الموضوع: طقم الشنبر ولا عمرة الموتور؟؟

الأخوة الأعزاء ..

أولا أنا من جمهور سيات 133 وكنت عاوز أستفسر من حضراتكم على الآتى:

أمتى العربية يتعملها طقم شنبر وأيه الأعراض اللى تخلينى أعمله وتكلفته كام تقريبا..
الحاجة التانية عمرة الموتور إيه أعراضها اللى بتظهر على العربية وتكلفتها إيه لو كانت كاملة؟؟
وهل طقم الشنبر بديل للعمرة ولا علاج مؤقت؟؟

انا عملت الاتنين
والاتنين يعتبروه نفس الاعراض
بتلقى دخان ابيض من وراء من الشكمان
والمياة فى اليرداتير بتترفع لدرجة انها بترفع الغطاء وبتلقى امبير الحرارة رفع لى اخر حاجة
والعربية بتحس انها تقيلة جدا فى الماشية
وعموما نصيحة لو العربية احتاجات طقم شنبر متعملوش واعمل عمرة علطول احسنلك
لانها بتبقى حل مؤقت ده لو انت ها تقعد العربية معاك اما لو ها تبيعها فا اعمل طقم الشنبر وبيعها علطول
لانها بعد فترة ها تحتاج عمرة مليون فى المية

كلام من واحد مجرب

محدش يقدر يقول طقم شمبر او عمره غير لما الموتور يتفتح الكلام ده عن تجربه.
اما تكلفه العمره الكامله فى موضوع اسمه(عمره موتور سيات 133)فى هذا القسم فيه تجربتى فى العمره الكامله بكامل تكاليفها.

فعلا مبيتححدش غير لما الموتور يتفتح ... لان الشميز والبساتم ممكن يبقو سلام وتحتاج بس طقم الشنمبر واللى يركبهولك يحكمه كويس ... هيبقى أكنك عملت عمره لاظبط

مشكور أخويا مدحت على المعلومة..

مشكورين يا جماعة على المرور والإفادة..

بس برضه ياريت تقولولى أعراض ده وده

وأمتى أقول إنى هعمل شغل فى موتور العربية لأنى بصراحة مش مستعد ليها خالص وتجربة الأخ تامر والنكاليف اللى دفعها مرعبة بصراحة لأن العربية كلها ب 6000 او 7000 حرام أعمل عمرة بنص تمنها يبقى ابيعها وانام على الفلوس شوية وأكمل عليهم وأجيب حاجة أعلى وخلاص..

ها اقولك تعمل شغل فى العربية وهو شغل فى قلب الماكينة ذات نفسها
لم تلقى ان العربية بتغير فى شكل العادم بتاعها يعنى يوم اسود ويوم ابيض ويوم مفيش حاجة خالص
لم تلقى ان امبير الحرارة بيعلى لوحده
لم تلقى المياة كل لم تحطها فى الريداتير بتترفع لفوق لوحدها
او لو لقيت زيت فى المياة معنى كده ان وش السلندر ضرب والمياة والزيت دخلوه على بعض
ودى حلها العمرة
لانك اصل لم هتيجى تعمل طقم الشنبر حتى ها يشوف الباساتم بتاعت العربية ان كان سليمة ها ترتاح من حاجة
لكن اكيد طبعا هايشوف الشميز سليم ولالا ولو لقه بايظ يبقى الافضل انك تعمل عمرة كاملة مش طقم شنبر
لان انا عملت طقم الشنبر واتكسر بعدها4 شهور بس لان الباساتم والشميز وعمود الكامة وقفص التكهات كانوا فى الضياع
وكمان لقيت طرمبة الزيت بايظة ودى كانت السبب فى ان معظم الحاجات دى تبوظ لانها مكينتش بتوصل زيت كفاية لماكينة

وها اقولك على حاجة ان عملت عمرة لعربية دى باعها صدقنى دى ومتزعلش منى عربيات متتركبش لانها مبتحفظش
يعنى انت هاتتبهدل وها تتمرمط فى العمره وها تبهدلك كمان بعد العمرة لان الماكينة فى حد ذاتها ضعيفة مش بتستحمل الجرى الكتير والمشاوير والحاجات دى

وطبعا اللى هاتعمل عنده العمرة لازم تكون معه لان الصنايعة كلهما بلا استشناء حرامية شوف لو طالع من الجامع متثقش فيه
اناقعدت فى الورشة 3 ايام بحالهما ايام العمرة كنت بروح بيتنا انام وارجع الساعة 9 بظبط اكون ادام الورشة واروح بيتنا هدومى كلها شحم وزيت وبنزين بسبب انى مش بسيبه يعمل اى حاجة غير لم اقوله ده اية وبتعمل كده لية

وانا اضمن منين انه مش ها يغشنى ولا ها يركب لى حاجة قديمة وياخد الجديدة

لو احتجت حاجة تانية انا تحت امرك

روح ربنا يكرمك ويجزيك خير عن الوقت اللى أخدته فى الرد عليا وشكرا على المعلومات القيمة جدا..

وشكلى هاخد بنصيحتك وأبيعها بس المشكلة غنى لو حبيت أجيب حاجة أعلى شوية زى127 مثلا هتتعبنى برضه بس أقل شوية وأكنى مغيرتش الركوبة..
عموما ربنا يقدم اللى فيه الخير..