موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



موضوع مغلق
النتائج 1 إلى 7 من 7
Like Tree0Likes

الموضوع: احتــرف تأليــــــــف الكوميديا (دروس ممتازة)

  1. #1
    الصورة الرمزية new__mido22
    تاريخ التسجيل
    Jul 2007
    المشاركات
    10,975

    25 احتــرف تأليــــــــف الكوميديا (دروس ممتازة)



    اهلا بكم اعزائى اعضاؤ الديفيدى الكرام
    تحية طيبة و بعد،،

    يسعدنى ان اقدم لكم الشرح الكامل و الوافى لكوميديا المناقشات ان شاء الله
    لتكون مرجعا لكل من يود ان ينضم الى فريق مؤلفى كوميديا المناقشات



    الموضوع ده انا هاغلقه
    بحيث يكون للمشرفين بس نحط فيه شرح الدروس بتاعتنا
    كل اللى عليك انك تقرا الدرس و بعدين تروح للموضوع الرسمى للتواصل
    (
    الموضوع الرسمى للتواصل لمشتركى دورة احتراف الكوميديا يونيو 2010
    ) و تسجل دخولك هناك بمعنى انك تكتب"تم قراءة الدرس الاول" مثلا
    مو ضوع التواصل هيبقى له اكتر من ميزة تانية ان شاء الله اهمها
    انه هيكون الموضوع اللى انت هتسلم فيه الواجب اللى احنا هنحدده و المكان اللى احنا هنصلح الواجب بتاعكم و هنحط عليه ملاحظتنا


    طبعا ممكن الواحد يقول طب ماكدا ما دام الدروس مرئية للجميع ..ايه بقا لازمة انى اشترك فى الدورة و احط اسمى فيها ؟؟
    هاقول لحضرتك
    مميزات الاشتراك فى الدورة حاجتين
    اول حاجة ان هيكون فى متابعة من المشرفين بمعنى ان فى ناس كتيرة اوى عندها موهبة التأليف بس بتبقى مكسلة تكتب
    احنا بقا من خلال الواجب ان شاء الله هيبقى فى اقوى متابعة بحيث ان احنا نضمن ان مستواك يتقدم بنسبة كبيرة جدا فى خلال 10 ايام
    و مع ذلك مفيش مانع ان اى حد مش مشترك يكون متابع معانا الدروس اول بأول
    دلوقتى انا هاكلم عن الواجب اللى الناس كلها مستغرباله
    اولا احب اوضح اهمية التطبيق(الواجب)

    "من المهم ان تتعلم و لكن الاهم هو ان تطبق"
    مقولة مشهورة اوى
    فى رايى الشخصى لو هتتعلم بدون تطبيق فالعلم ده ملوش اى لازمة
    و لو عاوز فعلا تطور من نفسك و مستواك فلازم تطبق على الحاجة اللى انت اتعلمتها او فهمت فكرتها
    خد دى قاعدة فى اى حاجة فى حياتك

    دى اهمية الواجب و الميزة اللى هياخدها الناس اللى اشتركوا فى الدورة و اللى هيلتزموا بيها ان شاء الله

    الواجب هيكون فى البداية :هو عدد من الفقرات اللى انت هتقراها( و متستهترش بالواجب ده)لأن مستواك هيتقدم بصفة اساسية من خلال القراءة
    و بعد كدة هنطلب تأليف فقرة كوميدية و مش مهم تطلع حلوة او وحشة
    و فى الاخر هنطلب منك تأليف فقرة بمستوى كوميدي عالى


    الدروس:
    1. COMEDY BASUCSاساسيات الكوميدية(درس عام للكوميديا بصفة عامة وهام جدا)مع نيو ميدو
    2. HOW TO START WRITING الدرس التانى و هتاخدوا فيه ازاى ابدأ فى التأليف و تنظيم االافكار مع محمود(درس هام جدا)
    3. تابع التأليف مع ميدو
    4. .......
    5. الاحترافية(PROFESSIONALISM)ميدو و محمود(اهم درس و هتاخد فيه ازاى تبقى محترف فى كل حاجة بداية من التأليف الى التنسيق)


    الدرس الرابع لسة ما تحددش هيكون ايه لاظبط




    المشتركين بالدورة
    Are_u_ready
    THE LEGEND_MIDO

    The_Undertaker1
    robert10
    power mady
    nitch
    Arcki



    مع تحيات ادارة كوميديا المناقشات


    التعديل الأخير تم بواسطة new__mido22; 17-07-2010، الساعة 01:01 PM

  2. #2
    الصورة الرمزية new__mido22
    تاريخ التسجيل
    Jul 2007
    المشاركات
    10,975
    الدرس الاول
    comedy basics


    بسم الله الرحمن الرحيم
    زى ما وعدت
    انا هابدا ان شاء الله من الصفر
    هاتكلم فى الدرس بتاع انهاردة فى اساسيات الكوميدياcomedy basics
    هتلاقونى بقول كلام فيه نظرة فلسفية نوعا ما لكن الكلام ده مهم جدا جدا ليك لتأليف الكوميديا بصفه عامة
    وهتلاقونى فى اول درس عمال بشرح فى حاجات و بادى امثلة على حاجات ممكن تكون بديهية و سهلة بالنسبة لكم..لكن صدقونى انا هاعمل كدة علشان اثبت بعض الاساسيات و القواعد فى دماغك و هتستعين بيها فى اى موضوع هتالفه بعد كدة ان شاء الله


    و ان شاء الله من الدرس الجاى محمود هيشرح فى التخصص بتاعنا (كوميديا المصارعة)

    لو انت فهمت البداية..الموضوع هيبقى بالنسبالك بعد كدة سهل جدا ان شاء الله
    نبدأ على بركة الله


    اول سؤال هابدأ بيه الدرس

    هو الانسان بيضحك ليه؟
    ايه اللى بيضحكنا اساسا لما بنشوف منظر او نسمع نكتة؟

    الاجابة: الانسان بيضحك على الحاجة الغريبة

    بس هل معنى كدة ان حاجة غريبة تضحكنا

    لا طبعا مش شرط
    هاديلكم 3 امثلة سريعة
    1. انت سمعت ان فى بركان جامد اوى حصل فى اليابان>>(حدث غريب بس مش مضحك لانه اثار عندك عاطفة اخرى مثل الخوف و الفزع)
    2. لو انت معدى فى الشارع شوفت قطة ميته>>(حدث غريب و لكنه غير مضحك لانه اثار عندك عاطفة مثل القرف)
    3. و انت ماشى فى الشارع شوفت واحد نازل من بيته من غير بنطلون(حدث غريب و مضحك لانه ما اثرش عليا باى عاطفة تانية زى الخوف او القرف الخ..)
    يبقى مش شرط اى حاجة غريبة تضحكك
    بس اللى احنا اتفقنا عليه ان اللى بيضحكك لازم يكون حاجة غريبة(خليك فاكر كدة كويس)

    ******
    بعد ما فهمت النقطة اللى فاتت..نخش بقا فى النقطة اللى بعديها
    ركز و تخيل معايا المنظر ده
    انهاردة انت نزلت من بيتك الصبح شفت راجل لابس قميص و بدلة و نازل بالبوكسر و شايل الشنطة السامسونايت بتاعته
    ركز كدة و تخيل المنظر هتلاقى نفسك اكيد ضحكت
    طب تانى يوم انت نزلت من بيتك و شفت نفس المنظر بالضبط..هل هتضحك؟
    اه هاضحك بس مش زى اول يوم
    طب تالت يوم انت نزلت و شفت نفس الراجل ابو بوكسر...هل هتضحك؟
    ممكن ابتسم و ممكن مضحكش خالص
    طب ليه؟
    اصل المنظر اصبح مألوف بالنسبالى فى تالت يوم اما فى اول يوم فالمنظر كان غريب بالنسبالى علشان كدة ضحكت جامد
    يبقى تانى اساس:ان الانسان بيضحك على المعنى الكوميدي الجديد غير المكرر

    REMEMBER
    • الضحك اذواق و مش شرط اللى يضحكك هو اللى يضحك غيرك
    • لا تكتب لمجرد انك تكتب بل اكتب عندما تشعر برغبة للكتابة
    و علشان اوضح النقطة التانية دى
    فى واحد ممكن يكتب علشان يبقى اسمه ألف اى حاجة مع ان موضوعه تلاقيه وحش اوى و مافهوش اى افكار
    اللى انا اقصده انك تكتب و انت عندك رغبة دايما انك تألف حاجة جديدة و مضحكة و تكون واثق انها مضحكة و مافهاش حاجة لو انت ألفت موضوع مرة او مرتين وحش بس العيب ان تكون مواضيعك وحشة و انت راضى بكدة و مش عاوز تحسن نفسك و لا بقراءة ولا بغيره
    • اهمية القراءة
      • كن قارئا جيدا تكن كاتبا جيدا
      • كن قارئا ممتازا تكن كاتبا ممتازا
    • اكتر حاجة هتتعلم منها التأليف هى القراءة
    هناك 3 انواع من القراء للموضوع الكوميدي على سبيل المثال
    1. واحد بيقرا علشان يخلص نفسه و يبقى اسمه قرا الموضوع الفلانى
    2. واحد تانى بيقرا و يفهم و يضحك
    3. التالت بيقرا و يضحك و يعرف ايه اللى ضحكه
    النوع الاول: تقدم طفيف او شبه معدوم فى الـاليف
    النوع التانى: تقدم متوسط
    النوع الثالث: تقدم و تطور ممتاز و سريع
    انت بقا حاول انك تكون من النوع التالت على قدر المستطاع
    انا عارف ان كتير اوى الواحد بيدخل علشان يبقى اسمه قرا الموضوع الفلانى و رد عليه و ده بيكون لان الواحد مذنوق فى الوقت او عنده حاجة تانية يعملها بس حاول قدر الامكان انك كل اسبوع مثلا تقرا موضوع بتركيز
    علشان افكارك تزيد و تنمو
    و
    تـــــــذكر
    • انت لما بتقرا موضوع بتاخد منه حصيلة جديدة من الالفاظ و المعانى الكوميدية
    • و بعد ما بتخلص الموضوع بتلاقى عقلك الباطن اوتوماتيك خزن الحاجات دى عنده
    • و لما تيجى تألف موضوع جديد ستجد نفسك عفويا بتستخدم المعانى اللى انت تعلمتها و كمان بتزود عليها من عندك و تطورها
    كدة يا جماعة الدرس الاول خلص

    الواجب المشاركة الجاية



  3. #3
    الصورة الرمزية new__mido22
    تاريخ التسجيل
    Jul 2007
    المشاركات
    10,975

    تعالوا نشوف ايه الواجب انهاردة
    الواجب بتاع انهاردة كله عن القراءه كل اللى عليك انك هتقرا الفقرات اللى انا هاديهالك و هتقراها بتركيز و اول ما تقرا حاجة تضحكك تقوم ملونها باللون الاحمر و طعبا ده على حسب ذوقك
    لون جمل، كلمات براحتك
    الهدف من طريقة الواجب دى مش التلوين طبعا
    و لكن انك تتعرف على الافكار و طريقة صياغتها


    الاساطير فى سطور
    تريبل اتش



    اعزائى اعضاء منتدى الدى فى دى
    موعدنا اليوم مع رابع حلقات برنامجنا الاساطير فى سطور
    *********************
    المذيع: اهلا بكم اعزائى المشاهدين فى حلقة جديدة من من
    حلقات برنامجكم الاساطير فى سطور
    و ضيف حلقة اليوم هو ملك الحلبة بلا منازع
    تريبل اتش... اهلا بيك يا عم اتش
    اتش: اهلا بيك و بالبرنامج الجميل
    المذيع: عايزين نعرف منك شوية حاجات كدة يعنى مثلا
    انت لية لما بتدخل الماتش بتشرب مية و تنفخها فى الهوا
    اتش: يااااااااااه انت فكرتنى بحكاية قديمة اصل بابى الله يرحمة كان شغال مكوجى رجل
    و كان نفسه اطلع زيه بس انا خذلته و طلعت مصارع
    و من يومها هو قاطعنى و حرمنى من الميراث بس اونكل مكمان
    اتبنانى و جوزنى بنته و بقى يصرف علية و انا بعمل كدة عشان اثبت لبابى ان المكوة فى دمى
    حتى لو اشتغلت ضابط شرطة هاشرب برضة مية و انفخها فى وش المجرمين
    المذيع: طب اية حكايةالتلات اتشات اللى فى اسمك دى
    يعنى h و h و h اللى يقراهم يلاقيهم ههه يعنى واحدبيضحك
    ده عشان الراجل اللى بيضحك فى اغنية الدخلةبتاعتك
    اتش: جرى اية يا بنى انت هتلخبط فى الكلام و لا اية
    فوق و شوف انت بتكلم مين دا انت ما تاخدش فى ايدى عطسة
    المذيع: طب نعدى السؤال ده و نخرج فاصل و نرجع نكمل


    المذيع: اهلا بكم اعزائى المشاهدين فى الجزء الثانى من الحلقة
    اتش ... اية يا راجل اللى عملته فى اورتن دة و هو فى بيته
    اتش: يا عم يعنى عاوزة يضرب مراتى و يشوط راس اونكل مكمان و اسكت له
    دة اونكل مكمان لحد دلوقتى ماسك راسه و عمال يقول اقفل الزاوية يا امير يا عبد الحميد
    بس انا هموت و اعرف مين اللى بلغ البوليس
    المذيع: طب عملوا اية فيك فى القسم
    اتش: ابدا يا عم دخلوا عليا 3 مخبرين خرعين عشان يضربونى
    فاديت اتنين منهم بيدجرى و التالت هرب و بعدين جه الواد ابن اختى يضمنى
    عشان كنت ناسى البطاقة فى البيت
    المذيع: فى حلقة سابقة مع شون مايكلز كلمته و قلت له انك خلصت على جى بى ال ... ازاى
    اتش: يا عم متفكرنيش دة لسة كف ايد مايكلز معلم على وشى عشان اتكلمت على الهوا
    المذيع: يا عم اتكلم براحتك هو اية اللى هيجيب شون هنا
    اتش: ماشى... احنا خطفنا جى بى ال و بعدين كتفناه و جبنا لبان و فضلنا نندغه و بعدين نلزقه فى شعره
    و بعد كدة خليناه يبتسم و يبص لنفسه فى المراية لمدةساعةلحد ما اتهبل
    و راح نط من البلكونة بس كان من الدور الارضى فمحصلش حاجة
    المذيع: امال دخل الانعاش ازاى
    اتش: اصل كان فية لورى معدى فى نفس الوقت راح خبطه و دغدغه
    و فجأة ظهر شون فى الاستديو و هو غاضب و قال:
    عملتها برضه يا اتش و قلت الحكاية و ربنا ما انا سايبك لا انت و لا المذيع
    و مسك كرسى وجرى ناحيتهم و ينقطع الارسال مع صوت ضرب و تكسير



    جميع الحقوق محفوظة لمحمود بدير


    الفقرة التانية

    شون مايكلز: اهلا بالصديق العزيز تربل اتش
    تربل اتش: اهلا بيك يا شون
    ايه يا عم ليك وحشة
    هو معنى انك سبت الدى اكس
    انك متزورنيش خالص
    شون: لا طبعا
    انا كنت جايلك انهاردة و عاوز اعمل معاك برنامج
    بيحكى عن يوم فى حياتك
    بتعمل ايه من اول ما تصحى لغاية لما تنام؟
    تربل اتش: اه طبعا انا جاهز
    شون: بتصحى ازاى يا ابو الاتشات
    اتش: الصراحة يا شون انا باصحى من النوم و بيبقى شكلى فظيع
    و كل يوم ستيفانى تصحى من النوم و تصوت تقول الحقوووووووووونى
    جوزى مش جامبى
    و بعدين تقولى : انت مين ..انت مش جوزى
    انت عملت ايه فى ترابل
    مايكلز: هههههههه
    و بعدين بتعمل ايه؟
    اتش:انا بجرى على الحمام و اتشطف و اغسل وشى كتير اوى لغاية لما شكلى يرجع تانى
    و فى النهاية بطلع من الحمام و اول ما ستيفانى تشوفنى
    احس ان الأمان و الدفء رجع مرة تانية لوجهها
    و تقبلنى قبلة الصباح
    شون: احممممم
    تربل اتش: فى الأورة طبعا
    اصلى عارف نيتك السودة
    شون: هههههه
    ماشى يا حج و بعدين ايه اللى بيحصل على الفطار
    تربل اتش: عادى ما انت بتيجى تفطر معايا كتير
    عم قنديل البواب بيخبط على الباب الصبح و يدخل البيت و هو ساحب وراه قدرة الفول
    و بعدين يفتح الشباك بتاع الصالون و يصفر للواد سيكا علشان يطلعلو كرتونة البيض
    شون: كرتونة واحدة
    انت كدة هتخس!!!
    تربل اتش: لا اصبر
    اصل المستودع بتاع البيض اللى تحتينا بيبقى تقريبا شطب
    بعد ما اخدنا كل البيض اللى عنده فى العشاء بتاع اليوم اللى قبليه
    شون: طب انت بتعمل ايه بكل البيض اللى عند ده
    تربل اتش: عادى يا شون
    ما انت عارف
    فاكر المرة اللى دوقتك فيها عصير البيض بالمياة ورجعت بعديها
    شون: اه اه حلاص افتكرت
    ده كان يوم ما يعلم بيه الا ربنا
    اوعا تكون لسة بتشربه
    تربل اتش: اه يا عم لسة شغال عليه
    ده انت لو جربت تشربه باستمرار
    صدقنى صدقنى ظهرك هيتصلح
    شون: بص
    انا ممكن اجربو مرة
    بس تحطلى سكر عليه
    او تحليه باى حاجة
    تربل: ماشى يا عم
    بعد ما بخلص فطار بطلع اجرى فى الشارع
    بس فى مشكلة بتقابلنى
    شون: ايه؟
    تربل اتش: مش بلاقى حاجة البسها
    خصوصا البنطلون
    فبنده ستيفانى
    و اقولها فين البناطيل بتاعة الجرى
    فترد ستيفانى: كلها متنشرة برة
    فأروح جى طالع علشان اشوف الغسيل اللى متنشر
    بس دايما بلاقيه مبلول
    يبتسم تربل اتش
    ثم يبتسم له شون
    و يكمل تربل اتش:
    فأقول لستيفانى: معقوله يا ستيفانى كل ده و لسة منشافش
    انتى نشرتيه امتا؟
    فترد ستيفانى: لسة يا حبيبى من شوية
    اتش: يا نهار مهبب امال انا هاجرى بأيه
    شون(ميت على نفسه من الضحك): طب ما تلبس بنطلون تانى
    اتش: مش هينفع
    لأن كلهم على الحبل متنشريين
    شون:
    ليييييييييييه بتجرى كام مرة فى اليوم
    طب و بتعمل ايه
    تربل اتش: بضطر اسفا انى اخبط على باب الجيران
    و استلف منهم بنطلون
    شون: ده بتاع مين بقا
    اتش: ده بتاع خليل جارنا و بندلعو و نقوله خلة
    بس مشكلته انه قصير اوى
    يبتسم شون
    تربل اتش: اكيد فهمت ايه اللى هيحصل
    شون: اكيد شكله بيبقى صغير عليك
    تربل اتش: ده انا بعملو شورت و اجرى بيه
    شون: هههههه
    ضحكتنى موووووت انهاردة
    زى العسل
    تربل اتش: ربنا يخليك يا شون
    و بعد ما اخلص جرى
    بروح البيت علشان افطر
    شون : تاااانى؟
    تربل: لا يا شون دى تصبيرة علشان الغداء
    و بتبقى خفيفة يعنى كلها فرختين و اتنين كيلو رز و سعات ببلع بجيرك عصير
    شون: كفاية كلام عن الاكل لحد هنا
    و تعالا نكلم عن الزيارات
    تربل اتش: هتكون ايه
    لأما عمى مكمان او حماتى ليندا
    غالبا مستر مكمان دايما يزورنا على الغدا
    قال ايه مش لاقى حد يطبخله
    يبتسم شون
    و يكمل اتش:
    اما ليندا فهى من هواه ازعاجى ليلا
    شون ليه كدة:
    عمرك شفت حد بيزور الناس الساعة واحدة باليل
    دى كمان بتجبرنى انى اقوم من النوم علشان اعملها شاى
    شون: يا انهار ازرق
    و انت بتقوم بجد؟
    تربل: اه طبعا
    شون: طب و كرامتك
    تربل: يا عم استنا بس
    انتا فاكرنى باعديها بالساهل
    انا بدخل المطبخ
    و احطيلها منوم فى الكباية
    و بعدين اديهولها
    شون: طب ما كدة هتبات عندكم فى الشقة
    اتش: مش مشكلة
    المهم ان تانى يوم الصبح بأصحى بدرى و اخدها على اقرب مقلب زبالة و ارميها هناك تكمل نوم
    شون: ههههههههههههه
    يخربيتك طب و ستيفانى بتعرف
    اتش: لا طبعا انا بقولها انى اخدت ماما وديتها الشغل
    شون: اها
    اتش انت عندك جيم فى البيت
    تربل اتش: اه عندى واحد فى البادروم انت مشفتهوش
    شون: لا
    اتش: ده بقا الجيم بتاعى
    بس بقالى فترة مش بادرب
    شون: ليه
    اصل المدرب بتاعى تعبان شوية
    تصدق بار الحديد وقع على رجله كسرها
    شون: طب و حصل ازاى ده
    اتش: مفيش
    كنا بنلعب لعبة احدف و القف
    و فجأة معرفش يمسك البار فوقعت على رجله كسرتها
    شون: يخربيت لعبك
    فاكر يا زفت لما كنت بتلعب معايا بالهامر بردو
    و كسرتلى العمود الفقرى
    اتش: يا عم خلى قلبك ابيض
    انا كنت اقصد اكسرلك رقابتك مقصدتش ان ظهرك يكسر
    و فجأة يحمر وجه شون
    شون: كدة
    طب منش مكمل معاك الحوار
    اتش:علشان خطرى كمل انا اسف
    شون: لما تشوف حلمة ودنك
    و يترك شون اتش و هو يحاول شد اذنه لأقصى قدر ممكن ليراها
    و ينتهى الحوار
    جميع الحقوق محفوظة لنيو ميدو



    الأساطير فى سطور
    فان دام

    أعزائى اعضاء منتدى
    الدى فى دى
    اهلا بكم فى الحلقة الرابعة و العشرون من برنامجكم
    الاساطير فى سطور
    *********************************

    المذيع: اهلا بكم اعزائى المشاهدين فى حلقة جديدة من حلقات برنامجكم
    الاساطير فى سطور
    ضيفنا اليوم هو نجم متميز .... روب فان دام .... منور يا ابو الفناديم
    فان دام: ده نورك يا حج مساء الفل
    المذيع: يا ترى اية سر تسميتك روب فان دام
    فان دام: هأقولك .. فى بداية عملى فى المصارعة كان فيه تصوير فيلم
    للممثل المعروف فان دام و كنت انا باتفرج على التصوير
    و كان فان دام طالع يلاكم واحد و كان لابس روب الملاكمة
    و اول ما قلعه اكتشف انه مش لابس حاجة تحته خالص
    طبعا اتكسف و معرفش يعمل حاجة رحت انا ناطط و حضنته بسرعة
    فكنت بالنسبة له بديل الروب و من هنا جه اسم روب فان دام
    المذيع: جميل جميل .... طب يا ترى انت ظهرت معاه فى اى فيلم قبل كدة
    فان دام: طبعا انت بتكلم فى اية ... انت فاكر الفيلم اللى كان فان دام طالع
    يصارع فيه و كانت ايده فيها صمغ و حطها فى صندوق كله زجاج
    المذيع: ايوة طبعا دة كان فيلم عالمى
    فان دام: اهو انا المفروض كنت اكسر الزجاج ده بس المخرج
    جاب ابن اخته يكسره بدالى ... الواسطة بقى
    المذيع: طب ما انت كدة ما ظهرتش فى الفيلم
    فان دام: ايوة ما انا بهدلت الدنيا ساعتها و فضلت اعيط 3 ساعات
    لحد اما وافقوا انى اخد دور فى الفيلم اللى بعده
    المذيع: و ظهرت فيه
    فان دام: طبعا ... فاكر الفيلم اللى كان فان دام فيه رجل مطافى
    المذيع: ايوة فاكره
    فان دام: اهو انا بقى كنت بأعمل دور الحريقة اللى هو بيطفيها
    المذيع: إزاى يعنى
    فان دام: كنت عمال اقول حريقة حريقة و هو بيطفى
    بس صوتى و صورتى ما ظهروش لانى كنت ورا الكواليس
    المذيع: دا انت نجم كبير بقى و احنا ما نعرفش .... حريقة حريقة
    فان دام: اه شفت بقى انا متواضع ازاى
    المذيع: طب خد يا متواضع السؤال ده ... ما دام انت مش ناوى ترجع الإتحاد
    اية اللى خلاك تظهر فى الرويال رامبل اللى فاتت
    فان دام: انا كنت معدى جنب القاعة و عرفت انا العرض شغال فقلت ادخل اشارك
    و أحط مستر مكمان امام الامر الواقع و اخليه يرجعنى الاتحاد
    رحت ناطط من فوق السور و دخلت غرفة الملابس بعد ما الحارس اخد
    منى 2 كيلو جوافة بناتى و طلعت على الحلبة بس مستر مكمان عمل فيها عبيط
    و ولا كأنى ظهرت و عمل حاجة عمرى ما هانساها
    المذيع: إية
    فان دام: خلى البودى جاردات يعجننونى من كتر الضرب فى البدروم
    و خلانى امشى من غير الجذمة بتاعتى .... كنت بأتنطط على الأسفلت و انا من غير جذمة
    المذيع: معلش قلبك ابيض ... طب قول لى بقى كان كين معانا هنا و قال انه طلب منك
    تجيب له ماء بعد الماتش بس انت قلت ان الماء مقطوع من بيتكم
    لية
    فان دام: اصل احنا بقالنا 3 مرات ما دفعناش وصل الماء
    المذيع: و ما دفعتهوش لية
    فان دام: اصل بابا مدمن بسكويت الشمعدان فكل شوية يصرف فلوسه كلها على البسكويت
    لدرجة انه مرة باع الشرابات بتاعتى عشان يجيب بسكويت
    فعلى طول احنا مفلسين
    المذيع: طب دى حاجة بسيطة كدة من البرنامج لحد ما ربنا يفرجها يا فاندومتى
    اعزائى المشاهدين فاصل قصير ثم نعود لإستكمال الحوار



    المذيع: اعزائى المشاهدين اهلا بكم فى الجزء الثانى من الحلقة
    و نعتذر لكم عن إضطرارنا لإنهاء الحلقة بسبب ذهاب فان دام
    لظروف خارجة عن إرادته
    و هى انقطاع قميص جاكى شان
    فهل سنرى ستايل جديد واسم جديد لفان دام و هو
    قميص جاكى شان
    هذا هو ما سوف ننتظره
    إلى اللقاء فى جديدة و أسطورة أخرى


    جميع الحقوق محفوظة
    لمحمود بدير



    قبل مهرجان التشامبر بساعات قليلة
    تيكر:بقولك يا شون
    انا عايو اشترى جزمة جديدة بدل اللى اتخرمت
    شون: اتخرمت؟!
    تيكر: اصل مناخير ايدج اخرمتها و انا ضربه برجلى
    شون : اه
    و انت دلوقتى عايزنى انزل اشتريلك جزمة..!
    تيكر: لا يا شون
    قولى بس على ماركة كويسة و انا انزل اشترها
    شون:
    احسن ماركة
    Nike
    انا شخصيا بلبسها
    تيكر: بتلبسها...هههه
    انتا هتاكل بعقل حلاوة
    شون: ايه مش مصدقنى؟
    تيكر: لا طبعا مش مصدقك
    هو انت من امتا بتلبس الحاجات النظيفة دى
    شون: طول عمرى يا اندر
    تحب افكرك انت بأيام زمان
    لما كنت بطلع الميت من قبره و تسرق جزمته
    تيكر: احمممم
    طب اثبتلى يا شون انك بتلبس نايك
    شون: ا ث ب ت ل ك ؟!
    اثبتلك ازاى يعنى؟!
    تيكر: انك تورينى الماركة اللى مكتبوبة على بطن الجزمة و اشوفها بعينى
    و دلوقتى حالا
    شون:لا..لا
    خليها فى اخر العرض
    تيكر: هتوريهالى ازاى و انا عندى ماتش
    شون: يا حج متقلقش
    هو انت اول واحد تطلب منى الطلب ده؟!
    و فى هذه الصورة
    شون مايكلز يورى تيكر الماركة ليشوفها عن قرب
    المذيع طب و ليه يا شون فضلت واقف شوية بعد ما وريتلو الماركة بطريقة
    Swm

    شون: اصلى كنت بوريله ماركة الشراب



    الحقوق محفوظة لنيو ميدو




    المطلوب من حضراتكم بعد ما تقرا الدرس الاول
    تروح للموضوع ده و تكتب"تم قراءة الدرس الاول"
    و بعد ما تعمل الواجب تسلمه فى الموضوع ده برضه

    الموضوع الرسمى للتواصل لمشتركى دورة احتراف الكوميديا يونيو 2010


    شباب!!
    الدرس الجاى مع محمود ان شاء الله يوم الجمعة
    يا ريت الواجب يتسلم بحد اقصى بكرة بالليل قبل الدرس اللى بعديه علشان نكون متابعين مع بعض


    التعديل الأخير تم بواسطة new__mido22; 23-06-2010، الساعة 01:17 PM

  4. #4
    الصورة الرمزية ™M@hmoud_Undert@ker™
    تاريخ التسجيل
    Feb 2007
    المشاركات
    5,018

    Flag Egypt الدرس الثانى

    بسم الله الرحمن الرحيم

    الدرس الثانى
    How Too Start Writing

    مبدئياً لازم كلنا نعرف اننا بنكتب عشان بنحب الكتابة
    مش بنكتب عشان نترقى او ناخد جوايز
    اللى هيفكر كدة بس هو اللى هينجح
    الكوميديان الناجح هو اللى بيعرف يعمل موقف كوميدى من لا شئ
    ازاى


    أولاً : يعنى حاجة حصلت و مرت على 100 واحد عادى
    انت بقى لأ لازم تدرس الحاجة دى كويس و تشوف انت تقدر تطلع منها اية
    مهما كانت تافهة بالنسبة لك
    مثال بسيط ناتالى فى فريق الهارت ديناستى كانت بتظهر دايما بجاكيت
    و فى عرض الليميت ظهرت من غير جاكيت الكل مر عليه الحكاية دى عادى
    لكن الكوميديان المركز و عنده قوة ملاحظة ممكن يستخدم الجزء ده
    فى فاصل كوميدى و حسب شطارته ممكن يبقى كبير او صغير

    ثانياً : انك تكون او تستحضر موقف كوميدى و تركبه على اى حاجة حصلت فى المصارعة
    او للمصارع
    يعنى ممكن يكون موقف حصلك شخصيا حاجة شفتها فى التلفزيون او حاجة انت عملتها قبل
    كدة فى اصحابك
    تعدل فيها شوية و تضيف و تحذف و تشوف المصارع اللى يناسبه الموقف ده اكتر
    و تركب الموقف عليه طبعا ده بعيدا عن المواقف اللى انت بتألفها بنفسك
    دون الاستعانة بحاجة تانية


    نيجى بقى لأهم حاجة انت هتكتب اية

    نشرة
    اكتر اسلوب بأفضله فى النشرات انك تتابع الاخبار الحقيقة
    و تعمل لها تحوير عشان يطلع خبر كوميدى
    اما فكرة تأليف الخبر ككل ده يليق اكتر بالمواضيع الكوميدية

    برنامج
    عشان تعمل برنامج حاول بقدر الامكان يكون ليه لونه الخاص
    يعنى تسيقه و ترتيب الفقرات يكون مميز و خاص بيه
    و لازم تختار له مذيع ثابت و تكون فيه حاجة مميزة
    او صفة مضحكة
    و بقدر الامكان يكون البرنامج بتاعك متعدد الحلقات
    مش حلقتين تلاتة و خلاص يعنى يكون زى السلسلة

    كاريكاتير
    ده هنتكلم عنه بالتفصيل بس النقطة اللى عايز اوضحها
    ان الكاريكاتير مش هو اللى بيحدد براعة الكوميديان
    عشان كدة انصح ان اى حد عايز يعمل كاريكاتير
    يكون بجانب فقرة مش كاريكاتير بس
    إلا الحاجة اللى مش عايزة غير كاريكاتير
    زى تغطية الرو مثلا


    حاجة اخيرة بقى
    مش شرط و انت بتألف انك تضحك على اللى بتكتبه
    انا عمرى ما ضحكت على حاجة و انا بأكتبها
    كنت بأضحك لما اشو ردود الاعضاء و تعليقهم على فقرة معينة
    ارجع اشوف الفقرة و الموضوع كله
    و اضحك ساعتها
    عشان كدة اوعى تقول ان موضوعى وحش مش انت اللى تقيم
    و مش شرط انك تكتب حاجة مقرفه او تشتم الضيف عشان تضحك
    ممكن حاجة بسيطة فى النص كدة
    لكن كأساس مش بتبقى حلوة خالص
    صدقونى اللى بيقرا بيتضايق اكتر ما بيضحك


    كدة الدرس انتهى
    و الطالب الشاطر هو مين
    لا يا حبيبى مش هو اللى بياخد درس عندى
    هو اللى يعمل الواجب بتاعى
    و الواجب سهل خالص
    بصوا بقى انتوا هتعملوا اية


    الواجب

    عايز كل واحد يألف فقرة عن فريق ال NXT
    و اللى بيعملوه فى الرو من تكسير و ضرب مصارعين
    تكتبوا فقرات مش عايز و لا صورة فى الموضوع
    طبعا انتوا عارفين هأشوف الواجب فى الموضوع المخصص ليه
    الموضوع الرسمى للتواصل لمشتركى دورة احتراف الكوميديا يونيو 2010
    الدرس الجاى يوم الاتنين يعنى لازم اشوف واجب الكل
    بأقصى حد يوم الأحد

    التعديل الأخير تم بواسطة ™M@hmoud_Undert@ker™; 25-06-2010، الساعة 02:35 AM


    There are a Mounts That Can not be Climbed
    Seas That Can not be Sail
    and Legends That Can not be Dead










  5. #5
    الصورة الرمزية new__mido22
    تاريخ التسجيل
    Jul 2007
    المشاركات
    10,975
    الدرس التالت(تابع التأليف+طرق تأليف النكت)

    طبعا الدرس اللى فات اخدتم مع محمود مع الملحوظات و النصايح الهامة جدا للتأليف
    انا هازود انهاردة على كلامه فى شوية حاجات مهمة جدا
    اولا لازم تعرف كويس ان التأليف بيعتمد على كم المعلومات و الافكار و الخبرات اللى موجودة فى عقلك و اللى مرت عليك فى حياتك
    فلا تتعجب لما تلاقى واحد اكبر منك فى السن بيعرف يجيب معانى احسن منك
    علشان كدة انا نبهت فى الدرس الاول على اهمية القراءة للحصول على اكبر كم من المعانى و الافكار

    تانى حاجة لازم تعرفها ان مخك عامل زى الغطاس اللى بيبحث فى بحر كبير عن الافكار فلازم تديله وقت و تصبر عليه
    و انا هادى مثال عن نفسى
    التحليلات اللى انا باعملها
    ماقدرش اعملها فى نفس اليوم اللى اتذاع فيه العرض
    بل على الاقل لازم استنا يوم كامل من ساعة ما اتفرجت على العرض او شفت صوره لغاية ما الف الموضوع فى خلال اليوم ده انا ببدأ افكر براحة فى العرض و بلاقى افكار كوميدية جديدة جاتلى

    تالت هام علشان تألف موضوعك مظبوط
    انك تكتب موضوعك فى ورقة او كراسة قبل ما تكتبه اساسا على الكومبيوتر
    و لنفس الاسباب اللى فاتت
    خليك واثق انك لما تقرا موضوعك قبل ما تنشره مرة او مريتن هييجى على دماغك افكار تزودها على موضوعك
    ملحوظة: فى ناس بتقدر تخش تكتب الموضوع من اول مرة من غير ما تكون مألفاه قبل كدة و ده بيرجع لموهبة عندهم لكن لازم نكون عارفين ان الديفولت بتاعك انك تحضر الموضوع قبل ما تكتبه

    رابع هام
    للبحث عن الافكار الكوميدية دايما استخدم كلمة( ليه؟)
    مثال بسيط
    كلنا شفنا من كام اسبوع المصارعين بتوع عرض نكست بيعتدوا على جون سينا و بيكسروا الرينج و الترابيزات(واجب المرة اللى فاتت)
    انت بقا المفروض الحتة دى ماتعديش عليك من غير ما تألف عليها حاجة
    طب اعمل ايه؟
    بص يا سيدى
    انت اول حاجة هتسأل نفسك ليه مصارعين نكست اعتدوا على جون سينا و عملوا التخريب اللى عملوه ؟
    و بعدين هتبدأ تفكر فى اجابة كوميدية لسؤالك
    يعنى مثلا
    تفكر انهم كانوا بيدوروا على حاجة و الحاجة دى جون سينا بس هو اللى عارف مكانها
    طب الحاجة دى ممكن تكون ايه؟
    الحاجة دى ممكن تكون محفظة
    طب ايه اللى هايخلى العيال دول يبقوا مهتمين كدة انهم يلاقوها؟
    اصل المحفظة دى بتاعة مستر مكمان و الواد جون سينا نشلها منه

    طبعا الكلام ده كله جوة دماغك
    انا بورييك بس انت المفروض بتفكر ازاى
    ما ان توصلت للاجابة اللى فاتت دى
    انت كدة اسمك وصلت للفكرة الرئيسية لموضوعك و كدة يبقى انت قطعت منتصف الطريق
    فاضلك بعد كدة صياغة الفكرة بشكل كوميديى

    الصياغة دى
    • ممكن تبقى على شكل حوار بين اتين (مثلا مذيع و مصارع تانى)
    • و ممكن تكون على شكل خبر نثرى زى بتاع النشرات
    و ممكن تكون على هيئة تعليقات كوميدية على الصور
    براحتك
    و الصياغة دى ما بتتطورش عندك الا بكثرة القراءة و الملاحظة

    طبعا لاحطتم و انا بكلم فى اخر جملة
    انى بقول واد و عيال
    يبقى انا برضه ممكن اعتبر على الفاظ معينة اثناء الصياغة
    ولازم تعرف حاجة مهمة
    انت اعتمادك فى اى موضوع كوميدى لازم يبقى على حاجتين
    اول حاجة المعنى الكوميديى( اللى احنا اتكلمنا عليه فى اول درس و بيعتمد على مدى الغرابة)
    تانى حاجة اللفظ الكوميدي
    و ده عن طريق استخدام بعض الالفاظ اللى انت عارفها اصلا
    مثلا: مبرشم -خابور-مصلحة..على سبيل المثال فقط ..المهم تستخدم الفاظ شبابية جديدة

    طبعا الكلمات دى لما انت تقراها كدة فردانى ما بتدحكش خالص
    لازم تكون بتدل على حاجة فى موضوعك
    و هناك طرق كتيرة ممكن تستخدم فيها اللعب فى الالفاظ مثل التورية
    مثال :
    واحد بيتكلم عن الامتحانات
    فقال عن الامتحانات خوابير
    دى كدة اسمها تورية لانه شبه الامتحانات بالخوابير

    مستر مكمان وصى ماكنتاير مثلا انه يضرب سينا؟
    فسأله بعديها انت عملت ايه فالمصلحة؟

    المصلحة هنا دى اسمها تورية لانه يقصد بيها جون سينا
    و بيبقى ليها تأثر بسيط للضحك

    دى كدة بعض الحاجات البسيطة اللى ممكن تستخدمها اثناء موضوعك و مش هتزيد حصيلتك من الالفاظ الا بكثرة القراءة

    انا هنا بس كنت بديلك لمحة علشان لما تشوفها فى موضوع..تبقى عارف دى اسمها ايه و بتضحك ليه

    و تذكر حاجة مهمة : ان اللفظ بيدل على المعنى و المعنى هو اللى بيثير عندك الشعور بالضحك
    فأهم حاجة انك تعرف تبتكر المعنى الكوميدى من خيالك اما الالفاظ ف دى من حصيلتك اللغوية اللى انت اتعلمتها من حياتك اليومية



    دلوقتى بقا هنبدأ نطبق على شوية نكت
    احنا هنا هنعمل تدريب مهم جدا انه للفهم و من ثم التطبيق

    اقرأ الاول النكت دى و افهمها و اضحك عليها و بعدين نخش عالتدريب


    واحد رخم بيصلي وسمع إتنين بيمدحوا صلاته راح قاطع الصلاة وقالهم: وكمان صايم

    واحد غبى حبيتين عينوه مدير ملجأ أيتام اول قرار اخده اجتماع لأولياء الامور

    واحد بيقول لمراته انا بحب فيتراك جدا قالتله و انا بحب محمود جدا جدا قلها بس فيتراك ديه مربه قالتله و محمود ده عسل ... عسل

    اتنين مساطيل واحد سال التاني هو النهارده السبت و لا الحد قاله الاتنين قال ماشاء الله هما بقو سوا

    واحد دلوعة اوي ابوه جبله شريط اسلامي عشان ينصلح حاله تاني يوم الاب رجع البيت لقى ابنه متحجب


    تعالوا بقا نشوف سبب الكوميديا اللى فالنكت
    فى كل نكتة من دول فكرة غير التانية ضحكتك او بمعنى اصح فى طريقة معينة المؤلف استخدمها فى تأليف كل نكتة من دول


    واحد رخم بيصلي وسمع إتنين بيمدحوا صلاته راح قاطع الصلاة وقالهم: وكمان صايم
    عكس الفعل
    هنا بدل ما الراجل يركز فى الصلاة اكتر علشان هما مدحوا فيه..راح جاى قطعها بغباءه


    واحد غبى حبيتين عينوه مدير ملجأ أيتام اول قرار اخده اجتماع لأولياء الامور

    عكس المعنى
    الراجل اللى الف النكتة دى الفها ازاى؟
    تصورى الشخصى انه الف الجملة اللى باللون البنفسجى عادى خالص و بعد كدة بدأ يدور فى الجملة دى على اى لفظ له معنى و عكسه
    فدور ...وجد كلمة ايتام معناها طفل فقد ابوه و امه(اولياء امره) فقالك خلاص انا هاكمل بقية النكتة بعكس المعنى زى ما شفنا

    كان ممكن فى النكتة اللى فاتت دى يخليها


    واحد غبى حبيتين عينوه مدير ملجأ أيتام اول قرار اخده تعيين مدير جديد

    و هنا هو اخد باله من معنى مدير فى الجملة الاول و جاب عكسه فى الجملة التاية فاصبحت نكتة
    و لو ان الاول طبعا احلى

    كدة احنا اخدنا طريقتين من طرق (ممكن نسميها طرق صناعة النكت)


    واحد بيقول لمراته انا بحب فيتراك جدا قالتله و انا بحب محمود جدا جدا قلها بس فيتراك ديه مربه قالتله و محمود ده عسل ... عسل
    تكرار نفس اللفظ على معنى مختلف
    هنا كرر كلمة انا بحب مرتين
    مرة على فيتراك مع انها مربى و مرة على محمود على انه بنى ادم
    شايفين يا جماعة اللجملة اللى عليها خط
    تعالوا ناخدها لوحدة و نطبق عليها التلت نكت و هاوريكم ازاى المؤلفين بيألفوا نكت

    واحد بيقول لمراته انا بحب فيتراك
    عكس الفعل:
    واحد بيقول لمراته انا بحب فيتراك فمراته ردت عليه و قلت له حاضر يا حبى اوعدك انى لما انزل مش هاجيبها
    عكس المعنى:
    واحد بيقول لمراته انا بحب فيتراك فمراته قالت له علشان كدة انا عمرى ما شفتك كلت مربى

    تكرار نفس اللفظ على معنى مختلف(اللى هى النكتة الى فوق)

    واحد بيقول لمراته انا بحب فيتراك فمراته قالت له و انا بحب محمود
    و ممكن بعد كدة تكمل عليها زى اللى فى النكتة اللى فوق

    واحد بيقول لمراته انا بحب فيتراك جدا قالتله و انا بحب محمود جدا جدا قلها بس فيتراك ديه مربى قالتله و محمود ده عسل ... عسل
    طب الجزء اللى متخطط دلوقتى ده نوعه ايه؟؟
    ده اسمه تكرارنفس المعنى على معنى مختلف
    يعنى هنا المعنى المشترك بين المربى و العسل ان الاتنين بيتاكلوا و طعمهم حلو
    و طبعا كلمه محمود لها معنى مختلف تمام عن كلمة فيتراك
    فعلشان كدة بنسميه
    • تكرارنفس المعنى على معنى مختلف
    كدة احنا اخدنا 4 انواع من طرق تأليف النكت


    اتنين مساطيل واحد سال التاني هو النهارده السبت و لا الحد قاله الاتنين قال ماشاء الله هما بقو سوا


    طريقة التورية باستخدام اللفظ

    تورية يعنى ايه الاول: تورية يعنى كلمة ليها معنيان ..معنى قريب للذهن و معنى بعيد..انا بقا اقصد المعنى البعيد
    فى النكتة اللى فاتت كلمة الاتنين ليها معنيين..المعنى الاول: يوم الاتنين
    المعنى التانى:رقم اتنين
    الراجل اللى الف النكتة لعب على كدة
    خلى نص الجملة الاول: على المعنى الاول
    و النص التانى: على المعنى التانى
    الطريقة دى يا جماعة اللى بيطلقوا عليه فى مصر الألش

    عاوز اقول كام ملحوظة مهمة بالنسبة للطرق دى
    الطرق دى حاجات اجتهادية من اختراعى ..يعنى ممكن تلاقى واحد عنده الموهبة و بيعرف يألف من كتر الممارسة
    الملحوظ التانية انك لازم تعرف ان الطرق كلها فيها شبه من بعض و كلها بتندرج تحت ما قلناه فى اول درس
    الانسان يضحك على الغريب

    كدة ا يا جماعة الدرس خلص


    و ان شاء الله بعد الدرس ده المفروض يكون مستواك علي بنسبة 300% عن قبل الدرس بس بشرط طبعا تعمل الواجب
    كدة يا جماعة انا ادتلوكم 5 طرق من اشهر طرق صناعة النكت
    1. عكس الفعل
    2. عكس المعنى
    3. تكرار نفس اللفظ على معنى مختلف
    4. تكرار نفس المعنى على معنى مختلف
    5. التورية باستخدام اللفظ
    6. التشبيه(هتشوفوا الطريقة دى كتيرفى الواجب)
    ركزوا معايا
    انتوا هتاخدوا كوبى للطرق الخمسة اللى انا كاتبهم دول
    و هتعملوا انشاء رد جديد فى الموضوع بتاع التواصل
    و هتعملوا بيست هناك للطرق
    علشان حل الواجب

    الواجب بتاع انهاردة

    هتقروا النكت دى و تقولوا لى كل نكتة نوعها ايه من الخمس انواع او الطرق اللى فوق

    واحد دلوعة اوي ابوه جبله شريط اسلامي عشان ينصلح حاله تاني يوم الاب رجع البيت لقى ابنه متحجب



    واحده ست اشتركت فى من سيربح المليون جوزها طلقها عشان اتصلت بصديق

    *******

    مرة واحد سافر الكويت لقى الاسامى بوحمد و بو فهد و بو محمد و بو فيراس راح سمى نفسه بوكيمون

    *******

    واحد كهربائى..ابنه سخن ركبله ترانس

    *******

    كان في واحد شكله وحش قوي قوي قوي عايز يتجوز فراح واتقدم لواحده, فبيقول لأبوها :انا يا عمي بلا فخر عملت نفسي بنفسي
    قاله: ما انا برضه بقول استحاله تكون خلقه ربنا

    *******

    واحد مسطول راح صيدلية يشترى جبنة حاول الصيدلى يفهمه ان مفيش جبنه بتتباع هنا وشويه و مسطول تاني جه، فالصيدلى قاله فهم صاحبك ان مفيش جبنه بتتباع هنا قال لة ياعم سيبك منة دا غبى ادينى بنص جنيه لانشون

    *******

    مرة واحد ميكانيكى دخل فرح نقط زيت

    *******

    عربجى كارو دخل فرح قال رفصنى ياجدع

    *******

    فكهانى دخل فرح رقص عشره بلدى و عشره بسره

    *******

    واحد قال نكتة قديمة طلع تراب من بقة

    *******

    واحد حب يصطاد ارنب قلد له صوت الجزر

    *******

    مرة واحد اتزنق في قرشين فعصوه

    *******

    واحد سباك سايب رسالة على التليفون يقول
    اترك اسمك وعنوانك بعد سماع صوت السيفون

    *******

    واحد حانوتي فتح محل فاكهة قام كتب يافطة المـوز علينا حـق

    *******

    اتنين مساطيل واقفين مستنيين الاوتوبيس فالاول بيسأل : هنعرف الاتوبيس ازاى التاني قاله بسيطه اللى هيجى يقف هنا يبقى اتوبيس قاله طب والكومسارى قاله: بسيطه اللي حيحط ايده على كتفك يبقى الكومسارى ندفعله الاجره فجه الاتوبيس ركبوا جه واحد حط ايده عليهم فطلعوله الاجره وبيدوهاله فقالهم : انا مش الكومسارى انا ضابط بحريه قاله شوفت شورتك المنيله ادينا ركبنا باخره

    *******

    تلاته عمالين بيحششوا فى مزرعه طب عليهم البوليس استخبوا فى تلات أشوله جه الظابط شاط الشوال الاول برجله قام الحشاش الاول عمل نفسه بط و قعد يكاكى راح الظابط سابه وراح عالشوال التانى و شاطه قام الحشاش اللى جوه قعد يأدن ويقلد صوت الديك الظابط سابه و راح عالشوال التالت برضه شاطه برجله الحشاش التالت متكلمشى..شاطه تانى بس بالجامد برضه متكلمش .. شاطه تالت
    طلعله الحشاش يقوله بطاطس بطاطس انت مبتفهمش

    *******

    مره واحد مسطول بيصطاد سمك بالحشيش طلعتله سمكه بتقول : انا تمساااااااااح

    *******
    واحد قال لأبوه بابا عاوز أكمل دراستي بره قال وايه المشكلة، قول لأمك تفرشلك في الحوش بس خد بالك لتبرد

    *******
    مره واحده حامل ابنها الصغير بيسألها:ايه اللي في بطنك ده يا ماما قالتله :ده أخوك يا حبيبي...تاني يوم و هوه في المدرسه المدرس سأله:انت عندك اخوات؟ قاله:كان عندي واحد بس ماما أكلته.

    مرة اتنين أغبية كانوا ماشيين في الصحراء طلع عليهم اسد راح واحد رمى عليه طوبه وقعد يجرى وبص وراه لقى زميله واقف ما بيجريش قاله ما بتجريش ليه ؟ قاله واجرى ليه هو انا اللى ضربته

    كفاية كدة
    انا يا جماعة مش عاوزكم تتعبوا نفسكم اوى لو ماكتشفتوش الطريقة المستخدمة فى تأليف النكتة
    خليكو فاكرين ان الهدف..هو تعليمك اكبر كم من طرق التأليف


    بكرر كلامى انت لو فهمت الدرس ده كويس و طبقت عليه
    مستواك لازم يرتفع ان شاء الله 3 اضعاف مستواك الحالى



    ارجو تسجيل حضورك هنا
    ( الموضوع الرسمى للتواصل لمشتركى دورة احتراف الكوميديا يونيو 2010
    بكتابة تم قراءة الدرس الثالث
    و الواجب ان شاء الله هيتسلم هنا ايضا
    ( الموضوع الرسمى للتواصل لمشتركى دورة احتراف الكوميديا يونيو 2010

    تحياتى
    نيو ميدو
    التعديل الأخير تم بواسطة new__mido22; 28-06-2010، الساعة 05:43 PM

  6. #6
    الصورة الرمزية new__mido22
    تاريخ التسجيل
    Jul 2007
    المشاركات
    10,975
    تصحيح الواجب(نموذج اجابة)
    ==============
    واحد دلوعة اوي ابوه جبله شريط اسلامي عشان ينصلح حاله تاني يوم الاب رجع البيت لقى ابنه متحجب
    تشبيه(شبه الولد اللى هو الابن بالبنت اللى اول ما سمعت الشريط اتحجبت)

    واحده ست اشتركت فى من سيربح المليون جوزها طلقها عشان اتصلت بصديق

    تورية(لان مش المقصود بصديق ان مرته هاتروح تصاحب)
    *******

    مرة واحد سافر الكويت لقى الاسامى بوحمد و بو فهد و بو محمد و بو فيراس راح سمى نفسه بوكيمون

    تورية( و المضحك هو كلمة بوكيمون لان ليها معنى قريب و هو مسلسل كارتون و معنى بعيد هو الاسم الكويتى)
    *******

    واحد كهربائى..ابنه سخن ركبله ترانس

    تورية + تشبيه
    المعنى القريب:ان الابن درجة حرارته ارتفعت و ده معناه انه عيان
    اما المعنى البعيد المستخدم هنا تشبيه الابن بجهاز كهربى

    *******

    كان في واحد شكله وحش قوي قوي قوي عايز يتجوز فراح واتقدم لواحده, فبيقول لأبوها :انا يا عمي بلا فخر عملت نفسي بنفسي
    قاله: ما انا برضه بقول استحاله تكون خلقه ربنا

    تورية
    المعنى القريب: عملت نفسى بنفسى يعنى عصامى
    المعنى البعيد: انى خلقت نفسى و ده اللى استخدمه المؤلف هنا و بيبقى ليه طبعا اثر كوميدى

    *******

    واحد مسطول راح صيدلية يشترى جبنة حاول الصيدلى يفهمه ان مفيش جبنه بتتباع هنا وشويه و مسطول تاني جه، فالصيدلى قاله فهم صاحبك ان مفيش جبنه بتتباع هنا قال لة ياعم سيبك منة دا غبى ادينى بنص جنيه لانشون

    تكرار نفس المعنى على لفظ مختلف
    المعنى المقرر ان المسطول الاول و التانى بيبص للصيدلى على انه بقال فى المرتين
    اما اللفظ المختلف فهو اول مرة جبنة و تانى مرة لانشون
    *******

    مرة واحد ميكانيكى دخل فرح نقط زيت

    تروية او الش و فى رأيى سخيف
    لانه هنا شبه الميكانيكى بجهاز

    *******

    عربجى كارو دخل فرح قال رفصنى ياجدع

    تورية برضه زى اللى فوق
    المؤلف هنا بياخد الحرفة نفسها(العربجى) و يجيب اى فعل يختص بيها(الرفص)
    و فيها تورية تانية انه بدل ما يقول رقصنى قال رفصنى

    *******

    فكهانى دخل فرح رقص عشره بلدى و عشره بسره

    تورية
    لنفس السبب اللى فوق
    و ده اسمه الألش
    *******

    واحد قال نكتة قديمة طلع تراب من بقة

    تورية+ تشبيه
    التورية: فى كلمة قديمة
    و التشبيه للنكتة كأنها سجادة او اى حاجة مادية وسخة

    *******

    واحد حب يصطاد ارنب قلد له صوت الجزر

    تشبيه
    *******

    مرة واحد اتزنق في قرشين فعصوه

    تورية+تشبيه
    *******

    واحد سباك سايب رسالة على التليفون يقول
    اترك اسمك وعنوانك بعد سماع صوت السيفون

    تورية + تشبيه

    *******

    واحد حانوتي فتح محل فاكهة قام كتب يافطة المـوز علينا حـق

    تورية لفظية فى الموز بدل الموت
    *******

    اتنين مساطيل واقفين مستنيين الاوتوبيس فالاول بيسأل : هنعرف الاتوبيس ازاى التاني قاله بسيطه اللى هيجى يقف هنا يبقى اتوبيس قاله طب والكومسارى قاله: بسيطه اللي حيحط ايده على كتفك يبقى الكومسارى ندفعله الاجره فجه الاتوبيس ركبوا جه واحد حط ايده عليهم فطلعوله الاجره وبيدوهاله فقالهم : انا مش الكومسارى انا ضابط بحريه قاله شوفت شورتك المنيله ادينا ركبنا باخره

    *******
    دى ممكن تبقى تورية فى الجمله(اللى يحط ايدك على كتفك)
    المعنى القريب: كمسرى
    المعنى البعيد:ظابط بحرية
    *******




    تلاته عمالين بيحششوا فى مزرعه طب عليهم البوليس استخبوا فى تلات أشوله جه الظابط شاط الشوال الاول برجله قام الحشاش الاول عمل نفسه بط و قعد يكاكى راح الظابط سابه وراح عالشوال التانى و شاطه قام الحشاش اللى جوه قعد يأدن ويقلد صوت الديك الظابط سابه و راح عالشوال التالت برضه شاطه برجله الحشاش التالت متكلمشى..شاطه تانى بس بالجامد برضه متكلمش .. شاطه تالت
    طلعله الحشاش يقوله بطاطس بطاطس انت مبتفهمش

    تشبيه: شبه الحشاش نفسه بالبطاطس
    *******

    مره واحد مسطول بيصطاد سمك بالحشيش طلعتله سمكه بتقول : انا تمساااااااااح

    تشبيه: شبه السمكة بانسان مسطول علشان السمكة ما بتتكلمش و ما بتسكرش

    *******
    واحد قال لأبوه بابا عاوز أكمل دراستي بره قال وايه المشكلة، قول لأمك تفرشلك في الحوش بس خد بالك لتبرد

    تورية

    *******
    مره واحده حامل ابنها الصغير بيسألها:ايه اللي في بطنك ده يا ماما قالتله :ده أخوك يا حبيبي...تاني يوم و هوه في المدرسه المدرس سأله:انت عندك اخوات؟ قاله:كان عندي واحد بس ماما أكلته.
    تورية

    مرة اتنين أغبية كانوا ماشيين في الصحراء طلع عليهم اسد راح واحد رمى عليه طوبه وقعد يجرى وبص وراه لقى زميله واقف ما بيجريش قاله ما بتجريش ليه ؟ قاله واجرى ليه هو انا اللى ضربته

    تكرار نفس المعنى على معنى مختلف


  7. #7
    الصورة الرمزية new__mido22
    تاريخ التسجيل
    Jul 2007
    المشاركات
    10,975
    السلام عليكم و رحمه الله وبركاته
    انهاردة موعدنا مع الدرس الرابع و الاخير ان شاء الله

    هابدأ الدرس انهاردة بمواضيع الصور اللى انتشرت مؤخرا ولاقت اقبال و اعجاب ممتاز من الاعضاء

    الصور الكوميدية(تعليقات الصور الكوميدية)
    طبعا الاتجاة ده كنت انا وبعديا محمود السبب فى ظهوره و لاحظنا انه من اسهل الطرق اللى تقدر تضحك بيها اللى قدامك
    سهلة..خفيفة على القارىء..تقدر تحط تعليق بسيط اوى (و مناسب للصورة) تضحك بيه القارىء كأ نه قرا موضوع كتابى(نثرى) كامل
    فهى ليها ميزات رهيبة
    بس لازم تعرف حاجة انا لاحظتها مؤخرا
    افكارك بالنسبة للصور هتخلص بسرعة
    فانت فى البداية هتألف عادى على الصور و اول ما تلاحظ نفسك بدأت تكتب تعليقات مكررة و حاسس انك مش لاقى تعليقات تحطها..اعرف كدا ان انت فى حاجة الى اعادة شحن رصيدك الكوميدى
    (حصلت معايا انا شخصيا)
    و هتلاقى نفسك بحاجة الى الاستعانة بفقرة كتابية +صور عليها تعليقات كوميدية
    و ده انا بعتبره موضوع قياسى(و هنتكلم فيه بالتفصيل فى الدرس القادم و الاخير)
    فى البداية احب ارشدكم لبعض البرامج اللى ليها دور رئيسى للكتابة على الصور
    برنامج
    snagit10.0
    https://dvd4arab.maktoob.com/f542/2320186.html
    مميزاته:يتيح لك الكتابة على الصور باستخدام (talk bubblesمتنوعة الاشكال و الالوان) حجمه صغير+له مميزات اخرى خصوصا فى شروحات البرامج و التسجيل من على شاشة حاسوبك+حجمه صغير بامقارنة ببرامج الفوتوشوب

    adobe photoshop
    لو انت عاوز تحمل برنامج ادوب فوتوشوب و مدعوم باللغة العربية
    الموضوع ده فيه جميع الاصدارات القديم و الجديد
    https://dvd4arab.maktoob.com/f542/1835155.html
    مميزات البرنامج:
    يتيح لك الكتابة على الصور باستخدام (talk bubblesمتنوعة الاشكال و الالوان)+بالاضافة طبعا انه برنامج احترافى للتصميمات
    عيبه بس انه حجمه كبير
    windows paint
    مفهاش حاجة عيب لو معندكش البرامج اللى فوق و هتستخدم الباينت
    الباينت ملوش مميزات غير انه بيبقى نازل جاهز مع الويندوز
    اما الباقى فهو عيوب:عدم التغيير فى التيكست بعد كتابته
    ما فهوش talk bubbles
    و هو برنامج غير احترافى تماما
    بالظبط للمبتدئين

    ثانى هام:
    انت هتجيب الصور منين؟؟
    لاما هتجيبها من منتدى الصور
    او تجيبها من موقع wwe نفسه
    و ده موضوع انا عمله علشان تقدر تجيب الصور من هناك باحترافيه
    احدث طريقة لحفظ الصور من wwe.com و استخدامها فى التحليلات الكوميدية


    ================
    بكل بساطة انتا هتجيب اول حاجة الصور من المصادر اللى قلت عليها و تحطها عندك عالجهاز
    و بعدين تبدأ تتفرج عليهم بتأمل
    و تحاول تركب عليهم موقف و تعليقات كوميدية من خيالك
    بعض الامثلة خلال هذه المواضيع
    يا ريت الجماعة المبتدئين مايكسلوش انهم يدخلوا عالمواضيع اللى هاحط لينكاتها هنا و يشوفوا بنفسهم و يتعلموا

    Ww e . ƒ @ t a l . 4 . w a y - full dvd quality-2010
    التحليل الكوميدى لعرض السماك داون 25-6-2010
    Wwe _ comedy _ r . A . W . 29/6/2010
    W w e . N . X . T . 30/6/2010

    ================

    دلوقتى هادى بعض ملحوظات للاحترافية
    professionalism

    • حاول تخلى بداية موضوعك قوية و نهاية موضوعك قوية لأن ده اللى بيدى الانطباع النهائى للقارىء عن موضوعك
    • حاولل تمشى مع سيناريوهات الاتحاد الحالية
    • يعنى لو الميز ماشى فى سيناريو مكروه..خلاص الف موضوعك و هو مكروه..
    • لو فى عداوة بين قوية بين تيكر و شون..ما اتألفش موضوعك و تطلعهم صحاب و هكذا
    • و هكذا و خلوا بالكم من النقطة دى لأن فى كتير بيغلطوا و بيبقى النهاية ان موضوعهم مش متناسق
    • بالنسبة للتنسيق لازم تخلى بالك منه
    • حاول على الاقل يكون هناك لونان فى موضوعك..حاول تحط فواصل..و الاهم من كدة حاول تكتب بفونت مميز و حلو
    • هتستخدم فى التنسيق بعض الاوامر هتسرعك
    • ctrl+a لتظليل الصفحة كلها
    • ctrl+استخدام الماوس=لتظليل الكلمات
    كان فى ناس سالتنى ازاى بحرك الكلمات زى كدة

    new_mido22



    دى يا جماعة الاكواد اللى باستخدمها
    كود HTML:
             [mover]القيمة[/mover]
                  [movel]القيمة[/movel]
                  [moved]القيمة[/moved]
                  [moveup]القيمة[/moveup] 

    كدة يا جماعة انا قلت كل اللى عندى
    الواجب اللى انا طالبه منكم (خصوصا من الناس الجداد اللى مالهومش مواضيع فالقسم)
    الواجب بتاعك: انك تعمل موضوع فى قسم الكوميديا والموضوع ده يكون مقسم الى جزئين
    الجزء الاول فقرة مكتوبة و الجزء الاخر عبارة عن صور عليها تعليقات
    يا ريت يا جماعة اللى ماجربش يعمل صور كوميدية قبل كدة..يجرب معانا
    و الفقرة تكتبوا عنها براحتكم..

    اتمنى تكونوا استفدوا من الدورة و انا عن نفسى قدمت فيها كل اللى اقدر عليها و اتمنى محدش يكون شايفنى قصرت فى حاجة
    و انا فى الخدمة فى اى وقت
    تحياتى
    اخوكم /محمد


    التعديل الأخير تم بواسطة new__mido22; 03-07-2010، الساعة 10:59 AM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك