الموضوع: من فضلكوا حد يفهمنى حاسس انى بموت بالبطيىء

السلام عليكم ورحمة الله
انامن اول الصيف اللى فات وانابحس بالاعراض دى لحد ما زادت على اوى من حوالى 3 شهور ودلوئتى بتعالج عنده هو اكبر دكتور تخصص جهاز هضمى ومناظير فى اسكندرية
الاعراض:
كل ما كنت باكل اى اكل احس بانتفاخ فظيع وبعدها ب 3 دقايق احس ان انا مش قادر اتنفس لدرجة انى كنت بحس ان انا عندى ازمة قلبية صعبة جدا وبحس بحاجة منتفخة اعلى البطن اول فى المنطقة اللى هى اعلى فم المعدة ووجع فى الزور كانة احتقان وكل شوية بكون مضطر اعمل احم احم علشان بحس صوتى متغير واوقات بيكون فى دوخة واكبر مشكلة فظيعة جدا جدا جدا انى بحس ان فى حاجة واقفة فى زورى مش قادر ابلعها

الحمد لله بعد ما روحت للدكتور شخص الحالة على اساس انها بدايات قرحة لانى وقت ما روحتلة كنت بعانى من وجع من النوع اللى بيموت فى البطن وقالى شوية ارتجاع فى المرىء

وكتبلى على باريت 20 مرتين فى اليوم وبيبتك 40 مرة واحدة ومتينورم اقراص 3 مرات فى اليوم وعلى اساسة اتحسنت جدا جدا وقالى هنعمل منظار بس اخويا صيدلى وقالى لا واتكلم مع الدكتور وقالى مدام انت مستريح على العلاج مش ضرورى منطار وروحت للدكتور بعد شهر فقلل الجرعة وخلاها ياريت بس ومرة واحدة ويادوب 3 ايام وحسيت انى كنت بموت تانى وروحتلة فكتبلى الباريت مرتين تانى وانتودين 40 ودوجماتيل عادى

انا عارف ان دة ارتجاع حمضى او اللى بيسموها الحموضة بس انا بس نفسى اعرف دة لية علاج ولا لا والموضوع خطير ولا لا علشان انا قريت ان ممكن دى تكون مشكلة فى الصمام اللى بين المعدة والمرىء ودى مشكلة ملهاش علاج دا راىء انا اللى قريتة على النت

ياريت من زوى الخبرة حد يفيدنى ربنا يخليكوا
اسف جدا جدا للاطالة
للعلم انا لسة اربعة وعشرين سنة

و عليكم السلام و رحمة الله و بركاته

الارتجاع ليه علاج طبعا
امال الأدوية اللى انتا بتاخدها دى ايه ؟؟

هوا ليه علاج جراحى
إنما الجراحة فى الحالات الشديدة اللى مش بتستجيب للعلاج

أهم حاجة تواصل على العلاج
تمنع التدخين
متنمش على طول بعد الأكل
تجنب الشاى و القهوة و المشروبات اللى فيها كافيين
عشان فيها مواد بتضعف صمام المعدة و تزود الارتجاع

و ألف سلامة عليك

شكرا يا دكتور احمدعلى ردك
انا عرفت من واحد كان عندة نفس المشكلة ان المشكلة بتكون فى الصمام اللى بين المعده والمرىء وان الاكل بيرجع فى المرىء تانى بس بيكون معاه الحمض اللى بيعملى المشكلة دى بس الدكتور بتاعه كان عاملة كورس نيكسيوم 40 و20

عايز بس اعرف هوالباريت هوا هوا النكسيوم ولا اية الفرق بينهم ؟
واية لاومة الانتودين الا40 اللى هو كتبهولى واية لازمة الدوجماتيل كمان

وعايز اعرف العملية الجراحية فى الحالات دى بتكون ناجحة ولا لا لانى قريت على مواقع تانية ان فى ناس عملت العملية دى ورجعلها نفس المشكلة تانى

برجاء المساعدة جزاكم الله كل خير

على فكرة انا من ناحية الاكل مش باكل غير مسلوق ونى بسسسسسسسسسس ولا شاى ولا قهوه والاكل بمواعيد والنوم بمواعيد بعيد عن الاكل وبرفع المخدة 15 سنتيمتر وبعمل كل الاحتياطات بس المشكلة مديقانى شوية

عايز بس اعرف هوالباريت هوا هوا النكسيوم ولا اية الفرق بينهم ؟

الاتنين من نفس المجموعة
proton pump inhibitor
أدوية مضادة للحموضة

واية لاومة الانتودين الا40 اللى هو كتبهولى واية لازمة الدوجماتيل كمان

الانتودين برده للحموضعة
H2 blocker
بس المجموعة الأولى أقوى
و الدوجماتيل زى مهدىء نفسى
بس للأعصاب بتاعة الجهاز الهضمى

وعايز اعرف العملية الجراحية فى الحالات دى بتكون ناجحة ولا لا

العملية نسبة نجاحها كبيرة
بس زى ما قلتلك بتتعمل فى حالة فشل العلاج الطبى

تانى حاجة إنتا حالتك أساسا مش ارتجاع
انتا الدكتور قالك قرحة و فيه شوية ارتجاع
فكمل العلاج و متبقاش موسوس
و إن شاء الله خير

ربنا يشفيك فى البدايه ويشفى كل المرضى امين يارب العالمين

انا عايز اقولك انى كان عندى حاله شبيهه بحالتك من حوالى كام شهر كده بس الاعراض كانت اكتر واقوى من اللى عندك ....

وروحت لاكتر من دكتور وخدت علاج حوال 6 شهور وهو علاج ارتجاع المرىء شويه كنت بحس انى برتاح عليه وشويه كنت بحس انى رجعت زى الاول !!!!

واخر ما زهقت روحت للدكتور وانا اللى طلبت منه المنظار علشان استريح واعرف فيه ايه ومطلعش عندى حاجه فى المرىء خالص والدواء اللى انا كنت باخده طلع مكنش ليه لازمه!!!!!!

فنصحتى ليك مهما يحاولوا يخوفوك من المنظار او صعوبته ارجو منك انك تحاول انك تعمله علشان متاخدش دواء على الفاضى لانه ممكن تطلع المشكله حاجه تانيه خالص

مع تمنياتى بالشفاء وطمنا عليك ومتخفش صدقنى المنظار مش صعب اوى زى ما الناس هتوصفهولك

الف الف شكر يا دكتور احمد والف الف شكر يا فنان وان شاء الله هكمل الكورس بتاع العلاج اللى عملهولى ولو لقدر الله منجحش ان شاء الله هعمل منظار زى فنان ما قال
بجد انتوا ناس محترمة جدا ربنا يكرمكوا فى حياتكم يارب

شكرا لكل اللى رد على واللى لسة هيرد ان شاء الله
الحمد لله رحت للدكتور تانى وكتبلى على نكسيوم 40 ومن اول اسبوع مبئتش احس بالوجع القاتل اللى كان بيجيلى فى فم المعدة .دلوئتى باخد النكسيوم مرتين فى اليوم بس المشكلة اللى معذبانى واللى مخليانى بخبط راسى فى الحيط انى كل ما اكل احس ان فى حاجة واقفة فى زورى ومش قادر اتكرع .ببئى هموت واتكرع ومش عارف .انا مش بنام ولا باكل بسبب الموضوع دة
ياترى اية السبب انى مش عارف اتكرع زى الناس مع العلم انى هروح اعمل منظار يوم السبت ان شاء الله
للعلم الدكتور قالى ان الحاجة اللى واقفة فى زورى هتروح وهرجع اتكرع عادى بس انا مش حاسس باى تحسن من الناحية دى
انا بتعالج عند استاد دكتور بكلية طب اسكندرية

انا عندي نفس حالتك .. خاصة لمن اكل شي حامض .
بحس اني مكتوب ومش قادر اتنفس ..

انا اعترض بشدة على عدم عمل المنظار في الحالة دي

واعذرني الدكتور اللي قالك على المنظار ماشي صح انما اخوك غلط تماما
والمنظار ده شئ سهل جدا وغير خطير على الإطلاق

ماعنديش كلام اقوه اكتر لان زميلي الدكتور احمد قال مايكفي

الف سلامة

حتى انا بتجيني نفس الحالات ..