موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



+ الرد على الموضوع
صفحة 1 من 12 1 2 3 11 ... الأخيرةالأخيرة
النتائج 1 إلى 15 من 177
Like Tree0Likes

الموضوع: أهم أسئلة المقابلات في شركات الدعايه(Interviews Questions)

  1. #1
    الصورة الرمزية drmansoob
    تاريخ التسجيل
    Sep 2006
    المشاركات
    15,004

    Flag Egypt أهم أسئلة المقابلات في شركات الدعايه(Interviews Questions)




    زملائي و زميلاتى الصيادله الاعزاء وكل من يعمل بمجال الدعايه الطبيه
    تلبية لطلب كثير من زملائي وزميلاتى الأعضاء بالمنتدى ومنهم


    tharwataa , mexxawy , moustafa_emam , wagdy2007 , ahmedhassam2030 , saassasa & IMAN MOSTAFA


    فقد قمت بعمل موضوع متواضع مختص بمعظم الاسئله اللى ممكن تتسالها ف اي مقابله
    وهذا الموضوع هو خلاصة 6 سنين خبره ولله الحمد مررت فيها بالعديد من الانترفيوهات
    ارجو ان ينال اعجابكم باذن الله
    بس اعذرونى انى هتكلم بصيغة المذكر عشان تبقي اسهل وللزميلات فائق الاحترام

    ملحوظه هامه

    =-=-=-=-=-=-=-=-=-=-=-=-=-=-=-=-=
    الموضوع حصري و من تأليفي الخاص
    واخذ منى تعب ومجهود كبير جدا
    أرجو عدم نقله الى اى مكان آخر قبل الرجوع لي شخصيا

    drmansoob
    =-=-=-=-=-=-=-=-=-=-=-=-=-=-=-=-=

    حبيت ابدا كلامى من البدايه خالص من اول عمل ال C.V
    وحتى عمل المقابله النهائيه ان شاء الله


    في كام حاجه كده مهمه ف السي في لازم ناخد بالنا منها واحنا بنعمله


    1- طبعا لازم يكون منظم وشيك بس بالاضافه لده لازم يكون مختصر يعنى الناس اللى بتعمل سي في صفحتين وتلاته ده مش شيء كويس ولا حاجه بالعكس خير الكلام ما قل ودل وبكلمتين ممكن نختصر كل اللى احنا عايزين نقوله عشان يدل على اننا ناس فاهمه وبنعمل ال GO TO THE POINT صح
    وده نموذج للسي في ممكن تحمله وتعدل فيه زى مانت عايز


    C.V


    2- الخبره بتتكتب من الاحدث للاقدم زى ماهو موضح بالسي في


    3- حاجه مهمه جدا ومعظم الناس بتقع فيها ...لازم نراعي الدقه المتناهيه ف كتابة السي في
    يعنى فى ناس تكتب ف اللغه الانجليزيه FLUENT وده طبعا غلط جامد جدا
    لان ده معناه انك بتتكلم انجليش زى ولاد البلد بالظبط وده مش بيحصل
    يفضل تكتب جيد جدا احسن عشان محدش يمسك عليك غلطه وكذلك بالنسبه للخبره ف الكمبيوتر والاوفيس


    دى تعتبر اهم حاجه الناس بتدقق عليها ف السي في
    ونيجي بعد كده للاسئله
    قبل اى حاجه خالص لازم حسن المظهر والثقه العاليه يكونوا موجودين قبل اى مقابله
    وتكون هادى ومتخليش اللى قدامك يحاول يعصبك مهما كان بس مش معنى كده انك تكون بارد لازم تبين انك ليك رد فعل بس يكون بثقه وبودن عصبيه


    A- اسئله عامه

    ودى بيتسال فيها اى حد سواء كان اشتغل دعايه قبل كده او لأ


    1- قوللى success story عملتها ف حياتك

    وده من اشهر اسئلة المقابلات واهم حاجه انك تكون محضر حاجه انت نجحت فيها جدا جدا وتكون سابت علامه ف حياتك ويكون محدش قبلك عمل زيها قبل كده
    زى انك تكون دخلت دواء مستشفي محدش عرف يدخله فيها قبل كده او اى مثال تانى


    2- ايه العيوب والمميزات اللى فيك

    وده برضه سؤال مشهور جدا وخلى بالك لازم تكون صريح جدا
    يعنى في ناس تقولك قول كل المميزات وتقول مفيش عيوب فيا قال يعنى ده دليل على الثقه بالنفس
    ده طبعا غلط جدا ده بيبقي دليل على كذبك وخداعك لازم تقول العيوب اللى فيك وبصراحه ( بس متتوصاش اوى يعنى متشردش نفسك هههههههه)
    المميزات المهمه للشغل طبعا كلنا عارفينها زى النشاط والطموح والغيره على شغلك والتنظيم ف شغلك


    3- اسئلة كشف الكذب

    ودى بتبقي اسئله غير مباشره اللى قدامك بيحاول يعرف منها انت ممكن تكذب على مديرك او تتبع طرق ملتويه ف الشغل ولا لا ومعظمها اسئله ممكن كلنا نقع فيها بسهوله
    مثال : لو انت شغال على دوا فيه side effect بسيط اوى ومش مضر تماما بصحة المريض زى زياده طفيفه جدا ف النبضات مثلا ونادرا ما يظهر على المريض
    هتقول للطبيب عليه ولا لأ
    طبعا بدون تردد حضرتك هتقول لا طبعا مادام هو عرض جانبي بسيط عشان الدكتور ممكن يخاف وميكتبش الدواء
    وقعت يا حلو : هيقولك افرض جه المريض اشتكى للدكتور من الحاجه دى والدكتور خاف ودخله عنايه مركزه مش لو كنت قلتله م الاول كان زمانه عرف وطمن المريض وثقته فيك زادت ..كده انت خسرت الراجل
    الصراحه مهمه مهما كانت


    4- سؤال مهم :

    هيقولك افرض انت كان عندك مقابلتين ف يوم واحد وجينا احنا اتصلنا بيك احنا والشركه التانيه ف نفس اليوم وكل واحد فينا اداك offer والشركتين زى بعض ف كل حاجه ما عدا الراتب هما اكتر مننا هتروح فين

    طبعا حضرتك هتقول هاجى معاكم طبعا انتو احسن وانتو اكبر والشركه فيها استقرار
    هيقولك لا احنا الاتنين زى بعض ف كل حاجه مفيش فرق غير الراتب
    ساعتها اوعى تتردد... قول هروح معاهم طبعا ... كلنا بنشتغل عشان الفلوس ومادام هما زيكم وعرضهم احسن هروح معاهم
    ده هيبقي دليل على صراحتك لان ده شيء طبيعي واللى بيعمل معاك المقابله نفسه لو جاله عرض احسن ف شركه تانيه هيروح .. والله انا كان عندى اتنين مديرين كل واحد فيهم ساب الشركه وراح مكان احسن ههههههههه
    بس لازم تضيف حاجه تقول لو انا اديتكم وعد وقولتلكم ان معاكم ساعتها مش هخلف وعدى عشان تبين انك انسان محترم


    5- سؤال للى مشتغلش دعايه قبل كده

    هيديك اى حاجه تعبانه زى قلم قديم او موبيل قديم ويقولك بيعهولى
    اهم حاجه ف عمليه البيع انك تعرف اللى قدامك ال needs بتاعه ايه ف الاول قبل ما تعرض عليه الحاجه دى
    وتقوله جمله حلوه اوى...يعنى لو حضرتك لقيت حاجه بالمواصفات دى هتشتريها
    هيقولك اه طبعا... كده انت زنقته .. تقوم تعرض عليه المميزات اللى ف الموبيل مثلا واللى تتوافق مع احتياجاته كده هو ادبس واشترى غصب عنه


    6- لو حد طلب منك هديه معينه عشان يمشيلك شغلك هتعمل ايه

    طبعا الاجابه معروفه بس الاهم منها سببها
    هتقول لا طبعا ومش عايز منه شغل والشغل مش هيقف على شخص واحد وفي غيره كتير
    وتانى حاجه تقول ماهو لو لبيت طلبه بكره يطلب طلب اكبر وبعده طلب اكبر واكبر


    7- سيبت شركتك القديمه ليه او عايز تسيبها ليه

    ده سؤال للاسف معظمنا بيجاوبه غلط بانه بيقعد يعدد ف عيوب شركته القديمه
    اهم شيء نتكلم عن اى مكان اشتغلنا فيه قبل كده باحترام شديد مهما كانت عيوبهم
    والعيوب المسموح ذكرها واللى اى حد ممكن يتقبلها وميمسكهاش عليك غلطه انك تقول
    والله المرتب ضعيف شويه وومش بناخد training كويس ف حبيت اشتغل ف شركه تكون مدرسه استفيد منها واتعلم فيها
    انا عن نفسي قلت الكلام ده ف شركتى اللى انا فيها دلوقت بس اضفت على كده انهم كانوا ناس محترمين واتعلمت منهم حاجات كتير برضه وياريت تكون سايب ذكرى حلوه ف شركتك القديمه عشان لو اتصل بحد منها ...مكن ده يحصل


    8- ايه اللى ممكن تضيفه بشغلك معانا للشركه

    ده سؤال صعب شويه بس الاجابه عليه لازم تكون منظمه
    هتقول انا طبعا الحمد لله طموح جدا وبحب شغلى وغيور عليه جدا واظن ان مفيش حد كتير كده اليومين دول
    واهم حاجه انى احاول ان شاء الله احقق اللى محدش قبلي حققه
    هيقولك زى ايه
    هتقوله انى اكتشف اماكن جديده ممكن يتباع فيها الدواء بتاعى مكنش حد بيبع فيها قبل كده
    واهم حاجه انك تحقق ال target وتعمل growth كمان يعنى تبيع اكتر من السنه اللى فاتت
    يعنى لازم تكون عارف تارجتك كويس وبيع السنه اللى فاتت عشان تعديهم
    وحاجه مهمه برضه انك لازم تكون عارف بيع ال competitors بتوعك وايه الاماكن اللى هما بايعين فيها وانت مش بايع
    وهى دى الطريقه اللى ممكن تكتشف بيها اماكن جديده


    9- هيقولك مكان حسابه مقفول مع الشركه ومش بنبيعله هتعمل فيه ايه

    اوعى تقول هبدل ...يبقي قفلت الانترفيو من قبل ما يبدا
    الجواب بسيط جدا انت هتعمل اللى عليك وتشتغل وتعمل prescription عاليه عشان تضغط على الصيدلي يشترى دواك
    ولو مشترهوش ييجي دورك بعلاقتك الكويسه وخفة دمك وال FOLLOW UP بتاعك انك تقنع الراجل يجيب الدوا بتاعك مهما كان


    10- سؤال مهم جدا

    عندك 3 دكاتره كل واحد بيشوف 10 حالات واحد بيكتبلك 8 والتانى 6 والتالت 2 هتعمل معاهم ايه هتزور مين اكتر وليه
    السؤال ده مهم جدا لانه هيبين طريقة تفكيرك
    في ناس كتير تقولك هزور اللى بيكتب 8 اكتر عشان ده هو اساس شغلى وهو اللى بيجيبلي ال target
    ده كلام سليم واللى بيكتب اتنين هزروره مرتين ف الشهر عشان مش بيجيب شغل كويس ده كلام مش سليم
    هنا لازم تقول كلمه حكمه ان اللي بيكتب اتنين ده هو اكبر فرصه ليك عشان يعملك growth
    انت بتحدد ال potentiality بتاع الطبيب من حاجتيتن .. عدد الروشتات اللى بتطلع منه .. وبيكتبلك منهم اد ايه وطبعا كلنا عارفين التقسيمه بتاعتهم


    11- طبعا من اهم الاسئله والمشهوره جدا هتحرق ولا لأ

    الاجابه برضه معروفه بس اهم حاجه التفسير... لازم تقول انك راجل مجتهد وتقدر تجيب شغلك بنفسك ومش محتاج تحرق
    هيقولك انت مش محقق يا بندق .. قوله المندوب الشاطر يقدر يبيع من اول السنه وميزنقش نفسه وعارف هو المفروض يبيع كام من اول السنه وربنا ميجيبش شر ...هههههههه


    12- سؤال تانى صعب جدا جدا

    ممكن يقولك لو حد من زمايلك شفته مش بيشتغل او بيعمل حاجه غلط ف الشغل زى انه بيحرق مثلا هتيجي تبلغنى ولا لأ
    طبعا الاجابه الصح للاسف انك تقول هبلغ عنه
    بس انا عن نفسي اتسالت السؤال ده ف واحد من اكبر الشركات وقلتلهم مش هبلغ طبعا انا هقعد معاه وانصحه واقنعه ان ده غلط
    وطبعا متقبلتش والراجل قالي ف سره طريقك صحراوى يا حج ...هههههههههه... بس بيني وبين نفسي كنت مستريح
    بس لو عايز تحرجه بقه بجد... قوله المفروض مديرنا يعرف الحاجات دى من نفسه لان دى شغلته هو مش شغلتى انا وانا احب اركز ف شغلى وبس


    13-اشهر سؤال واسف انه جه متاخر
    رتب حسب الاهميه وليه : الشركه , المندوب , الدواء


    الاجابه النموذجيه هو الترتيب ده 1- المندوب 2- الدواء 3- الشركه
    طبعا المندوب هو اهم حاجه لانه هو اللى في ايديه الشغل كله ومن غيره مفيش حاجه هتم
    والدواء تانى حاجه لانه الطبيب مش هيكتب دواء عشان خاطر الشركه وانما عشان المنتج كويس
    ومين اللى هيوضحله ان المنتج كويس ... المندوب طبعا بشخصيته ولباقته وقدرته ع الاقناع عشان كده المندوب جه قبل الدواء
    لان ممكن يبقي دواء كويس جدا ومندوب ضعيف يخلى الناس مش مقتنعه بيه
    بس يبقي دواء كويس بس الطبيب يكتبه عشان خاطر المندوب اقنعه بيه
    وبكده تيجي الشركه ف المرتبه الاخيره والاجابه دى على ضمانتى


    14- يفضل لما تكون رايح تعمل مقابله على دواء معين انت عارفه انك تقرا ف ال MEDICAL شويه عشان احتمال كبير سالك عن المرض نفسه


    15- سؤال تانى هيقولك لو اشتغلت ف مكان غير بلدك توافق ولا لا او عندك اى قيود جغرافيه ف توزيع الشغل
    طبعا لازم تقول لا معنديش انا مستعد اشتغل ف اى مكان.. وبرضه ممكن تضيف انك بتفضل مكان معين عن غيره دى مش عيب خااااااااالص


    16- ده بالاضافه للاسئله الخاصه بعلاقتك وشخصيتك مع الناس لازم تكون صبور وتكون مستمع جيد للى قدامك
    ويكون دمك خفيف وتحافظ ع البريستج بتاعك مع الناس يعنى متجيش على نفسك عشان واحد طلب منك طلب لانك صوره لشركتك


    طبعا في اسئله تانيه كتير ممكن تتسالها بس اجابتها منطقيه ومعروفه ودي حاجه مش مستاهل ذكرها انا حبيت اعرض عليكم الاسئله اللى ممكن ننخدع ونجاوبها غلط
    بس ارجع واقول اهم حاجه الصراحه الشديده ومتخليش حد يحرجك وحاول دايما انك تكون ايجابي ومتخليش اللى قدامك يمسك الحوار طول الوقت وانت بتستقبل وبس
    حاول انت كمان تساله عادى او تفتح اى مواضيع معاه عشان دى مهمه جدا ف انك بتيبنله انك راجل LEADER وانك لبق وتقدر تقنع اللى قدامك
    وممكن ييجي ف الاخر يقولك تحب تسالنى سؤال.. يفضل انك متقولش لا.. خليك جريء واديله سؤال متين كده ... اشمعنى هو يعنى ما حضرتك بتتهرى اسئله م الصبح


    وان شاء الله لوحد عايز ممكن اعمل PRESENTATION بسيطه فيها عرض لل BASIC SELLING SKILLS عشان الزملاء اللى ما اشتغلوش دعايه قبل كده ياخدوا فكره عن الموضوع ويكون فيها برضه طريقة الكلام المثاليه والتعامل مع الناس وكيفية الحديث بطريقه PREOFESSIONAL


    ييجي بعد كده الاسئله اللى ممكن يتسالها حد كان شغال دعايه قبل كده
    نكمل ف الموضوع الجاى ان شاء الله
    التعديل الأخير تم بواسطة drmansoob; 20-12-2009، الساعة 06:08 PM


    ترجمة المواسم الخمسة الأولى من السلسلة الوثائقية ( الكــون )
    -(-( The Universe.S01 )-)--(-( The Universe.S02 )-)-
    -(-( The Universe.S03 )-)--(-( The Universe.S04 )-)-
    -(-( The Universe.S05 )-)-
    ترجمة سلسلة تاريخ العالم لأندرو مار
    -( BBC Andrew Marr`s History of the World )-

  2. #2
    الصورة الرمزية drmansoob
    تاريخ التسجيل
    Sep 2006
    المشاركات
    15,004

    Flag Egypt Call & Full Day Assessment

    B- Professional Questions


    نييجي للاسئله اللى ممكن يتسالها اى حدا مننا كان شغال دعايه قبل كده
    طبعا بالاضافه للاسئله اللى قبل كده كلها في كام سؤال بسيط كده زياده


    1- طبعا اول واشهر سؤال بعد الاسئله اللى فاتت انه هيقولك اعملى CALL ع الدواء بتاعك
    وطبعا انا مش هقولكم تعملو CALL ازاى بس احب افكر نفسي وافكركم ببعض الحاجات المهمه جدا


    قبل ما تبدا في اى CALL اول شيء لازم تعمله انك تحضر CASE من دماغك لطبيب معين
    ودى عباره عن 3 حاجات

    A-Doctor Perception

    اللى هى نظره الطبيب للدواء بتاعك هل هو عارفه وبيكتبه ولا عارفه ومش بيكتبه ولا مش عارفه اصلا وبيكتب دواء غيره

    B- Desired Outcome

    وده طبعا عباره عن هدفك اللى انت عايز توصل الطبيب ليه انك تصححله معلومه او توضحله حاجه هو عايزها منك

    C- Needed Action

    ودى هى الطريقه اللى هتعملها عشان توصل لهدفك زى انك تعرض عليه دراسه ع الدواء بتاعك مثلا تخليه يقتنع بدواك اوى


    صدقنى لو كلنا بدانا ال call كده يبقي الباقي سهل
    وطبعا باقي ال call مهم جدا واهم حاجه فيه how to handle dr. objections
    ودى طبعا كلنا عارفين نعملها ازاى بس لازم نكون مستعدين لاى اعتراض من الطبيب
    بس لازم نكون good listenerطبعا


    2- سؤال تانى ممكن يقولك ايه اهم حاجه ف ال call انت شايف انها ممكن تقنع الطبيب ب دواك
    من وجهة نظرى ان اول حاجه معرفة ال needs بتاع الطبيب
    و اهم حاجه
    how to handle his objection in a proffessional style & how to take commitment


    3- ايه اللى بيميزك ف شغلك عن غيرك وازاى تقدر تحقق ال target بتاعك
    وده نفس السؤال اللى ممكن يقولك فيه ايه اللى ممكن تضيفه للشركه وازاى
    طبعا احنا قلنا قبل كده ايه اللى ممكن تضيفه
    اما ازاى دى ف طبعا عشان انت راجل خبره لازم ساعتها تخلى ادامك 3 حاجات هى سر نجاحك ف شغلك


    A- Sales Review
    ودى طبعا زى ماكلنا عارفين عباره عن البيع بتاعى شهر بشهر وبيع السنه اللى فاتت شهر بشهر
    وال TAREGET بتاعى اكون مقسمه شهر بشهر او كل 3 شهور
    دى طبعا عشان تبين انك راجل منظم وتعرف تحقق اهدافك ازاى


    B- Bussiness Plan
    طبعا لازم تكون عامل جدول لبيع الدواء بتاعك وبيع ال competitors عشان تبين انك عارف السوق ماشي ازاى
    وانك واعى لكل اللى حواليك وتقدر تحسب ال Market Share بتاعك


    C- Forcast
    ودى طبعا الحاجه اللى مسببالنا التعاسه الابديه ف شغلنا ...ههههههههههه
    بس نعمل ايه لازم تبين انك محدد انك هتبيع كام وامتى وفين عشان تبين انك راجل محترف

    لو حددت ال 3 حاجات دى ف كلامك يبقي انت كده راجل عارف هو عايز ايه وهيعمل ايه

    وارجع واقول تالت ان اهم حاجه الثقه والكلام بهدوء عشان منغلطش كتير والصراحه الشديده


    هنقول بعدها جالك تليفون من الشركه : الو .. ايوه يابطل... استعد انت عندك
    full day assessment
    و ده بيبقي final interview و غالبا بيبقي ف مقابلات الشركات المالتى ناشيونال وف السفر للخارج
    يا ترى ايه هو ال full day assessment


    طبعا باين من اسمه
    هو عباره عن مقابله طويله من الصبح للمغرب تقريبا مع حوالى اربعه من ال top managers
    وده بيحصل لما يتوافق على اكتر من واحد ويبقوا عايزين يا خدوا منهم عدد معين


    Full Day Assessment

    1-Intellegence Questions

    ودى عباره عن اختبار ذكاء غالبا ما يكون عباره عن مسائل حسابيه تحتاج لسرعه ف الحل
    بيديك معطيات كتير ف الاول وبعدين اسئله عليها... الموضوع مش انك تحل بسرعه وده الغلط اللى بيقع فيه كل الناس
    اولا هو بيديك مثلا 60 سؤال ونص ساعه زمن الحل ...كده نظريا وعمليا مستحيل تخلص كل الاسئله
    ومش الصح انك تحل بسرعه عشان تحل اكبر عدد ممكن من الاسئله ... لأ
    الصح انك تختار الاسئله السهله اللى تحلها لانه غالبا بيحطلك اسئله طويله ف الاول تعطلك ... ف انت ببساطه اى سؤال طويل فوته بدون تردد وخش ف اللى بعده عشان تحل اكبر عدد ممكن... انما اللى بيحل بالترتيب بيكتشف ف الاخر انه حل عدد قليل جدا من الاسئله


    2- Language Questions
    ودى ببساطه اسئله عامه ف اللغه الانجليزيه لازم حضرتك تكون مستعدلها كويس
    وبتبقي عباره عن paragraph وعليه اسئله عشان تبين تمكنك من اللغه


    3- Round Table Discussion

    ودى بقي اصعب جزء ف المقابله بيخليك تقعد مع زمايلك اللى بيعملوا المقابله معاك ف نفس اليوم ويديكم topic معين ويقولولكم اتكلموا مع بعض فيه
    ساعتها لازم يكون عندك مباديء تمشي عليها
    لازم تكون leader وتشارك بفعاليه ف الموضوع وتحاول انك تكون الوسيط بينهم وتجمع بين افكارهم وتضيف فكرتك ف الاخر ويا سلام لو انت اللى تقفل الموضوع يبقي انت كده بقيت ال prince بتاع القعده


    4- Case Study
    ودى اطول جزء ف اليوم
    بيديك case لوضع معين للدواء بتاعك ف السوق ويديلك كل المعلومات عن ال market ف ملف ممكن يوصل لعشرين صفحه وبيديك حوالى ساعه ونص تقرا فيه الملف وساعه ونص بعدها تحضر في presentation تكتب فيها حل المشكله اللى مديهالك وبعدها يا بطل يديك نص ساعه تقوم تعرض ال presentation بتاعك ادام حضرات المديرين


    طبعا اهم حاجه وانت بتتعامل مع ال case اللى قدامك انك تحدد ال potentiality بتاع الدكاتره وتحدد عدد زيارات لكل واحد وتحدد هتحل مشكلتك ازاى بطريقه professional ودى طبعا هتيجي من خبرتك ف التعامل مع المشاكل اللى قابلتك قبل كده
    اهم حاجه وانت بتعرض الpresentation تكون واثق من نفسك وتتكلم بهدوء و ياريت الانجليش بتاعك ميكونش فيها اخطاء لغويه خالص
    ومهم جدا انك تكون محدد اهدافك ف السوق اللى لازم تكون طموح فيها وتكون واقعي ف نفس الوقت وتكون محدد نفسك بزمن معين عشان تبين انك راجل منظم


    5- call
    ممكن يخليك تعمل call تانى ف اخر اليوم بس مش ف كل الاحيان



    كده اكون جمعت ليكم معظم الحاجات المهمه ف المقابلات
    بعد كده حضرتك تستنى التليفون العظيم
    الو ايوه يا بطل ... انت عبرت القنال .. الف مبروك ... تعالى عشان تنضم للقوات
    ياريت اسمع ارائكم ف الموضوع بجد لانى تعبت فيه جدا والله العالم
    ولو اى حد عنده اى سؤال انا تحت امركم


    والسلام عليكم ورحمة الله وبركاته
    ولا تنسونا من صالح دعائكم


    اخوكم فى الله

    =-=-=-=-=-=-=-=-=-=-=
    Created By :-

    drmansoob


    All Rights Reserved

    =-=-=-=-=-=-=-=-=-=-=

    التعديل الأخير تم بواسطة drmansoob; 03-10-2009، الساعة 09:08 PM

  3. #3
    الصورة الرمزية The Angel ®
      The Angel ® غير متصل ربِ اغفِرْ لِي ولوَالديَّ
    تاريخ التسجيل
    Sep 2007
    المشاركات
    17,825
    موضوع ولا اروع من كده

    تسلم يادكتور ياكبير
    التعديل الأخير تم بواسطة The Angel ®; 24-11-2008، الساعة 12:48 AM

  4. #4
    الصورة الرمزية βlue_ωheat
    تاريخ التسجيل
    Jun 2007
    المشاركات
    5,929
    علي التثبيت عدل......و موضوع و لا اروع.....


    التعديل الأخير تم بواسطة drmansoob; 14-08-2009، الساعة 04:33 PM

  5. #5
    الصورة الرمزية alyyyyy
    تاريخ التسجيل
    Oct 2007
    المشاركات
    3,436
    موضوع رائع اخي الكريم ويستاهل التثبيت تحياتي
    عودة من جديد للمنتدى

  6. #6
    الصورة الرمزية drmansoob
    تاريخ التسجيل
    Sep 2006
    المشاركات
    15,004
    د \ ايهاب
    د \ سيد
    د \ على

    شكرا على ردودكم الجميله اوى دى
    وسعيد جدا ان الموضوع نال اعجابكم

    التعديل الأخير تم بواسطة drmansoob; 14-08-2009، الساعة 04:38 PM

  7. #7
    الصورة الرمزية miro26
    تاريخ التسجيل
    Mar 2007
    المشاركات
    1,164

  8. #8
    الصورة الرمزية drmansoob
    تاريخ التسجيل
    Sep 2006
    المشاركات
    15,004

    Flag Egypt

    اقتباس المشاركة الأصلية كتبت بواسطة miro26 مشاهدة المشاركة
    جزاك الله خيرا
    العفو يا اخى
    يارب الموضوع يكون افادك
    التعديل الأخير تم بواسطة drmansoob; 25-11-2008، الساعة 03:09 PM

  9. #9
    الصورة الرمزية apotheker
    تاريخ التسجيل
    Mar 2007
    المشاركات
    1,182
    بارك الله فيك يادكتور
    وجزاك الخير والثواب في الدنيا والاخرة
    ومنتظرين الاروع منك

  10. #10
    الصورة الرمزية drmansoob
    تاريخ التسجيل
    Sep 2006
    المشاركات
    15,004
    اقتباس المشاركة الأصلية كتبت بواسطة apotheker مشاهدة المشاركة
    بارك الله فيك يادكتور
    وجزاك الخير والثواب في الدنيا والاخرة
    ومنتظرين الاروع منك
    شكرا على ردك الذوق والدعوه الجميله دى
    وان شاء الله نعمل انا وكل زمايلي ف القسم مواضيع تفيد كل زملائنا وزميلاتنا الصيادله

  11. #11
    الصورة الرمزية NONO_MASHALY
    تاريخ التسجيل
    Aug 2006
    المشاركات
    109

    21

    شكراا علي الكلام العظيم بس في مشكله في الوقت الي كل الممتحنين قاعدين مع بعض بيناقشوا حوار او موضوع واحد لو تلاحظ ان كل الاي قاعدين هيعوزوا يبقوا هما اليدر وهما الي يجمعوا الافكار وهما الي يقفلوا الموضوع مش ملاحظ ان الموضوع ده هيبقي صعب شويه؟؟!!!!!!!!!!!!!!!!!!!!
    التعديل الأخير تم بواسطة drmansoob; 09-08-2009، الساعة 04:09 PM
    misho

  12. #12
    الصورة الرمزية IMAN MOSTAFA
    تاريخ التسجيل
    Oct 2008
    المشاركات
    23

    Flag Egypt [جميل جدا

    ماشاء اللة موضوع اكثر من رائع جزاك الله كل خير
    بس لم تتعرض للانترفيو للمستشفيات
    لو الانجليزى ضعيف ماالحل
    اشكرك جدا

  13. #13
    الصورة الرمزية drmansoob
    تاريخ التسجيل
    Sep 2006
    المشاركات
    15,004
    اقتباس المشاركة الأصلية كتبت بواسطة NONO_MASHALY مشاهدة المشاركة
    شكراا علي الكلام العظيم بس في مشكله في الوقت الي كل الممتحنين قاعدين مع بعض بيناقشوا حوار او موضوع واحد لو تلاحظ ان كل الاي قاعدين هيعوزوا يبقوا هما اليدر وهما الي يجمعوا الافكار وهما الي يقفلوا الموضوع مش ملاحظ ان الموضوع ده هيبقي صعب شويه؟؟!!!!!!!!!!!!!!!!!!!!
    اخى وزميلي العزيز : مشالى

    طبعا معاك حق ف رايك تماما
    عشان كده هتلاقيني قولت ان ده اصعب جزء ف assessment
    واكيد كل الناس هتحاول تبقي ليدر على الباقيين

    1- اقدر اقولك ان هنا هتيجي الثقه بالنفس والهدوء والابتسامه وهتلعب دور محورى ف المقابله
    لازم تكون هادى جدا وواثق من نفسك جدا جدا وابتسامتك متفارقش وشك
    لان صدقنى مش هتلاقي كل اللى قاعدين هاديين ... في ناس كتير بتبقي متوتره جدا
    وانت قلتها بنفسك ان كل الناس هتحاول تبقي ليدر يعنى هيبقي عندهم نسبة تسرع
    وغالبا التسرع بيوقعهم ف غلط سواء ف الموضوع نفسه او ف اللغه وده اللى هيخليهوم متوترين
    انت بقي بثقتك بنفسك وهدوئك تقدر تركز على اخطائهم وتبين لهم انك انت مركز اكتر ف الموضوع ومنظم ف افكارك
    ومش شرط تتكلم اكتر بالعكس
    انت ممكن بكلمتين تبين للى قاعدين انك اكتر واحد بتفهم ودى طبعا مش هتيجي غير من خبرتك اللى هتخليك واثق من نفسك

    2- مش كل اللى داخلين بيكونوا متوقعين او عارفين ايه اللى هيحصل جوا
    فى ناس كتير بتبقي داخله مش عارفه حاجه وتتفاجئ بالوضع فيرتبكوا
    انما انت لما تكون مستعد استعداد تام للموضوع ده هتلاقي نفسك فارق كتير عن باقي زمايلك
    ويا سلام بقي لو تحضر كام جمله كده وتحفظهم صم وترزع فيهم كام كلمه انجليش حلوين عشان تبين انك متمكن من اللغه
    هتفرق معاك جامد جدا لانك هتلاقي كل اللى حواليك اضعف حاجه عندهم هى اللغه
    فلما يلاقوك واثق ولغتك كويسه هتلاقي نفسك بقيت الليدر بسهوله جدا

    3- حاجه اضافيه اكيد انت عارفها طبعا لما تقول رايك ف موضوع صمم عليه ودافع عنه بهدوء وثقه وابتسامتك متفارقكش طبعا

    شكرا مره تانيه على رايك وقرايتك للموضوع
    وياريت تقولى رايك ف ردى عليك
    والسلام عليكم

  14. #14
    الصورة الرمزية drmansoob
    تاريخ التسجيل
    Sep 2006
    المشاركات
    15,004
    اقتباس المشاركة الأصلية كتبت بواسطة IMAN MOSTAFA مشاهدة المشاركة
    ماشاء اللة موضوع اكثر من رائع جزاك الله كل خير
    بس لم تتعرض للانترفيو للمستشفيات
    لو الانجليزى ضعيف ماالحل
    اشكرك جدا
    شكرا يا دكتوره ايمان على رايك اللى بعتبره شهادة تقدير للموضوع
    لانك انتى اللى كنتى طالباه م الاول والحمد لله انه عجبك

    بالنسبه لمقابلات المستشفيات مفتكرش انهم بيدققوا ف اللغه اوى
    ولو فرضنا انهم بيدققوا اذن لا يبقي الا حل وحيد ومثالى

    اولا : انك تتكلمى بهدوء...لانك كل اما تتكلمى على مهلك كل ما نسبه خطأك هتقل بنسبه كبيره جدا
    ثانيا : تختارى كلمات سهله جدا عشان متقطعيش ف الكلام
    لان الناس بتفضل انك تتكلمى ببساطه من غير غلط
    ولا انك تتكلمى بلغه قويه وكلمات صعبه بس بتغلطى و تقطعي ف الكلام كتير

    وبالنسبه لتقوية اللغه في طريقه سهله انا عن نفسي مجربها
    1- حاولى تقرأى رويات كتير والكلمه الصعبه اللى تقابلك طلعيها م القاموس واحفظيها
    2- حاولى تركزى كويس مع الافلام الاجنبى والترجمه بتاعها مش مجرد انك تقري الترجمه وبس

    الحاجات دى هتقوى اللغه عندك ان شاء الله

    شكرا مره تانيه يا دكتوره ايمان على مشاركتك ورايك اللى بعتز بيه جدا
    ونورتى الموضوع وقسم الصيدله
    والسلام عليكم

  15. #15
    الصورة الرمزية NONO_MASHALY
    تاريخ التسجيل
    Aug 2006
    المشاركات
    109

    Love

    كلامك مقنع جداا ودا يكمن عن خبرتك انتا فعلا اكتر من رائع انا بشكرك علي كلامك ده وردك عليا انتا انسان خدوم شكراا
    http://rapidshare.com/files/16514422..._Yara.rar.html

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك