موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



+ الرد على الموضوع
صفحة 1 من 21 1 2 3 11 ... الأخيرةالأخيرة
النتائج 1 إلى 15 من 311
Like Tree14Likes

الموضوع: تجربتى الشخصية فى الهجرة لاستراليا وبعض العبر والنصائح

  1. #1
    الصورة الرمزية maboushamah
    تاريخ التسجيل
    Apr 2008
    المشاركات
    66

    2 تجربتى الشخصية فى الهجرة لاستراليا وبعض العبر والنصائح

    بسم الله الرحمن الرحيم

    السلام عليكم ورحمة الله وبركاته




    البداية احب اوضح ان ده اول موضوع ليا فى المنتدى او اى منتدى تانى ولكن حبيت اكتب تجربتى الشخصية اللى ممكن تفيد حد او يكون فيها عبرة ونصيحة لحد تانى ومش ارجو الا حسنة من الله عز وجل تنفع فى الاخرة ان شاء الله

    البداية:

    او اسميه الحلم زى معظم الشباب اتخرجت من الجامعة على امل واحد ان الواحد يحقق لنفسه وحياته حاجة كويسة تنفعه فى المستقبل عن طريق وظيفة بمرتب كويس وبعد فترة يقدر يحوش فلوس يفتح بيها بيت ويتزوج ويكون حياته الشخصية اللى كل الناس بتقول يارب مش مهم ابقى غنى ولا عندى فلوس كتير بس المهم الستر والصحة والاقى اكلي وشربى كل يوم منغير ما امد ايدى لحد ولا اتفضح قدام حد ولا اقعد على القهوة مش لاقى شغل واعتقد ان ده كان الحلم بتاع اى شاب فى الفترة الاخيرة ولحد قبل 25 يناير اللى فات.
    المهم مش هطول عليكم فى الحاجات ده بس البداية كانت وظيفة فى مكتب تصميم هندسى (بالطبع نسيت اقول ان تخصصى هندسة مدنى) وكانت فرحة اول مرتب متتوصفش حتى مع انه صغير ومش بيقضى كل الطلبات فى الفترة ده ولو حسبتها مش هرف اجيب شقة او اتجوز الا بعد 10 سنين هههه يعنى هكون لسه شاب شوية
    المهم ربنا كرمنى بدخول الجيش وضاعت سنة من العمر فى خدمة الوطن والحمد لله وربنا قضى المدة ده على خير وبكرمه وحده اتعلمت حاجات مش سهل اتعلمها بره ولو بفلوس منها الصبر وازاى تعيش فى اضيق الحدود وفى اى حتة ولو مش على سرير بس المهم تعرف تبقى قد الامور دايما وواقف فى الوقت الصعب راجل
    بعد الجيش ورجعت الشغل فى نفس المكتب وبكرم ربنا ظهرت اول بشرة للفرج بوظيفة فى الخليج وفى دبى بالذات اللى كانت لحد 2008 حلم لاى مهندس او اى واحد انه يشتغل فى باريس العرب من الخبرة الكبيرة للى هناك ومستوى الحياة الاعلى وطبعا المرتب الكويس
    وفعلا قضيت هناك 3 سنين بس كل سنة مش بتزيد جوايا الا حاجة واحدة هل انت راضى عن حياتك وده اخر طموحك ولا فيه حاجات ممكن تتعمل؟ هل دبى واللى كانت افضل مكان فى الخليج هى المكان اللى ممكن تستقر فيه فترة اطول ولا فيه احسن؟ فكرت لقيت ان فعلا فى حاجات اكتر منها اكمل دراسات الماجستير او اتعلم حاجات جديدة فى المجال بتاعى ولكن جات الصدمة الكبيرة لقيت ان اى فلوس اتغربت وتعبت واشتغلت بيها هتروح فى مدة قصيرة على التعليم ومش هعرف اكمل كمان اى دراسة هبدائها ولقيت نظام الكفيل وعدم الاستقرار هناك واضح وفى ابسط وقت يقلك انت خلاص مش مطلوب قدامك شهر تلاقى شغل تانى او ترحل وطبعا علشان ترحل ولو انت متزوج ما اصعب الامور وقتها من بيع اثاث وعربية وتنقل الاولاد من المدارس وغيره
    برغم صغر سنى تقريبا 24 سنة كنت عارف ان اده هيحصل سواء عاجلا ام اجلا انا عارف ان اخواتنا العرب المواطنين مش بيرضوا بالموضوع ده لان لما حصلت الازمة طالت ناس كتير منهم والشركات الاجنبية مش مهم الانسان بالنسبة ليهم قد ما مهم التوفير فى المصاريف وميزانية الشركة وفعلا كانت النهاية فى 2009 وغادرت دبى بس بعد ما بداءت اول خطوة فى الحلم بتاعى حلم الهجرة لدولة اوروبية او استراليا او كندا وكانت الواجهة هى استراليا

    مرحلة التحضير والعمل

    وده ممكن نقسمها لاقسام مهمة
    اولا: الدراسة والصبر.
    اهم حاجة فى الموضوع هو الدراسة المتعمقة فى الهجرة وهل هتناسبك وتناسب زوجتك وعائلتك ولا مش هتناسبهم بمعنى لو عندك اطفال صغيرين هل عملية انك تنقل من بلد عربى لبلد تانى ذو طابع وحضارة مختلفة سهلة وممكن يتغلبوا عليها ولا هتأثر فيهم لدرجة تخليك تقول يارتنى واللى احنا مش عايزينه يحصل ان شاء الله وطبعا اهم حاجة فى الموضوع هو الدين لان الطفل لما ينقل او يهاجر لبلد اوروبى هو وصغير هيكبر على مبادئ البلد ده من صديقة وخروج وحاجات كتير غريبة عن حضارتنا وده مهما تقول انا هحكمه انا هخلى بالى انا هعمل كذا وكذا لازم تحط فى دماغك ماذا لو .......

    تحت نفس الخطوة واللى هى الدراسة المتعمقة للموضوع وبعد مناقشة العايلة وكل اللى اتقال فى الفقرة السابقة تيجى لدراسة ايه البلد اللى هسافر عليه يعنى وقت ما كنت بفكر وزى ما قلت كان فى اكتر من خيار بس خلينا فى اشهر ثلاثة منهم واللى هم بالترتيب (كندا - استراليا - نيوزيلاندا) لما فكرت لقيت ان كندا واستراليا هما البلدين اللى ممكن اروح عليهم لان ببساطة نيوزيلاندا هى تصغير لاستراليا يعنى نفس الحضارة والمناخ وكل حاجة متشابهة وكمان لو اخدت الاقامة الدائمة فى استراليا يحق لك انك تعمل وتزور نيوزيلاندا دون فيزا مسبقة يعنى تعامل معاملة المهاجر النيوزيلاندى (ممكن تتاكد من الموضوع ده عن طريق البحث فى ويكيبيديا) والجديد اللى اكتشفته ان ناس كتير بتيجى تعمل هنا من نيوزيلاندا لقوة الاقتصاد الاسترالى وسوق العمل الافضل فى الاجور من نظيره النيوزيلاندى

    مهم بعد تفكير ودراسة لقيت ان استراليا هى الانسب لان اهم سبب شجعنى عليها هو موضوع معادلة الشهادة اللى بتعمله كا أول خطوة فى التقديم على الهجرة الدائمة هنا وده بيفيد كتير بمعنى ان بيدرسوا مؤهلاتك وخبراتك مقارنة مع الخريجين هنا ولو محتاج دراسة او شهادات معادلة علشان تواكب الطلب فى سوق العمل بيطلبوها منك قبل ما يعتمدوا اوراق او استمارة الهجرة بتاعتك وده كان بيختلف عن كندا اللى كانت بتقبل ناس كتير وقتها بغض النظر عن المعادلة ده ولما توصل هناك بتلاقى ان صعب تجد عمل فى مجال مهنتك بدون معادلات للشهادة ودراسة مقرارات كتير وده بيستهلك وقت طويل وفلوس اكتر وانت مش محتاج كل ده فى اول حياتك فى بلد اجنبى لان المعيشة والسكن لوحدهم هيستهلكوا جزء كبير من الميزانية بتاعتك وهتلاقى ان اهم حاجة انك تلاقى عمل فى اسرع وقت علشان يزيد فرصتك فى الاستمرار هناك ويديك دافع دايما وطموح فى العيشة عامة
    كمان نقطة مهمة كانت الانتظار برغم انى صبور والحمد لله بس انتظار الدور فى الهجرة لكندا كان طويل وممل وبعد الفترة ده ممكن يرفضوا طلبك او ان قانون الهجرة يتغير تلاقى انك عملت وصبرت وحلمت على امل وهمى وحاجة مش مضمونة (ده المطلوب فى الهجرة لاى بلد وخصوصا فى مرحلة التقديم انك تبقى صبور على الامور ده ومش تحط امل كبير بس الفكرة انك لما تيجى تراهن او تحلم بحاجة لازم تكون عن ثقة فيها والباقى تسيبه على ربنا عز وجل ولو ليك امل او اكل عيشة فى بلد لازم هتاخده ولو ربنا مش موفق لو هتعمل ايه مش هيحصل)
    كمان من نقط او اسباب تفضيل استراليا ان البلد لسه جديد مقارنة مع كندا او اى دولة اخرى وفعلا فى مهن ووظائف مطلوبة بكثرة هنا والاقبال على الهجرة من دول اوروبا او امريكا مش كتير زى كندا لانها اقرب فى المناخ والعطلات والمواسم لاوروبا منها عن استراليا اللى الصيف او اجازات راس السنة بتبقى فى مناخ مش محبوب او ملائم للاوروبيين كمان بعد المسافة عن اوروبا عامل مهم فى الجذب.

    بعد ما رسيت على واجهتى المستقبلية الحمد لله فى الوقت ده بداء الموضوع ياخد طبع الجدية ومراحل التنفيذ وكان لازم يكون فى خطوات منظمة وفى وقت سريع لان كنت متابع للقوانين وعارف ان كل سنة الامور بتزيد صعبوة عن اللى قبله وكان اهم حاجة ليا ان اقدم استماراتى قبل ما القانون الجديد ما ينزل او يعدلوا حاجة مقدرش عليها فى الوقت ده

    ثانيا: وقت العمل والجد.
    بعد اول خطوة لقيت ان كل تفكير بقى منصب على حاجة واحدة وواجهة واحدة اللى هى استراليا وكل فكرى فى المرحلة ده ايه المطلوب من ورق ومستندات وشهادات تخرج ولغة وخبرة وغيره او بمعنى اوضح ايه هى التفاصيل الكاملة للهجرة لاستراليا, بعد وقت وتصفح الموقع الحكومى للهجرة وبعد ما حملت كل الكتيبات الموجودة عليه والخاصة بالمعيشة والهجرة الدائمة لاستراليا بداءت افهم ويوم ورا يوم اعرف ايه المطلوب وطبعا اتابع اخر القوانين ومستجدات الهجرة كلها من لغة ووظايف وغيره واقدر الخص الموضوع ده ليكم فى تلت خطوات بسيطة:
    1- اللغة: (امتحان الايلتس كان وقتها لابد 6 فى كل الاقسام من قراءة وكتابة وسمع وتحدث ) وده بيفرق حسب الوظيفة المطلوبة وحسب الولاية اللى ممكن تسافر عليها يعنى المحاسبين او الاطباء ممكن يطلب منهم 7 درجات او غيره كمان لو هتقدم على دراسة بيطلب منك الامتحان الاكاديميى مش العام وغيره من الامور اللى مكن تقروا عنها بالتفصيل واللى هتكلم عليها تانى شوية قدام.

    2- معادلة الشهادة :( وده على حسب الوظيفة بتاعتك مهندس محاسب مترجم او غيره وكل واحد ليه المكان اللى بيعمله معادلة لشهادته والوقت الزمنى المطلوب للكلام ده – يعنى بالنسبة ليا نقابة المهندسين كانت طالبة تقرير عن الخبرة فى العمل الهندسى والسيرة الذاتية وشهادة توضح المسؤليات والجوابات ليا فى كل عمل عملته بجانب شهادة تخرج من الجامعة و 6 درجات فى امتحان الايلتس وكان الوقت المحدد للرد على التقرير والمعادلة تقريبا 12 اسبوع من وقت استلامهم ده طبعا لو مفيش ورق ناقص او التقرير مش كامل)
    المهم بعد ما تعمل او تخلص المرحلة ده وده بيختلف من وظيفة لاخرى وهتلاقى كل وظيفة مكتوب الجهة اللى بتعملها كدا وممكن تخش على الموقع بتاعهم وتبحث بالتفصيل ولو بعت ايميلات او رسائل هيردوا على اى استفسارات ليك فى يومين يعنى لو مش فاهم اسئلهم مش تقف عند نقطة وبحث النت هيفيدك وخصوصا فى مواقع بيكون معموله للهجرة وبتلاقى ناس بتتبادل فيها الخبرات فى المواضيع ده من وقت زمنى للرد او حاجات مفيدة لتجاوز الخطوة ده فممكن تحط تقريبا من 3-6 شهور دراسة للمرحلة ده وعلى بال ما تخلص المطلوب منك من ورق ومستندات وغيره.

    3- تقديم طلب الهجرة: بمجرد ما تاخد جواب معادلة الشهادة ولو تعرف تطلع كارنيه او تعمل عضوية فى النقابة اللى عملت لك الكلام ده بسرعة هتكون جاهز للمرحلة ده ولا تخاف على نتيجة امتحان الانجليزية لانها ببساطة مقبولة لمدة سنتين من تاريخ الاصدار (حتى لو مكتوب عليها صالحة لمدة سنة واحدة هما بيوافقوا عليها لمدة سنتين) اول حاجة تخش على النت وموقعهم وتملى الاستمارة من خلال الانترنت هيبقى اسرع واسهل وتعمل سكان او تصوير للمستندات ونسخة على الكمبيوتر وتحضر كل حاجة مطلوبة منك قبل ما تبتدى انك تملئ الاستمارة على النت وتتاكد من كل ورقك موجود ومساحته على الكمبيوتر مش كبيرة وفى صيغة هما هيقبلوها واحسن حاجة تعملها انك تطبع الاستمارة ده على ورق نسختين وتملاها يقلم ولو غلطت صلحها مش مشكلة علشان لما تكون على الانترنت هبيبقى التعديل صعب بعدين وبيكلفك وقت ورسايل واستمارات جديدة وممكن لا قدر الله استمرتك تترفض لسبب تافه فخد بالك جدا وكن دقيق فى كل حاجة وكل كلمة لانها مهمة ليهم جدا النسخة الورق خليها ليك علشان تعرف انت قدمت ايه وقلت ايه بالضبط وهتنقل منها وانت بتملى على النت (طبعا مصاريف الاستمارات مش بسيط وبيوصل 2500 دولار او اكتر ولو مش جاهز ورفضوا الاستمارة مش هيردولك الفلوس وده حاجة مش بسيطة فخد وقتك وكن متاكد جدا)

    4- بحث الطلب من ضابط الحالة: لكل طلب شخص من الهجرة بيدرس الورق بالتفصيل وممكن تاخد فترة طويلة على بال حالتك ما تدرس ستة اشهر او سنة او اكتر مش تقلق وخليك متابع حالتك والتقدم اللى بيحصل فيها على النت لانهم بيكتبوا اى خطوة بيعملوها وبتبقى واضحة قدامك المهم اول الضابط ما يمسك الطلب او الملف يبتدى يدرس فيه يعنى ممكن يكلم الشغل بتاعك يتاكد منهم انك شغال او يطلب منك كشف مرتب او شهادة خبرة او غيره ولو ورقك تمام نادرا ما هيطلي منك حاجة الا انك ملاء استمارة معينة خاصة بالحالة الجنائية (لا قدر الله لو عليك قضايا او مشاكل او حاجة قبل كدة)

    5- الكشف الطبى وصحيفة الحالة الجنائية: ده بتيجى بعد الضابط او الموظف ما يبتدى يدرس ملفك وكمان مش بتبقى سريعة ولا فى وقت محدد ليها ممكن يطلبها منك فى خلال اسبوع بعد المرحلة السابقة او بعد شهر او اكتر فكل اللى عليك الصبر وما تحاولش تتصل بيهم او تسالهم عن البطئ او انهم اتاخروا فى الرد عليك لان ده مش بيسرع الامر ولا بيعمل حاجة مهم لك بس خليك جاهز بمعنى لو انت كنت فى اكتر من بلد مقيم زى حالتى خليك معاك صحيفة الحالة الجنائية جاهزة قبل ما تغادر البلد ده او اطليها من السفارة الخاصة بيهم قبلها بفترة كبيرة لانها للاسف ساعات بتاخد حوالى 3-6 شهور على حسب البلد اللى هتعملهالك وكون جاهز بيها فى الملف بتاعك فى البيت بحيث اول ما تطلب منك تبعتها فى خلال اقصر وقت ممكن علشان انت مش محتاج تعطيل اكتر من كدة وفى نفس الرسالة اللى بتوصلك بيطلب منك الكشف الطبى وده لازم يتعمل فى مستشفيات محددة هما بيقلولك عليها وده بسيط ومش بياخد اكتر من كام يوم ومش هيطلب منك اكتر من تحاليل واشاعة على الصدر وهما بيبعتوا الرد والحاجات ده على الهجرة على طول (بيبقى مكلف شوية حوالى 200 دولار وحسب المكان والدولة) بس مش هيبقى ممل ولا صعب ولا مجتاج اكتر من انك تملا كام استمارة بخصوص الحالة الصحية بتاعتك من امراض وغيره وما تخافش اكتب الحقيقة لو لا قدر الله كذبت او غيرت حاجة مش فى مصلحتك وممكن تترفض استمارتك على طول ومش كل الامراض بتاثر على طلبك مجرد معرفة للحالة مش اكتر.

    6- الموافقة وجواب المنحة: خلصت يا بطل كل حاجة وفى الوقت المحدد خلاص انتظر شوية وغالبا بيبقوا مش كتير يعنى شهر اول 3 شهور او فترة مش طويلة ولو كل حاجة تمام الضابط هيبعتلك جواب يوضح انك اتوافق عليك وتم منحك الهجرة الدائمة ورقم التأشيرة بتاعتك ومدتها (خمس سنين وبتتجدد) والشروط من عمل و زواج ومرافقين وغيره (لو عازب ساعات بيكون شرط انك توصل هناك عازب) ولو معاك اطفالك او زوجتك كله بيظهر فى الجواب ده وهو المطلوب بس اهم حاجة فيه ان بيديك وقت معين لازم تسافر فيه البلد وتعمل تأكيد على التأشيرة او بمعنى تانى لاندينج وخد بالك ان المدة ده متغيرة يعنى ساعات بتبقى سنة من تاريخ الكشف الطبى بتاعك وساعات اقل وفى حالتى كانت خمس شهور بس من تاريخ الموافقة وتاريخ استلامى الجواب- يعنى لازم كل الافراد اللى حصلوا على الهجرة يسافروا ويدخلوا استراليا قبل التاريخ المحدد حتى لو هيقعدوا يوم واحد ويغادروا بس اهم حاجة هى ختم الدخول للمطار يكون قبل تاريخ انتهاء الصلاحية للفيزا ( ممكن تسافر مرة واحدة كهجرة او تسافر تتفسح اسبوع انت والعايلة وتشوف البلد وترجع تانى بعد ما تجهز امورك وحالتك النفسية والمالية تسمح)


    والله انا خلصت اهم مراحل الحصول على الهجرة الدائمة وتجربتى فى الموضوع ده واعتقد ان فى مواضيع كتير فى المنتدى بتشرح بالتفصيل كل مرحلة وفى مواقع فيها تفاصيل اكتر ممكن ابقى اكتبها فى موضوع تانى كمرجع للاخوى الاعضاء لو طلبوها بس انا زى ما قلت انا مش بتكلم على الهجرة ولا خطواتها اكتر من انى بتكلم على تجربة شخصية من الجائز يكون فيها افادة لك او لاى عضو اخر والله الموفق, وفى المرة التانية هتكلم على الحياة هناك وبدايتى فى العمل والمعيشة والسفر واختيار الولاية وايه اللى ممكن يفيدك انك تعمله قبل السفر واللى هيفيدك لما تكون هناك وغيره بس انا هأجل ده للمرة الجاية لو نال اعجابكم الموضوع ولقيت ان فى طلب من الاعضاء على الاستمرار اكيد هكمل ومش هبخل باى معلومة او حاجة ممكن تفيدهم
    وياريت انك تفهم او تفهمى ان ده موضوع وتجربة شخصية وكل حاجة هى رأى شخصى ووجهة نظرى ومش بنتقد او بحاول اجمل او اسئ لاى احد او اى مكان وانك لو اختلفت معى فى الموضوع فانا اتقبل هذا ولن اعترض ولست هنا لاناقش سياسة او دين او اختلافات بين انسان او دولة او غيره انا بعرض تجربة وخبرات ومش هبخل على اى واحد يسال عن اى حاجة ممكن اكون اهملتها او لم اوضحها بطريقة او باخرى بس كل طلبى انك تكون قرائت ودرست كل شئ وان لم تجد اجابة كافية عن سؤالك فانا تحت الامر ولا تسئل لمجرد التسلية او عن بخل منك فى اضاعة المجهود المرجو فى الموضوع وغيره.

    كمان عذرا للتحدث باللغة العامية المصرية فانا لا اجيد الفسحة كما انى حاولت ان اعطيك التجربة كما هى ليست منمقة او بكلمات لا اتحدثها فى الحياة بل البساطة كما هى

    وشكرا
    التعديل الأخير تم بواسطة ,KING; 12-03-2011، الساعة 07:25 PM

  2. #2
    الصورة الرمزية namer90
    تاريخ التسجيل
    Jun 2006
    المشاركات
    120
    يشرفنى اكون او واحد رد على موضوعك القيم جدا
    وربنا يوفقك للى فيه الخير

    ومستنى باقى الحكايه
    انا مش ناوى اهاجر لاى سبب
    بس حبيت اقرا تجربتك من داقع الفضول

  3. #3
    الصورة الرمزية zidzid22
    تاريخ التسجيل
    Sep 2007
    المشاركات
    271
    انت فين يا بشمهندس ,, بجد انت جتلى من السما انا محتاج اعرف تجربتك بالتفصيل الممل لانى بفكر فى الهجرة لاستراليا
    انا مهندس اتصالات و عندى اسئلة كتير بس مش عارف استنى لما تخلص حكايتك كلها ولا اسال علطول

    شكراااااااااااا
    أوقات يا دنيا معاكى بعيش

  4. #4
    تاريخ التسجيل
    Feb 2006
    المشاركات
    100
    والله يا بشمهندس تسلم ايدك و يا ريت تكمل لأنك بتفيد غيرك فعلا

  5. #5
    تاريخ التسجيل
    Sep 2009
    المشاركات
    325
    جزاك الله كل خير وربنا يوفقك
    منتظرين المزيد
    انا هاكمل على خطاك ان شاء الله خصوصا ان حالتى مشابهه لحالتك اوى
    انا خريج تجاره انجلش _ حاليا محاسب بالسعوديه _ استراليا هى الجهه المقصوده للهجره ان شاء الله


    يااااااارب ناولها لى

  6. #6
    ربنا يوفقك يا باش مهندس

  7. #7
    جزاك الله خيرا على سرد تجربتك الشخصية
    التى سوف تفيد اعضاء كثيرا بأذن الله
    ونتمنى تواجدك قدر المستطاع للرد على استفسارات الاخوة
    ونسأل الله لك النجاح والتوفيق


    مثبت اسبوع تقديرا لمجهودك الرائع
    التعديل الأخير تم بواسطة ,KING; 12-03-2011، الساعة 10:43 PM



    قنـوات القـرآن الكريـم على YouTube تفضّـلـوا بالزيارة
    www.youtube.com/user/QuranSound

    www.youtube.com/user/SoundQuran





  8. #8
    الصورة الرمزية costa0111
    تاريخ التسجيل
    May 2007
    المشاركات
    847
    good luck bro
    اللَّهُ لَا إِلَـٰهَ إِلَّا هُوَ الْحَيُّ الْقَيُّومُ لَا تَأْخُذُهُ سِنَةٌ وَلَا نَوْمٌ لَّهُ مَا فِي السَّمَاوَاتِ وَمَا فِي الْأَرْضِ مَن ذَا الَّذِي يَشْفَعُ عِندَهُ إِلَّا بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلَا يُحِيطُونَ بِشَيْءٍ مِّنْ عِلْمِهِ إِلَّا بِمَا شَاءَ وَسِعَ كُرْسِيُّهُ السَّمَاوَاتِ وَالْأَرْضَ وَلَا يَئُودُهُ حِفْظُهُمَا وَهُوَ الْعَلِيُّ الْعَظِيمُ

    Uploaded with ImageShack.us


  9. #9
    الصورة الرمزية SadSouL
    تاريخ التسجيل
    Nov 2004
    المشاركات
    926
    جزاك الله خيرا
    الناس تحسدك دائما على شيء لا يستحق الحسد , لأن متاعهم هو سقوط متاعك حتى على الغربة يحسدونك , كأنما التشرد مكسب وعليك أن تدفع ضريبته نقدا وحقدا

  10. #10
    جزاك الله كل خير اخى العزيز

    سوف اقوم بقرائتها ووضع استفساراتى

    وشكرا لك
    The Best Album 2o13



  11. #11
    الصورة الرمزية essam_010
    تاريخ التسجيل
    Sep 2009
    المشاركات
    374
    جزاك الله خيرا
    على هذا الموضوع الرائع
    و المتميز و المنسق و المرتب
    أرجو من الله أن يوفقك فى كل خطواتك

    One Team .... One Dream
    ITI .... I Will Be There isa

  12. #12
    الصورة الرمزية mohammed malah
    تاريخ التسجيل
    Mar 2007
    المشاركات
    377
    ربنا يوفقك انت واسرتك

  13. #13
    الصورة الرمزية ahmedgamal2006
    تاريخ التسجيل
    Jul 2006
    المشاركات
    163
    tab ana 3ayz 2s2l 3la shewayet 7agat zay eah haya egmaly el taklefa l7d 2bl ma tesafer
    thanyan : hwa 2fdal 2roo7 le maktab hegra wla ana 2shof el 7kaya deh benfsy we lw ro78t le maktab hatklef kam
    we yaret 7dretak tekamel el 7kaya

  14. #14
    الصورة الرمزية zidzid22
    تاريخ التسجيل
    Sep 2007
    المشاركات
    271
    هى حكاية حضرتك حلقة واحدة ولا ايه ؟؟؟؟
    يارب يكون المانع خير

  15. #15
    تاريخ التسجيل
    Aug 2006
    المشاركات
    92
    :) الصراحة التجربة بتاعتك حضرتك موضح فيها حاجات كتير أوي كنت محتاج أعرفها فعلا
    بارك الله فيك وربنا يوفقك في مشوارك وهجرتك ويبعد عنك كل شر يا أخي

الكلمات الدلالية لهذا الموضوع

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك