موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



+ الرد على الموضوع
صفحة 1 من 42 1 2 3 11 ... الأخيرةالأخيرة
النتائج 1 إلى 15 من 617
Like Tree0Likes

الموضوع: ((((كيف تختار موبايلك الجديد بالطريقة الصحيحة))))

  1. #1
    الصورة الرمزية virus2002eng
    تاريخ التسجيل
    Feb 2004
    المشاركات
    1,123

    ((((كيف تختار موبايلك الجديد بالطريقة الصحيحة))))

    السلام عليكم ورجمة الله وبركاته



    اليوم حبيت أكتب موضوع قد يفيد الكثير من الناس لإختيار موبايل مناسب
    وبإمكانيات ترضي الشخص حتى لو واحد كان أبيض في الموبيلات يتفرج على
    الي هعمله معاه



    في البداية

    يجب على الشخص أن يحدد مبتغاه من التلفون يعني يشوف هو محتاج إيه من الإمكانيات
    الي محتاجة عاوز مثلاً تلفون يكون فيه راديو و MP3 وبيتركبله ميموري وكاميرا وبس
    وممكن واحد تاني ماتهمهوش الحجات ده بيبقى محتاج تلفون بس يكون شيك سواء بباب أو زلاج
    وطبعاً دلوفتى الشركات ( خصوصاً نوكيا ) مابتقدمش كل المميزات في عدة واحدة علشان التسويق لبقية العدد يعنى تلاقي تلفون فيه حاجات كويسة بس نقصة مش عارف إيه وهكذا

    خلاص دلوقتى فرضاً أن واحد عاوز تلفون تكون كاميرته معقوله ( مش غاوي تصوير قوي ) بس أهم حاجة ان يكون في راديو و MP3 علشان المزاج




    وفي البداية برضه

    ( طيب ياباشمهندس الكلام الي أنت قلته ده جميل إخلص على أهلى وقلي أعرف إزاي أن العدة كويسة بنفسي ؟ ) السؤال ده إتسألى كثير
    طيب هرد عليك أنا وهقولك لازم تشوف إمكانيات الجهاز ويفضل انك ماتشفهاش من الموقع الرسمى للجهاز ويفضل أن يكون لك موقع لشركات الأبحاث الهاتفية لأنها بتفصفصلك الجهاز وبتجيبلك عيوبه ومميزاته وأنا بنصح بموق كويس جداً وذات مصداقية كويسة وهو
    WWW.GSMARENA.COM

    بعد ماتدخل على الموقع ده هتلاقي على اليسار قائمة بجميع شركات الموبايل الي ربنا أوجدها على الأرض بلا إستثناء الوحش والحلو وشكل القائمة كده



    المهم لمى تختار الشركة الي أنت عاوزها هيفتحلك صفحة بكل موبايلات الشركة عملتها وبالصور كمان ( يالله عيش بدلعكو أهو )








    المهم أنا بنصح لو واحد متردد في شركة أنه يتمشى شوية في الشركات ويتفرج على الجديد ويشوف حاجة تعجب زوقه المهم دلوقتى أنت شفت حاجة عجبتك شكلها قوي وعاوز تعرف بقى
    العدة ده كويسة ولى لا من غير ماحد يفتى عليك ولى يسرحك ( خليك بس أنت مع الباشمهندس VIRUS ) وأنت هتندم قصدي هتكسب

    المهم دلوقتى أنا هوضح حبة نقط مهمة لأي واحد فينا انه يعرفها ( علشان بس يكون عارف هيشتري إيه بالضبط )
    بعد مالقيت الجهاز ( الهدف) الي أنت عاوزه دوس على الصورة وهيفتحلك صفحة بها خصائص الجهاز وبص معايا بقى على حبة النقط ده ( أنا إخترت الموبايل ده للشرح فقط أنا مابحبش النوكيا خلاص )






    أولاً
    الترددات

    أول حاجة ممكن تبص عليها ( مع أنها مش مهمة قوي بس قلت أشير عليها )
    الترددات الي بيشتغل عليها الموبايل

    وطبعاً زي ماهو باين أن التلفون ده بيشتغل على 3 ترددات وكلهمGSM وهي إختصار لـ Global System for Mobile وده مانسميه نحن الجيل الثاني 2G
    ومن هذا نعرف أن هذا التلفون مش مدعم لخدمات الجيل الثالث 3G ولو كان التلفون مدعم هنلاقي كاتبين أنه مدعم للـ 3G المهم النقطة ده مهم للناس الي بتجيب تلفونات من أوربا وشرق آسياً يتأكده أن التفونات مدعمة لحيز الترددات الي شغالة عليه مصر الي هو 900
    يعني لازم الموبيل يكون بيشتغل على GSM 900 غير كده هيكون الموبايل عمياني يعيني




    ثانياً
    المقاس والحجم



    وهنا قصده مقاس جسم الموبايل ووزنه
    وطبعاً ماحدش فاهم المقاسات ده هتعرفها إزاي أسهل حاجة تعملها أن تفتح صفح خصائص تلفون
    أنت عارفه كويس نقول مثلاً 6600 وتقارن المقاسات ببعض ساعتها هتاخذ باله من مقسات ده
    يعنى تخلي 6600 مرجع تقيس عليييه (طبعاً الحاجة ده تفرق مع واحد عاوز جهاز يكون صغير أو كبير ) حسب المزاج يعني




    ثالثاً
    الشاااااااشة يامعلم



    وده أنا شايفها من أهم الحجات الي لازم تاخذ بالك منها قوي
    وطبعاً هيجي واحد منكم ويقولي وده مهمة ليييييييه قوي ياحدق
    هقوم أنا وأرد عليييه قائلاً أن دقة الشاشة وعدد الألوان في البكسل هو ده الي
    بتوقف عليه نقاوة الشاشة وبيخلي الشاشة ده أنظف من التانية

    المهم أول حاجة هو كاتب النوع وهنا يقصد الحج نوع الشاشة
    وهي من نوع TFT وهي إختصار لـ thin film transistor وهذه التقنية بتعطيأفضل وضوح للشاشة وهي عبارة عن دمج ألوان البيكسل وأغلب الأجهزة الجديدة من بعد 6600 تقريباً وهي بتنزل بهذا التقنية
    وبعد كده كاتب 65K وهنا أن 65 ألف لون للبيسكل الواحدة وأنا من رأي الشخصي أن 65ألف شوية أغلب الجديد دلوقتى بينزل 256k لون وده أقل ما أنصح بيه
    وبعد كده قال مقاس الشاشة 176*208 بيكسل برضه ممكن تقارنها بمقاس6600 علشان تحس بفرق المقاس ( أنا بقول 6600 علشان أغلبيتنا مسكه وعارفه عن ظهر قلب )
    وبعد كده ذاكر حبة حجات زرار الملاحة بخمس إتجهات ( فوق وتحت ويمين ويسار و الضغط للداخل كزر ) .




    رابعاً
    النغمات


    وده طبعاً لو بيهمك الموبايل بيشغل إيه ومابيشغلش إيه
    هنا الحج قال أن نوع النغمات POLYPHONIC يعني مجسمة وبتتكون من 48 طبقة صوت
    وهنا أحب أقول لحضارتكم أن عدد الطبقات بيفرق كثير موووت في وضوع النغمات ( المجسمة)
    وشركة سامسونج هي الرائد في وضوح النغمات بتصل طبقات الصوت عندها لأكثر من 64 طبقة
    علشان كده تحسوا أن النغمات عندهم حلوة كده ونظيفة عن النوكيا
    وبيقول أنه مدعم يشغل MP3 كنغمة رنه
    وبعدين ذاكر أنه ممكن تعمل داون لون لنغمات ( وده بيكتبها في كل الموبيلات )
    وبعد كده ذكر أن فيه فايبريشن وده لازم تاخذ بالك منها ( مع أن خلاص أغلب الموبيلات بقت بفايبريشن )



    خامساً
    الذاكرة يابيه



    وطبعاً أنتو عارفين أهميتها أكثر منى
    أول حاجة هو كاتب أن النوتة مطورة ( وكل التلفونات كده)
    وثاني حاجة أنه بيسجل مكالمات ( طبعاً ده بتفرق مع أشخاص المقالب )
    وثالثاً ده أهم حاجة ( علشان تعرف الموبايل بيركبله كارت ومساحته الداخلية قد إيه )
    هو كاتب MMC وهي إختصار لـ Multi Media Card ودلوقتى ظهرت أنواع أخرى
    المهم هنا هو قلك أنه يتركبله كارت ولو ماكنش بيتركبه بيقولك NO MMC
    وبعد هذا ذكر أن الجهاز بيجي معاه كارت 32 ميجا ( طبعاً ده بتتوقف على التوكيل في البلدان )
    وبهد كده قال 6 ميجا مساحة الجهاز الداخلية وبعد كده ذكر أنه بيسجل فوق الـ60 دقيقة فيديو




    سادساً
    نقل الداتا و التوصيل



    وده برده تعرفوها علشان فيها حاجات مهمة
    أول حاجة ذكر الـ GPRS وهي إختصار General Packet Radio Service
    وهي تقنة الإتصال بالإنترنت عن طريق الموبايل وتصل سرعته إلى 115 كيلو بت لكل ثانية ( ده أقصى سرعة ) وطبعاً هنا في الموبايل ده سرعته 48 فقط بس الحجات ده مابتفرقش معانا ( قال يعني مقطعين النت عالموبايل )

    وبعد كده ذكر أن التلفون غير داعم للـ HSCSD وهي إختصار High-Speed Circuit-Switched Data وهي بتستخدم للـ GSM NETWORK

    وبعدين قال أنه داعم لخاصية EDGE وهي إختصار Enhanced Data rates for GSM Evolution وهي بتستخدم لمميزات الجيل 2.5G وهي عبارة عن مميزات تحتاج على إتصال ذات سرعة عالية زي الرسائل الفيديو وخلافه

    وبعدين ذكر أنه مش مدعم للجيل الثالث 3G

    والمهم بقى الي جاي بقى التوصيلات الي إحنا عاوزنا بجد
    قال أنه فيه بلوتوث ونوعه 1.1 ( البلتوثات فيرجنات كثير وعليها بتعتد سرعة البلوتوث)
    وبعد كده قال أن فيه إنفرا ريد
    وبعد كده قال أن ليه كابل USB ( يعني ممكن توصلي بالجهاز عن طريق الكابل )



    سابعاً
    المميزات العامة ( وده أهم حاجة )


    ركز بقى معايا وفووووق ( أوعى تكون نمت من الموضوع الرخم ده )


    اول حاجة ذكرها الحج OS وتعني الـ OPERATING SYSTEM
    أو نظام التشغيل أو بالعربي نوع السوفت وير المستخدم والشركات الرائدتان في صناعة سوفت وير للموبيلات هي سيميان ومايكروسوفت بس الأخيرة متخصصة في الـ آي ميت
    وطبعاً في شركات ثانية كثير غيرهم بس سيمبيان هي بقت تعمل أغلبية السوفت وير للنوكيا وهنا كاتب أنه الإصدار السابع وطبعاً أنتو بتشوفوا الإختلاف بين الإصدارات في الموبايلات المختلفة
    بتاعت نوكيا بس لو تلاحظة الأوبشن الأساسية كلها واحدة ( إخلص علينا ياعم الحج إنت لسه هترغي )

    وبعد كده بيذكر أنواع الرسائل
    وبعدها نوع المتصفح بتاع النت ( هم انواع وإصدارات كثير )
    وبعد كده الألعاب الموجود على الجهاز
    وبعد كده الألوان المتوافرة للجهاز
    وبعد كده وأهم حاجة لناس كثييييييييير الكاميرا
    كتبب أنها 1.23 ميجا وأنها 1280x960 بيكسل ( يعني الصور الي هتصورها من غير زوووم هتبقى بالمقاس ده) وذكر أنه بيصور فيديو ( وطبعاً لو الكاميرا كان فيها فلاش هيكتب ذلك ولو فيها MULTI SHOT هيذكر ذلك برضه يعنى الحج مش هيخبي عليكو حاجة )
    وطبعاً أنا بنصح أن الكاميرا ماتكنش أقل من 1.3 ميجا ( للمهتمين بالتصوير فقط )
    وبعد كده ذكر حبه خصائص الي موجودة في الجهاز أنا هقولكم على الحجات المهمة منها :

    Push to Talk وده خدمة جميلة جداً وهي أن تستخدم الموبايل كجهاز لاسلكي عادي بس للاسف الخدمة ده مش شغالة في مصر

    Java MIDP 2.0 هنا بيقول ان الجهاز مدعم بلغة جافا يعني ممكن تنزل عليه ألعاب جافا وبرامج الي بنشوفها اليومين دول

    Mono MP3 player وهنا بيقول أن التلفون فيه مشغل MP3 ماحدش يضحك عليكم ويقلوكم على الجهاز انه بيشغل MP3 بس ببرامج لازم تنزله لازم يكون التلفون يكون فيه مشغل علشان فرق الصوت

    Stereo FM radio هنا قال أن الجهاز فيه راديو وإيستريو كمان يالله هيصوا

    Visual radio وده صراحة ميزة عجبتنى قوي في التلفون ده وهي خدمة الراديوة لو جاية معاه أي إنفورميشن أو معلومات أو حتى صور بيعرضها زي التلفزيون بس للأسف الحجات ده مش في بلدنا العزيز

    T9 القاموس طبعاً كلكم عارفينه



    ثامناً
    البطااااااااارية ياعسل وماوراء البطارية



    طبعاً في الاول بيقول نوعها
    وبعد كده بيقولك STAND-BY بتعقد 150 ساعة ( قصده ان التفون لو سيبته خلاص من غير ماتتكلم أو تلعب فيه بيعقد 150 ساعة )
    وبهد كده بيقول التحدث بيعقد معاك 4 ساعات ( يعني البطارية طولها 4 ساعات كلام متواصل )

    ده بقى أهم 8 حجات لازم تعرفها عن الجهاز الي ناوي تشترية
    بس فيه نقطين زيادة علشان تكمل إقتناعك بالجهاز الي انت عاوز تجيبه
    ( إخلص بقى ياعم الأمور ) إصبروا بس



    تاسعاً

    ياريت تبص على حاجتين رئيسية في الصفحة بتاعت التفلون أولهما على الريت ده

    ده التقيم بتاع الناس على الجهاز وطبعاً مدام فوق 7 يبقى ممتاز
    وهمى بيقيموا على ثلاث حاجات التصميم والمميزات والإمكانيات

    وثاني حاجة ياريت تقروا شوية عن آراء الناس عن الجهاز


    ونصيحة حاول تقرى على قد ماتقدر من الردود لأنهم هيكشفوا عن عيوب ماتبانش إلى في الإستخدام بس أهم حاجة ماتلاحظ مشكلة إتكررت مع كذا واحد ده هيبقى عيب في الجهاز نفسة غير كده هتلاقي مشاكل أشكال وألون وعن سوء الإستخدام وهتلاقي برده ناس بتمتح في الجهاز وبتقول أحلى وأحش حاجة وطبعاً كل ده هيفيدك قوي


    عاشراً

    وده أخر حاجة وده هتبسطكو قوي قوي تحت صورة الموبايل هتلاقي مكتوب PICTURES



    دوس عليها هيفتحلك صفحة فيها الصورة الحقيقة للموبايل بنفس المقاس الحقيقي لها وتحت حبة صور
    وتحت حبة الصور هتلاقي كلمة
    Click for more pictures المهم دوس عليها هيجبلك بقى كمية صورة للموبايل من كل الزويا ومن الي جناب ومن جواه وبراه ومن كل حته تتوقعها


    وكمان هتلاقي هططلك صور للسوفت وير بتاع الموبايل





    وأحلى حاجة هتلاقيه حاطط صور متاخذة بالكاميرا بتاعت الموبايل علشان تشوف نقاوة الكاميرابنفسك







    وأخيراً نحمد الله الذي أعانني على إكمال هذا الموضع ( الي انا إتخنق منه ومنكم ) على أكمل وجه وإنشاء الله أكون أفدت كل واحد عاوز يعرف إزاي يقيم الموبايلات بطريقة صحيحة وسيبه من القيل والقال أنا كل ما أشتري جهاز ( أنت هتصيع هو أنت عندك موبايل أساساً ؟)
    بتحرى عليه بالشكل ده لحد ما أكون مقتنع بيه جداً

    وبعدين أهو وأنت قاعد على النت عرفت تاريخ الجهاز والسوفت وير وصور الكاميرا
    شفت بقى التكنولوجيا بتخدمنا إزاي

    تحياتي إليكم أخوكم الباشمهندس VIRUS ( لسه متخرج ومستنى الجيش )
    طبعاً أنتو شايفين أنا تعبت قد إيه في الموضوع ده ياريت أشوف بقى ردود حلوة
    وتدعولى من قلبكم أن تيجيلي إعفاء أو تاجيل ( مش أقل من عشرين سنة طبعاً )
    والسلام خير ختام
    اه نسيت أقول حاجة تانية ياريت لو حد نقل الموضوع يذكر المصدر علشان الامانة
    والسلام ختام
    التعديل الأخير تم بواسطة virus2002eng; 20-09-2006، الساعة 12:20 PM
    ـــــــــــــــــــــــــــــــــــــــــ


  2. #2
    الصورة الرمزية virus2002eng
    تاريخ التسجيل
    Feb 2004
    المشاركات
    1,123
    صحيح والي عنده أي أي أي إستفسار يقول ولا ينكسفش
    أو أي سؤال يسأل
    على فكرة أنا كنت عامل الموضوع بأشكال الوشوش ده بس
    قلي لازم تشلها وماتتعمل إلى عن طريق المدير

  3. #3
    الصورة الرمزية supersmart2007
    تاريخ التسجيل
    Nov 2005
    المشاركات
    1,288
    شكرا عل الشرح الجميل ده وفعلا الموقع ده كويس وانا متابعه على طول
    بس فيه مشكله غريبه جدا فى عالم الموبايلات انا اكتشفتها بعد خبره كبيره انت ممكن تساعدنى فى حلها
    المشكله ان لغاية النهارده كل الشركات لما بتصنع اجهزه جديده بتركز فى الكاميرا على الصور الثابته يعنى ميجا بعدين 2 ميجا لغاية 4 ميجا فى السونى اريكسون والصور اللى بتصورها بتكون رهيبه جدا لكن الفيديو يبقى بدون تطوير
    اقوللك حاجه عن تجربه وما تضحكش
    انا جربت جودة الفيديو المتصور بعدد نوكيا وسونى اريكسون على شاشة الكمبيوتر
    لا ان70 ولا ان 90 ولا ان80 ولا ان73 الفيديو بتاعهم يعادل اى كاميرا فيديو .ممكن نقول الفيديو كويس بس مش لدرجة السعر الغالى جدا اللى بندفعوه فى الموبايلات دى
    حتى سونى اريكسون بتطور فى جودة الصورة وبتهمل جودة الفيديو
    موبايل واحد اللى شوفته وفعلا الفيديو فيه مقارب من الجوده العاليه وهو نوكيا ان93 واتوقع ان سعره عالى جدا
    ياريت لو تعرف سعره تقوللى وياريت لو تعرف موبايل بيصور فيديو كويس غير ان 93 تقوللى عليه

    على فكره انا عندى موبايل مفيش منه فى العالم صوته عالى جدا وستيريو وكاميرا 5 ميجا بكسل وذاكرته 10 جيجا
    وشاشته 17 بوصه وفوق دا كله رخيص جدا بـ 190 جنيه بس عرفته؟
    عرض النجم من فودافووون هههههههههههههههههههههههههههه

  4. #4
    الصورة الرمزية virus2002eng
    تاريخ التسجيل
    Feb 2004
    المشاركات
    1,123
    أهلا أخي supersmart2007 وفعلاً كلامك صحيح تماماً


    بس المشكلة تتحور أن كاميرات الديجتال كلها ضيقة الإستخدام في الفيديو
    بل أن إميكانيات العدسات نفسها ضعيفة جداً لصنع فريم ريت ذات جودة عالية
    بس طبعاً هتلاقي كاميرات بتصور فيديو نظيف جداً بس في المقابل هتلاقي سعرها برضة نظيييف جدا
    يعني إن 93 أنا سألت علييه أول مانزل كان بـ 6500 جنية ( يعيييييييييني) وكاميرات الفيدوت متوسطة الإمكانيات مابتعديش الألفين ونص أو ثلاثة بالكثير
    وطبعاً تلفون زي ده هتلاقيه إمكانياته زي العربية المرسيدس :)

    بس انا أنصح لكل من مهتم بالكاميرات ملهوش إلى سامسونج وهى الرائدة فعلاً في صنع كاميرات الموبايل
    ( مع العلم أن كاميرات سامسونج بتعملها شركة كانون ) يعني مش أي حاجة أانا شفت صورة موبايل سامسونح
    6 ميجا والله الصورة أنظف من صورة كاميرا الديجتال الي عندي :(
    ودلوقتى الشركة طارح جهاز بـ 10 ميجا وأوبتكال زوووم كمان

    مع أنى شايف لو أنت من هواء التصوير تجيبلك كاميرا ديجتال تكون حلوة كدة أحسن من أي الموبايل والصورة
    الي تعجبك تروح تحمضها بنص جنيه ( تممممممممممممممام )
    وطبعاً عارف التلفون بتاعك ده خطييييير جداَ

    وتحياتي لك أخي supersmart2007

    التعديل الأخير تم بواسطة virus2002eng; 21-09-2006، الساعة 04:44 AM

  5. #5
    الصورة الرمزية yalla99
    تاريخ التسجيل
    Jul 2005
    المشاركات
    685
    شكرا على موضوعك الجميل


    الاهلى مش هاتقدر تغمض عنيك الزمالك هانام وتمدد رجليك

  6. #6
    الصورة الرمزية ZerOo_CodE
    تاريخ التسجيل
    Feb 2005
    المشاركات
    2,253
    مجهود أكثر من رائع تستحق عليه كل تحية وتقدير


    وفى رأيى الشخصى تستحق عليه وسام الشرف (هههههههههههههه حلوة وسام الشرف دى)

    بجد معلومات فوق الممتازة ( ولو إنى عارف إن محدش هيخش ويمقق عنيه فى الصفح دى علشان يفهم ويقارن _ دا إذا فهم اللى مكتوب أصلاً )

    وعموما أنا شايف إن دى كلها إمكانيات زايدة مش هتفيد فى حاجة ( يعنى تليفون بيرد ويقول ألوووووو ويجيب شبكة وبطاريته كويسة زى الفل )

    أنا سمعت ناس كتير بتقول إننا الشعوب الوحيدة اللى بتشترى العدد دى وبره مش بيهتموا أوى بالكلام ده

    يعنى مثلا اللى يخلينى أدفع س من الفلوس ( حيث س دا رقم كبير أوى ) فى موبيل علشان كاميرا وفيديو وإم بى 3 كان ممكن أوفر واجيب تليفون كويس وكاميرا ديجيتال محترمة وأنا الكسبان

    ( أيه الكلام الكتير اللى أنا رغيته ده ) المهم يا عم الحج ألف شكر على الموضوع
    سلام بقى
    التعديل الأخير تم بواسطة ZerOo_CodE; 21-09-2006، الساعة 10:16 AM

  7. #7
    الصورة الرمزية B@DR
    تاريخ التسجيل
    Sep 2004
    المشاركات
    5,398
    موضوع رائع ويستحق التقدير

    وصراحة مرجع مهم لكل من يسال عند شرائه تليفون

    تم التثبيت والتعديل

    تحياتي وتقديري لك

  8. #8
    الصورة الرمزية darkman_hy
    تاريخ التسجيل
    Jul 2005
    المشاركات
    1,184
    الف شكر يا باشا و الله موضوع اكتر من رائع
    و اموقع جامد جدا


  9. #9
    الصورة الرمزية virus2002eng
    تاريخ التسجيل
    Feb 2004
    المشاركات
    1,123
    مشكور أخي yalla99 على مرورك الجميل



    أخي ZerOo_CodE نورت الموضوع بجد
    وفى رأيى الشخصى تستحق عليه وسام الشرف (هههههههههههههه حلوة وسام الشرف دى)
    بلاش وسام ده الله يخليك أنا بتشائم بأي حاجة ليها علاقة بالجيش ههههههههههه :smoke100:


    بجد معلومات فوق الممتازة ( ولو إنى عارف إن محدش هيخش ويمقق عنيه فى الصفح دى علشان يفهم ويقارن _ دا إذا فهم اللى مكتوب أصلاً )


    وعموما أنا شايف إن دى كلها إمكانيات زايدة مش هتفيد فى حاجة ( يعنى تليفون بيرد ويقول ألوووووو ويجيب شبكة وبطاريته كويسة زى الفل )

    أنا سمعت ناس كتير بتقول إننا الشعوب الوحيدة اللى بتشترى العدد دى وبره مش بيهتموا أوى بالكلام ده

    ههههههه ما أنا عارف برده أن الناس ما بتعبش نفسها ( على خلاف الناس الي بره )
    بس برده المفروض لمى الواحد بيشتري حاجة المفروض يفهم هو بيشتري إيه ومايكنش
    ملطشة لأي حد عارفله كلمتين يتنطط عليه وهات إشتغلات



    يعنى مثلا اللى يخلينى أدفع س من الفلوس ( حيث س دا رقم كبير أوى ) فى موبيل علشان كاميرا وفيديو وإم بى 3 كان ممكن أوفر واجيب تليفون كويس وكاميرا ديجيتال محترمة وأنا الكسبان


    طيب أنا عامل كده فعلاً جايب موبايل حلو وكويس وشاري إم بي ثري وشاري كاميرا ديجتال
    وأنا شايف أن كده أحسن من أن كل حاجة تبقى في جهاز واحد وكمان مابتبقاش فيها الحجات
    ممتازة قوي بس هي فكرة التقنية اليومين دول اشية على مبدأ ALL IN ONE يعني بكره
    هيحطولك البيت على الموبايل ههههههههههههههههه


    شكراً لك أخي B@DR وعلى المجهود الطيب
    وشكراً على التثبيت ونورت الموضوع
    والحمد لله أنه عجبك




    أخي darkman_hy شكراً على زيارتك للموضع ووضع بصمتك عليه

    التعديل الأخير تم بواسطة virus2002eng; 22-09-2006، الساعة 09:32 AM

  10. #10
    الصورة الرمزية nbetoo
    تاريخ التسجيل
    Sep 2005
    المشاركات
    67
    موضوع رائع شكراااااااااااااااااااااااااا

  11. #11
    الصورة الرمزية vido dido
    تاريخ التسجيل
    May 2004
    المشاركات
    2,043
    شكرا على الموضوع الرائع












  12. #12
    الصورة الرمزية oozo44ever
    تاريخ التسجيل
    Mar 2005
    المشاركات
    2,118
    موضوع جبار وملوش حل
    ونا استفدت منه كتير والله

  13. #13
    الصورة الرمزية hamada_eng
    تاريخ التسجيل
    Sep 2004
    المشاركات
    515
    والله يا اخى virus كان بدى اكون من اول الناس ارد عليك واشكرك جدا على هذا الموضوع الاكثر من راائع
    وفقك الله ودائما فى تقدم
    واتمنى انك دايما كده تفيدنا بعملوماتك القيمه هذه

  14. #14
    الصورة الرمزية virus2002eng
    تاريخ التسجيل
    Feb 2004
    المشاركات
    1,123
    مشكور أخي vido dido على زيارتك الطيبة

    شكراً أخي nbetoo على تنويرك للموضوع

    أخي oozo44ever هو ده هدفي واللهي أن
    أفيد أي أحد بحاجة إلى المساعدة
    وشكراً لزيارتك

    أخي حماده مش فارقة الأول ولى الأخير المهم أنك
    وصلت بالسلامة :clap0000:

    وأي إستفسار أنا حاضر

  15. #15
    الصورة الرمزية hamada_eng
    تاريخ التسجيل
    Sep 2004
    المشاركات
    515
    الله يخليك يا virus باشا انا علطول اى استفساار هجيلك علطول واسألك
    الله يخليك للشعب :) :) :)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك