asp?...sg=EG&cl=0&p=1 .

  4. #4
    الصورة الرمزية Dr_saycovich
    تاريخ التسجيل
    Aug 2007
    المشاركات
    154
    هوه المنتدي ده مفيش حد مشترك فيه ، ولا اللعبه معجبتش الناس؟ :)

  5. #5
    الصورة الرمزية Dr_saycovich
    تاريخ التسجيل
    Aug 2007
    المشاركات
    154
    تم اضافة 6 دول عربية للعبه

    لتصبح مصر والاردن والسعودية والجزائر والمغرب وتونس والكويت وقطر والامارات

  6. #6
    الصورة الرمزية Nemovich2009
    تاريخ التسجيل
    Aug 2009
    المشاركات
    40
    الف شكر علي اللعبه وانا فعلا مشترك فيها

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك