الموضوع: ازاي اعمل كيكه بالشيكولاته السايحه

ممكن اعرف اسهل طريقة لعمل كيكة بالشكولاته السايحه يعني كيكة بالشكولاته الخام او السايحه نفسها مش لمجرد التزيين لاني مش عايزة تكون الكيك بالكاكاو

يا ريت حد يقولي على اسهل طريقة والمقادير
وشكرا

شوفى الكيك ده وان شاء الله تعجبك

المقادير

صوص الشيكولاته

مج كاكاو خام

مج لبن بارد

مج سكر

مج زيت

كيس فانليا

تضربى الخليط كله مع بعض وتاخدى مج من الخليط وتحطيه فى الفريزر

مقادير الكيك

5بيضات

2كوب دقيق

كوب سكر

كيس بكنج بودر وكيس فانليا

باقى صوص الشيكولاته[الطريقه هنضرب السكر مع البيض والفانليا وبعدين نضيف باقى صوص الشيكولاته نضيف الدقيق والبكنج بودر نقلب نصب الكيك فى صنيه مدهونه سمن ومرشوشه دقيق دخلى الصنيه الفرن لحد متستوى وتسيبيها تبرد وبعدين تشقيها من النصright][/right]

وتحشى بالصوص والباقى تصبيه على الكيكه من فوق والف هنا (منقوله)

مرسي جدا يا غالية

لا أعتقد ان دي الوصفة اللي انت عايزاها
الوصفة اللي أعتقد انك عايزاها اهي وأتمنى تعجبك


المقادير:

125 جرام شوكولاتة خام مكتوب عليها 70% (كمية جوامد الكاكاو فيها)
125 جرام سكر
60 جرام زبدة
3 بيضات مفصول البياض عن الصفار

سخني الفرن على 170 درجة
سيحي الشوكولاتة في حمام مائي مع الزبدة
على ما الشوكولاتة تسيح اضربي بياض البيض كويس لحد ما كله يبقى كتلة واحدة وتقلبي الطبق مايقعش
اخلطي الصفار مع السكر كويس وأول ما الشوكولاتة تسيح (تسيح مش تسخن أول ماتسيح) ضيفيهم عليها علطول مع التقليب السريع
وبعدين ضيفي عليهم بياض البيض بالراحة وقلبي بالراحة من تحت لفوق دائري لحد ماتخلطيهم سوا
حطيهم في القالب المناسب للكمية وخدي بالك الكيكة دي مش بتعلا أوي فمتقلقيش
وممكن تحطيها من غير ما تدهني الصنية زبدة براحتك لأنها بتتاكل علطول دافية أول ما تطلع من الفرن وبيبقى قوامها غير قوام الكيك العادي
حطيها في الفرن 30 دقيقة تقريبا أو حسب الفرن بتاعك
الكيكة بتكون طرية من الداخل ومقرمشة من الخارج

وبالهنا والشفا :)

مرسي جدا يا غاليه على الوصفه الحلوة
تسلم ايدك