موقع الدي في دي العربي

الموقع الأكثر تطوراً في مجال الترفيه والتسلية وهو أحد مواقع شبكة منتديات مكتوب، تابع أحدث أخبار الأدب والفن الأفلام والمسلسلات، الرياضة، البرامج والألعاب، الفضائيات والاتصالات، العلوم واللغات، شاركنا آرائك مع محبي الفن والثقافة ، انضم الآن



+ الرد على الموضوع
النتائج 1 إلى 4 من 4
Like Tree0Likes

الموضوع: اخر قصائد الشاعر الكبير عبد الرحمن الابنودي

  1. #1
    تاريخ التسجيل
    Jan 2008
    المشاركات
    105

    اخر قصائد الشاعر الكبير عبد الرحمن الابنودي

    المواويل
    أنا باشكر اللى خلق لى الصوت وأوصانى
    أقول كلام حُرّ.. مايقبلْش لون تانى
    مااسكتش ع الضِّيم واهشّ الغيم بقولة «آه»
    وإن سرقوا صوتى.. بينسوا ياخدوا قولة «آه»
    فى الفرْح فى الجرح إيه حيلتى إلاّ قولِة «آه»
    يحميك يا ولدى وكنت اسكت وتتكلم
    يحميك يا ولدى واكون مجروح وتتألم
    ياما حرسْت النهار.. آدى النهار.. ضلِّم
    وإن شفت جرح الوطن جوّه الفؤاد علم
    تقول كلام.. ياسلام.. يحيينى من تانى!!
    ■ ■ ■
    أنا كان لى ورْدات عجب.. كبّرتها بايدى
    أسقيها بالدمع بالدم اللى فى وريدى
    جانى غشيم القدم وداس على ورودى
    أخدم جناينى فى بستانى يا ناس إزاى؟
    وإن نمت ناسى باقوم فاكر يا ناس إزاى؟
    مين مرّر الشاى فى شفايفى وبكى الناى؟
    ياليل يابو الهمّ.. تحتك دم.. ما تحاسب
    وقوللّى إمتى يا ليل.. وفين حنتحاسب؟
    إزاى بلادى تبات ليلة مع الغاصب
    وإزاى يدوس وردها.. واقولّه: «ياسيدى؟!
    ■ ■ ■
    مدّ الأمل سِكِّتُه.. وقالِّنا: «سيروا
    نصيبكو حيصيبكوا تمشوا والاَّ حتطيروا
    عيشوا النهارده الزمن.. بكره زمن غيره
    آدى أول السكة صوت الضحكة بيلالى
    والشمس أمشيلها ألاقيها اللى ما شيالى
    ولا حدّ يقدر يعكّر قلبنا الخالى
    لكن ومين بكرة يعرف إحنا فين فيها؟
    هيه حتدينا والا احنا حندّيها؟
    وإيه نصيبنا من الأيام ولياليها؟
    غاب الزمن فى الزمن.. واحنا بِلا عزوة
    ولا نملك الا نماشى السكة ونسيروا»!!
    ■ ■ ■
    ويا مصْر وان خيّرونى ما اسكن الاَّكى
    ولاجْل تتبِّسمى.. يا ما بابات باكى
    تسقينى كاس المرار.. وبرضُه باهواكى
    بلدى ومالى الّا إنتى ولو ظلمتينى..
    مقبولة منِّك جراح قلبى وْدموع عينى
    الجرح يشْفَى إذا بإيدك لمستينى..
    كلّك حلاوَة.. وكلمة «مصر».. أحلاكى!!
    ■ ■ ■
    التّناتيش
    من يمدحُه يطلع خاسر
    ويشبَّروله.. أيامه
    يعيش جمال عبدالناصر
    يعيش بصوته وأحلامه فى قلوب شعوب عبدالناصر
    ■ ■ ■
    مش ناصرى ولا كنت ف يوم
    بالذات فى زمنه وف حينه
    لكن العفن وفساد القوم
    نسّانى حتى زنازينه.. فى سجون عبدالناصر
    ■ ■ ■
    إزاى ينسّينا الحاضر..
    طعم الأصالة اللى فى صوته؟
    يعيش جمال عبدالناصر
    يعيش جمال حتى ف موتُه ما هو مات وعاش عبدالناصر!!
    ■ ■ ■
    إسمه جمال وجميل فعلاً
    ياما شفنا شجعان خوّافه
    عظيم.. وكان إنسان طبعاً
    المجد مش شغل صحافة علشان ده عاش عبدالناصر
    ■ ■ ■
    أعداؤه كرهوه ودى نعمة
    مِن كرهُه أعداؤه صادق
    فى قلبه كان حاضن أمَّه
    ضمير وهمَّة ومبادئ ساكنين فى صوت عبدالناصر
    ■ ■ ■
    ملامحنا.. رجعت بعد غياب
    دلوقت بس اللى فهمناه
    لا كان حرامى ولا كداب
    ولا نهبها مع اللى معاه أنا باحكى عن عبدالناصر
    ■ ■ ■
    عشنا الحياة ويّاه كالحلم
    فلا فساد ولا رهن بلاد
    يومها انتشينا ثقافة وعلم
    وف زمنه ماعشناش آحاد كنا جموع فى زمن ناصر
    ■ ■ ■
    كان الأمل فى خُضرِتُه بِكْر
    مافيش لصوص للقوت والمال
    ومصر أبطال ورجال فكر
    ومثقفين ستات ورجِال جيوش جمال عبدالناصر
    ■ ■ ■
    كان الهلال فى قلبه صليب
    ولا شفنا حزازات فى بلادنا
    ولا شُفنا ديب بيطارد ديب
    ولا جرَس خاصم مادنة وَحَّدْنا صُوت عبدالناصر
    ■ ■ ■
    دفعنا تمن الحريّة
    بدمّ مش بدينار ودولار
    يوم وقفته فى «المنشيّة»
    خلّى الرصاص يهرب من عار أعداء جمال عبدالناصر
    ■ ■ ■
    رغم الحصار كنا أحرار
    وفى الهزيمة الشعب ماجعْش
    كان اسمها «بلد الثوار»
    وقرار زعيمها مابيرجعْش قرار جمال عبدالناصر
    ■ ■ ■
    خلَّى بلادُه.. أعزّ بلاد
    ليها احترام فى الكون مخصوص
    لا شفنا وسط رجالُه فساد
    ولا خطط سمسرة ولصوص كان الجميع عبدالناصر
    ■ ■ ■
    لولاه ماكنتوا اتعلمتوا
    ولا بقيتوا «دراكولا»
    ياللى انتو زعما وإنجازكو
    دخّلتوا مصر الكوكاكولا وبتشتموا ف عبدالناصر
    ■ ■ ■
    عمره ما جاع فى زمانه فقير
    أو مالتقاش دوا للعِلّة
    دلوقت لعبةْ «اخطف طير»
    والأمة فى خِدْمةْ شِلَّة تكره جمال عبدالناصر
    ■ ■ ■
    يتّريقوا على طوابيرُه
    علشان فراخ الجمعية
    شوفوا غيره دلوقت وخيرُه
    حتى الرغيف بقى أمنيّة يرحم جمال عبدالناصر!!
    ■ ■ ■
    فيه ناس بتنهب وتسوِّف
    لا يهمّها من عاش أو مات
    ورضا العدو عنّا يخِوِّف
    معناه أكيد إننا قَفَوات من يوم مامات عبدالناصر!!
    ■ ■ ■
    الأرض رجْعت للإقطاع
    وقالوا: «رجعت لصْحابها»
    وصاحبَك الفلاح تانى ضاع
    ضاعْت العقود واللى كتبها وخط إيد عبدالناصر!
    ■ ■ ■
    أنا أذكُرك من غير ذكرى
    والناس بتفتكرك بخشوع
    الأمس واليوم ده وبكره
    يبكوك بعظمة مش بدموع يكفَى نقول: «عبدالناصر»
    ■ ■ ■
    دلوقت رجعوا الفقرا خلاص
    سكنوا جحورهم من تانى
    رحل معاك زمن الإخلاص
    وِجِهْ زمن غير إنسانى ماهوش زمن عبدالناصر!!
    ■ ■ ■
    صحينا على زمن الألغاز
    يحكمنا فيه «أهل الأعمال»
    وللعدو.. صدّرنا الغاز
    بفرحة وبكل استهبال نكاية فى عبدالناصر!
    ■ ■ ■
    بنمدها بغاز الأجيال
    تحويشةِ الزمن القادم
    إتوحَّشوا فْ جمع الأموال
    ورجعْنا سادة.. وخوادم ضد اتجاه عبدالناصر
    ■ ■ ■
    يا جمال.. نجيب زيك من فين
    يا نار.. يا ثورة.. يا ندهِةْ ناى..
    البوسطجى.. إللى اسمه «حسين»
    - أبوك - منين جابك؟ وإزاى.. عمل جمال عبدالناصر؟!
    ■ ■ ■
    لو حاكتبك.. ما تساع أقلام
    ولا كلام غالى وأوراق
    الأمر وما فيه.. أنا مشتاق
    فقُلتْ امسِّى عليك وأنام نومةْ جمال عبدالناصر!!
    Ahmed Kayaty

    Mechanical Engineer

  2. #2
    الصورة الرمزية Poetry-prince
    تاريخ التسجيل
    Feb 2007
    المشاركات
    6,906

  3. #3
    الصورة الرمزية masrawy2011
    تاريخ التسجيل
    Apr 2007
    المشاركات
    615
    الله عليك يا عمنا . يا شاعر يا كبير
    ربنا يحفظك لمصر

    ________________________________

    أهاجر وأسيبك لمين ؟ ولسه صبية ونيلك حزين ..
    ولسه لبكره ماليكي الحنين .. أسيبك لمين ؟
    ومين راح يرد لتاريخك صباه ؟ ويمشي طريقك لآخر مداه ؟
    ومين من حياته يجيبلك حياة ؟ ومين راح يكبر في وقت الصلاة ؟
    ومين يبقى مغرم بحب صبابة ... ومين يحيي طيبتك يا أم الطيابة ؟
    ومين يبقى ضلة في شمس الغلابة ؟ ومين يبقى شوكة في حلق الديابة ؟
    أسيبك لمين ؟

  4. #4
    الصورة الرمزية beso_egypt
    تاريخ التسجيل
    Aug 2008
    المشاركات
    1,037
    الله عليك يا خال
    بجد من اعظم شعراء مصر
    {أقسم بالله العظيم
    أن أحافظ على مصر حرة مرفوعة الرأس
    وأن أخلص لها العمل بكل ضمير
    وأن أجتهد لتحقيق أحلامي
    وأن أحترم أحلام أولادي
    واثقا في شمس مستقبل بلادي مؤمنا بوحدة شعبي
    ومسؤولا عن كل حبة تراب من أرض وطني
    والله على ما أقول شهيد}

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك