المشاركة الأصلية كتبت بواسطة bascota2010
حضرتك أفدتني جدا والدنيا بقيت عندي كويسه اها كفايه ان حضرتك أستجبت للاغاثه لاني بجد مكنتش عارفه موضوع الcollection checks بس معلش انا أصلي مش فاهمه يعني ايه مقاصه ممكن توضحهالي
الحمد لله انك استفدتي معلومه وبجد انا بفرح جدا لما بساعد حد واحس فعلا انه استفاد
بالنسبة بقي لموضوع المقاصة
ايه هي المقاصة ؟
مقاصة يعني تسوية
بصي شوفي المثال ده
نزلت انا واحد صاحبي علشان نشتري ملابس فعجبني بنطلون وكان تمنه مثلا 120 جنيه فراح صاحبي ودفع تمن البنطلون ، كده صاحبي له عندي 120 جنيه اوك
وبعد كده صاحبي عجبه تي شيرت نقول ب 90 جنيه ههههههه فرحت انا للراجل ودفعت تمنه
اذن انا دلوقت دفعت 90 جنيه يعني ليا عند صاحبي 90 جنيه
جينا انا وهو في اخر اليوم بعد ما روحنا للبيت نتحاسب بقي
المفروض ان صاحبي له عندي 120 جنيه
انا ليه عنده 90 جنيه
فالمفروض انا بقي بدفعله 120 -90 =30 جنيه الفرق بين اللي دفعه هو واللي دفعته انا
هي ديه بقي المقاصه
بس المقاصه بتكون بين شيكات
اذن المقاصة هي تسوية حسابات بين البنوك وبعضها البعض سواء كانت لصالح العملاء او مسحوبة عليهم
المسؤل عن المقاصة بين البنوك طبعا هو البنك المركزي المصري
المقاصة ديه بتم ازاي ؟
اقولك بتم ازاي طبعا مينفعش اي موظف يدخل غرفة المقاصة اللي بيتم فيها تسوية الحسابات بين البنوك وبعضها ليه ؟ علشان طبعا كل اللي جوه في غرفة المقاصة عبارة عن شيكات فمينفعش اي موظف يدخل الغرفة ديه الا اللي لديه الصلاحية انه يدخل
طب مين الموظفين اللي بيدخلوا هناك ؟
البنك المركزي المصري بيطلب من كل بنك انه يعين مندوب او اكثر عن البنك اللي يكون ليهم الصلاحية لعمل المقاصة عن البنك
وبتم عملية المقاصة علي فترتين
فترة صباحية وفترة بعد الظهر
هناخد مثال هنا بقي بين بنكين وكيف المقاصة بتم بينهم
نفرض ان عملاء بنك مصر معاهم شيكات مسحوبة علي عملاء البنك الاهلي فيه طريقيتن لصرف الشيكات ديه
الاولي
ان عملاء بنك مصر يروحوا علي طووول علي البنك الاهلي ويصرفوا الشيكات اللي معاهم
وبكده مش هيكون فيه مقاصة بين البنكين
التانية
ان عملاء بنك مصر بيروحوا لبنكهم ( بنك مصر ) ويقولوا احنا معنا شيكات مسحوبة علي عملاء في البنك الاهلي وعايزينك تحصلهم لينا وبيدوا الشيكات طبعا لموظفين بنك مصر وبياخدوا منهم ورقة تفيد انهم اخدوا الشيكات منهم للتحصيل وطبعا قيمة الشيكات ديه مش بتنزل في حساب العميل علي طوووول لانه ممكن يكون العملاء بتوع البنك الاهلي اللي مسحوب عليهم الشيكات معندهمش رصيد يغطي القيمة
المهم
موظفين بنك مصر بيجمعوا الشيكات كلها وبيختموها بختم البنك علي وش الشيكات وظهرها ليه بقي؟
علشان لا قدر الله لو الشيكات ضاعت او اتسرقت من موظف البنك محدش يقدر يصرفهم طالما عليهم ختم بنك
بعد ما يختموا الشيكات بيبعتوها للفرع الرئيسي بتاعهم وهناك موظف مسؤل عنهم بياخد الشيكات ويظبطهم طبقا لتعليمات البنك المركزي وبيحط الشيكات كلها في ملف الكتروني وبيبعته للبنك المركزي
كده بقي بدات المقاصة
طبعا كل بنك في مصر عنده حساب في البنك المركزي
البنك المركزي بياخد الشيكات من مندوب بنك مصر وطبعا الشيكات ديه مسحوبة علي البنك الاهلي
بيخصم البنك المركزي قيمه الشيكات من حساب البنك الاهلي وبيضفهم لحساب بنك مصر
طب فيه حاجتين هنا ؟
الاولي
ما هو ممكن يكون فيه عملاء البنك الاهلي رصيدهم مش مغطي قيمة الشيكات المسحوبة عليهم
ايه ذنب البنك الاهلي انه يتخصم الفلوس من حسابه ويدفعها هو للبنك مصر والعميل معندوش رصيد ؟
اقولك لا طبعا البنك الاهلي مش هيتحمل حاجة ليه ؟
لانه اول ما البنك المركزي بيستلم الشيكات من مندوب بنك مصر وبيخصمها من حساب البنك الاهلي وبيرسل الشيكات الي مندوب البنك الاهلي علشان يتاكد من الشيكات انها مفهاش غلط وكمان يتاكد من رصيد كل عميل مسحوب عليه شيك
فاذا البنك الاهلي وجد شيكات بتاعت عملاء معندوهمش رصيد بيعمل رفض للشيكات ديه علي طوووووووووول في نفس التو واللحظة وفي نفس اليوم اللي استلم فيهم الشيكات وبيبعتهم للبنك المركزي وباسباب الرفض
طبعا البنك المركزي مش بيخصم قيمة الشيكات المرفوضة ديه وبيدي لمندوب بنك مصر الشيكات المرفوضة واسباب الرفض
ومندوب بنك مصر بيرجع الشيكات الي عملاء بنك مصر وسبب الرفض
الحاجة التانية
ما هو ممكن البنك الاهلي يكون عنده شيكات مسحوبة لعملاء بنك مصر يعني
لما البنك المركزي يبعتل الي البنك الاهلي الشيكات اللي استلمها من مندوب بنك مصر
علشان يفحصها فالبنك الاهلي بيشوفها وبيرد علي البنك المركزي وكمان بيبعت للبن المركزي الشيكات المسحوبة علي بنك مصر
وبيدا بقي نفس المشوار السابق
انه كل بنك يتاكد من الشيكات ويفحصها ويتاكد من رصيد كل عميل
اخر حاجة بقي في المقاصة
فيه نوعين من المقاصة
المقاصة الصادرة وهي الشيكات المسحوبة علي عملاء بنوك اخري لصالح عملاؤنا
المقاصة الواردة وهي الشيكات المسحوبة علي عملاؤنا لصالح عملاء بنوك اخري
وبكده تكون انتهت المقاصة
وياااااااااارب مكنش طولت في الشرح ورخمت عليكوا
عنوان الرابط المتبادل
حول الروابط المتبادلة
