موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



موضوع مغلق
النتائج 1 إلى 7 من 7
Like Tree22Likes
  • 5 Post By
  • 17 Post By

الموضوع: دليلك الى عالم كمال الاجسام (سؤال و جواب عن كل شىء فى اللعبة)

  1. #1
    الصورة الرمزية Mr.Dreamer
    تاريخ التسجيل
    Sep 2006
    المشاركات
    5,436

    7 دليلك الى عالم كمال الاجسام (سؤال و جواب عن كل شىء فى اللعبة)

    بسم الله الرحمن الرحيم

    الى كل اعضاء و زوار قسم
    استفسارات كمال الاجسام


    نظرا لكثرة الاسئلة و تكرارها بدون سبب عملت الموضوع ده عشان يبقى مرجع لكل شخص عنده سؤال بما ان محدش غاوى يدور على اجابة سؤاله و بيستسهل و يعمل موضوع جديد
    الموضوع عبارة عن حوار بين الكابتن و اللاعب الجديد و هو سؤال و جواب لكل حاجة فى اللعبة سواء ( تمرين .. تغذية .. راحة .. جداول .. مكملات ..... الخ )

    و نبتدى الاول ب
    التمرين

    يا كوتش انا بلعب بقالى 10 سنين ههههههههه متقطع شهر العب واريح اتين او بلعب 6 شهور واريح 4 شهور وهذا وجسمى مش بيزيد !!!!! ايه الحل ؟ وعندك حل يخلينى انزل الصالة من غير ما اكسل حاجة تحفزنى يعنى ؟

    اللعبة دى بتاعة استمرار يعنى ما تقولش انا لعب وبطلتل شويه وتستغرب ان جسمك مش بيتحسن امال انته منتظر ايه ؟

    الحل انك يا جميل تفضل مستمر فى اللعبة لان جسمك بكل بساطة مش هيحافظ على حاجة انته مش مهتم بيها واحد عضلات جسمه مش بيمرنها الجسم هيخليها ليه لا هيبدا يهدما للحصول على احتياجاته من البروتين والسعرات وده هيسد نفسك عن الاكل وتلاقى حالة جسم اتدهورت وده لان جسم حضرتك محصلة لعوامل داخليه وهى الوراثة وعوامل خارجية وهى الموثرات البيئية واللى بيمثلها لحضرتك التمرين اذا مفيش تمرين مفيش استثارة من الوسط البيئى لجسمك تدفعه للحفاظ على كتله عضليه او زيادتها وانته مش بتتمرن

    عايز حل يخليك تنزل الجيم والله دى بقى حاجة ترجعلك انته عايز تتمرن ولا بتدخل الصالة عشان تخرج زهقك وتضحك ولا عايز تبقى حاجة فى اللعبة دى هقولك على ابسط الحلول اختار جيم قريب منك قدر الامكان وظبط التمرين مع واحد صاحبك تحس انه نشيط وبيحب الرياضة وما تظبطش مع واحد كسول يقولك يا عم بلاش انا تعبان وهئانتخ فى البيت النهارده
    و يا سيدى اقرا الموضوع ده و هيفيدك جامد جدا





    يا كوتش طيب انا هلعب خلاص بانتظام ممكن جدول تمرين ؟

    الاجابة والله التمارين كتير وومكن تختار منهم اى 5 تمارين للعضلة الكبيرة ( البش - الكتف – الظهر – الارجل ) و3 تمارين للعضلة الصغيرة ( الباى – التراى – الرست – السمانة )

    عايز تدخل عضلتين فى اليوم ينفع عايز تدخل عضلة واحده برده ينفع طب يرجع لايه ؟ لطبيعه جسم والله بتتعب جامد ومش بتقدر تتمرن وكمان مش بتاكل كويس اتمرن عضلة واحده يعنى دراع فى يوم والبنش فى يوم والظهر فى يوم والارجل فى يوم والكتف فى يوم

    عايز تدخل عضلتين ادخل بنش وباى( او تراى ) ظهر وتراى ( او باى ) اكتاف مع رست واخر حاجة الارجل




    طيب ايه هو جدول التمارين ؟

    طب انا هقولك فكرة حلوة .. مش كل شوية تيجى تسألنى عن جدول جديد لانك زهقت او مدة الجدول خلصت





    خلصت ؟ هو بيحمض ولا ايه يا كوتش ؟

    لا يا ظريف مبيحمضش بس كل شهرين على الاقل لازم تغير الجدول .. ليه ؟ اقولك انا .. اصل لو سعدتك فضلت طول حياتك ماشى على نفس النظام جسمك هياخد على اللى بتعمله و هيبقى ملوش فائدة بعد كدة

    مش احنا قلنا لازم تغير كل شوية عشان تستفيد ؟ والله انت مسطول ومش فاكر حاجة




    طب و الحل يا كوتش ؟ اعمل ايه دلوقتى ؟

    كل شهرين غير جدولك يا اما غير اكلك و هدفك بدل ما تضخم خس شوية و احرق دهون و العكس صحيح .. بدل ما بتلعب 12 عدة .. خليهم 8 مش خسران حاجة .. غير عدد المجاميع .. غير التمرينات .. غير الجيم يا جدع انت هتشلنى ليه ههههههههه

    و اادى يا سيدى الجداول عشان نخلص منك ! نقى براحتك و ونوع براحتك و كله شغال و تمام و متجيش تقولى طب انا عندى جدول جديد ادينى رأيك عشان هضربك





    السبت: بنش و باى
    الاحد: رجل
    الاثنين: راحة
    الثلاثاء: كتف و ترابيس و رست ( ساعد يعنى)
    الاربعاء: راحة
    الخميس: ضهر و تراى
    الجمعة: راحة
    ---------
    السبت: كتف و تراى
    الاحد: ضهر و باى
    الاثنين: راحة
    الثلاثاء: بنش و رس
    الاربعاء: راحة
    الخميس: رجل و سمانة
    الجمعة: راحة

    ---------
    السبت: ضهر و باى
    الاحد: بنش و تراى
    الاثنين: راحة
    الثلاثاء: رجل و سمانة
    الاربعاء: راحة
    الخميس: كتف و ترابيس و رست
    الجمعة: راحة
    ---------
    السبت: بنش
    الاحد:ضهر
    الاثنين: راحة
    الثلاثاء: كتف و ترابيس
    الاربعاء:رجل و سمانة




    الخميس: دراع كله ( باى و تراى و رست)
    الجمعة: راحة









    --------


    المهم يا عم تهتم بالراحة اكتر من اللعب حتى فى جداول ال 5 ايام و 2 راحة بس .. مش ناس كتير بتمشى بيهم لانهم مبعرفوش يتجنبوا التمرين الزائد اللى هو اوفر ترايننج




    اوفر ترايننج مين يا كوتش و الناس نايمين ؟ ايه ده كمان ؟

    ما انت لو فايق و رايق كنت قاريت المواضيع اللى معمولة فى القسم العام بس اقول ايه .. حسبى الله






    خش يا سيدى على اللينك ده و انت تفهم و ياريت بلاش كسل و تقرأ للاخر











    اوباااا يا كوتش ده الموضوع خطير اوى! طب اتجنب البتاع ده ازاى ؟

    ما يا ناصح انا كتبتلك متزودش عن ساعة فى الجيم و طرق تجنب الهرمون ده








    ساعة ايه بس يا كوتش دنا يادوب بلعب بار على فى ساعة اومال بقيت التماناشر ولا 20 تمرين اللى بعملهم هوديهم فين ؟

    تماناشر ؟ يخربيتك يا جدع .. و عايز تزيد ؟ طب ازاى فهمنى






    بص يا عم من غير رغى هو 5 تمارين فقط لا غير للعضلة الكبيرة و 3 للصغيرة زى ما قلت فوق هتلعب المهم و الاساسيات بس و فكك من تمارين الكابل و الاجهزة لان كترتها مش مفيدة و مبطلعش عضلات زى البلدى اللى هو بار و دمبل




    طب و النبى يا كوتش اعتبرنى ميحا بلاطة يعنى مليش فيها .. ممكن تكتبلى ال 5 تمارين دول و الحاجات ديه بس بالصور اصلى مبفهمش عربى ؟

    ماشى يا عم لما نشوف اخرتها .. بص يا سيدى:







    البنش:






    بار عالى:








    تجميع مسطح:








    بار مقلوب:








    تفتيح مسطح:








    اوفر:









    و زى ما قلت تغير و تنوع ياض دايما مش شرط حاجة معنية خليك لذيذ و متاخدش التمرين بأفش عشان يجيب بفائدة و يبقى الاسبوع اللى جاى مثلا تلعب:





    دمبل عالى:








    بار مسطح:








    تجميع دمبل مقلوب:








    تفتيح عالى بالدمبل:








    فراشة:











    الضهر:








    عقلة امامى:








    مرجحة بار:








    دمبل مجنص:








    سحب ارضى على الجهاز :








    قطنية رفعة ميتة:










    و الاسبوع اللى جاى تغير برده و اللى بعده نفس الحوار اقعد بدل فى الحاجات اللى فيها اشكال كتير زى العقلة مثلا فيها قبضات كتير جدا





    عقلة خلفى:








    قبضة معكوسة مرجحة بالبار:








    سحب ارضى: ( صورته فوق )





    عقلة قبضة معكوسة:








    قطنية رفعة ميتة بالبار برده: ( صورته فوق )
    التعديل الأخير تم بواسطة Mr.Dreamer; 11-01-2010، الساعة 07:22 PM






  2. #2
    الصورة الرمزية Mr.Dreamer
    تاريخ التسجيل
    Sep 2006
    المشاركات
    5,436
    الكتف:




    رفرفة امامى:

    رفرفة خلفى:

    رفرفة جانبى:

    بار امامى:

    تجميع دمبل جانبى:

    وبدل برده اسبوع و اسبوع من غير ما اكتبلك بقى عشان شلتنى .. الدمبل فردى خليه زوجى او بار او كابل هتلاقى عندك لينك فى الاخر فيه كل التمارين و عيش يا عم بس متزودش عن 5 زى ما قلت قبل كدة

    الترابيس :


    تنقى 2 تلعبهم كل اسبوع سامع !!

    بار قدام رجلك:

    بار من ورا ضهرك:

    دمبل جانبى:

    سحب امامى:


    الباى:


    دمبل تبادل:

    بار قبضة متوسطة:

    بار على الحصان:

    و الاسبوع اللى بعده تغير

    بار قبضة ضيقة:

    ارتكاز بالدمبل فى الكوع:

    تكوير على جهاز الكابل:

    التراى:






    دمبل فرنساوى فردى:

    دفع لتحت بالمسطرة على جهاز الكابل:

    دمبل كيك باك:




    و اللى بعده

    بنش قبضة ضيقة:

    دمبل فرنساوى ورا راسك:

    دفع لتحت بالمسطرة و ايدك معكوسة زى اللى فوق بس اعكس ايدك الناحية التانية



    و فيه تمارين تانية حلوة زى المتوازى طبعا و البار ورا راسك المهم انك تنوع ساااااااامع
    التعديل الأخير تم بواسطة Mr.Dreamer; 26-09-2009، الساعة 02:17 AM

  3. #3
    الصورة الرمزية Mr.Dreamer
    تاريخ التسجيل
    Sep 2006
    المشاركات
    5,436
    الرست:




    بار بقبضة معكوسة و ايدك كلها مسنودة على رجلك او دكة:

    بار بقبضة عادية:

    هامر سواء بار او دمبل او جهاز ( اللى الناس فاكراها تمرينة للباى ايوا ):



    و بدل بقى البار بالدمبل فى كل اسبوع و كله موجود فى اللينك تحت



    الرجل:



    بار قرفصاء ( سكوات ) و رجلك 11 و بعدين على شكل 7

    طعن امامى دمبل او بار:

    على جهاز الرجل امامى:

    و خلفى:




    السمانة:







    رجلك مرة تبقى 7 و مرة تبقى 11

    و اادى يا سيدى لينك لكل التمارين بالصورة المتحركة بما انك مبتقراش عربى







    طب يا كوتش مقلتليش اعمل كام عدة يعنى و كام مجموعة ؟
    خليك فى الطبيعى ياض اللى هو من 8 الى 12 لكن لو عايز تضخم يبقى خليك من 6 الى 8 عدات فى 3 مجاميع للعضلة الصغيرة و 4 للكبيرة قلنا


    بس احذر .. مش كل العضلات كدة .. اصل يابنى العضلات نوعين فيه اللى بيزيد بالعدات الكتير و الوزن الخفيف و ده ( سمانة و رست ) و فيه اللى عايز وزن تقيل و عدات قليلة عشان يزيد ( كتف و ضهر و رجل و بنش ) و الباى و التراى بقى عضلتين صغيرين يعنى تلعب باللى تقدر عليه و اهم حاجة الحركة الصح و اقل حاجة 6 عدات برده بس مش وزن تقيل على الفاضى



    و البطن بقى يا سيدى مش كل يوم زى الناصح تلعبها عشان تنشف .. قلنا 3 ايام فى الاسبوع حلو اوى يوم للعضلات العلية و يوم للسفلى و يوم للجانبى4مجموعات فى 25 عدة و الراحة دقيقة بين المجاميع لكل العضلات بس كدة و افضل ال 3 ايام عن بعض عشان تستريح سااامع




    صحيح يا كوتش امسك البار منين ؟ اصل فيه ناس بتقولك ده يتلعب ضيق زى الكتف الامامى و معرفش البنش يتلعب واسع عشان يعرضك و حاجات كدة ؟
    امسكه من ودنه هتمسكه منين يعنى
    بص ياض .. البار علطول بتبقى قبضة متوسطة فى اى تمرين كان ما عدا التمارين اللى بتتنوع فيها القبضات زى الباى لان قبضاته ال 3 ( واسعة و متوسطة و ضيقة ) بتركز على اماكن مختلفة من العضلة
    اى عضلة تانية تمسك من النص و مش معنى كدة نص البار لا يا ناصح ما انت ممكن البار يكون طويل جدا عليك و النص بتاعه يبقى اعرض من كتفك .. انا عايز قبضتك و كتفك يعمله زاوية 90 درجة مع بعض يعنى لا داخل لجوة دراعك ولا طالع لبرة ماشى ؟

    بس يا كوتش .. انت عارف انى مبلعبش رجل .. اصل زى ما كله بيقول ( ابنى من فوق الاول و بعدين ابنى من تحت براحتى ) ؟
    اه ما انت بتعرف ناس زبالة .. بص يا سيدى .. ينفع تبنى عمارة من فوق الاول و بعدين تحت ؟ اكيد لأ .. مدام الاساس بايظ يبقى كله هيخرب
    يعنى ايه الكلام ده ؟ يعنى لو اهملت رجلك طبعا مش هتزيد بطريقة كويسة ليه ؟ عشان لعب الرجل و خصوصا تمرين القرفصاء بيساعد على افراز هرمون الذكورة و هرمون النمو بطريقة اكبر من التمرينات الاخرى
    يعنى العب رجل تزيد من فوق
    و كمان لو ملعبتهاش .. و نفرض ان ربنا نفخ فى صورتك و زدت من فوق كدة وزنك هيتقل على ركبك و مفاصلك و مش هتعرف تمشى عدل و اى خبطة بسيطة فى رجلك هترقد لانها ضعيفة و مش مستحملاك .. ده غير ده كله هتبقى ماشى بجسم بقرة و رجل كتكوت
    و لما تيجى تلعبها عشان تزودها مش هتزيد معاك بنفس السرعة لانك اهملتها فى الاول و دائما هيبقى فيه فرق ملحوظ بين جسمك من فوق و رجلك
    لاعب كمال الاجسام اللى رجله ضعيفة يلعب بللى افيدله !!

    خلاص يا كوتش والله مانا مزعلك .. هلعبها و امرى لله .. طب يا كوتش انا عندى البنش فيه حبة دهون ايه رأيك هعمل 40 عدة فى 6 مجاميع مثلا عشان احرق الدهون اصل الكابتن بتاعى فى الجيم قاللى كدة ؟
    قول للكابتن بتاعك يبيع بطيخ افيد .. ما انت لو قريت موضوعينى عن الافتكاسات كنت عرفت ان الحاجات ديه غلط و بتحرق العضلة مش الدهون يا ناصح


    خد ياض اللينكات اهى و لما تخلص قراءة ادعيلى بقى







    يااااه يا كوتش .. نورتنى تانى والله بعد ما كنت زى الحمار سوررى يعنى انا هبطل اسمع كلام الناس فى الجيم بقى دول شكلهم مبيفهموش حاجة


    طب دلوقتى بعد ما فهمت ان العدات الكتير مبتحرق الدهون .. سؤاااال لولبى .. علل ؟ ايه بيحرق الدهون ؟
    بص يا عم اللولبى اللى بيحرق الدهون هو الكارديو و التغذية السليمة



    ايه يا كوتش الهندى ده يعنى ايه كارديو ؟
    الكارديو ده يا سيدى يعنى التمارين الهوائية ( و لا هوائية مش هتعملها و انت طاير يعنى ) هوائية ديه اللى بتحرقلك دهونك و منها


    ( الجرى و ده احسنهم .. العجلة .. السلم .. نط الحبل .. الرياضات اللى فيها جرى برده ) من الاخر ياض اى حاجة بتخليك تنهج و لسانك مدلدل لانك كدة معدل نبضات قلبك بيبقى عالى و ساعتها هتحرق الدهون اللى مضايقاك ديه



    طب و امتى احسن وقت ده للكارديو يا كوتش ولا قد ايه ولا فى يوم ايه ؟
    احسن وقت اول ما تصحى من النوم و انت عينيك معمصة و مكلتش حاجة .. ليه ؟ عشان معدل الجليكوجين فى دمك بيبقى قليل و بالتالى الحرق هيبقى اعلى من اى وقت تانى

    لكن لو زى الناصح جريت بعد ما كلت .. هتحرق اللى كلته و ما استفتدش بحاجة زى ما كنت هستفيد الصبح

    هتقولى يا كابتن انا بصحى متأخر و مكسل و ورايا شغل يبقى تجرى بعد التمرين و ده ثانى افضل وقت للجرى و هتحرق دهون برده

    عايز تعرف اجرى قد ايه ؟ يبقى لازم تقيس نسبة دهون جسمك عشان تعرف التغذية و الكارديو هتقولى يا كوتش ده فيلم هندى و معرفش فين .. يبقى خلاص نمشى بالبلدى

    عندك دهون بسيطة فى الرجلين و البطن ؟ وزنك من 70 الى 87 كيلو ؟

    هتجرى 4 ايام فى الاسبوع اول ما تصحى من النوم 30 دقيقة كل مرة

    عندك دهون كتير فى كل حتة فى جسمك ؟ ملظلظ من الاخر ؟ 87 كيلو و انت طالع

    هتجرى 5 ايام فى الاسبوع 45 دقيقة كل مرة اول ما تصحى من النوم .. و 3 ايام كمان 25 دقيقة عجلة او نط حبل بعد التمرين

    و كل ده طبعا بجانب التغذية .. يعنى مش تعمل كل ده و تروح تاكلى برجر و بيض مقلى و سمنة و زيت تبقى ناصح كدة بقى

    لازم تبعد عن الدهون خالص يعنى اى حاجة فيها سمنة و زيت و مقلية و محمرة و ايس كريم و بيبسى و حلويات و الكلام ده متجيش جنبه و تاكل مسلوق و مشوى بسسسسس ماشى ؟
    و عشان تفهم بطريقة اوسع شوية خد اللينك ده هيفهمك كل حاجة بالتفصيل




    طب انا كرشى بس اللى مضايقنى و الكابتن فى الجيم قاللى هديلك حزام رهيب ساحر والله تحطله على كرشك يقعد يهز فيه لحد ما تخس و تعرق جامد

    و كمان واد صاحبى قاللى البس كيس نايلون ولا بلاستيك و انت بتلعب عشان تعرق جامد و تخس و يلهوى يلهوى على حبوب التخسيس ديه بتعمل نتائج رهيبة العيال قالولى ايه رأيك يا كوتش ؟
    ياض انت بتفهم منين .. مش معنى انك بتعرق يبقى كدة بتخس لا طبعاااا .. العرق ده من المياه اللى بتشربها و لما جسمك حرارته بتسخن بيفرز عرق عشان يرطب الجلد بدل ما تولع ولا جلدك يجيله تسلخات من الحرارة و تتحرق يا ناصح .. يعنى من الاخر الكلام ده كله مضر و ملوش لازمة و الناس اللى فى اعلانات الاحزمة ديه بتمشى بالطرق الصعبة و واخدين فلوس عشان يشتغلوك و انت بتصدق اى حاجة

    و كمان حبوب حرق الدهون ديه مش سحر .. ديه بتساعد مش اكتر يعنى لو الكارديو مفيش و التغذية غلط يبقى فلوس على الفاضى

    فهمت ياض و كمان برده مفيش حاجة اسمها تحرق دهون من حتة و حتة لأ مش هنفتى .. الدهون بتتحرق من الجسم كله يعنى غصب عنك يعنى و متحاولش بقى تعمل حاجات عجيبة قال ايه هحرق دهون كرشى بس



    اااه يانى يا كوتش .. انا رحت الجيم و جالى مزق فى كوعى و ركبتى و رست ايدى و جسمى كله شادد و حاسس انى مضروب بالنار ده من ايه ؟
    عملت اطالات ياض ؟ اكيد لا و هتقولى يعنى ايه اطالات طبعا بص يا سيدى ديه تمرينات بتعملها بتسخن العضلة و المفاصل عشان متتمزقش و معمولها موضوع من زمان بس حضرتك نايم على ودانك برده و اادى اللينك يا سيدى



    و كمان مش ده السبب الوحيد .. انت لما بتروح الجيم طبيعى الياف العضلة بتتبهدل و تتقطع كلها عشان كدة بتفضل وجعاك يومين بعديها مثلا و اللى مبتوجعوش مش معنى كدة ان شغله غلط .. لا بتختلف من جسم لتانى و متحطش فى دماغك انت بس



    طب انت شكلك بتشتغلنى يا كوتش يعنى تقولى ساعة و متزودش عن كدة عشان متخسرش عضلات و بتاع .. اذا كان التسخين لوحده ربع ساعة طب تيجى ازاى ديه ؟
    ياض بطل غباوة منا قلتلك 100 مرة قبل كدة الساعة ديه للتمارين بس من اول ما تبتدى تمسك دمبل و تلعب بيه بس التسخين ده متحطوش ضمنها و متتعبش نفسك فى التسخين يا ناصح .. يعنى اطالات على مجموعتين عقلة و ضغط و بس كدة مش تقعدلى شهر تسخن و تخلصلى الباور اللى عندك

    و الناس اللى فى الصور ديه يا كوتش اللى عندهم 6 باكس كدة و جامدين دول انا عايز يطلعلى 6 باكس و النبى يا كوتش اعمل ايه ؟
    تعمل جمعية هتعمل ايه يعنى
    هتخس .. بطل تاكل دهون و بطل كمان تشرب بيبسى و الحاجات ديه و اهتم بالكارديو بتاعك و هما يطلعوا .. اقولك حاجة احسن
    دوس هنا و انت تعرف تعمل ايه بلاش رغى كتير


    كان عندى سؤال محرج شوية يا كوتش .. انت عارف ان الشيطان شاطر و ربنا يسامحهم بتوع الاوروبى و الهوت بيرد 24 ساعة مشغلين حاجات قبيحة و انا مبقدرش امسك نفسى و شغال على العادة السرية اعمل ايه طيب ؟
    بص يا ضنايا .. انا مش هتكلم كتير لان مفيش اكتر من مواضيع العادة السرية و اضرارها فى المنتدى و ازاى تخلص منها
    و ااادى لينكين كمان لما نشوف اخرتها معاك



    انا فى السليم كدة خلاص يا كوتش بس للاسف عندى خبر زبالة .. كنت بهزر انا و حموكشة صحبى فى التمرين امبارح راح حادفنى ب دمبل و انا بلعب و جالى مزق فى كتفى منه لله اعمي ايه بقى ؟
    تريح خالص يا ذكى حتى لو المزق بسيط عشان ميطورش و متعرفش تعالجه و كمان تستعمل تلج عليه و اى كريمات للمفاصل و فيه واحد اسمه ( ريباريل جيل ) ده بيعمل شغل جامد لأى الم عموما
    و لو وجعاك جامد يبقى روح لدكتور عظام احسن و هو يقولك اعمل ايه متروحش تسألى واحد عندك فى الجيم و حط فى دماغك كابتن الجيم ده مش دكتور ده بيقولك كلام و خلاص و ساعات مبيجبش نتيجة
    و بعدين خد هنا ما فيه موضوع معمول عن الاصابات مقرتهوش ليه ؟



    طب انا ليا صحابى يا كوتش بيلعبوا لعب تانية مع الجيم يعملوا ايه بقى ؟
    بص ياض اللى عايز من صحابك يلعب لعبة تانية مفيش مانع بس يظبط جدوله بين الجيم و اللعبة التانية يعنى يحاول بقدر الامكان ميتعبش نفسه و لو اللعبة فيها مجهود كتير يلغى الكارديو بتاعه و يفصل على الاقل 6 ساعات بين تمرين الجيم و اللعبة التانية و كمان لازم يوم فى الاسبوع يبقى راحة من اى مجهود خالص عشان استشفاء العضلة و يهتم بتغذيته برده عشان ميحصلوش ضعف فى جسمه بسبب المجهود الكتير

    صحيح مقلتليش يا كوتش اعمل ايه اول ما امسك الدمبل احس انى بترعش و اعصابى بايظة مش عارف من ايه ؟
    عادى جدا اعصابك ضعيفة من العادات المتخلفة اللى بتعملها و منها العادة السرية و شرب السجاير و الفرجة على التليفيزيون و الكمبيوتر
    الحل انك تهتم بالفيتامينات و المعادن اللى بتاخدها يوميا و اشرب لبن كتير و فكك من حقن التراى بى و الانجكشن بتاع الاعصاب عشان بيتعبها فى المستقبل خليك فى الغذاء و المالتى فيتامين بس
    و تجنب العادات السيئة ده و كله هيتظبط مع الوقت متستعجلش المهم

    الحقنى يلهوى يانى يا كوتش .. ايدى احمرت و انا فى فترة الضخامة و طلعلى خطوط حمرا كدة فيها ايه هموت ؟
    لا يا ناصح مش هتموت ده عادى جدا الجلد بيتشقق عشان عضلة حضرتك بيزيد حجمها و واحدة واحدة هتلاقيها بتروح لما الجلد يتأقلم مع الحجم الجديد و نفس الموضوع الخطوط البيضاء لو بطلت تلعب و خسيت شوية برده بتروح مع الوقت لما الجلد يتظبط

    صحيح يا كوتش .. الناس اللى عندها كتف اعلى من كتف و بنش ازيد من بنش و دراع اكبر من التانى يعملوا ايه و ليه اصلا الكلام ده ؟
    شىء طبيعى جدا ان جسم الانسان مش متساوى بيختلف فى النسب يعنى فيه حد باين الفرق بين دراعاته و صدره و فيه واحد الفرق مش ملحوظ .. و موضوع كتف اعلى من التانى ده عشان بيلعب بأوزان تقيلة غلط و الحل يا سيدى انك تخفف الوزن و تلعب صح 12 عدة المجاميع بار امامى كتف و الترابيس ظبط لعبك فيها و لو فيه جهاز ( سميث ) فى الصالة يبقى افضل و ده البار المتعلق جاهز عشان ايدك متتهزش و لازم الواحد يتجنب الموضوع ده فى اى عضلة تانية كمان و ميلعبش غلط بأوزان تقيلة على الفاضى

    طب يا كوتش انا بحب اسمع موسيقى شعبى و يانى يانى فى الجيم .. ايه رأيك فى الموضوع ده ؟ اصلها بتحمسنى و بتخلينى بتنطط ؟
    تتنطط ايه يا عم الشمبانزى .. و شعبى ايه يخربيتك
    اقولك حاجة حلوة .. اقرا الموضوع ده فيه المفيد

    الموسيقى و علاقتها بكمال الاجسام

    كوتش ربنا يخليك انا ابويا فلس و بعنا اللى ورانا و اللى قدامنا و اضطرينا نعزل من فيلتنا فى المعادى و رحنا الصحراء .. و اقرب جيم منى حوالى 3 ساعات .. اعمل ايه انا هتجنن ؟
    بص يا عم المفلس .. مدام خلاص مفيش امل انك تخش جيم قريب يبقى لازم ترضى بقليلك .. يعنى ايه ؟ يعنى حاول تتصرف فى بار و دمبل من اى داهية و تشترى شوية اوزان على دكة و تعيش مع نفسك فى البيت على نفس الجداول اللى موجودة فوق بس طبعا التغذية بتاعتك هتقلل السعرات فيها بما ان مجهودك قل
    و لو مش هينفع خالص لا بار ولا دمبل .. يبقى عليك و على العقلة و الضغط بجميع انواعهم و تسخينات الرجل و الاستطالات و برده هتعملهم فى صورة جدول 5 ايام التمارين ديه و يومين راحة
    و مجموعات عادى جدا كانك فى الجيم
    و متهملش الكارديو حتى لو مش عاوز تخس .. عشان تحافظ على جسمك انه ميزدش دهون و العضلات متقلش للدرجة بما ان سعادتك مريح

    خلاص يا كوتش انا احترفت و باقيت واد معدى على الاخر .. و اسلوب التمرين بتاع الهواة ده مش نافع معايا .. انا عاوز حاجة تكسرنى .. تهلكنى فى الجيم .. اطلع مش قادر اروح من قوة التمرين ؟
    بص يا عم المعدى .. مدام خلاص واثق انك عديت مرحلة المبتدىء و دلوقتى فى مرحلة المتوسط و عاوز اساليب ضخامة تانية غير العادى و اساليب تزودلك قوة التحمل عندك فى العضلات يبقى تقرا الموضوع ده لاخره و تمشى عليه بالظبط

    التعديل الأخير تم بواسطة Mr.Dreamer; 07-03-2010، الساعة 04:04 PM

  4. #4
    الصورة الرمزية Mr.Dreamer
    تاريخ التسجيل
    Sep 2006
    المشاركات
    5,436
    ثانيا
    التغذية


    طب يا كابتن انا بلعب بقالى 4 سنين متواصل وبانتظام ومفيش اى تقدم ممكن السبب ؟
    والله حاجات كتير التغذية اولا والراحة ثانيا والتدريب ثالثا
    التغذية انته مش هسالك بتاكل اد ايه ؟ لا هسالك واقولك انته بتاكل ايه وازاى وامتى ؟

    هتاكل ايه ؟ اكيد لازم تهتم بالبروتينات والكاربوهيدرات والدهون غير محبب الاعتماد عليها فى طهى الطعام
    امتى ؟ والله انته عندك 5 الى 6 وجبات حاول توزعهم على طوال اليوم بشكل جيد وبكميات جيده وده حسب مراحل اليوم واللى بتتقسم بالنسبة للاعب كمال الاجسام كالتالى
    الصبح الساعة 7 لما تصحى فترة استفاقة للجسم حضرتك محتاج كارب سريع زى السكر او العسل لاسود وبعدها تبدا تاخد فطورك ولا زم يكون الافطار غنى بالكربوهيدراتفترة الساعة 10 جسمك محتاج بقى بروتين يبقى لاوم تاخد بروتين بكمية جيدة مع فيتامينات واللى مصدرها هيكو ن الخضروات او مكمل فيتامينى ده بالاضافة لقليل من الكربوهيدرات
    فترة الساعة 1 انته محتاج تاكل فواكهفترة الساعة 3 الى 4 عصرا وجبه الغداء يعنى الوجبه الاساسية ودى لازم تكون متزنه جدا وبتضم كل انواع المواد الغذائية بروتين وكاربوهيدرات وفيتامينات ومعادن ودهون مفيدهازاى ؟ اولا فى ناس بتلخبط وهى بتاكل تلاقيه مش بياكل لا بيزلط هههههههههه وطبعا الماء على الاكل حدث ولا حرج وبعد الاكل بيبسى وشاى ودخان يحبس بيهم الله اكبر هههههههههه يتحسدوا والله !!!!!!! غلط يا حبيبى الكلام ده
    الاكل لازم يكون بالراحة واحده واحده وتمضغ الاكل كويس وشرب الماء يكون قبل الاكل بنصف ساعة او بعد الاكل بساعتين وممكن نصف كوب ماء خفيف بعد الاكل مش هياثر لو كنت عطشان اوى طبعا الببسى والشاى والكلام ده كله عادات غذائية سيئة جدا بعد الاكل وليها موضوع هتكلم فيه بالتفصيل عن العادات دى واضرارها باذن الله قريب
    الراحة انته بتنام كام ساعة وازاى وامتى ؟
    كام ساعة انته محتاج 7 الى 8 ساعات ولازم يكونوا بالليل بداية من الساعة 11 بالليل ولازم يكونوا متواصلين لان النوم بيقسم مراحل وفى كل مرحله الجسم بيتتم اداء عمليات محددة ومرتبطة بتواصل فترة النوم زى النوم فى مراحل واجزاء الجسم المختلفة وربنا يسهل واجمع معلومات كويسه بالخصوص ده وانزلها فى موضوع قريب ان شاء الله برده و التدريب اتلكمنا عنه فوق
    و خد اقرأ الموضوع ده هيجبلك من الاخر

    خلاصة تغذية لاعب كمال الاجسام

    طب يا كوتش انا لو رفيع و عايز اضخم ااكل ايه ؟ و الواد حموكشة صحبى تخين و عايز يخس و الدكتور كاتبلو على دايت تفاحة فى اليوم و يتعشى خيارة ايه رأيك ؟
    بص ياض .. رفيع و عايز تضخم يبقى تاكل سعرات حرارية اكتر من اللى بتحرقه طبعا و تزود البروتينات و الكربوهيدرات جدا
    متوسط و عايز تحافظ على شكلك يبقى تاكل سعرات قد اللى بتحرقها بالظبط و كله نسب تقديرية يعنى
    اما لو حضرتك تخين و عايز تخس يبقى تاكل سعرات اقل من اللى بتحرقها و فى ال 3 حالات لازم تتوزع على مدار اليوم قلنا 5-6 وجبات عشان الجسم يحرق بسرعة و ميخزنش حاجة فى صورة دهون

    و قول للواد صحبك السلحفاة اللى بياكل خيارة ده يفكه من النظام اللى ماشى عليه .. دكاترة التخسيس عايزين فلوس و خلاص زيهم زى كباتن الجيم تروح للدكتور اليومين دول يقولك هتفطرلى ربع تفاحة و معرفش زتونة و الكلام الاهبل ده .. اكيد هتخس يا ناصح ما انت مبتاكلش و طبعا هتخس بطريقة غير سليمة

    و فيها ايه يعنى يا كوتش لما اخس بطريقة غير سليمة هموت مثلا هاع هاع مهو كله خسسان ؟
    لا يا ناصح مش كله خسسان و لا مش هتموت بس هتتعب جدا لدرجة انك هيغمى عليك من قلة الاكل و مش بعيد تروح فيها و نخلص منك يا شيخ و غير كدة اتفرج بقى يا سيدى على الترهلات اللى فى جلدك عشان خسيت بسرعة و الجلد ملحقش ينكمش هتيجى تتغذب عشان تشيل الجلد ده و اول ما ترجع تاكل تانى اللى نفسك فيه اتفرج على الدهون اللى هتتخزن بقى عشان جسمك خايف لا حضرتك تذتذكى تانى و تبطل اكل هيقوم مخزن كل اللى بتاكله فى صورة دهون ( الاحتياط واجب يعنى )

    طب فعلا الواد حموكشة طلعله ترهلات يعمل ايه بقى ؟
    هيفضل يجرى لحد ما تقل تدريجيا لان الكارديو بيحرق الدهون زى ما قلت و الجلد خلايا دهنية و اكيد هتقل مع الكارديو و الوقت طبعا لازم يصبر

    ماشى يا كوتش .. نفرض انى واد بقى خريج تجارة و بموت فى النسب المظبوطة اعمل ايه عشان احسب سعراتى اللى المفروض اكولها كل يوم ؟
    الشغل ده بفلوس بس يلا مش خسارة فيك




    عشان مترغيش كتير هتكتب البيانات المطلوبة منك و هيطلعلك سعراتك الحرارية قد ايه اللى لازم تاكلها يوميا اعمله داونلود انت بس
    الباسورد ( www.dvd4arab.com )


    خلاص يا كوتش نزلته و كله تمام و عرف السعرات بتاعتى قد ايه .. اعرف بقى سعرات الاكل نفسها منيين ؟ يعنى كيلو اللحمة فيه قد ايه بروتين و الحاجات ديه يا كوتش ؟
    مش بقولك حضرتك قاعدلى رجل على رجل و مكسل تدور .. بص يا سيدى عمك عمر مهران عامل موضوع من زمان كاتب فيه الحاجات ديه و كمان الموضوع ده عشان لو عايز جسمك يبقى متناسق ولا ضخم اوى ولا رفيع اوى من الاخر جسم مودلز
    و اادى اللينك اقراه و تعالى


    و كمان عندك الموقعين دول هيفيدوك اوى فى معرفة القيم الغذائية





    خلاص قرأته يا كوتش و فهمت كل حاجة طب دلوقتى انا عمال باكل زى البغل و مبزدش ولا سم ولا حتى لما بشرب البيبسى ولا اكل الدهون و معنديش كرش و معصعص ايه ده ؟
    ده يا سيدى سبب وراثى عندك بيبقى حرق السعرات عالى اوى فى جسمك عشان كدة مفيش حاجة بتتخزن و ده تخلص منه عن طريق الجيم .. يعنى لما تروح و تلعب و تتغذى صح هتلاقى نفسك بتزيد تدريجيا و جسمك بيتعدل
    و فيه ناس مبينفعش معاها الجيم لوحده يبقى تعمل ايه يا شاطر ؟ تروح لدكتور ( بيفهم اهم حاجة ) بتاع جينات يعملك تحاليل ويشوف عندك ايه و ان شاء الله يعالجك و تبقى تمام و تاكل سليم و تلعب سليم



    فل عليك يا كوتش يا جامد .. ايه رأيك بقى فى مشروب الطاقة اللى هو 7 بيضات نيئة طازة لسة كاسرهم و حبة لبن و سكر و سمنة و زيت و اى حاجة موجودة هحطها و اضرب كله فى الخلاط و اشربوا ؟
    و بعد ما تشربه هتبقى سوبر مان يعنى ؟ هتطير ياض ؟
    ايه العك ده كله .. البلاوى ديه فيها كمية دهون بالعبيط و معدتك هتتقلب .. غير كدة مش قلنا البيض النىء غلط ؟ ليه ياض ؟ عشان بيجيب مرض اسمه ( سلمونيلا ) و ده يا سيدى هيبوظلك حياتك و هتندم انك شربت بيض نىء غير كدة يا ناصح انفلونزا الطيور اللى شغالة .. احسن طريقة لاكل البيض هو سلقه و تاكل البياض بس و بلاش الصفار عشان الكولستيرول
    التعديل الأخير تم بواسطة Mr.Dreamer; 31-01-2010، الساعة 12:20 PM

  5. #5
    الصورة الرمزية Mr.Dreamer
    تاريخ التسجيل
    Sep 2006
    المشاركات
    5,436
    ثالثا
    المكملات الغذائية

    يا كوتش تعالى بسرعة الحقنى انا عيز اظبط كورس مكملات يخلينى زى روونى كولدير ولا جاى كاتلرز ؟
    كوولدير و كاتلرز ؟ تيييت
    ولا .. انا عايز افهمك حاجة المكملات ديه مش سحر يعنى ايه ؟ يعنى لو تغذيتك مش سليمة اكيد المكملات مش هتجيب معاك نتيجة لانها مش اساسية و مش محتاجها الا لو تغذيتك ضعيفة
    و كمان الابطال دول مش بياخدوا مكملات بس لا منشطات كمان ده غير التمرين و الراحة و التغذية مفيش حاجة لوحدها بتعمل نتيجة

    ايه ده يا كوتش يعنى انت قصدك انى مش محتاج المكملات عشان اضخم ؟
    اكيد يا ناصح مدام تغذيتك سليمة و كافية يبقى هتعمل احلى شغل من غير مكملات احنا بس بناخدها عشان تغذيتنا مش سليمة سليمة بنسبة 100 %

    خلاص يا كوتش و انا كمان تغذيتى مش سليمة طب ايه رأيك اخد ايه ؟ انا سمعت عن الماس ميكر و الامينو و الميجا ماس و معرفش حاجات كدة كلها ماسات كهربائبة اعمل بيهم ايه دول ؟
    بص ياض .. كل اللى بيتباع فى الجيمات المصرية ده مضروب بالنار عشان الكابتن بتاعك عايز يطعله مصلحة عالية يجيب هو الحاجة ب 50 و يبيعها ب 300 و كله سرقة
    عايز تعرف اساسيات المكملات ؟ اقولك يا سيدى

    اولا:

    الواى بروتين:

    و ده من افضل انواع البروتينات اللى موجودة دلوقتى و هو بروتين مصل اللبن و سريع الهضم و الامتصاص و فوائده عالية و فيه شركات منتجة كتير و احسن شركة فيهم ايه ؟ اوبتيموم نوتريشن Optimum Nutrition و عملين اصدار جديد من الواى بروتين و هو جولد ستاندارد ده مزودينلك عليه جلوتامين كمان و احماض امينية

    طريقة استعماله: سكوب اول ما تصحى من النوم عشان جسمك بيبقى محتاج لبروتين سريع الهضم و سكوب كمان بعد التمرين لنفس السبب و فى ايام الراحة سكوب اول ما تصحى من النوم بس و كله على مياه عشان سرعة الهضم
    ممكن تستعمله مدى الحياة مفيش مانع لانه مفيش اضرار من استعماله زيه زى اى مكمل اخر و ده بالذات واخد جوائز بقاله 5 سنين لاحسن مكمل بروتينى

    و اادى صورته عشان متتخمش





    ثانيا:

    الكرياتين:

    الكرياتين ده يا سيدى كثرت مواضيع عندنا فى المنتدى و فيها فوائده و فيها كل حاجة عنه الصراحة و الخلاصه انه من الاساسيات و بيدى باور فى التمرين و سبب فى الضخامة لانه بيخزن المياه فى العضلة
    و فيه موضوع حلو عنه و اادى اللينك


    طريقة استعماله: اول 5 ايام فترة التحميل بتاخد 20 جرام يوميا على مدار اليوم 4 جرعات .. ال 5 جرام = معلقة شاى ممسوحة
    5 جرام اول ما تصحى على مياه و 5 جرام قبل التمرين و 5 بعده و 5 قبل النوم و بعد كدة هتاخد 5 جرام قبل التمرين بس .. و ممكن تزود 5 جرام معاهم بعد التمرين كمان لو عايز ضخامة لمدة شهرين و تريح شهر مش عشان مضر لا بس عشان تستفيد منه اكتر يعنى مفيش ضرر لو استمريت على الكرياتين طول حياتك
    بس خليك فاكر .. لازم تشرب مياه كتير و انت بتستعمله عشان ميضركش قول مثلا 6 لتر يوميا

    و فيه شركات كتير برده بتنتج الكرياتين و لكن افضلهم شركة برولاب و جى ان سى و اادى شكل الكرياتين البرولاب


    ثالثا:

    المالتى فيتامين:

    بص يا سيدى .. المالتى فيتامين ده فوائده كتير اوى الصراحة و لو قعدنا نتلكم مش هنخلص بس انا عملت موضوع عن فوائد الفيتامينات قبل كدة .. خش هنا و اقراه


    احسن انواع المالتى فيتامين ايه بقى ؟
    عندك يا سيدى انيمال باك ده رائع و سينتروم و ميجا مان و كل واحد مكتوب على ضهر العلبة بتاعته طريقة استعماله لانه ساعات بيختلف عن الانواع الاخرى

    و طريقة استعمال انيمال باك: 1 باكت نص ساعة بعد الوجبة اللى قبل تمرينتك يوميا
    و شكله اهو


    بس كدة ؟ امال فين يا عم المكملات اللى بتزود الوزن و اللى بتحرق الدهون و الباور و النيتروجين و بتاعة المفاصل و الكلام ده ؟ انت شكلك مش عارف حاجة عنهم ؟
    ياض يا غبى قلتلك دول الاساسيات اللى الواحد مبيستغناش عنهم يمكن حتى انا شلت منهم ( زيوت اوميجا 3 ) لانك ممكن تاخدها طبيعى فى زيت الزيتون و زيت كبد الحوت و زيت عباد الشمس و المكسرات

    بص يا عم الشركات اليومين دول شغالة بتنزل مكملات كتير بكافة انواعها انا هديلك مثالين كدة فى السريع عن مكملات زيادة الوزن و حرق الدهون و الباقى هديلك لينك بيه

    و من مكملات زيادة الوزن:
    الترو ماس:

    ترو ماس من افضل مكملات زيادة الوزن اللى موجودة دلوقتى و واخد جوائز كتير لافضل مكمل لزيادة الوزن و هو بيتكون من كل العناصر الاساسية اللى الجسم بيحتاجها سواء بروتين او كربوهيدرات او دهون او فيتامينات او معادن بعكس مكملات الواى بروتين اللى بتركز اكثر على البروتين فقط

    طريقة الاستعمال: 3 سكوب اول ما تصحى و 1 سكوب قبل التمرين بساعة و 2 سكوب بعد التمرين علطول و طبعا كل ده بيتخصم سعراته المكتوبة على العلبة من سعراتك اليومية اللى المفروض تاكلها و قلتلك ازاى فى جزء التغذية

    و اادى صورته يا سيدى


    السيروس ماس:
    برده مكمل رائع لزيادة الوزن من شركة اوبتيموم
    طريقة الاستعمال: اول اسبوع: نصف سكوب بعد التمرين علطول و نصف سكوب قبل النوم بساعة .. و فى ايام الراحة نصف سكوب الصبح و نصف سكوب قبل النوم بساعة
    و بعد الاسبوع الاول تخليه سكوب فى الجرعة بدل النصف

    و اادى صورته برده


    ليبو 6 - ليبو 6 اكس - ليبو 6 بلاك:

    ال 3 حوارق للدهون و طبعا البلاك اعلاهم قوة و الليبو 6 العادى اقلهم قوة و ارخصهم بس احب افهمك انها مش حبوب المادر السحرى يعنى هتاخدها فى يوم و ليلة هتخس لا طبعا .. لازم كاديو كويس و لازم تغذية سليمة خالية من الدهون عشان تجيب نتيجة برده
    و فيه انواع تانية كتير غير دول بس ليبو افضلهم و الجرعة مكتوبة على ضهر علبة كل واحد و انا هكنبلك جرعة العادى
    طريقة الاستعمال: اول يومين كبسولة الصبح قبل الفطار بنص ساعة و كبسولة بعد الضهر قبل الاكل بنص ساعة برده
    تالت و رابع يوم كبسولة الصبح قبل الفطار بنص ساعة و كبسولتين بعد الضهر
    بعد كدة 2 الصبح و 2 بعد الضهر و متزودش عن كدة
    و اادى صور المنتجات ال 3



    ان او اكسبلود:

    برده مكمل لزيادة الباور زى الكرياتين و لكن مفيش مقارنه مبينهم لان الكرياتين مكونات طبيعية موجودة فى اللحوم الحمراء و ال نو اكسبلود عبارة عن نيتروجين بيزودلك ضخ الدم فى العضلة و بيديلك باور فى التمرين و ايضا بيخلى عروقك ظاهرة و واضحة

    طريقة استعماله: 1 سكوب قبل التمرين بنص ساعة و فى ايام الراحة 1 سكوب على معدة فاضية ممكن اول ما تصحى من النوم لو مش هيتعارض مع اى مكملات اخرى بتستعملها
    الجرعة ممكت تزودها الى 2 او 3 سكوب حسب مستواك

    صورته اهى


    و فيه انواع اخرى كثيرة من كافة المنتجات و مش كلها شغالة لا بس الشركات بتنتجها و تجيبلك كام بطل منفوخ و يقولك انا بستعمل ده دعاية يعنى و هى اى كلام زى منتجات شركة ماسل تيك ( نيترو تيك و سيل تيك ) و الحاجات ديه بتعمل نتيجة اه بس مش زى اللى مكتوب على العلبة
    و ناس كتير بتيجى تسأل عن الامينو 2222 او امينو ليكويد فيول من توينلاب .. هو مش وحش و لكن مفعوله ضعيف جدا مقارنة بالمكملات الاخرى و فلوس على الفاضى لان البروتين فيه قليل

    ايضا الجلوتامين من الاساسيات و لكن واى بروتين اوبتيموم لغى الموضوع ده لانه فيه جلوتامين و امينو كمان يعنى انت مش محتاج غير واى اوبتيموم و كرياتين و مالتى فيتامين و هتعمل احلى شغل

    و لمعلومات زيادة خش على الموضوعين دول



    و احب اقول جميع المكملات امنة تماما من حيث الاستعمال و لم يثبت لها اضرار على مدار السنين و المدى البعيد طول ما بتستعملها زى ما الجرعة مكتوبة على ضهر العلبة و الكابتن اللى بيقولك تاخدها امتى مبيجبش حاجة من عنده ( حتى انا ) الجرعة بتاعة كل مكمل فى ضهره و التعليمات و الارشادات و تحذيرات الاستعمال لمرضى الضغط .. الخ و لسن معين
    و ياريت استعمال كل المكملات يصاحبه شرب مياه كتيرة عشان تتهضم و متعملكش مشاكل فى الحلق و محدش يعمل ناصح وياخد المكمل من غير مياه و يحاول يبلع البودرة لوحدها ممكن يتخنق
    و اى مكمل تستعمله احسب سعراتك اليومية وسعرات المكمل معاها على حسب الجرعات اللى بتاخدها



    يااه يا كوتش كل ديه معلومات ربنا يخليك لينا بس نسيت اهم حاجة اشترى الحاجات ديه منييييين ؟ شكلها نضيفة اوى و مبتتبعش هنا اعمل ايه ؟
    بص يا سيدى .. المكملات بتتباع فى الصيدليات النضيفة و منها ( العزبى و على ايمدج و سيف ) بس اسعارهم غالية شوية عشان كدة فيه تجار فى المنتدى بيبيعوا و حاجاتهم اصلية و اللى اضمنهولك هو ( دكتور محمد على ) لانى اتعاملت معاه و اسأل الناس اللى هنا بتشترى من مين و مش هتخسر حاجة لو جربت يعنى و حاجاتهم بتبقى ارخص من الصيدليات و فيه برده توكيل لشركة اوبتيموم فى ( سيتى ستارز ) المول الجديد الدور الاول جنب العطارة الهندية و سعره مش غالى اوى و اوعى تشترى حاجة رخيصة و تطلع مضروبة فى الاخر انا بقولك اهو

    طب يا كوتش انا جبت كام مكمل معايا اهو و استعملتهم بقالى شهرين و مجبش نتيجة لييييه بقى ؟
    يا حبيبى قلتلك قبل كدة لازم تكون تغذيتك سليمة و فيه عوامل تانية برده
    ممكن يكون المكمل مضروب او ممكن يكون جسمك مش قابله لان مش شرط كل المكملات تنفع مع كل الناس
    و فيه موضوع قلنا فيه الكلام ده قبل كدة خش و اقراه

    التعديل الأخير تم بواسطة Mr.Dreamer; 12-01-2010، الساعة 11:16 PM

  6. #6
    الصورة الرمزية Mr.Dreamer
    تاريخ التسجيل
    Sep 2006
    المشاركات
    5,436
    رابعا
    المنشطات

    والله يا كوتش مش عارف اقولك ايه بعد كمية المعلومات ديه بس الصراحة من غير ضرب عايز اعرف شوية كمان عن المنشطات و الحاجات ديه ينفع ؟
    هاااا .. عايز ايه كمان ارغى ؟

    بص يا كوتش الواد حموكشة صحبى اللى معنديش غيره راح الجيم و الكابتن قاله هديلك كورس ديكا على 20 حباية انابول و 40 دنابول و نص كيلو ميجا ماس و هنفخك فى شهر و هو سمع كلامه و دلوقتى بقى حيوان ينفع اعمل زيه ؟
    اوعى تفكر فى كدة اصلا .. هو فاهم انه قوى و عضلات بقى و الواد بقى ضخم و مش عارف ان هو شكل بس من برة و منفوخ هوا و من جوا بايظ
    زمان كبدة خرب و عنده خلل هرمونى و صمامات قبله بتعانى و هو ولا يعرف اى حاجة لان مخدش بطريقة صحيحة و كمان مفيش كورس تنضيف ولا اى بتنجان

    ايه ده يا كوتش ؟ كورس تنضيف ؟ هو لازم يستحمى بعد ما ياخد هرمونات و منشطات ولا ايه ؟ و بعدين اضرار مين يا عم ما الناس كلها بتضرب و الديكا فى يد الجميع ؟
    لا ميستحماش يا خفة .. كورس تنضيف يعنى تظبط اللى حصل فى جسمك بعد الزفت اللى ضربته سواء هرمونات و منشطات لانك لو خدت تستوستيرون مثلا اللى هو هرمون ذكورة محتاج كورس تنضيف من هرمونات الانوثة عشان تعادل نسب الهرمونات تانى فى جسمك و هتلاقى بقى صوتك رفع و طلعلك حلمات و دهون فى مناطق غريبة زى الحريم بالظبط ده غير ان انتاج هرمون الذكورة عندك هيبوظ بما انك بتاخد من مصدر خارجى و الخصيتين هيخربوا برده و كل ده عشان سعتدك عايز تنفخلى البنش و انت لابس البادى و ماشى فى الشارع

    الله يا كوتش طب اعمل ايه انا ؟ ما كله عايز ينفخ و فى اقل وقت فا بيلجأ للمنشطات و الكلام ده و بعدين رخيصة جدا ده انا اول امبارح جبتلى لتر ديكا ب 50 جنيه من عند عبده بتاع الجاز هههههه ؟ امال الابطال بياخدوها ليه بقى مدام مضرة ؟
    عم عبده اه .. بص ياض .. الابطال بياخدوا منشطات و هرمونات عشان يعملوا الشكل و الحجم اللى انت شايفه قدامك ده بس اللى بياخدوه حاجات نضيفة و غالية مش ديكا و انابول يا معفن من بتاع الجاز و كمان بيتابعوا مع دكاترة و علطول شغالين تحاليل عشان يتجنبوا الاضرار الكثيرة و يقللوا من خطرها ده غير المكملات و التغذية و الراحة و التمرين يعنى مش هرمونات بس زى ما انت عايز تعمل و خلاص

    طب ما تدينا شوية معلومات كدة عن الهرمونات و بتعمل ايه و ازاى و كدة اهو من باب الاحتياط يعنى ؟
    ما احنا عملين مواضيع من زمان يا سى زفت مبتقراش ليييه افهم انا ؟

    خش يا سيدى على الموضوعين دول هتلاقى فيهم معلومات جبارة




    ثانكس يا كوتش نورتنى والله طب ما تقولى بقى باقى الاضرار بتاعة الحاجات الوحشة ديه بعد الشر عليا يعنى ؟
    يوور ويلكم ياخويا .. عايز معلومات كمان عن اضرارها ؟ طب خش على اللينك ده بقى و انت تعرف


    يلهوى يا كوتش كل ده بيحصل فى الولا حموكشة و هو ميعرفش طب لما الحق اقولو بقى بس صحيح سؤال متخلف .. حموكشة و الواد ابن خالته ال 2 كانوا بياخدوا نفس المنشطات و نفس المكملات و بياكلوا نفس الاكل و بيشربوا مع بعض و الراحة زى بعض و كمان نفس الجيم و التمرينة واحدة ..من الاخر ال 2 توأم و فى الاخر الولا حموكشة بقى حيوان و ابن خالته زى ما هو طب ازاااااى انا هتجنن ؟
    ما انت لو مصحصح معايا كنت فهمت من الرغى ده كله ان محدش زى التانى يعنى ايه ؟ يعنى كلنا مختلفين عن بعض وراثيا و فى التكوين الجسمى
    ممكن واحد يتولد عملاق من غير ما يلعب و واحد تانى يلعب طول حياته و ماشى صح و مفيش نتيجة
    و اقرب مثال الواد حموكشة و قريبه ده ال 2 عملوا نفس الحاجات و فى الاخر جسم واحد منهم هو اللى اتقبل الحاجات ديه و جسم التانى مجبش نتيجة

    ييييه ينفع كدة ده انا كنت ناوى ابعت اس ام اس ل رووونى ولا ديكستر اقولو بيجيب الستافف بتاعتوا منين عشان اضرب منشطات زيه و ابقى قده !!
    اه منتا غبى عرفك تعملها والله .. لا يا سيدى حتى لو خدت اللى البطل بياخده عمرك ما هتبقى قده لازم كل واحد ياخد على طبيعة جسمه و تحاليل و بلاوى سودة بقى

    تصدق مش عارف اقولك ايه والله يا كوتش انت كدة فهمتنى كل حاجة فى اللعبة الرخمة ديه بس انا عندى خبر مش هيبسطك اقول ولا بلاش ؟
    هاااااااااا ؟ خنقت اهلى

    انا مش عايز اروح الجيم تانى يا كوتش و هحترف باليه مائى افيدلى
    يلا ياض من هنا انا غلطان انى قلتلك على حاجة
    حسبى الله و نعم الوكيل فيك
    التعديل الأخير تم بواسطة Mr.Dreamer; 26-09-2009، الساعة 07:09 PM

  7. #7
    الصورة الرمزية Mr.Dreamer
    تاريخ التسجيل
    Sep 2006
    المشاركات
    5,436
    و فى النهاية اعضائى الاحباء .. احب اتوجه بالشكر لكل شخص بذل مجهود فى كتابة موضوعه اللى استعنت بيه عشان اخلى الموضوع ده كامل و مش نقصه حاجة

    اشكر العضو المحترم Baher Bop لمشاركته فى كتابة بعض نصوص الموضوع و ايضا لتصميمه برنامج حساب السعرات

    احب اوجه رسالة لكل عضو داخل يعمل موضوع جديد عشان يسأل عن حاجة اتكررت عشرات المرات

    اولا: شكرا لصبرك و قراءتك الموضوع بأكمله يا رب متكونش ملليت

    ثانيا: العضو او المشرف اللى بيرد عليك مش بياخد فلوس من حد و هو عمل تطوعى بدون اجر و لما حضرتك تعمل موضوع مكرر بتوجعله دماغه هو و بيكره اليوم اللى بيرد فيه عشان كدة معظم الاستفسارات الجديدة ملهاش ردود كتير لانها مكررة

    ثالثا: العضو اللى بيرد مش مستفيد حاجة بالعكس كل اللى بياخده انك بتهزهقه او تهينه او تشكك فى معلوماته بدون ادلة كافية او تتسبب فى جدال حول نقطة معينة اتجادلنا فيها كتير جدا و وضحنا كل حاجة
    و لو محدش رد عليك بسبب الموضوع انه مكرر بلاقى ردود كالاتى ( فين المشرفين ... ايه يا عم المنتدى اللى مفيهوش حد ده .. الخ )

    رابعا: العضو اللى بيرد عليه مش مطلوب منه يديلك ايميله او رقمه عشان تسأله ما هو ببلاش و لكن لما يعمل كدة بيكون عنده سعة صدر و مش ممانع انك تسأله و ساعتها ياريت تحترمه و انت بتكلمه و متاخدش الموضوع ماهو خلاص بقى صاحبى فا اقول اللى انا عايزه ( الادب ثم الاحترام دائما )

    خامسا و هو الاهم:
    اى عضو سيقوم بوضع موضوع مكرر ( لن يتم الرد عليه ) و سيتم حذف الموضوع فورا و انذار العضو بعدم تكرير مواضيعه لانه حضرته مكسل يقرأ الردود على الناس قبل كدة ولا مكسل يعمل بحث عن المواضيع ولا يقرا الحاجات اللى مكتوبة فى القسم العام و هتفيده و ياريت بلاش نكتب اسماء المواضيع ( الحقنى يا كوتش .. يلهوى همووت .. الخ ) و الكلام اللى ملوش لازمة ده


    نصيحة لكل عضو عنده اسئلة جديدة:

    ياريت تقرأ المواضيع الاول اللى فى القسم العام عشان تفيد نفسك قبل ما تعمل سؤال جديد يكون متجاوب عليه قبل كدة و ياريت تبحث الاول برده
    و ده لينك للقائمة الشرفيه اللى فيها احسن مواضيع فى الاقسام




    الموضوع مغلق عشان نتجنب التعليقات او الردود و يفضل متناسق و مرجع لكل الاعضاء .. اللى عنده كلمة شكر يوجهها ممكن يشكرها فى نفسه مش شرط يقولها لعضو معين عشان يبينله انه بيحبه اكيد بدعائك ليه كفاية عليه حتى لو هو ميعرفش

    كلمة الشكر الحقيقية هى انك لما تبطل تعمل مواضيع جديدة على الفاضى و تبطل الكسل و تدور على سؤالك قبل ما تكتب حاجة جديدة

    الموضوع فيه اكثر من 99 % من الاسئلة الشائعة و مفيش نقطة مغفولة فيه ياريت نقرأ كويس قبل ما نسأل تانى

    أتمنى ان ينال اعجابكم
    و شكرا ليكم جميعا و بالتوفيق


    ك.أحمد دريمر
    التعديل الأخير تم بواسطة Mr.Dreamer; 26-09-2009، الساعة 08:02 PM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك