موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



+ الرد على الموضوع
صفحة 1 من 3 1 2 3 الأخيرةالأخيرة
النتائج 1 إلى 15 من 33
Like Tree0Likes

الموضوع: [  ♫ ♥ موضوعات للشباب +18 فـقـط ومتـجـدد بـأسـتمـرار ♥ ♫  ]

  1. #1
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25 [  ♫ ♥ موضوعات للشباب +18 فـقـط ومتـجـدد بـأسـتمـرار ♥ ♫  ]

    الموضوع الأول
    نبتدي موضوعنا كده وياريت ماينتهي بكده
    (الكوبري)



    الكبارى فى كل مكان فى العالم تستخدم لعبور السيارات والمشاة من فوقها وفى احوال نادرة تستخدم لعبور المياة والأسماك .
    لكن كبارى مصر عموما وكوبرى الجامعه تحديدا يستخدم لحاجه تانيه خالص, تلاقى كل 2 متر 2 عشاق واقفين فى حالة هيام مطلق , هوا حاطط ايدة على ايديها وهيا حاطه ايدها على ايدو ولا كأنهم فى شارع خالص وغالبا بيكونوا جنب عواميد النور مش عارف ليه ؟ يمكن الكهرباء ليها علاقه بالموضوع ؟؟؟؟
    انما ليه بيفضلوا كوبرى الجامعه او الكبارى عموماً؟؟ اقولكوا ليه:
    1-الكوبرى مجانا يعنى مش هايدفع فيه فلوس
    2-الكوبرى شارع وزحمه وزيطه ودا هايديلو فرصه انه يقرب منها ال ايه علشان تسمعه
    4-على الكوبرى هايكون جمع الميه والخضرة والوجه الحسن ( على اعتبار انه معاه مزه حلوة ولابس قميص اخضر)
    5-على الكوبرى ماحدش هايقاطعه ويرخم عليه ويقوله تشرب ايه (كلام منطقي برضه )

    6-غالبا بيكون مظبط صحابه يعدوا عليه علشان يتمنظر عليهم انه معاه واحدة يا سيدي
    انما الغريب فى الموضوع انه ماعادش فيه خشا ولا ادب كله بيعمل اللى هوا عايزة ولا كأنه فى شارع فيه ناس وعربيات وشرطة اداب وخيلق ربنا كلها بيشوفوة .
    انما الأغرب هوا موقف البنت. طيب الولاد مش مؤدبين ووشهم مكشوف ومش فارقه معاهم انما البنت المفروض تكون مؤدبه لأنها مالهاش الا سمعتها وشوفوا بقى لما يتقال عليها انها كانت واقفه على الكوبرى. هايكون ايه موقفها قدام الأمم المتحدة ؟ ؟
    لكن هانستغرب ليه؟ ما الأب و الأم اللى يسمحوا لبنتهم تدخل وتخرج زى ما هيا عايزة وتلبس المحزق والملزق اكيد مش هايمانعوا لو شافوها وعلي اى حد وفى اى وضع . ماهو اللى مايتكسفش من الخالق اكيد مش هايتكسف من المخلوق .
    الفكرة مش فى الغلط بس لكن فى الجرأة فى عمل الغلط دا.

    تحيــــاتي

    التعديل الأخير تم بواسطة Joy Boy; 04-06-2009، الساعة 04:43 PM

  2. #2
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25 [  ♫ ♥ موضوعات للشباب +18 فـقـط ومتـجـدد بـأسـتمـرار ♥ ♫  ]




    تحيه طيبه لجميع أعضاء ومشرفين أستراحه التورنت


    أنا أسمي كريم وأتشرف أن أضع أول موضوع لي في هذا القسمالأكثر من رائع المتميز

    ومن غير كتر كلام من العنوان يظهر البيان

    سوف نتحدث في هذا الموضوع

    عن كل القضايا المتعلقه بالشباب والبنات لكن بآسلوب مختلف عن الأخرين

    وبدون زعل

    وهناك أيضآ مواضيع أخري سوف نطرحها لكم

    ويمكنكم المشاركه أيضآ بطرح أي موضوع أو قضيه متعلقه بالشباب

    آرحب جدآ بذلك


    كما يمكنك التحاور والتشاور في الموضوعات المطروحه




    وسوف يتم طرح المزيد من الموضوعات علي قدر ردودكم وموافقتكم علي أستكمال ومتابعه الموضوعات .



    وسيتم أضافه الموضوعات الجديده
    لأستراحه التورنت فقــط





    التعديل الأخير تم بواسطة Joy Boy; 04-06-2009، الساعة 04:44 PM

  3. #3
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع الثاني
    نبتدي موضوعنا كده وياريت ماينتهي بكده
    (صباح الخير)




    حد يعرف هما ليه زمان كانوا بيجعلصوا الكلام اوى؟ كنت تحس وانت بتتفرج على اى فيلم قديم انهم بيرجعوا مش بيتكلموا , وياترى لو تخيلنا حوار بين واحد من زمان وواحد من دلوقتى ياترى هايكون ازاى؟ تعالوا نشوف:
    بتاع زمان : صباح الخير يا افندى
    بتاع دلوقتي : صباح القشطه يا بوب
    بتاع زمان :انا متضايق قوى ومهموم وفيه شئ عاوز اقولك عليه
    بتاع دلوقتي : قول يا باشا خليك أيزي ؟
    بتاع زمان : يا أخى البنات ابتدوا يغزوا الشوارع بشكل رهيب, تصور يا اكسلانس حتى الجامعه بقى فيها بنات .
    بتاع دلوقتي : اوعه يامعلم والنعمه معاك حق, كوبرى الجامعه بقىمرشق بنات مهلبيه معديه ( تمشي برضه الكلمه دي )
    بتاع زمان :مهلبية ايه بس يا اخى؟ دا حرام والله. شئ فظيع انك تلاقى حواليك من كل ناحيه بنات سافرات الوجه. دا حتى الملايات بيقلعوها دلوقتي .
    بتاع دلوقتي : فعلا ؟ بتوع الأداب بيخدوهم بالملايات ؟ طيب دا بيس خالص. يا بخت شرطة الأداب .
    بتاع زمان : يا ريت على بتوع الأداب وبس . دا حتى الحقوق والتجارة دخلوا فيها. ومش بعيد بعد كام عام تلاقى حكيمه ست وافوكاتو ست ههههههه.
    بتاع دلوقتي : ولو انى مش فاهم يعنى ايه افوكاتو لكن حاسس كدا انك لسه قافش . ياعم فكها ولو المزة فرقعتك فرقعها انت كمان وشوف غيرها .
    بتاع زمان : مزة ايه ومعزة ايه ؟ صدقنى يا افندى المسأله اضخم مما تتصور. انا راح اقولك على شئ فى منتهى الغرابه تصور يا مون شير انى امبارح وانا فى التياترو كانت جنبى واحدة ست ولوحدها ؟؟
    بتاع دلوقتي : اة والنعمه هما دلوقت فى المترو بيسيبوعربيات الستات وييجوا يركبوا معانا فى عربياتنا.
    بتاع زمان :مترو ايه يا اخى؟ عموما انا لازم امشى لأنى عندى معاد انجليزى مع حكيم العيون اورفوار يا اكسلانس ههههه
    بتاع دلوقتي : وانا كمان عندى رانديفو فرنساوى مع المزة, سلام يا بوب .


  4. #4
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع الثالث
    نبتدي موضوعنا كده وياريت ماينتهي بكده
    (البنات)

    هوا ايه اللى بيحصل هنا؟؟
    مش ملاحظين معايا ان الولاد ضعفت والبنات استقوو ؟
    انا طبعا مش هاتكلم هنا عن حقوق المرأة ولا حقوق عين شمس لكن بتكلم عن العلاقه اللى اتقلبت بين الولد والبنت.
    دلوقتى بقى الولد هوا اللى بيسهر طول الليل يسمع عبد الحليم ويعض النجوم قصدى يعد النجوم وطبعا بينام طول النهار من سهر الليل اما البنت طول اليوم مشغوله بدراستها وشغلها وترجع البيت اخر النهار مهدودة وعايزة يادوب تاكل وتنام علشان شغل بكرة ولو عبرته برنه ولا حاجه يبقى كويس .
    هو ايه اللى حصل؟
    اللى حصل ان الولاد ضعفت اوى قدام اسلحة البنات الفتاكه, وللأسف كل البنات ما تبعد كل الولد ما يضعف وكل الولد ما يضعف كل البنت ماتبعد اكتر وصدق من قال" سيبها تحبك حبها تسيبك"
    هيا البنت كدا, مهما حاولت تستقوى هيا من جوة ضعيفه عايزة اللى يحسسها بأنوثتها وضعفها . علشان كدا طبيعى انها تهرب من الضعيف وتحن اوى للى يديها على دماغها (مش كلهم برضه ) يعنى من الأخر كدا ومن غير زعل زى كرة التنس كل ماتخبطها فى الحيطه تردلك وفي نوع تاني من غير ما تخبطوا تلاقيه جنبك وحاسس بيك . المهم
    وللأسف برضه ان اغلب الولاد عبط وراكبهم العبط وبيفتكروا ان الحب ورد وميسدات وتليفونات وكلام حلو وبس (مش كلهم برضه ) لكن البنات بيبصوا للحب بمنظور تانى خالص.
    الحب عند الولد احساس ونظرة عين وتسبيله والحب عند البنت امان واطمئنان ورجوله.
    الحب عند الولد هاكون جنبك طول العمر وعند البنت عملت ايه علشان تكون جنبى.
    الحب عند الولد اتحدى العالم كله وانا وياك وعند البنت اثبتلى دا.
    الحب عند الولد انا اكتر واحد بيحبك وعند البنت خليك اول واحد يتقدم لى.
    الحب عند الولد هاشيلك جوة عيونى وعند البنت شيلنى فى شقه مناسبه.
    من الأخر الحب عند الولد اقوال وعند البنت افعال.
    مش عيب انك تحب لكن العيب انك تفرط فى كرامتك وعذرك انك بتحب.
    مش عيب انك تضورى على الأمان لمستقبلك لكن العيب انه يكون دا هدفك الرئيسى فى الإرتباط .
    مش عيب انك تضعف قدام حبيبتك لكن العيب انك تحسسها بضعفك دا.
    ومش عيب انك تدورى على ذاتك وطموحك لكن العيب انك تلغى ذاته وطموحه.
    اى ارتباط ناجح اساسه الإحترام والتفاهم والفكر الواحد. المهم انك تفضل بشخصيتك وقوتك وطموحك وكرامتك وانتى تفضلى بثقتك فى نفسك وطموحك وذاتك من غير ما حد فيكم ييجى على التانى .
    افهموها بقى وبلاش غباوة و والنبى بلاش " عذبنى اتعبنى غلبنى بس ارجع "



    يتبع
    بأذن الله

    و


  5. #5
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع الرابع
    نبتدي موضوعنا كده وياريت ماينتهي بكده
    (برنامج أسامه منير)



    انا والناس وكتير من اصحابى معجبين جدا بالبرنامج الجميل انا والنجوم وهواك هانديلك علي أفاك اللى بيقدمه المذيع اللامع ذو الصوت الرخم قصدى الرخيم اسامه منير .

    طبعا سر اعجابنا بالبرنامج مش سمسم لكن المزز اللى بتتصل فى البرنامج دا.
    كلهم تحت العشرين وتحت البطاطين , بعد الساعه 12 بالليل والمعاد دا اكيد مقصود علشان يكون اولياء الأمور ناموا تاخد البنت التليفون وتبدأ المكالمات الملهلبه زي : ( اسامه انا عندى 14 سنه وبحب المستر بتاعى) ( اسامه انا متجوزة وعندى بنت بس بحب ابن الجيران) ( اسامه انا بحبه وهوا مش معبر أهلى) وغيرها وغيرها من العبارات وقصص الحب المشعلله ليبدأ البيه أسامه بالرد عليهم بقوله ( ولا يهمك, سيبك منه وخليكى مع اللى يستاهلك, دا كلب ولا يسوى, ازاى تعبرى واحد مش حاسس بيكى , انتى تستاهلى سيد سيدة) وهكذا حتى تتظبط البنت تماما وتنسى اللى كانت بتحبه وتلعن سلسفيل ابوة كمان ثم يكمل عم سمسم (انتى صوتك حلو اوى, صوتك بجد بيدل انك شخصيه جميله, صوتك, محمد منير ) لتبدأ اغنية محمد منير وتتحول البونيه الى الكونترول روم حيث يتواجد حاتم منير اللذى يكمل عملية التظبيط بأخذ رقم الموبايل والوعد بلقاء اسامه باشا .
    وكان في واحد بيحب واحدة ومشغول عنها شويه بدافع امتحاناته والبنت اتخنقت راحت مكالمة اسامه باشا اللى تكفل بانهاء الحوار تماما مع صاحبنا
    لأ وايه البيه كمان قرر ان صوته حلو وقرر يغنى كمان
    يا اسامه باشا ايه مؤهلات سيادتك علشان تعمل نفسك امير الرومانسيه؟ حاجات مالكش فيها وخصوصآ أحترام السن؟ كل قصة حب مايقدرش يحكم عليها غير اللى عايشين فيها بس ماينفعش حد يتدخل ويوجه نصايح فى حاجه هوا مالوش فيها وكل مؤهلاته ان الظروف خدمته وهيافة البعض وصلته لمستوى مكنش هوا يحلم بيه .

    منتظر مقترحاتكم ومشاركاتكم معنا برد او بموضوع




    ويتبع

  6. #6
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع السادس
    نبتدي موضوعنا كده وياريت ماينتهي بكده
    (كيف يمكنك التعامل مع الزوجه النكديه)




    1- لما تصحى يوم الجمعه بهمه ونشاط وتلاقيها لسا نايمه وعاوز تجهز لها الفطار , بس ماتنساش بقي تستخدم 15 طبق واكبر كميه من الملاعق والشوك و 5 حلل من اللى عندكم فى المطبخ و 5 كوبيات لاعداد طبق بيض وسندوتش جبنه.


    2- اذا كنت بتتفرج على التليفزيون وهيا عايزة تغير القناة قلها معلش الحلقه دى مهمه جدا واحد صاحبى شافها على فضائيه وقالى ان الحلقه دى هيا فيها المسلسل كله , ولو بتتفرج على ماتش كورة يبقى الموضوع اسهل كل ما حد من الاعبين من اى فريق يمسك كورة قلها معلش بقى انا حاسس ان الكورة دى جون حتى لو كان حارس المرمى ماسك الكورة والماتش واقف لأن فيه واحد مصاب ( اغلب النساء ثقافتها الكرويه ضعيفه ) .


    3-الصبح وانت رايح على شغلك وهى نايمه تعمد اسقاط اى شئ او خبط على الباب بصوت عالى علشان تصحيها هى كمان اشمعنى انت يعنى؟؟؟ ولو حاولت ترجع تنام تانى قول لها مادام صحيتى بقي قومي حضريلى الفطار بقى .
    4- طبعا يراعى ترك اثار سمنه على الأرض مع ترك الثلاجه مفتوحه وقشر البيض فى الحوض .


    5- فى عيد ميلادها زين لها تورتة عيد ميلادها ب 50 شمعه ولو سألتك ليه 50 رغم ان عندها 20 سنه بس ؟ اتحجج بضعف الإضاءة عندكم فى البيت وانت بتبص على النجفه اللى عندكم اللى فيها 30 لمبه مع ابتسامه صفراء خفيفه .


    6- لو عملت ريجيم اجرى على السوبر ماركت ومحلات الحلويات واملى التلاجه شيكولاته وجاتوة وعليك بقي تاكل وتمزمز ومستمتع جدآ بأكل الجاتوة امامها .


    7- ماتنساش تقول رأيك فى طبيخها , لو عامله لحمه قولها حلوة اوى الفراخ دى ولو طابخه باميه قولها جميله اوى الملوخيه دى حاطه عليها ايه يا حبيبتى ؟ ولو عامله كيكه قولها انا بحب اشرب الشاى مع البسكويت الحلو دا .


    8-لو قررت مسح الأرضيات حاول انك تروح وتيجى على المناطق المبلوله متحجج انك محتاج تتصل بواحد صحبك ومرة عطشان ومرة تانيه بتجيب الجرنال ومافيش مانع انك حاسس ان التليفون هايرن كمان شويه .


    9-وانت قاعد تتفرج على التليفزيون وهيا طالع عينها فى تنظيف البيت وبعد ما تخلص وتيجى يادوب تقعد تستريح جنبك بص لها وقول لها حبيبتى معلش ممكن كوباية ميه علشان ضهرى بيوجعنى؟؟


    10- لو كانت مشغوله فى نظافة البيت او مع الاولاد وطلبت منك تغسل كوبايتين الشاى بتوع الصبح الموجودين فى الحوض ارجع لها كمان دقيقتين من دخولك المطبخ وانت ماسك كوبايه من الإتنين وهيا مكسورة واسألها فى براءة ارمى دى فين يا حياتي ؟؟


    يتبع

  7. #7
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع الخامس
    نبتدي موضوعنا كده وياريت ماينتهي بكده
    (الرجل والزوج)




    الرجل فى العشرين .... يبحث عن قصة حب
    الرجل فى الثلاثين .... يبحث عن الزواج
    الرجل فى الأربعين .... يبحث عن نفسه
    الرجل فى الخمسين .... يبحث عن علاقه جديدة
    الرجل فى الستين .... يبحث عن

    الرجل فى الزواج يبحث عن الإستقرار .... وفى الطلاق ايضا
    الرجل زى المرايه .... ماتنفعش تديله ضهرك
    الزوج زى البقال الغلس .... دايما يقول ماعندوش وهوا عندة جوة

    الراجل زى البيتزا .... الفرق فى الحشو
    الرجل زى دكتور التحاليل .... لازم ياخد عينه حتى لو مالكش نفس

    الفرق بين الرجل وفودافون .... ان فودافون مش بس كلام



  8. #8
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع السابع
    هذا الموضوع مهدئ
    ManSoob
    نبتدي موضوعنا كده وياريت ماينتهي بكده
    (غلاسه ورخامه)

    الجزء الأول


    النهارده في حياتنا مفيش حته أو مكان متلقيش فيها ألا واحد رخم أو غلس ويمكن أكثر
    ودي بقت مشكله في حياتنا بنقابلها كل يوم وفي كل مكان . لكن النهاردا موضوعنا مختلف كالعاده هو كيف يمكن تنميه وتنفيذ هذه المهارات

    1 - لما حد يشتكى لك من حاجه قوله انا عندى مشاكل اكتر منك
    2 - لو أنتا فى ميكروباص وواحد جنبك بيسقط وعنيه غفلت قول بصوت عالى للسواق هو فاضل كتير علي .. .. و لو نام تاني صحية تاني ... خليك وراة !!
    3 - قول نكته طويله ولما تيجى عند اخر سطر اللى فيه الأفيه اعمل انك نسيته
    4 - هات بخاخة مطهر ( ديتول) وامشى ورا الشخص الي عندك في البيت كل ما يمسك حاجه ويسيبها تروح راششها بالمطهر على طول .
    5 - طول ما انت قاعد ومعاك ناس قلد صوت الفاكس .
    6 - وانت بتتكلم فى موضوع اقطع كلامك وادى انطباع انك هاتكمل وماتكمليش
    7 - لو فى مطعم بص للشخص اللى قاعد فى الترابيزة اللى جنبك وانت ماسك لقمه فى ايدك وقول له ممكن الطحينه بتاعتك ثوانى ؟؟
    8 - وانت قاعد مع ناس بيتفرجوا على التليفزيون واول ما تلاقيهم مندمجين تروح فجأه مغير القناه
    9 - كل ما حد يقول لك حاجه عيدها بصيغة سؤال , مثلا هايقولك ( مش انا اتجوزت) قول له ( اتجوزت؟) يقولك اة الشهر اللى فات قوله ( الشهر اللى فات؟) وهكذا
    10 - عاوز تثبت لنفسك أنك رخم قوي أعمل موضوع ومتعملهوش عنوان وأقعد جرب للصبح

    11 - وانت بتتكلم مع شخص ما ما تبصلوش خالص
    12 - وانت بتتكلم مع شخص ما أفضل مركز فى وشه
    13 - طول ما انت قاعد مع زمايلك فى الشغل صفر موسيقى بلادى بلادى
    14 - وانت بتصور ورق وفيه حد مستنى يصور وراك اول ما تخلص اضبط مكنه التصوير على 99 نسخه مقاس كبير وقول له بابتسامه واسعه (اتفضل) . . . (عملتها وحياتك)
    15 - كل ما حد يقولك حاجه قول له ( ها ها ... كل الناس فاكرة زيك كدا بالضبط)

    16 - وانت قاعد مع ناس وقدامك كمبيوتر تخيل ان ( الماوس) عدة تليفون واتكلم فيها كل شويه بصوت عالى ( الو ايوة)
    17 - علق فانوس كبير فى الشارع وحبل مثلثات . . . قبل رمضان بست شهور .
    18 - تبقي بيكلمك حد ومندمج في كلامه أعمل نفسك أنك هاتعطس وفجاه أهى راحت
    19 - وانت واقف بتتكلم مع حد برق عينيك كدا واسأله فجأة ( سمعت؟) هايسألك ( سمعت ايه؟) قوله ولا حاجه راحت خلاص
    20 - وأنت مشرف وأحد الأعضاء بيكلمك علي الميل ... تقوله متكلمنيش هنا تاني . أبعتلي رساله خاصه


  9. #9
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع الثامن
    هذا الموضوع خاص بالأخ ؟ . .
    وهو أول موضوع يتم أرساله لعرضه بينكم
    ومن لديه موضوع جميل يريد عرضه بينكم فأرجوا أرساله .
    نبتدي موضوعنا كده وياريت ماينتهي بكده
    (تعمل أيه علشان تنفض لواحده عايزه تخرج معاك)



    طبعا اسهل حاجه انك تقولها انك مش عايز تخرج معاها بس لو هاتقدر تقول كدا وش وتتحمل العواقب المترتبه على صراحتك زى انها تلزق لك زيادة او تزن عليك او تخسرها للأبد .( ونصيحه ماتخسرش حد ممكن تحتاجله تانى فى اى يوم) والحل الوسط انك تشوفلك حجه من الحجج دى....

    انا مش هاينفع اخرج عشان..........

    -اصل انا اشتريت خلاط جديد وعايز اقعد اتدرب عليه
    -ابن خالتى سايب القطة بتاعته عندنا ولازم اقعد معاها علشان عندها اكتئاب
    -فيه احتمال ان امريكا تضرب أيران البلد النهاردة
    -انا وصلت فى لعبة luxor ليفيل صعب , محتاج اقعد النهاردة اركز شويه
    -انا عايز اقعد ارتب اوضتى النهاردة علشان مكركبه
    -بيقولك فيه مظاهرات فى البلد مش هاينفع نخرج ونتبهدل
    -لازم اروح القسم, كلمونى الصبح وقالولى عايزينك خمسه, ادعيلى
    -امى مسافرة أو مش موجوده وكل هدومى في الغسيل
    -مشغول النهاردة, اكتشفت ان التلاجه مليانه معلبات لازم اقعد واشوف تواريخ الصلاحية والإنتهاء بتاعة كل واحدة
    -غسلت شرابى ونشرته بس فيه فردة وقعت فى بلكونة الجيران والجيران مسافرين مصيف لما يرجعوا بقى
    -عندى معاد مع دكتور السنان علشان هاخلعوا خلاص
    -رخصتى مسحوبه
    -اصل النهاردة افتتاح جراج العمارة بعد تجديدة لازم اكون موجود
    -اصل فيه ريحة غاز فى البيت لازم اعرف جايه منين
    -اصل ماما نازله تشترى كرسى متحرك انا نازل معاها مقدرش اسيبها لوحدها بعد ما اتشلت بسببى
    -اصل حنفية الحمام بتنقط ولازم اركب لها جلدة النهاردة قبل ما تغرق البيت
    -اصل انا واخد حكم 6 شهور فى شيك ولازم اسلم نفسى النهاردة
    -اصل انا اشتريت موبايل جديد ولازم احطه فى الشاحن 24 ساعه متصلين
    -انا عايز اخرج معاكى بس عقلى الباطن بيقول لأ
    -انا عايز اخرج معاكى بس البرج بتاعى النهاردة بيقول مصائب فى الطريق اليك ولازم اقعد استناها
    -اصل انا لسه داخل البيت من اخر مرة كنا فيها مع بعض
    -اصل النهاردة عندى اجتماع رابطه محبى النادى الأهلى
    -اصل انا غيرت كالون الشقه ومش معايا المفتاح الجديد
    -اصل انا مبحبش اخرج يوم التلات ( او اى يوم حسب اليوم اللى بتكلمك فيه)
    انبوبة الصمغ ضربت فى ايدى وانا دلوقت لازق فى الدولاب
    -اخرج ازاى بس, طيب والناس اللى عماله تموت فى العراق دى ؟؟؟
    -اصل انا شاكك اني عندي أنفولونزا الطيور فمش هاقدر أجي
    -اصل النهاردة سحب الجوايز بتاعة 0900 ومش عارف ليه حاسس انى هاكسب, لازم اقعد اتفرج .
    -اصل انا شاكك اني عندي أنفولونزا الخنازير ومش هاقدر أجي
    -عربيتي عجلاتها نايمه ومش عارف أصحيها
    -اصل انا عايز اتفرج على برنامج المفتش كرومبو , جايبين حلقة جامده النهاردة


    تحياتي ليك علي موضوعك
    ويارب ماتحرمناش من مواضيعك

    ههههههههههههه

  10. #10
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع التاسع
    هذا الموضوع خاص بالأخ Hour Hill. .
    أشكرك يا محمد علي الموضوع
    نبتدي موضوعنا كده وياريت ماينتهي بكده
    (أنفلونزا الطيور)



    كيف يمكن القضاء علي مرض أنفلونزا الطيور أليكم الأقتراحات التاليه . . .

    1-اغلاق مستشفي أبو الريش

    2-اعلان منطقة العصافرة بالإسكندريه والنعام بعين شمس مناطق حظر صحى

    3-منع عرض افلام دعاء الكروان والسمان والخريف وعصفور من الشرق والإكتفاء بفيلم افواة وارانب حيث لم يثبت بعد امكانية انتقال العدوى للأرانب

    4-منع اذاعة اغنية الطير المهاجر واغنية الدنيا ريشه فى هوا واغنية أنا طير فى السما

    5-التحفظ على الفنانه فاتن حمامه والمخرج سمير العصفورى والمؤلف بشير الديك فى مناطق عزل صحى

    6-الغاء الجناح الأيمن والجناح الأيسر من جميع تشكيلات فرق كرة القدم

    7-منع الزواج العرفى

    8-تأجيل عرض حفلات باليه بحيرة البجع بدار الأوبرا

    9-الغاء كتاب ال ( ورك بوك) من كل مناهج اللغه الإنجليزيه بالإضافة الى الغاء كلمة But . With


  11. #11
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع العاشر
    نظرآ لشده حساسيه الموضوع تم حذف بعض المقاطع .
    وأنا عارف برضه أني هاروح ورا القمر بعد الموضوع ده
    فالموضوع خاص بالشباب +18 فقط
    نبتدي موضوعنا كده وياريت ماينتهي بكده
    (كليبات القنوات الفضائيه)

    نفسى اعرف ايه سر الهجمه الشرسه دى على الفيديو كليب الناس دى عايزة ايه ؟
    مايسيبوا الناس فى حالهم ياكلو عيش؟
    ايه اللى مضايقهم مش عارف . يا اخى مش عاجبك غير القناة .
    ايه المشكله انهم بيرقصوا بطريقه خليعه؟ عادى جدا الرقص انواع وكل بلد ليها رقصه مثلا السامبا البرازيليه والتانجو الأرجنتينى والخلاعه المصريه . مش كفايه كمان بيعملولنا سمعه فى العالم وبيشهرونا ؟
    ايه المشكله انهم بيطلعوا مش لابسين حاجه؟ عادى جدا كل الدنيا دلوقتى بتتكلم عن الشفافيه ودول اول ناس طبقوها يبقى نزعل ليه منهم ؟
    ايه المشكله انهم بيقولوا كلام مايصحش يتقال؟ عادى جدا برضه هما واضحين وبيحاولوا يقولوا ان زمن عبد الحليم وام كلثوم انتهى وبقى دلوقت زمن الصراحه . كل واحده بتعبر بأسلوبها , اللى عايزة تحط النقط على الحروف قبل مايطلعوا على الروف يأكلوا سمك طبعا, , واللى واضحه وصريحه تبوسنى اة اكتر من كدا لأ . يبقى نزعل من الصراحه ؟(حاجه غريبه والله )
    ايه المشكله انهم بنات زى العسل وبيخلونا نفتكر ان اللى معانا دول جنس(ممنوع) او صنادل؟ عادى جدا مش ذنبهم انهم حلوين. مش كفايه انهم فاتحين بيوت ناس؟ الكوافير والماكياج واللبس ودكاترة التجميل ومحلات الملابس الداخليه ومناطق التصوير مش كل دا بيشغل ناس وبيفتح بيوت ناس ؟
    طب ايه المشكله انهم بيصوروا اغلب كليباتهم على السرير؟ عادى جدا ناس شقيانه وتعبانه طول اليوم ومن حقهم يرتاحوا .
    ثانيا دا برضه نوع جديد من الفن اسمه فن السرير هوا اللى يحب يجدد نزعل منه ؟ لأ ويقولك طالعه بقميص النوم , يعنى يا اخى عايزها تنام بهدومها ؟ (حاجه غريبه والله ).سيبوا الناس فى حالها ومالكمش دعوة بيهم . وندعوا اللهم عجرم نسائنا وهيفئ بناتنا واجعلهن شكيرات اليسات .

    وعن رآيي الشخصي بتمني من ربنا
    ليهديهم ليناديهم



  12. #12
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع الحادي عشر
    نظرآ لشده الموضوعات السابقه

    فقد قررت تهدئه الموضوعات لفترة
    ثم نعود لموضوعاتنا +18
    نبتدي موضوعنا كده وياريت ماينتهي بكده
    (الولاده)





    ماذا تفعل الام عند شعورها
    بالحمل ؟



    الملابس:

    الطفل الأول: تلبس هدوم الحمل من اول ماتعرف انها حامل

    الطفل الثانى: تحاول تلبس هدومها العاديه لأطول فترة ممكنه

    الطفل الثالث: هدوم الحمل هيا هدومها العاديه


    الإعداد للطفل:

    الطفل الأول: كل دقيقه تغييرللطفل وتحاول تخلى ريحته حلوة

    الطفل الثانى: كل ثلاث ساعات

    الطفل الثالث: لما ريحته تطلع



    القلق:

    الطفل الأول: من اول خبطه تجرى عليه وتشيله

    الطفل الثانى: تشيله لو حست ان خلاص فيه عربيه هاتخبطه

    الطفل الثالث: احسن.. علشان تتربى.. خلى العربيه تدوسك


    الأكل:

    الطفل الأول: ترمى اى حاجه تقع على الأرض

    الطفل الثانى: تغسلها بشويه مية

    الطفل الثالث: تمسحها فى هدومها

    الفسح:

    الطفل الأول: الملاهى... المراجيح... النادى

    الطفل الثانى: النادى بس

    الطفل الثالث: السوق



    الخروج:

    الطفل الأول: تسيبه مع اختها وتتصل تطمن عليه كل خمس دقايق

    الطفل الثانى: تسيبه مع اختها.... وهى على الباب تفتكر تسيب رقم تليفون المكان اللى رايحاة

    الطفل الثالث: تسيبه مع اى حد مع تحذير بان محدش يتصل بيها الا لو كان فى الموضوع دم


    فى البيت:

    الطفل الأول: كل دقيقه تتفرج على ابنها وهوا نايم

    الطفل الثانى: من وقت للتانى تتأكد ان الكلب ماكلش دراع الواد

    الطفل الثالث: تستخبى منه على قد ماتقدر


    لو بلع ربع جنيه :

    الطفل الأول: تجرى تعمل اشعه

    الطفل الثانى: تقلق شويه عليه وتستنى تشوف هايبلع الفلوس ويهضمها ولا ايه

    الطفل الثالث: تخصمه من مصروفه



  13. #13
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع الثاني عشر
    نبتدي موضوعنا كده وياريت ماينتهي بكده
    (نصائح للبنات)




    أجمد أشتغالات بيعملها الولاد علي البنات
    خلي بالكم




    1-بصراحه انتى تستاهلى واحد احسن منى : يقولها الولد وعينه فى الأرض وبيحاول يبان بصورة الفارس المضحى اللى ممكن يسيب حبيبته لواحد تانى احسن منه يقدر يسعدها.

    2- المشكله عندى مش عندك.. انا مش حابب فكرة الجواز: يقولهالك الولد ويبقى جواة عارف انه ممكن يتجوز بكرة الصبح بس واحدة تانيه غيرك

    3- اهلى ضاغطين عليا علشان اتجوز بنت عمى او بنت خالتى او بنت الجيران: هوا متخيل انك ممكن تصدقى اننا واحنا فى سنة 2009 ممكن حد يصدق ان فيه ولاد اهاليهم بيجوزوهم غصب عنهم

    4- خلينا اصحاب احسن : قوليله له وانتى ماشيه وسايباة ان عرضه نوع من البقشيش العاطفى لا ترضاة اى بنت عندها كرامه

    5- علاقتنا مافيهاش كيميا: قوليله وليه سمحت لعلاقه مافيهاش كيميا انها تبتدى اصلا؟؟

    6- مش هاقدر اكمل معاكى لأنى لقيت الإنسانه اللى كنت بدور عليها: ماترديش بلسانك ومش هاقولت تردى ازاى

    7- انا مش قادر احبك زى مانتى بتحبينى

    8- انا مش عايز اظلمك معايا انا لسه قدامى وقت علشان اكون نفسى

    9- انا هاقفل دلوقت علشان داخل على لجنه

    10- معلش الموبايل فصل شحن

    11- كنت قافل الموبايل اصلى كنت فى مييتنج

    12- مارديتش اصلى كنت عند المدير

    13- مارديتش كنت سايق

    14- انا فى الطريق بس الكوبرى واقف

    15- مكنتش قافله بس كنت فى حته مافيهاش شبكه

    16- لا والله كلمتك امبارح بس موبايلك كان مقفول: ولو اصريتى انك ماقفلتيهوش هايقول الله يخرب بيت الشبكات البايظه دى.

    17- واحد يتصل بيكى ويقولك مساء الخير لو سمحتى انا لقيت عندى ميسد من الرقم دا

    18- مابتصلش علشان واقفين عنى الخدمه لحد ما ادفع الفاتورة او مش معايا رصيد او كارت

    19- طيب كنت قافل موبايلك ليه يقولك كنت فى عزا ابو واحد زميلى

    لما يحب يقفل معاكى فجأة لو هربان منك وكلمتيه من نمرة غريبه ورد عليكى: بصى لو الشحن فصل هاكلمك تانى.. تيت تيت تيت وطبعا معروفه انه لا الشحن خلص ولا هايكلمك تانى
    20- عقلك اكتر حاجه عاجبانى فيكى: غالبا بيقولها لواحدة وحشه

    21- على فكرة انتى اكتر واحدة فهمتنى فى حياتى كلها: قصدة اكتر واحدة عرفت اسيطر عليها

    22- لسه جميله زى اول يوم شوفتك فيه

    23- عمرى ماهازعلك فى حياتى

    24- انا مستعد اتجوزك دلوقتى حالا : تظاهرى بالموافقه الجريئه لتكتشفى مدى عمق الكذبه

    25-لما ببص فى عنيكى مبقدرش اكدب عليكى

    26-عندك اجمل عنين فى الدنيا: يقولها مع كثير من التسبيل

    27-لعلمك الإختلاف اللى مابينا هوا اللى هايقربنا من بعض اكتر

    28-حتى وانتى عندك 80 سنه هاتفضلى جميله وهافضل احبك

    29- بينا حاجه حلوة مش عارف هيا ايه: بداية التلميح

    30-صدفه غريبه, عايز اقولك انى انا كمان مابسمعش غير فيروز: فقط اسأليه عن اسم اغنيه واحدة لفيروز بتعجبه لتكتشفى ان اخرة فيروز توت

    31- معاكى بحس انى طفل من جديد: يقولها لأنه عارف انه بيلعب

    32- دى مجرد صديقه تصدقى انى حتى مش فاكر اسمها.

    33- اهلى بيموتوا فيكى وماما نفسها تشوفك

    34- عمرى ما هاتضايق انك بتقبضى مرتب اكبر من مرتبى

    35-انتى اتجننتى؟؟ اعرف واحدة غيرك؟؟: وبينه وبين نفسه واحدة بس؟؟

    36- اول واحد حبيتها ماتت فى حادثه/ اتجوزت وسابت مصر/ خانتنى مع اعز اصدقائى/ اهلها رفضونى: اى حاجه تقطع القلب وخلاص

    37- صدقينى لما اقولك ان كل حاجه ماشيه صح

    38- يا حبيبتى اعملى اللى انتى عايزاة: لما يكون اللى انتى عايزاة هوا اللى هوا عايزة

    39- ماعنديش مشكله فى فرق السن اللى مابينا

    40- مش هاينفع تيجى معانا الخروجه كلها رجالى



    وأنا كده عملت الي عليا ونصحتكم ختكوا بالعافيه بقي


  14. #14
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع الثالث عشر
    هذا الموضوع أهداء للأخ والصديق عبدو
    weislove2005
    +18
    نبتدي موضوعنا كده وياريت ماينتهي بكده
    (مشاعر الطرفين بعد الزواج)




    هانبتدي من هنا كده وبعدين هانحتوي الموضوع والخلاصه منه

    مش هننكر ان المجتمع دلوقتى وخلينا نقولها بصراحه خلى الست تكتسب بعض الصفات العنيفه وده ليه بقى اولا الست عاوزه تخرج وتلبس براحتها لو حد يقولى الدين اقول ملكش فيه دينها وعلاقتها بربنا بينها وبينه فالبتالى بتتعرض لتحرش وبهدله وطوله لسان
    هى عاوزه تحس بالحريه الراجل لازم يكفلها ليها بس فى الزمن ده لا طبعا مفيش الكلام ده بيتحول لوحش بيغتصب اي حاجه شايفها فيها حتى لو ضحكتها
    فده خلاها تحس انها محاصره ومن قبل الجواز يعنى عوامل مترسبه حتى لو محجبه او غير
    فبقت قاسيه جدا وده انعكس من الشارع للبيت لانها بتحاول تحمي نفسها كل وقت حتى من جوزها
    او حبيها او خطيبها اللى المفروض يحميها لانها بقت دايما متهمه فى نظر الراجل انها سبب المشكله .

    الست لو حست بامان واهتمام بتكون رقيقه وبتتخلى خالص عن عنفها وبتتحول غضبها لمشاعر وأحاسيس جميله

    وفيه أخطاء بيقع فيها الكثير منا

    اولا
    الست محتاجه حنيه يعنى لما تتخانقوا وتلاقيها اتسهوكت ونونوت وعيطت اعرف انها حتى مع المترليوس اللى طالع منها بتكون عاوزاك تاخدها فى حضنك او تقولها كلمه صغيره كويسه وده بذكاء الراجل لو ذكي يعنى ودي اللحظه اللى ممكن الست تعمل فيها اي حاجه علشانه وده طبعا مبيعملهوش الراجل

    ثانيا
    الست ذكيه جدا وبتكون فاهمه جوزها وعندها احساس عالى بيه اوي يعنى لما بتكون مضايقه منه وعاوزه تقوله حاجه بتخاف علشان عارفه ان البيه عصبى ولما بيكون عصبى بيشوط اي حاجه قدامه وممكن الموضوع يتحول لمكوي طايره فازه فبتتقوقع على نفسها
    مش بالظبط بس الكلام بيكون طالع كده
    فبتفضل السكوت ومن هنا بيحصل فجوه رهيبه بينهم وبتحاول تعوضها هي وتنتقم فى نفس الوقت

    تعوضها ازاي بقى انها بتهتم بولادها اكتر و تهمله هو تهمل مظهرها وده علشان حاجه كمان انها بتحس انه مبقاش يقول لها كلمه حلوه ولا بياخد باله من اي تغيير ولو صغير فيها

    فهيا تيجي بنتجيه صح وتهتم اكتر بنفسها يا نتيجه عكسيه وتتخن وتهمل وتبقى ريحتها بصل وتوم وحاجات غريبه ما تعرفش جابتها منيين

    او تتجهه اتجاه تاني تتكلم مع ناس تانيه اصحاب اصدقاء وده مع مرور الوقت بيتحول لجفا وهجر من ناحيتها ناحيه جوزها او حبيبها وهي مش قادره تستغنى عنه وفى نفس الوقت نفسها فى حياه وتحس انها عايشه وكتير بيوقعوا فى ده او تكون علاقات محترمه بس مديه لهم اهتمام اكتر بكتير ومن هنا برضه بيحس انها بقت جامده ومش مهتمه ودي بتكون منحنى خطر لانهم اصلا مفيش بينهم حوار وبيكون انتهي خلاص وعلشان ترجع الحياه لازم يبقى فيه حوار

    البعد من الزوج
    يعنى مينفعش تكون بعيد عنها وعاوزها تفهمك من غير ما تكون بتشوفك يعنى مسافر بتشتغل طول اليوم عايش فى البيت زي اللوكانده تيجي وتنام وتشخر كمان أو تصدرلها العبيطه وهى علي كده هتحس بيك ازاي هتفهم انت عاوز ايه وانت عنيد ومش عاوز تتكلم وواخد كل حاجه على اعصابك واعصابها
    لازم تتكلم وتبطل كبرياء ما انت ممكن تتكلم مع اي حد ولو مشكله وانت مش من النوع اللى بيتكلم كتير اكتب لها حسسها فهمها براحه متسبهاش فى حيره (بس مش كل الرجاله) ده )

    الحوار
    نيجي بقى لنقطه الحوار اياك اياك اياك تلاقى رساله او كلمه حلوه منها وانت متعصب او كنتم متخانقين وترد ببرود او باهمال ده بيعمل حته سوده جوا القلب شويه بشويه بتكبر اوي ومبيكونش فيه مجال للرجوع وبتكون الحياه بقت بارده علشان كده بيحصل المشاكل والبعد بدون احساس

    الست بقى مبتعرفش تعبر وتصعب عليها نفسها اوي ومبتعرفش تعبر عن اللى جواها فيه حلول كتير كلمي أعز أصدقائه حاولي تتكلمي معاة وتفهميه اي حاجه المهم توصليله الرساله قولى له نفسك فى ايه عاوزه ايه والرجاله بتتوسم فيهم الذكاء واكيد هيفهم ولو مفهمش اضربيه بالكرسي حطي له سم فى الاكل خضيه هاتي له سكته قلبيه المهم خدي حقك

    بجد الحوار والاحساس جربوا الورد جربوا كلمه رقيقه بلاش العنف بلاش نصد بعض يا ريت يبقى قلبنا اكبر من كده وعقلنا الرجاله بترجع تعبانه بس من حق الست تتكلم وانت تسمعها

    وقال الله سبحانه وتعالي الرجال قاومون عن النساء
    وقال الحبيب المصطفي عليه أفضل الصلاه والسلام قال رفقا بالقوارير

    يا جدعان مش تكسروها يعنى

    القوامه عند الرجال مش بالعنف مش بكلمه لا لمجرد انها لا
    ده صعب وخاصه مع البنت او الست اللى شخصيتها قويه اياك وانك تحسسها انها اوت اوف كنترول يعنى متقدرش تحكم علاقتها ده بيخليها تعند اوي خاصه لما يكون لها شخصيه وانت واخدها كده متلغيش الشخصيه دي لانك هتلاقى العكس وتهد دنيا جميله انتم محتاجينها الست لما بتحب بتبقى زي السكر الدايب فى الميه أحنا قاومون عليكم بالحب كمان مش بالماديات وبس بالاحتواء الست لما بتبقى نار فى ثانيه بتكون رماد بس العند

    اياك ترفض حاجه هي قالت لك عليها وانت فى نفس الوقت تطلبها منها يعنى لو عندها سبب مقنع انك تبعد عن شخصيه معينه او حاجه معينه وانت ترفض وتقول لا وتضايقها وهي تسكت علشان الحياه تمشي وعلشان قلبها وجعها اوي وعلشان بتحبك اوي متجيش انت تطلب منها ده برضه وتقولها متعمليش كذا بدون اقناع او مناقشه بحب بينكم بلاش تتحكم لمجرد انك راجل وهي مش هتربس وخلينا متفقين ان الست بتيجي على نفسها فى حاجات كتير وتقبل بحاجات كتير علشان بتحبك يبقى لازم انت تقدر علشان هى تقديرها يكبروأحترامها يزيد



    بس كفايه كده وأتمني لو أستفادت 1 % من الموضوع

    كان معكم حلال المشاكل حلال العقد اللى متعقد لوحديه



  15. #15
    الصورة الرمزية Joy Boy
      Joy Boy غير متصل ঔلƒ¦à¦” Hallelujah ঔلƒ¦à¦”
    تاريخ التسجيل
    Jan 2009
    المشاركات
    1,725

    25

    الموضوع الخامس عشر
    نبتدي موضوعنا كده وياريت ماينتهي بكده
    (بـــــــاب الحيــــــاه)




    دائما ما يوجد بداخلنا باب مرعب من الاحزان والأنطواء على النفس
    دائما وابدا فى ظل ما نعانى منه من وحده .... برغم وجود الكثير من الاصدقاء والاهل
    كل منا بداخله هذا البـــاب
    ولكن العجيب انه على الطرف الاخر دائما لابد من وجود من يهوى فتح هذا البـــاب ورؤيه ما بداخله من كوابيس وأحلام محطمه وضياع هويه
    فيا من تهوى ومن تحب الحياه وترغب فى التغيير
    اترك العنان لاحلامك
    اعطى المفتاح لمن هواك وأراد الدخول للسرداب
    الحياه لن تستمر بدون تجارب
    الكثير من المخترعين لم ينجحوا الا بعد الفشل
    فى النهايه من يريد التقدم فى حياته لابد له ان يجرب كل المعانى وكل الاختراعات وكل الصدمات لكى يتعلم . . . (عن تجربه)

    اممممممممم المهم بقي
    عاوز اقولكم منه حاجه واحده لا حاجتين تلاته
    اولا : البلد مش هتتغير طول ما احنا بننتقد اللى حوالينا وبس كل واحد عنده حل فى حاجه او مشكله يبدا يعملها يعنى مثلا
    واحد رافض الرشوه خلاص ابد بنفسك ومتديش رشوه ومتقوليش ما هى ماشيه كده لا تنح وزعق وانفش ريشك هتاخد حقك بدل ما اهبدك بقله فى دماغك
    واحد مضايق من الزباله فى الشارع خلاص امسح بجيرانك الارض لو شوفتهم بيرموا الزباله
    بس لو اتلموا عليك وضربوك متجيش ليا وتشتكى
    مضايقك أعلان مستفز
    خد رقم الشركه اللى بيتعلن عنها واتصل قولهم رايك بصراحه فى الاعلان اى والله انا عملتها هههههههههههههه والناس اتخضت بس عادى يعنى ايه المشكله فى اعلان حزام السونا علشان الراجل اللى بيبص على جيرانه وكانت تجربه ممتعه ليه انى اقولهم راى بصراحه
    يعنى زى اللى بقوله كده اعمله اى حاجه شايف انها غلط ابدا بنفسك واعملها وقول لنا عملت كذا ورد الفعل كذا غيرك يتعلم
    واللى عنده افكار تانيه يقول
    ونبطل نخبط راسنا فى الحيطه لان عندنا حكومه بس هما مش عندنا بمعنى عايشين فى عالم تانى منفصلين عنا يبقى بالسلامه بقى ونطنشهم منستناش منهم حاجه ولا نضغط علشان يعملوا هما مش هيعملوا

    الحاجه التانيه
    اممممممم
    لما تكون من جواك حزين وحاسس انك وحيد وقرفان من العالم كله وعندك اكتئاااااااااااب ولقيت حد مجنون يدخل حياتك بليز متقفلش الباب وساعده انه يكمل معاك ساعده انه يخرجك من اللى انت فيه
    يمكن هو هوايته وحبه فى حياته انه يخرجك من ده
    متقولش انا لوحدى متقولش مفيش حد هيعمل ليه حاجه متقولش انا زهقت
    دايما فى وسط الضلمه والسماء الضلمه كمان نجوم او نجمه صغيره بتنور وبتفتح طريق
    العالم مبينتهيش وانت لوحدك لازم يبقى معاك حد
    وده قصدى

    نطلع بقى من كل الكلام اللى فوق ده بايه ولا حاجه وانى مهيس على الاخر ومبسوط اوى
    وربنا يستر بقى

    كان معاكم استاذ ورئيس قسم فتح الابواب



    التعديل الأخير تم بواسطة Joy Boy; 04-06-2009، الساعة 05:03 PM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك