الموضوع: السويد بدايه ام نهايه المطاف " معلومات عمليه عن السويد و الحياه فيها بتجارب شخصيه"

السلام عليكم و رحمه الله و بركاته


الموضوع ده عملته عشان نجمع فيه خبراتى و خبرات كل الناس اللى عايشين فى السويد و نجمع كل مشاركتنا و نحدثها بأخر المعلومات ومنه هاتتعلم ان شاء الله كتير عن السويد و عن الحياه فيها
زى ما اى موضوع عن دوله اوروبيه الناس بتحب تبدأ بالتأشيرات للسويد و ده موضوع اتفرك و اتدعك شرح و اتفرتك خالص فى مليون موضوع قبل كده و كل دول الشنجن ورقها واحد وظروفها متشابهه.
اول حاجه يا بطل ربنا كرمك ووصلت هنا خلاص
الاول هانعمل مقدمه كده نشرح عن طبيعه الحياه و المشاكل الكبيره و بعدين الحياه اليوميه دى من القصص بتاعتنا
لازم تعرف بعض المعلومات كده الهامه عند وصولك اولا فى فرق كبير بين مستوى المعيشه والدخل و المصاريف من مدينه الى اخرى هنا! بمعنى مثلا الحياه صعبه فى استوكهولم بسبب الاجانب و الشغل صعب جدا و الاسعار غاليه بدرجه رهيبه والمدينه الاصعب على الاطلاق انك تعيش فيها هى مالمو بسبب انخفاض و تدنى مستوى المعيشه هناك ( طبعا بالنسبه لمستوى السويد يعنى بس بالنسبه لمصر بدون تعليق طبعا ) المهم هناك بقى الاجانب مش بس كتير لا دول مجرمين كمان فى مناطق كامله الحكومه اعتبرتها مناطق موبوئه و بتتعامل معاهم من المبدأ ده ان دى مناطق زى مناطق المشعه بعد كارثه نوويه نسبه اجرام عاليه جدا نسبه نجاح الطلبه فى المدارس شبه منعدمه و اطفال مجرمين (هنا القانون بيحمى الطفل حتى لو عمل جريمه لايحاسب قضائيا بيتعالج نفسيا بس ) وكمان كل كام يوم حادث اطلاق نار على اى حد فى الشارع و سقوط ضحيه لأسباب مختلفه اغلبهم شباب صغيرين و اسبابها تصفيه عصابات و بعض الاوقات ناس ولا ليهم اى ذنب فى الشارع و بهدله يعنى!
بس فى مناطق فى مالمو كويسه و يتعاش فيها عادى لكن يعنى سمة المدينه ككل وحشه جداو بعد كتاب زلاتان ابراهموفيتش اللى نزله جديد ده و كتب عن نشأته فى مالمو كل العالم خلاص عرف قد ايه المكان ده من اصعب الاماكن للعيش فى العالم كان بيقولك بالنص لولا الكوره كان زمانى مجرم زى باقى اللى اعرفه مواقف على الناصيه ببيع مخدرات او ببيع صاحبتى بالساعه للى يدفع!
وطبعا يوتوبورى تانى اكبر مدينه و فيه االميناء الرئيسى و تعتبر مقصد سياحى كويس لكن مش للسياحه الشواطئ و كده تبقى سياحه مؤتمرات بقى و ثقافيه و انواع تانيه كتير ملناش فيها يعنى يوتوبورى الحياه فيها صعبه برضه بسبب قله الوظايف و الاسعار برضه عاليه الى حد ما بالزات فى السكن ولك كمثال اى موقع سكن تخش عليه و تشوف بنفسك فرق الاسعار فى الشقق بين يوتوبرى و باقى المدن!
للعلم فى يوتوبورى الناس بتأجر شقتها باليوم والاسبوع للاجانب فى ايام الحفلات والمهرجانات و كده لان الفنادق غاليه ونادرا ما هاتلاقى مكان يعنى بتسيب شقتكو تروح عند اصحباك وتأجرها تعملك الف اوالف ونص فى الليله حلو مش عيب و يا سلام بقى لو فى السينتروم تعملها الفين و انتا طالع فى الليله المهم يعنى الحياه فيها برضه صعبه و مليانه اجانب و مليانه ناس عايشين على المساعدات من الحكومه بغض النظر عن اسبابهم لو هما فعلا محتاجين اوبيسرقوا و ينهبوا البلد و دول كتير جدا
بالنسبه لمدن الشمال الحياه هناك جميله و ارخص شويه و سهل تعيش هناك لكن البرد مرعب والشمس مبتشوفهاش الا كام شهر فى السنه بس و مش شمس كمان مجرد نور كده وخلاص


الفروق فى المناطق هنا مش بس فى السكن و الاسعارالفروق برضه فى التعليم و فى الرعايه الصحيه و كل حاجه
بالمنطق كده
هنا المورد الاساسى للبلد هو الضرايب
اعتبر ان علاقه الخدمات المقدمه من الحكومه مربوطا طرديا بتعداد السكان و تنوعهم فى كل مدينه
بمعنى ان كل ما السكان يكونوا اكتر كل ما يكون دخل المدينه اكبر و الخدمات افضل
لكن المشكله ان العكس بيحصل فى حاله وجود الاجانب
السويدى بطبعه مش بيسرق بلده وعارف انه لما يشتغلو يدفع الضريبه ده واجب وطنى تجاه بلد هعشان تفضل فى المقدمه و عارف انه عشان يحافظ على مستوى المعيشه المرتفع ده لازم يدفع اللى عليه كله عشان يقدر يستفيد هو واولاده من بعده انما الاجنبى يقولك انا وبعدى الطوفان بلا عيالبلا نيله لما يكبروا يحلها الف حلال

الاجنبى بيجى ميشتغلش و يكدب عشان ياخد الاقامه و يقول كلام محصلش عشان يدوله اقامه (منها للاسف الشديد الادعاء بالشذوذ الجنسى او جرائم الشرف مع عدم وجود ادله قاطعه على حالات تم اكتشافها لكن الناس كلها بتؤكد ان دى واحده من الطرق للحصول على الاقامه) وبعد ما بياخدها بيعيش على المساعدات ولعشرات السنين لدرجه ان فى دلوقتى حزب اسمه الشبيبه ديموقراطى حاجه كده المهم يعنى ده ماشى فى الشوارع و خد قرض من الحكومه لطباعه اسطوانات و فلاشات ومنشورات لتوزيعها على الناس دى اسم الحمله هى ( الغربه حلوه بس وطنك احلى و اولى بيك) يعنى من الاخر نورتنا يا بيه مع السلامه بقى و بدأت الناس تنتخب الحزب ده على امل انه يخلصهم من قوم يأجوج و مأجوج دول!
الهدف من الحمله او من اى حزب هو الناس اللى عايشه على المساعدات لمده عشر سنين اواكتر لك بقى ان تتخيل عشر سنين عايش على المساعدات و مبيشتغلش ولا عمره دفع حاجه كل حاجه البلد بتدفعله حتى السكن و كله كله على البلد هو وعياله
مع العلم ان برضه الهدف مش اى حد محتاج اومريض او غير قادر على العمل احنا بنتكلم على الناس اللى بتسرق لانهم بياخدو الفلوس دى و بيشتغلوا اسود يعنى انتا بتدفع ضريبه و مش لاقى شغل هو بقى بياخد فلوس الضريبه بتاعتك يجيب تلفزيون ليد اخر موديل و لبس انتا متحلمش بيه و احدث موبايل و كمان بيشتغل اسود عشان يزود دخله و بياخد فرصتك فى ايجاد عمل كويس تكسب منه
ببساطه تبا لهم يعنى
حط نفسك فى مكان ابن البلد و شوف هايكون احساسك ايه ده الشعب السويدى يعتبر من اطيب الناس على وجه الارض لصبره عشرات السنين على الناس دول و برضه بيدعهمهم بفلوس و تعليم كويس ليهم و لعيالهم و كل حاجه و كورسات لتأهيلهم انتا لو متعلم مش هايدوك كورسات التانين دول اللى من النوع ده ليهم الاولويه فى الكورسات و التعليم عشان دول محتاجين مساعده (على الورق) انتا ممكن تتصرفو هما بيكلفوا البلد كتير
الخلاصه ان يوم بعد يوم السويدين بدأو بالفعل تشجيع الافكار المتشدده مع الاجانب بسبب المشاكل السابق زكرها
ومشكله المشاكل هنا الاطفال
للاسف الشديد المرض النفسى اللى فى الاباء اللى من النوع الى نتكلم عليه بينقلوه بحزافيره للاطفال بتلاقى اطفالهم فى المدرسه بيبعدوا عن العلاقات مع باقى الاطفال ومش بيختلطوا و بيودوهم مدارس لوحدهم مش زى باقى مدارس الحكومه يعنى مش كفايه تفكيرك المريض كمان بتنقله لطفلك للاسف الاباء دول فاكرين انهم بيعملوا الصح كدهو فاكرين ان ده هو الطريق المظبوط فى التربيه طيب ليه متديش مثال كويس لطفلك ليه لما بتروح تاخده من المدرسه مش بترد حتى على المدرسين يعنى الناس دى استضافتك انتا وعيالك و بتعمل المستحيل عشانكو وبيشتغلوا وبيصرفوا عليكوا و بقت الخدمات مستواها فى النازل بسببكو و بتخربوا كل حاجه وفى الاخر تيجى المدرسة بتاعت ابنك او بنتك تكلمك متردش عليها و تمشى يعنى كمان كل ده و فى الاخر بيعزله نفسهم عن الدنيا هما و عيالهم!
(كل المواقف دى الناس كلها شافتها و ممكن تسأل اى حد عايش هنا و يحكيلك اكتر من كده )
غير ان الاجانب بيستخدموا الدين غلط يعنى مثلا بيروحوا يتطلقوا مدنى قدام المحكمه و ده طبعا للمسلمين ملوش لزمه دى ورقه وخلاص تقوم الحكومه مدياهم كل واحد شقه لوحده يروحوا مأجرين واحده و قاعدين فى التانيه عيب يعنى خلاص سيرتهم العطره بقت على كل لسان حتى التجار المحترمين و العمال المحترمين الملتزمين بسبب الغوغاء اللصوص دول بقوا يتعاملو معامله وحشه لان السيئه بتعم على السمعه بتاعت الجنسيات دى
ده بقى بيأثر على بقى فرص العرب عموما فى ايجاد عمل
ودفع شباب كتير الى الموضه الايام دى و هى تغييرالاسماء عشان يلاقى شغل بقى يغير اسمه من اسم عربى لاسم اوروبى عشان على الاقل السى فى بتاعه عند التقديم يأخذ محمل الجد ولايهمل من اول فرز لمجرد اسمه عربى
وده كلام ملوش اى دعوه بعنصريه الناس زى الفل اللى انا حكيته عن اللى الاجانب بيعملوه في البلد ميجيش 1% من الواقع المرير اللى اهل البلد دى بيعيشوه بسببهم
المهم يعنى دى كانت من الحاجات اللى لازم تحطهافى دماغك
حاول تكون سفير بلدك و دينك يعنى متبقاش الخمره فايحه منك فى رمضان ولا ماسك سيجاره حتى لو انتا مش عاوز ترضى ربنا على الاقل يا اخى احترم نفسك و اشربها بعيد متبقاش انتا بتعمل الغلط و بتتباهى بيه و بتوريهم ان جنسيتك و دينك ولا يفرقوا معاك مهو طبيعى بعد كده لما تطلب منهم حاجه مش هايهتموا يقولك ده شوف بيعمل ايه فى نفسه
بلاش النصب و الاستيلاء بدون وجه حق على فلوس البلد لمجرد انك تجيب اى فون ولا تلفزيون جديد
لو محتاج طبعا ليك الحق فى المساعده لكن المشكله فى اللى مش محتاج و عايش برضه على المساعدات و شغال اسود وبيحوش كمان
راعى ربنا فى فلوسك اولادك ملهمش زنب ياكلوا من الحرام و فلوس الناس دى مش غنيمه حرب دول بيشقوا و بيصرفوا عليك فحرام عليك تأكل عيالك من الفلوس دى وانتا مش محتاجو شغال اسود
النار اولى بجتتك لو بتاكل من الحرام
المهم يعنى ده كان نبذه مختصره جدا جدا جدا عن الاجانب عموما
برضه للعلم جنسيات كتير فيها العيب ده انا بس علقت على العرب و المسلمين لان دول اللى
يخصونى الباقى مليش دعوه يعمل اللى يعمله هو معندوش لا حرام ولا حلال فبراحته بقى
كنت زكرت ايه العلاقه بين نوع و عدد السكان ومستوى الخدمات بعد ما شرحت شويه اكيد فهمت اللى اقصده ايه ان لو مدينه كبيره فيها كتير عايشين على المساعدات بالتالى اللى بيشتغل و بيدفع ضريبه فلوس الضريبه بتروح للى عايش على المساعدات دول و البلد مبتاخدش حاجه و المدينه بيبقى عليها ديون و بتاخد قروض عشان تبنى او تعمل طريق اوحاجه لان الدخل مفيش اللى جاى على قد اللى رايح فبالتالى بيؤدى الى فترات انتظار طويله للحصول على الخدمات مش بسبب عدد المتقدمين بس بسبب قله الموارد عموما ومش قادرين يعينوا حد زياده و مش عارفين يصرفوا على التعليم كويس و لا عارفين يصرفوا على الرعايه الصحيه كويس ولا حتى على تطوير اى حاجه بسبب الناس دى و ارجع اقول المشكله مش فى المحتاج المشكله فى اللى
معاه ومش محتاج و بيسرق
ممكن اى واحد عايش هنا يجيب كاميرا الموبايل بتاعت و يصور مكان سكن السويدى و اوضه الغسيل كمثال و حوالين المبنى و كده وبعدين يصور التانين بقى اللى بنتكلم عليهم و مكان سكنهم و ابوس ايدك صور اوضه الغسيلو انتو تعرفوا الفرق بدون ادنى تعليق علىاى صوره منهم!
و هانستكمل الحديث فى الحلقه القادمه ان شاء الله

سلام عليكم يا رجاله بما انى شايف ناس كتير بتسأل عن وظائف مختلفه و تخصصات مختلفه فى السويد هاقولكو تقريبا نظره شامله للموضوع عشان يبقى الناس فاهمه و اللى ليه رزق لو فى بطن الحوت ربنا هايكرمه و يوصله بس هو يسعى و خلاص يعنى لاسفير ولا سفاره ولا فيزا هاتقف بينك و بين رزقك اللى ربنا كاتبهولك المهم السعى !
اول حاجه لازم الكل يعرفها السويد دوله مفتوحه على البحرى كميه الاجانب فيها كميه مهوله بعضهم اتجنس خلاص هو وعياله و البعض على وشك يعنى الفكره انه مجتمع متعدد الثقافات و دى محدش كتير هايفهمها الا اللى اشتغل مالتى ناشونال او فى السياحه بالتحديد .
القبليه هنا منعدمه الى حد ما بين العرب يعنى لا يعتمد عليهم الا من رحم ربى لكن مع باقى الجنسيات بالزات الاسيويه لاحظت ارتباطهم ببعض وثيق و يحترم اصراحه و بالنسبه للسويدين انسى خالص موضوع العيله و القبليه و الكلام ده كله السويدى ملوش فى الجو ده خالص ولا جو الاسره و الكلام ده كل واحد فى حاله و كل واحد يقولك انا حدودى اهى و انا بحترمك انتا و اختياراتك وملكش دعوه بيا ولا بأختياراتى .
نيجى للنقطه المهمه اوى اللى الكل بيدور عليها وهى اكل العيش
انواع الشغل الاسود مش موضوعى عشان اصلا معرفش بيمشى ازاى وكله بهدله ومخاطر
الشغل الطبيعى هنا فى كل المجالات لكن عندهم استندارد قوى اوى لكل حاجه يعنى مفيش حاجه اسمها فنى و ابويا علمنى و معايا صنعه اى كانت حتى لو مفيش غيرك فى البلد لازم يكون مدعم بشهاده من الحكومه انك فعلا تعرف تعمل اللى انتا بتقول عليه ده
وده فى طريقتين
يا تعمل حاجه اسمها فالديرينج يعنى هاتتاخد وتتحط فى مكان العمل وحد يقيم شغلك و ادائك و ده نادرا ما بيتعمل مع اى حد الا فى ظروف معينه
يا اما هاتاخد كورسات من كزا جهه هنا فى البلد
كورسات القطاع الخاص غاليه لدرجه رهيبه يعنى اللى ليه فى الكمبيوتر كمثال بسيط مثلا فليكن كورس شبكات سيسكو مثلا سى سى ان ايه ccna الكورس ده تكلفته فى مصر لا تتعدى ال1000 جنيه و فى مدعم كمان و كمان فى اجهزه تتعامل عليها و الكورس ممكن ياخد شهر او اكتر فى مصر هنا الكورس فى ارخص شركه فى السويد ب 400000 اربعين الف كورونا من غير الضريبه اللى هى 25% يعنى الكورس هايعمل خمسين الف ( الكورونا تساوى جنيه مصرى تقريبا ) و كمان الكورس اللى هو الخمس ايام السريع يعنى لو معندكش خلفيه يبقى بترمى الفلوس لانك مش هاتتلعم فى الخمس ايام دول اى حاجه
و ده مثال بسيط للقطاع الخاص فى التعليم مع العلم مفيش اى استثناء من المبلغ ده اى كانت نوع اقامتك حتى لو كنت مواطن سويدى الاصل برضه كله بيدفع
القطاع بقى العام و ده بيختلف من كوميون الى اخر يعنى من مدينه الى اخرى بس كله طبعا ببلاش و المده بتبقى طوييله شويه لكن دراسه على حق ربنا بتتعلم فعلا حرفه
القطاع العام فى نوعين من الكورسات كورسات من الكومفكس وده تعليم الكبار اللى تعدوا 20 سنه و فى حرف كتير جدا تتعلمها و كله بيرجع لخلفيتك و طلباتك انتا ايه للمستقبل و فى كورسات تبع مكتب العمل و دى حرفيه متخصصه الى حد ما و موجهه لناس معينين منهم اللى هو اصلا حرفى لكن بيزود مهاراته بطريقه علميه و دى مش سهل الحصول عليها اطلاقا لانها بتكلف مكتب العمل مبالغ كبيره جدا و انتا مبتدفعش حاجه بالعكس انتا بتاخد مبلغ شهرى بسيط لمساعدتك لحد ما تخلص وتدور على شغل و ده لا ينطبق على كل الناس يعنى مش زى زمان
والتعليم الجامعى بقى
التعليم الجامعى مشكلته انه غالى جدا ( السنه بتعمل تقريبا 150 الف كورونا من غير مصاريفك الشخصيه دول رسوم الجامعه بس يعنى من غير سكن ولا اكل ولا شرب فممكن تخش فى مليون جنيه او كورونا يعنى عشان تاخد بكالريوس و ماستر ) ده لو انتا جاى اقامه دراسه لكن لو معاك اقامه لغرض غير الدراسه بتدرس ببلاش
كل حاجه عن التعليم كوم
و حوار الكوميون ده كوم تانى بقى اللى هى المدينه يعنى
ليه
قولتلى ليه يا معلم
لو انتا فى كوميون مدينه كبيره عشان تلاقى مكان فى اى كورس او مكان فى الجامعه من دول الموضوع شبه مستحيل الا لو بقالك مثلا تلات اربع سنين من غير شغل و البلد عماله تدفعلك مساعدات و اتخنقوا منك او تكون قدامك عرض عمل جدى و صاحب العمل بيتعهد انه هايعينك بعد الكورس
ده سببه بسيط لان كل اللاجئين و كل الاجانب بيجوا على المدن الكبيره بطبيعه الحال عشان سهوله المعيشه مع ان الاسعار نار فى المدن الكبيره دى و الشغل مش كتير و العرض اقل من الطلب يعنى فى ألف وظيفه لكان فى عشر الاف عاطل منهم خمس الاف مؤهلين للوظائف دى
لكن على العكس فى المدن الصغيره المدينه بتبقى غنيه عشان عدد السكان قليل و مفيش ناس كتير عايشه على المساعدات بعكس المدن الكبرى و دى بيستنزف مصادر المدينه بطريقه بشعه بغض النظر بقى عن ظروفهم و ربنا يرزق كل مجتهد نيجى بقى لنوع العمل
العمل الحرفى
90% من الاعمال الحرفيه ( نجاره - سباكه - كهربا - تركيبات - بناء - سواقه - سواقه بلدوزر و معدات تقيله - نضافه - فنى سيارات بأنواعهم )
دول بيشترطوا انك يكون معاك رخصه قياده يعنى من بين عشر اعلانات وظايف من النوع ده تسعه منهم لازم رخصه سواقه على الاقل (B) اللى هى خاصه فى مصر يعنى
الرخصه دى موال كبير
رخصتك المصريه او رخصه عربيه حتى الامريكيه و كل العالم اجمع مينفعش تسوق بيها هنا الا سنه واحده فقط بعد ما تترجمها و بعدين لا تستبدل بسويديه ومحدش هايعينك بيها عشان التأمين هايوديه فى داهيه لو انتا عملت مصيبه بالعربيه
الرخصه الوحيده المعترف بيها هى رخصه الاتحاد الاوروبى غير كده من اى دوله اوروبيه بره الاتحاد شكرا ملهاش اى لزمه
بعد السنه ما تخلص و عاوز تطلع رخصه هنا فى السويد ده الجحيم بعينه بقى لو بتسوق بقالك عشرين سنه ولا يفرق معاهم هاتتعلم فى مدرسه من الاول الكورس هايكلفك حد ادنى 20 الف كورونا و فى امتحانين و كورس رسمى كل واحد من التلاته دول ليه رسوم ده غير العشرين الف بتوع الرخصه ونسبه النجاح حتى لو انتا بتسوق قبلها لا يتعدى 60% و دى احصائيه سنه 2010 قريتها على موقع thelocal عشان كده تعتبر الدوله الأمن فى العالم فى الطرق و المواصلات و اقل نسبه حوادث لصعوبه الحصول على الرخص و التعليم الجيد جدا للحصول عليها او امتلاك عربيه اصلا برضه صعب جدا و مكلف بطريقه رخمه و المواصلات العامه زى الفل
موضوع الرخصه يطول شرحه لكن عامه هى صعبه و ممكن متدفعش غير رسوم الامتحانات بس و كورس الهالكا ده بتاع سيفتى كده اجبارى بيعلمك ازاى تسوق على التلج يعنى لكن مش امتحان مجرد تعليم لمده يوم او اتنين مش اكتر و يقولك بقى الخمور و تأثيرها و يوريك عربيات مدغدغه و عملت حواث عشان تشوف اللى حصل و كده يعنى و الامتحانين النظرى و العملى هما اللى موال بقى لكن تكلفتهم بسيطه يعنى ممكن متخشش مدرسه تعليم اصلا و تشوف حد معرفه يظبتك شويه على عربيته و دى سهله لانه بيروح المرور وبيطلع رخصه مدرس بس يكون بقالوا خمس سنين معاه رخصه نفس الكاتوجرى و ميكونش عنده اى علامات فى رخصته يعنى معملش اى مشاكل و بيدفع رسوم و بيبقى مدرس معتمد عادى يعنى
ما عالينا
نرجع للشغل تانى
بعد ما بيشترط عليك بقى الرخصه و ده منطقى لانك غالبا بتستلم عربيه فيها عدتك و بتروح تخلص الشغل مش هايعينلك سواق كمان و مفيش بقى شغل مصر هوب تلفح العده على كتفك و تنط فى اى ميكروباص و تروح على اكل عيشك مفيش كده هنا مستحيل تطلع بعده فى المواصلات
بيجى يشوف التعليم هل حصلت على تعليم فنى ولا لا فى المجال ده و هل المجال ده لازمله كورس تعليمى او خلفيه اكادميه ولا لا يعنى مثلا لو هاتبقى كابل فيتتر ودول اللى بيركبوا الكابلات فى الشارع او المبانى مفيش حاجه اسمها انتا بتعرف لان فى كورس مهم جدا لأمان الطريق لازم تبقى واخده و معاك رخصه معتمده انك تشتغل على الطريق و تأمن مكان شغلك لنفسك وللمرور معكش الورقه دى يبقى مش هايشغلك حتى لو معاك عشرين سنه خبره و للعلم مفيش شغل عتاله هنا فى اجهزه لكل حاجه يا راجل ده اللى بيلم الزباله من البارك مش حتى بيوطى على الارض بيلم كله بعصايه كده اخرها مشبك
يعنى مفيش بهدله كله معاك اجهزه و لابس لبس مناسب للشغل و لطبيعه المكان
نيجى بقى للعمل اللى هو شغل المكاتب الكمبيوتر و المحاسبه و ما الى ذلك
دول لازم لازم كورسات قويه عشان تفرق عن الباقى و تكون مدعمه بخره كويسه فى مجالك مع طريقه محترمه و منظمه لتقديم نفسك وخبرتك لصاحب العمل عشان تقدر تقنعه وخلى بالك انك لو معاك تلات اربع كورسات برضه خريج الجامعه ليه اولويه عنك وده منطقى طبعا.باقى الشغلانات بتختلف بأختلاف متطلبتها لكن على العموم لو شغلانه فيها تنقل لازم رخصه و اوقات حتى لو مفيش تنقل بس المصنع بعيد لازم رخصه و عربيه كمان و بيدفعولك البنزين بس المسافه مش باللتر و برضه بعض الشغلانات بتشرط يكون عندك اصلا عربيه عشان مكلفهمش عربيهو موال و تأمين و ضريبه وقرف و بيدفعولك البونديره يعنى مش هايكلو حقك متخافش.
بالنسبه للشغلانات المحترفه اوى و الحساسه زى الطب مثلا بفروعه ده معنديش فكره اوى عنه لكن على العموم من غير اللغه انسى كل كلامى ده كله الا لو انتا سوبر بقى فى الكمبيوتر مثلا او الهندسه بيعينوك عشان انتا ملكش زى فى العالم لكن غير كده لازم تتكلم سويدى على المستوى المحترف يعنى مش مجرد كورس اللغه هنا لازم تدعمه بممارسه عمليه بالزات فى مجالك زى الطب وغيره
معلومات متفرقه بقى
الشعب السويدى كله بلا استثناء بيتكلم انجلش برفكت الا الاجانب دول مش كلهم بيتكلم انجلش لكن السويدن والمتعلمين فى السويد بيتكلموا انجلش طبعا لكن فى الشغل محدش هايشغلك انجلش لان زى ما قولت البلد بقى كلها اجانب و اغلب الاجانب مش بيتكلم غير سويدى فمش هاتعرف تشتغل
بالنسبه للضريبه انتا بيتخصم منك 30% تقريبا فى المدن الكبيره ضريبه من مرتبك يعنى لو بتاخد 20 الف كورونا فى الشهر بيتخصم منهم سته الاف ضريبه و الباقى بيتحولك فى حسابك هنا مفيش حاجه اسمها كاش فى الشغل مفيش اكراميات خالص او يعنى محدوده اوى و محدش اصلا هاياخدها بطريقه طبيعيه لانهم مش متعودين على الموضوع ده و ممكن تسببلك مشكله لو قبلتها تحت اى ظرف كل شغلك و كل حياتك متعلقه بحسابك البنكى و سجلاتك فى السكات اللى هو اصلا مصلحه الضرايب مش احوال مدنيه يعنى انتا تمثل رقم و الرقم ده يمثل حساب بنكى مش اكتر ولا اقل و حقوقك بتاخدها وواجباتك بتعملها
وخلى بالك ان فى الاخر لو رزقك فى الاسكيمو هاتاخده متخافش
يا رب ميكونش مشاركه ممله و معلومات قديمه و الاستاذ كينج اتمنى انه يراجع على كلامى و يصححلى اخطائى او قله خبرتى و بالتوفيق ان شاء الله

متشكر اوى على كل رد على المشاركه الاخيره عن شويه المعلومات عن سوق العمل فى السويد احب اضيف بس شويه معلومات تانيه عن الحياه اليوميه و المصاريف اللى بتصرفها هنا فى الطبيعى
ملحوظه هامه
انا هاكتب المصاريف بتاعت الانسان العادى مش الانسان العايش على السوسيال و المساعدات لان ده ليه ظروف معينه و مصاريفه بتختلف كتير عن باقى الناس
اول حاجه الجنيه المصرى يساوى كورونا تقريبا بيطلع و ينزل سعر الصرف فى حدود عشر قروش فوق او اقل من الجنيه
هاناخد او بند فى المصاريف و هو بند اساسى هو السكن
السكن فى السويد يا حضرات من عجائب الدنيا السبع
قولتلى ليه
اقولك يا سيدى
هنا السكن فى المدن الكبيره يعتبر مغامره و بيعلمك معنى الصبر الحقيقى و المرمطه على حق فعلا
السكن نوعين نوع رسمى عادى و ده بيبقى بعقد مفتوح المده مع شركه من شركات السكن هنا و ده بيشترط حاجات كتير عشان الشركه دى تديلك سكن ان مثلا بعض الشركات بتطلب ان يكون مرتبك بعد خصم الضريبه يساوى تلات اضعاف الايجار و ده بيبقى صعب شويه لو انتا بقالك فتره مش طويله فى البلد
مشكلته
ان ايجاد عقد فيرست هاند او عقد يعنى مفتوح مع شركات السكن هنا فهو اصعب من ايجاد حفيد التنين البمبى بالعكس ده يمكن تلاقيه و عيلتهم قبل ما تلاقى السكن
قوائم الانتظار بتتراوح ما بين سنه الى 15 سنه انتظار عشان تلاقى عقد من النوع ده حتى لو انتا شغال و مرتبك كويس برضه صعب ولو لقيت بسرعه بعد سنه او اتنين هاتبقى فى منطقه زحمه جدا و كلها اجانب يعنى بصريح العباره منطقه اينعم رخيصه فى الاسعار و المحلات لكن كلها مشاكل
النوع التانى من الايجارات و هو الاسود بقى او الاندرا هاند ترجمته ثاكند هاند يعنى
ده بتأجر شقه من واحد مأجرها من الشركه و ده عادى و قانونى مفيش فيه مشاكل خالص و ممكن يكتبلك عقد يعنى امان مشكلته بقى ان المده محدوده مبتبقاش حر بقى فى تركيب و لا شيل اى حاجه فى الشقه و بياخد منك تأمين شهر او شهرين هو ومزاجه و الاصعب بقى ان مفيش اى ضوابط تحكمه يعنى يطلب منك اى رقم براحته مفيش سعر سوق و مفيش اى رينج ولا حدود الموضوع عرض و طلب و معاكش ميلزمكش
اكبر عيب فيه بقى هو قلته الشديده جدا
بمعنى
لو دخلت على اى موقع لعرض وطلب السكن الناس بتعرض اللى عندها و بتحط رقم تليفون او ايميل
افتح اعلان لسه نازل حالا و يكون فيه رقم تلفون و اطلب الرقم و فى الايد التانيه فى استوب واتش
و بالظبط فى عده ثوانى
المكان اتأجر بالفعل و بسعر اكبر من السعر اللى مطلوب اساسا و من غير حتى ما الناس تشوف المكان
و الموضوع موضوع توفيق بحت ان تلاقى مكان لسه متأجرش او يكون سعره عالى او المكان نفسه معفن و محدش عاوز يأجره و دى الحالات اللى ممكن تلاقيه فيها مكان من اى موقع اعلانات او طبعا من خلال علاقاتك والمعارف ممكن تلاقى مكان بسرعه معقوله و بسعر كويس
الاسعار بقى
بص يا سيدى كل ما تبعد عن وسط البلد كل ما السعر يكون افضل و طبعا العماير الجديده و المربعات السكنيه حديثه البناء اسعارها اعلى لانها معموله بتكنولوجيا حديثه و كده
لو لقيت اوضه و مطبخ استوديو يعنى بتبقى اوضه و مطبخ و حمام هاتعمل مش اقل من 3500 كوورنا
لو مثلا تلات اوض ومطبخ و حمام هاتعمل فى حدود 6000 كورونا حد ادنى فى الشهر دى اسعار الشركه يعنى الفيرست هاند الاسود طبعا اغلى بكتير
هنا فى السويد الصاله تسمى اوضه برضه يعنى بتتحسب اوضه من الاوض مش بيحسبوها لوحدها
عندك بقى كهربا دى مش مكلفه اوى يعنى شهريا استخدام عادى بتاع 200 كورونا فى الشهر و فيه اشتراك سنوى بيتقسم على الشهور الاشتراك 2600 كورونا تقريبا وكل سنه بيتغير
هنا مفيش غاز الا فى مناطق معينه ومش شغال كمان لانه مكلف
الميا و التدفئه ببلاش فى اى مكان الا الفيلات دى انتا بتدفع كل حاجه لنفسك بس اظن الميا برضه ببلاش
ده عن السكن عموما
الاكل والشرب بقى
بص يا سيدى
هو صعب اوصفها كتوتال لان احنا متعودين عى الخير فى الفريزر فى مصر و الكرم فى الضيافه و دايما نعمل ونشيل المهم يعنى هاديك امثله لاسعار الاكل ومنها تتخيل المصاريف قد ايه
كيس عيش اللبنانى اللى هو عامل زى ورقه السيجاره ده الابيض الخفيف كيس خمس ارغفه ارخص سعر توصلتله 7 كورونا الكيس طبعا ده ولا بيشبع ولا بتاع المهم يعنى
الخضار و الفاكهه على حسب الموسم طبعا فمش هاقدر اكتب بالظبطبس كمثال
الطماطم ارخص كيلو فى وسط الموسوم 10 كورونا و لو مش فى الموسوم بتوصل 30 عادى يعنى
البصل فى الموسوم بتاعه بيعمل من 6 الى 9 كورونا بره الموسوم بيعمل 15 مثلا
الفراوله النص كيلو ب 30 فى الموسوم لو بلدى
البطيخ الكيلو ب 12 فى الموسوم طبعا
المانجا الواحده ب 10 لو فى الموسوم بره الموسوم لو تحب اشترى بس اخرك تحطها ديكور او تتصور جنبها
الخوخ ب 40 كورونا و ربنا ما له اى طعم
الجبنه هنا اغلى من اللحمه و كلها جبنه صفرا بجميع بقى انواعها بس مش لاقى رومى بطارخ
كيلو اللحمه على حسب لو حلال من محل عربى هايعمل لو حته حمرا كده بيعمل سبعين مثلا لو مفروم بستين كورونا الكيلو
العصير اقل علبه ال 150 ملى بتعمل 20 كورونا
ازازه البيبسى الصغيره ب 20 كورونا النص لتر
ارخص ساندويتش فى البلد كلها ب 15 كورونا و مايتكالش
الفراخ الكيلو من 30 وانتا طالع
اللحوم المطبوخه اللى هى السجق و السلامى و كده بيتراوح اسعارها من اول 80 للكيلو وانتا طالع بقى بس لو انواع نضيفه وحلال
البرجر والكلام ده لو حلال من اول 60 مثلا للكيلو وانتا طالع
الجبن بقى من اول ستين و 70 و انتا طالع بقى اشى مش عارف سويسرى اشى هندى اشى بنغالى و كلام غريب كده مهم كلهم لونهم اصفر ما عالينا
الجبنه البيضا عمله نادره بس مع شويه حظ و مساعده الخبراء هاتلاقيها فى دمياطى من الدنمارك حكايه الكيلو ب 60 كورونا مع الطماطم كده دلع
كيلو الرز الكويس البلانشيه اللى هو فى مصر بنسميه البسماتى او السعودى ده الكيلو من اول 30 كورونا وانتا طالع فيه ارخص طبعا بص مش حلو
كيس الشيبسى ب 20 كورونا
المكرونه اقل كيس ب 6 كورونا
و دول يعنى اللى فاكرهم دلوقتى لو حد عاوز يعرف حاجه يقولى
يبقى كده فى الطبيعى اسره مكونه من نفرين لو بيجيبو اكل على اضيق الحدود و الاكل الاساسى بس من غير بقى صوص المهمزيز بالهالوزى و البهلبيز بالمش عارف ايه يعنى يخشلك فى 2000 كورونا فى الشهر ده لو جبت اكلك كله مره واحده وحلفت ما تشترى تانى طول الشهر ولا تشرب حتى كوبايه ميه بره البيت
يعنى نقول من 2000 الى 3000 او 3500 فى الشهر ده الرينج الطبيعى فى الاكل و برضه يرجعلك انتا تظبيط الموضوع ده
المواصلات بقى
بص يا حاج
المواصلات هنا فى المدن بتجيب كارت حلو كده من الشركه اللى بتخدم مدينتك و تشحنه بالشهر بيبقى موفر جدا و بتركب بيه كل يوم طول اليوم و مليون مره فى اليوم مفيش اى مشاكل اشتراكك شهرى و مفيش اى حدود لكن ليك زوون معينه يعنى ليك منطقه معينه تتحرك فيها لو شغلك ابعد بتشترى كارت شهرى يكون بيغطى المنطقه بتاعت شغلك و برضه هايبقى اوفر مليون مره
لسبب
التزكره هنا داخل نطاق مدينتك بتبقى ب 22 كورونا و دى مش بالمسافه دى بالوقت يعنى بتقطعها مره واحده و بتفضل معاك تسعين دقيقه تركب بيهم اى عدد مواصلات فى مده التسعين دقيقه دى ولاى مكان داخل نطاق التزكره
لو التزكره فى نطاق ابعد شويه بتبقى فى حدود 33 كورونا
ابعد ب 55 كورونا
و بعدين بقى و انتا طالع على حسب النطاق بتاعها لحد ما تبقى بقى نطاق مدينه تانيه و دى تزكره قطر بقى او طيران
و الكارت الشهرى رخيص طبعا لانه لو بتاع المدينه بيعمل تقريبا 500 كورونا فى الشهر لو قسمناهم على 22 كورونا هايعمل 25 تزكره بس تخيل بقى انتا بتركب بيه طول اليوم و كل يوم لمده شهر حتى ممكن تركب بيه العباره و المراكب لو فيه فى مدينتك مراكب بنفس الكارت
الكروت بقى من اول 500 كورونا وانتا طالع بقى على حسب احتياجاتك
شبكه المواصلات فيها دقه رهيبه و نظام لا يعلى عليه و من اقوى شبكات المواصلات فى العالم فى الدقه و الامان و النظام
التاااااكسى
ده بقى لو انتا مثلا مستغنى عن شقاك هنا يا نجم تمد ايدك تفتح الباب بس من غير حتى ما تحط رجل بتدفع البونديره و بتبقى مكتوبه على التاكسى من بره اقل بونديره هنا 270 كورونا يعنى عيش يا برنس
ده بغض النظر عن المسافه الكيلو زى عشره هى بونديره و كل ما المسافه بتزيد البونديره بتعلى.
لو معاك عربيه
قولتلى بقى انتا غاوى تتقلب شكلك
بص يا سيدى
بسم الله الرحمن الرحيم كده بتدفع فحص العربيه و اللى يقولك عليه ورشه الفحص لازم يتغير وهنا مفيش هوب انتف السلكه و مش عارف ايه وهات ظلتين وخبط و بتاع هنا شيل و هات جديد يا سيدى يا اما العربيه مش هاتعدى فحص و مفيش هنا انك تبرز بريزيتين و تعدى انتو الجوز هاتروحوا فى داهيه
المهم
بعد الفحص و المحص و ده كل سنه بتدفع لوكشه فلوس زى الفل الا لو عربيتك جديده فيه بقى الضريبه و دى بتتراوح بقى حسب موديل العربيه و نقدار انبعاثات العوادم الضاره و دى عالجتالوج يعنى مش بيقوسوا عربيتك دى بتبقى ارقام عندهم موجوده بيحاسبوك عليها كشريحه معينه
و بعدين بقى النمر و التسجيل و الحركات
و دور المفتاح واتكل على الله
نحط بقى شويه بنزين
ماشى يا معلم
البنزين هنا يا سيدى الفاضل ارخص من الديزيل
شوف ازاى
عشان الديزل وحش و بيلوث البيئه عشان كده اغلى من البنزين اللى بيلوث البيئه برضه بس اقل من الديزيل
لتر الديزيل اللى هو الغالى الوحش ده ب 15 كورونا حضرتك و كل يومين بيزيد متفهمش كل يومين على الريق كده تلاقيه زاد شويه كام اوره كده او ربع كورونا مثلا فى حسبه التانك بتجمع طبعا
البنزين بقى الحلو الرخيص بيعمل 13 كورونا اللتر ده سعر قديم كمان مش عارف دلوقتى كام بس اكيد زاد يعنى
و على فكره الاسعار بتختلف من بنزينه للتانيه عروض برضه و حركات و خدلك لتر و عليه ربع هديه و كده يعنى و جمع نقط تكسب تفويله التانك
الف مبروك بقى ربنا كرمك وحبيت تعزل زى الناس الف الف مبروك يا صاحبى
عاوزين بقى ننقل حتتين العفش
لو قليلين
ارميهم اوفرلك
ليه
هاتجيب شركه نقل
اقل شركه هاتاخد منك 400 كورونا فى الساعه و محدش هايشيل و لو جابو حد يشيل حط 200 كورونا كمان فى الساعه و على كل 10 كيلو العربيه تمشيهم بتدفع 25 كورونا كمان دى ارخص اسعار
اسعار من الاخر نحن نختلف عن الاخرون
طبعا اللى بينقلك الحاجه ده بيبقى بقى تلاجه برود متحركه انتا هاتموت عايزه ينجز فى اول ساعه او تانى ساعه عشان تبطل نزيف المصاريف و هو بقى هايوريك الزل اللى على حق عشان ياخد على الاقل ساعه زياده هنا شعار السويد ظبط الشغل اهم من الشغل نفسه
لو انتا بقى معاك رخصه
يا سلام يا فنان الموضوع كده اسهل
بص يا سيدى هاتجيب اتنين صحابك
و تأجر عربيه من البنزينه دى تكلفتها مش اقل من 900 كوورنا فى اليوم لو العربيه حجم متوسط و ينفع تتساق برخصه بى B يعنى اكبر من الميكروباص بشويه يعنى البيجو الجامبر كده
ال 900 كورونا دول يا دوب تاخد المفتاح
نيجى بقى للمساقه
على كل 10 كيلو ( هنا بيسموه ميل الميل السويدى يساوى عشره كيلو عشان لو لقيت الكلمه دى فى اى موقع يعنى مش زى الميل الامريكى و الانجليزى ) بتدفع 25 كورونا على الاقل
برضه احنا جايبين الاسعار اللى من الاخر
و ده يخلينى افكر طيب لو المسافه اللى انا دافعها خلصت قبل ما اوصل
هلى العربيه بتمشى بزمبلك و مظبوطه على المسافه دى بس وهاتقف فى الشراع مثلا ولا ايه المهم ما عالينا
لو انتا بقى معاك عربيه جميل مش عيب هاتأجر يا باشا البتاعه اللى بتركب ورا المقطوره الصغيره دى ده طبعا على اعتبار انك عندك السوكت بتاع الاشارات و الخطاف بتاع المقطوره الصغيره اللى ورا دى
دى مش غاليه دى هاتعمل بتاع 400 فى اليوم و طبعا ممنوع منعا باتا تمشى واى حاجه باظه من العربيه حتى لو علقت فيها جركن زى ما بنعمل فى مصر مستحيل دنتا تتسجن مش رخصتك تتحب بس هنا فى الامان مفيش تهريج خالص مهما كنت حتى لو وزير
يستكمل.....

قبل اى حاجه عاوز بس اشكر صديقى محمد

ribery_france_22 الراجل فضل سهران جنبى يفكرنى بالاسعار عشان اكتبها فى الموضوع و كمان هو صاحب الفكره اصلا انى اعمل مشاركه عن تكاليف الحياه بالتفصيل

فى حاجه نسيتها عن العربيه هى انك كمان عربيتك مينفعش تركنها فى اى مكان فيكى يا بلد من غير ما تدفع باركينج و اقل ساعه ب 20 كورونا و وسط البلد احسنلك متنزلش بالعربيه هناك لانهم من كتر ما اتخنقوا من السنه الجايه هايبقى كمان دخول وسط البلد بالعربيه الدخول نفسه بفلوس غير بقى الباركينج حتى عند بيتك بتأجر باركينج بالشهر سعره بيتراوح بين 200 الى 500 كورونا لو عندك فيلا ربنا يزيدك و مش بتدفع حاجه لان الارض ارضك
موضوع تانى حساس اوى برضه
الحلاقه
الحلاقه يا محترم هنا عباره عن بطيخه يا تطلع قرعه يا حمرا انتا بتعد و تدعى ربنا انك تخرج شكلك كويس و اتكل على الله بقى
الحلاقه شعر بس اقل واجب ده فى محل عربى زى محلات قرفص تحت الكوبرى هاتعمل 100 كورونا للراس شعر بس من غير دقن ولا اى حاجه تانيه و الباقى بقى لو حبيت تعمله يعنى دقن و تحابيش هايخشلك فى 300 كورونا و ممكن اكتر دى برضه اسعار المحلات العربى الرخيصه فى المحلات السويدى العاديه من اول 180 و انتا طالع بقى
التلفزيون بقى
هنا السويد فيها نظام صارم فى الحفاظ على موارد الدوله اللى هى مبنيه على موارد الضرايب لان مفيش اى موارد طبيعيه المهم واحده من النقاط دول هى التلفزيون
هنا لمجرد امتلاكك تلفزيون او اى جهاز بيستقبل اشاره تلفزيون و ده يشمل ( ريسيفر دش - كابل تى فى - اى بى تى فى - كارت تلفزيون او كارت ستالايت بتاع الكمبيوتر - مودم تلفزيون - كارت تلفزيون يو اس بى .....) و طبعا لو عندك التلفزيون نفسه يعنى مش مجرد شاشه لازم تكون تلفزيون و يكون فيه تونر للقنوات المهم يعنى لو توفر عندك اى من هذه المنتجات
بتدفع لمجرد امتلاكهم حتى لو مشغلتهمش حتى لو مسافر بتدفع 2700 كورونا فى السنه دول مش اشتراك القنوات دول فلوس ضريبه امتلاك الاجهزه دى و استقبال اشاره التلفزيون بس يعنى ملهمش دعوه بأشتراك القنوات و الكلام ده دى فلوس ضريبه رسميه و كل سنه بتحدد بس بقالها كام سنه ثابته عند السعر ده
هاتقولى منا ممكن مدفعهمش هاقولك ممكن ليه لا بس ازاى بقى
اولا
اى محل بتشترى منه اى جهاز من الاجهزه دى او غيرها و بتؤدى نفس الوظيفه و بتستقبل اشاره المحل لازم يبلغ رسميا عنك و عن اسمك و بياناتك للهيئه المسؤله عشان تبدأ تبعتلك بقى الفواتير بتاع ال 2700 كورونا مفيش محل مش هايبلغ عشان الحاجه دى بيتعمل عليها جرد من الحكومه نفسها لو فى قطعه ناقصه من غير تبليغ او فاتوره رسميه المحل بيروح فى ستين داهيه حتى لو القطعه تمنها لا يتعدى 100 كورونا
يعنى اى مره تحاول تشترى تلفزيون المحل هايبلغ عنك على طول عشان تدفع
هاتقولى منا ممكن ادفع كاش و المحل مياخدش بيانتى
هارد عليك واقولك
ممكن تشترى اى حاجه كاش هنا بدون ما المحل يعرف بيناتك لانك مش بتسخدم كارت الفيزا بتاعك الا الاجهزه اللى من النوع ده المحل لازم ياخد بياناتك و البرسونال نمبر و يسجله وانتا واقف حتى لو دفعت كاش و ده طبعا من خلال بطاقتك مفيش بطاقه ميقدرش يبعلك المنتجات دى
برضه المستعمل لو اشتريته و الهيئه دى عرفت انك مبتدفعش بتعملك قضيه كبيره و بتدفع بأثر رجعى و كمان بغرامه
بالنسبه للاتصالات
بص يا سيدى الموضوع مش معقد خالص زى دول تانيه كتير
هنا التغطيه عال العال مش محتاجه وصف طبعا و الخطوط فى تلات شركات كبيره و طالع منهم شركات اصغر يعنى تقدر تقول ريسيلير ليهم يعنى بس بمسميات و براند مختلفه المهم يعنى
التلات شركات دول لو هاتشترك بيبقى بعقد و فاتوره شهريه و اشتراك و باكج و بتختار اللى يناسبك و بعد مرور على الاقل سنه عليك فى السويد ممكن تاخد منهم عده تلفون مع تجديد العقد او تغيير خطه الدفع نظام الاشتراك يعنى و بتختار اللى يعجبك اغلب الشعب معاه اى فون فور اس كله بيحب الاى فون مش عارف ليه و سوق المستعمل مزدهر برضه
و الشركات بقى الريسيلر تقدر تشترى منهم خطوط بكارت شحن بتشحن على قد كلامك و الدقيقه سعرها حلو وفى كزا نظام طبعا بتختار اللى يعجبك وانتا بتشحن
عموما الاشتراكات دى انتا و دماغك انما الكروت يعنى من اول 50 كورونا لحد 200 تقريبا فى الشهر مش اقل من 400 كورونا للاتصالات عموما يعنى او تجيب خطزط يكون فيها نظام معين بيناسبك ويوفرلك كله بيرجعلك انتا بقى
الانترنت فى البيت
بص ارخص حاجه هاتجيبها هاتكلفك 300 كوورنا فى الشهر و سرعه بطيئه جدا بالنسبه لاوروبا بالنسبه لمصر مفيش داعى للتعليق يعنى
يعنى لو عاوز خط محترم يعتمد عليه و بتعمل داونلود كتير و كده هاتلك بقى واحد ب 400 ده كويس و سرعته معقوله يعنى اخرك 10 ميجا سرعه داونلود حقيقيه من سيرفرات بره اوروبا لو من اوربا بتبقى اسرع
ممكن تشترى باكج بقى تلفزيون و نت و تبلفون ارضى كلهم نفس الشركه اصلا
التلفزيون بقى ده موال كبير فى الاشتراكات المهم فى الاخر مش اقل من 100 كورونا فى الشهر عشان بتاع عشرين قناه بس و ملهمش اى عازه لو جبت دش ده فى حاه ان عندك بلكونه و شركه السكن موافقه انك تركب دش لان اغلب الشركات بترفض و مش بمزاجك لازم الشركه توافق ولو معندكش بلكونه انسى اصلا اى حاجه عن الدش فى حياتك ممنوع منعا باتا
لو متقدرش تركب دش ممكن تركب اى بى تى فى ده بوكس بيتوصل بالنت بس و بيشتغل اتش دى و عليه كل قنوات النايل سات و العرب سات المشفره كل حاجه مفتوحه عليه مفيش اى قناه مقفوله و شويه من الهوت بيرد للعلم هنا النايل سات لا يمكن استقباله ولو جبت طبق سبعين متر و العرب سات برضه كذلك
اشتارك الاى بى تى فى بيعمل اقل باقه 2500 فى السنه غير تمن الجهاز نفسه الجهاز لوحده ب 2000 تقريبا لو الموديل الاخرانى و فيه موديل اندرويد منه هايل اصراحه جهاز عبقرى بيعمل 3400 لوحده من غير الاشتراكات
او بقى تدفع للشركه بتاعت التى فى اللى بتغطى منطقتك وتتفرج على القنوات الغلسه بقى بتاعتهم
نيجى بقى للعفش و الموبيليا
دول امرهم مش صعب بجد يعنى هنا الشعب جميل جدا فى موضوع الساكند هاند فى المستعمل فى ناس غاوياه كأنتيكه و ناس تانيه بتحبه عشان اوفر لكن الاساس هو ان كل الناس بتحب المستعمل و كل الطبقات بتشريه بمختلف بقى الاهتمامات
فالاسعار جميله و مش غاليه يمكن قريبه من مصر و اوقات كتير ارخص و اوقات اصلا بتلاقى حاجات ببلاش بس انتا عليك النقل
وده طبعا يفسر معاناه النقل واسعاره الخياليه ( فينك يا مواقف مصر كنت تروح تقف بس فى الموقف و السواقين يتلموا عليك عشان توصيله ب 50 جنيه و تاخد عربيه نقل تنقل بيها عمارتكو كلها ايييه ايام بقى ) يعنى تلاقى واحد عارض مكتبه تلفزيون حلوه كده ببلاش عشان هو مش عارف ينقلها حتى عشان يرميها يقولك هات عربيتك و تعالى شيل
الاسعار عموما فى الموبيليا بالنسبه للمستعمل هى معتدله يعنى و فيها صفقات جامده ممكن تفرش بيت اوضتين و مطبخ فى حدود 20 او 25 الف كورونا بس حتتين عفش حلوين يعنى و ميزه محلات الثاكند هاند ان النقل عليهم و سعره معقول جدا يعنى فى حدود 400 كورونا للنقل و بيزيد حسب الكميه و المسافه لكن ده الاساس يعنى فده هايل طبعا و راحه بال بتدفع و الحاجه تتفك و تجيلك و تتركب فى شقتك
اه نسيت اقول ان التلاجه و البوتجاز و المطبخ كل محتوياته دى الشركه اللى بتسلمهولك ولو فى اى حاجه بايظه او باظت الشركه بتغيرها بجديد يعنى تلاجه و بوتجاز و المطبخ نفسه الخشب و كده
بالنسبه للعفش الجديد لو المحل سويدى الاسعار مبالغ فيها الى حد ما يعنى كنبه اقل واجب 5000 كورونا و عامله زى ما يكون بلاستيك تبقى خايف و انتا قاعد اخرها ديكور يعنى و النضيف بيبدا من 10000 كورونا
فى طبعا ايكيا ده اكبر محل على كوكب الارض فى حاجات المنزل و العفش و الفرش و كل ملتلزمات المنزل و المكتب و البيت و الفيلا و الحديقه وكده يعنى فروعه فى الدنيا كلها فى المنطقه العربيه موجود فى الامارات و الكويت اظن مش متأكد
ده اسعاره معقوله و الجوده محترمه جدا و فيه عروض من وقت للتانى و فيه تقسيط
بالنسبه للاجهزه المنزليه ده انتا بقى و زوقك يعنى كل حاجه موجوده كل اللى عليك هو انك تختار اللى يناسبك من الاجهزه و تشتريه على قد فلوسك مع العلم ان كل حاجه اغلى من مصر اى لاب توب شوفته على الاقل 800 كورونا اغلى من اسعار مصر و هكذا بقى فى كل الاجهزه بتبقى اغلى شويه عن مصر
الملابس و المتعلقات الشخصيه
بص هو بيبقى فى عروض بس اصراحه يعنى العرض اه مثلا البنطلون معفن يقرف و تمنه 800 كوورنا نزل عليه عرض بقى ب 600 يا حالولى
يعنى كده كده هاتلبس و كده كده هاتشترى فأشترى و خلاص بقى اقل جاكت يدفيك فى الشتا هنا يعمل 1500 مستريح و تلبس تحته تلاتين حاجه عشان تدفى ولو عاوز جاكت عدل من اول 3000 كورونا بقى و انتا طالع البناطيل لو عليها عرض ممكن تلاقى سعر كويس فى محلات حلوه بتعمل عروض كويسه بجد تلاقى التيشيرت البولو مثلا ب 250 كوورنا و ده سعر خيالى هنا و طبعا كله خامه درجه اولى مفيش تهريج هنا فى الكواليتى بتاع اى منتج
و تلاقى القميص فى العروض ب 200 مثلا ده اقل حاجه على فكره اللى عندنا فى مصر ميكملش 30 جنيه و لسه كمات هاتفاصل قبل ما تشترى الجزم بقى انا مش وش كلاسيك فمش عارف الكلاسيك دول تمنهم كام ولا عمرى لبستهم و الكوتيشهات بقى الفلاتات و الكلام ده و الاندور و الماركات اللى زيها بتتراوح ما بين 800 كده و انتا طالع برضه اسعار عمرك ما هاتسمع عنها فى اى حته تانيه نااااااار و اجراااااااام رسمى .
غالبا لو انتا اتخنقت قضيها اون لاين هات كل حاجتك من انجلترا فى مليون محل هناك هايل جدا فى الاسعار يعنى الجزمه هنا تعمل 800 كوورنا تلاقيها بتلاتين جنيه فى انجلترا فهات كل حاجتك من هناك افضل بكتير للفرق الرهيب فى السعر احنا كلنا بنعمل كده يا راجل دحنا بنجيب كل حاجه حتى الرفايع و المتعلقات الشخصيه حتى الغيارات من انجلترا عشان فرق السعر و الكواليتى هو هو
الحاجات الطبيه
هنا كل حاجه تقريبا متغطيه بالتأمين بتاعك و ده بيغطى كل الناس اى حد شغال او مش شغال كله ليه الحق فى العلاج حتى لو هربان تتعالج برضه بس طبعا البوكس واقف بضهره بره مستنيك تقوم بالسلامه
المهم
حاجتين اصتدمت بيهم و هما بره التأمين و مفيش اى شغل او حاجه بتأمن على دول
النظر و الاسنان
النظر يا حاج اولا متقدرش تخش المستشفى تشكف فى اى حال من الاحوال بدون ما تكون عملت كشف عند محل نظارات لان هما عندهم فنيين و اجهزه متقدمه و بيعملوا كشف كامل ليك ولو فيه مرض لا قدر الله بيقولك بقى روح المستشفى طبا الكشف ده اقل واجب و اقل سعر 400 كورونا و بعدين لو رحت المستشفى هناك ببلاش بقى يعنى المحل اخره نضاره ميقدرش يكتبلك على نوع قطره ولا دوا دول مش دكاتره دول فنيين بصريات مش اكتر لو الموضوع اكبر منه بيبعتك للمستشفى
لو الموضوع فى ايده يبقى هاتشترى نضاره و فى الحاله دى خير الله ما اجعله خير بقى
الشنابر من اول 1000 كورونا وانتا طالع بقى فى شنابر ب 50 الف يا معلم ابو الف ده حاجه معفنه فى مصر اخره 20 جنيه
العدسات بقى على حسب بقى ما الفنى يقولك انتا محتاج انهى نوع و يوريك المتوفر و كده بس يعنى مش اقل من 2000 كوورنا للعدسات بالزات لو عينك حساسه و محتاجه عدسات معينه لو عدسات استندارد و دى مش موجوده بس يعنى هاتبقى اقل شويه
يعنى لسه واحد صاحبى عامل نضاره بسيطه خالص كلفته 7000 كورونا من غير الجراب بس عليها تأمين يعنى وتمام و خد الجراب فى نهايه المطاف هديه بحمد الله
الحاجه التانيه بقى الاسنان
بص يا حاج
الاسنان هنا برضه تبع الحكومه بس ليها دايما مبنى منفصل مش عارف ليه المهم يعنى
الكشف فقط بدون اى حاجه تانيه ولا هايعملك اى حاجه خاااااالص مجرد كشف بس يشوف فيه ايه ده 800 كورونا دول زى ورقه البوسطه استندارد تروح تدفع ال 800 كورونا و تحجز بس المشكله ايه بقى الحجز يعنى ممكن يكون على الاقل اول ميعاد فاضى بعد شهرين او اكتر يعنى لو تعبان اوى استحمل بقى عشان مفيش مستعجل كده كده هاتستنى شهرين او اكتر لحد ما ميعادك يجى لو رحت عياده خاصه الموضوع اسهل بس الاسعار اغلى
الاسعار بقى
لو هاتدفع لحد 3000 كورونا بتشيل لوحدهم لو هاتدفع اكتر من 3000 الحكومه بتساعدك ب 50% من الفاتوره فوق التلات الاف يعنى لو هاتدف مثلا 5000 كورونا انتا هاتدفع التلاته و هما هايساعدو فى 50% من اللى فوق التلاته يعنى الفين انتا تدفع منهم الف و هما يدفعولك الف يبقى انتا فى الاخر دفعت اربع الاف صافى
طبعا محدش خالص بيتكلف علاجه خمس الاف كورونا دى عمرى ما شوفتها خالص
اخر مره واحد صاحبى مراته عملت حشو عصب و حاجه كمان كده دفعوا 30 الف كورونا و دى الاسعار او ده الرينج الطبيعى من اول 20 الف كورونا و انتا طالع بقى فى اى حاجه تافهه بتعملها فى سنانك فالافضل تعملها فى مكان تانى بره السويد
على فكره بالنسبه للنضاره و السنان انا متأكد من الارقام لان دى تجارب شخصيه و فعلا هنا معاناه بسبب الموضوعين دول
فى حاجه بقى لازم تعرفها هى ان البنك ممكن يقسطلك اى حاجه و لاى فتره يعنى تشترى اى حاجه قسط و تمام و كل الاجرائات فى ثوانى بتخلص مجرد بياخدو البرسونال نمبر و بيكشفوا عليه و البنك بيوافق او بيرفض فى ساعتها و غالبا بيوافق
بس فى شروط
اولا ميكونش عندك علامات فى تاريخك المصرفى و دى من اهم النقط اللى عايو يعيش فى السويد لو انتا اتعلم عليك مش هاتعرف تشترى خط تلفون حتى هاتفضل منبوز طول عمرك و متقضرش تشترى اى حاجه بأقتراض ولا البنك حتى البنك بتاعك هايسعدك فى اى حاجه و مصيبه كبيره وممكن يكون السبب عشره كورونا مش اكتر و بسببهم اتعلم على ملفك فى البلد حتى الجنسيه هايخنقوا عليك فيها لو عندك علامات و دخلت بلاك ليست
العلامات دى عباره عن فلوس انتا اقترضتها بشكل او بأخر ززى مثلا اشتريت اون لاين و استلمت و الدفع بعدين و هكذا و مدفعتش بقى الفاتوره دى بيفضلوا وراك شركه مسؤله للتحصيل بتتابعك لو خلاص مش عارفين ياخدو منك الفلوس بيعلموا بقى عليك وخلاص و بكده انسى حياتك فى السويد تماما و ممكن تتسجن كمان بس ده بياخد وقت يعنى لحد ما يتعلم عليك ممكن تصلح الموقف قبل العلامه بس بعدها خلاص انسى
الشرط التانى عشان تشترى قسط هو مرور اكتر من سنتين عليك عايش فى السويد و مقيد و تكون شغال و مرتب ثابت او ليك معونات ثابته لفتره لا تقل عن سنه على الاقل دول اغلب الاماكن بتطلب كده بس فى بنوك جديده صغيره كتير مش بتطلب موضوع يكون سنتين و مرتب و كده بس للحاجات الاليكترونيه و بيبقى تعاملهم مع محل يعنى انتا بتشترى من محل معين اون لاين مثلا و البنك ده بيحصل منك و فوايد بسيطه جدا جدا جدا و بتدفع بعد شهرين من الاستلام لو دفعت فى خلال اول شهرين بتدفع من غير فوايد خالص مجرد رسوم 29 كورونا مش اكتر
و اخر طريقه هى الماستر كارد بس ده بقى بيرجع لحجم مرتبك و العائد السنوى بتاعك و البنك اللى انتا بتتعامل معاه و عروضه و كده و الماستر زى فى مصر بتشترى بيه اى حاجه و بتدفع بعد 60 يوم من غير فايده و اى حاجه تشتريها بيه بيبقى عليها سنه تأمين و ضمان زياده عن الفتره بتاعت المحل نفسه و عروض تانيه كتير على حسب بنكك ايه
متفرقات بقى فى الشارع
كوبايه القهوه اقل حاجه ب 20 كورونا
الدونات او الكورواسون اقل واجب 15 كورونا للواحده
الموزايه او التفاحه الواحده ب 10 كورونا على الاقل لو موسوم
ارخص علبه لبان هنا ب 20 كورونا
علبه السجاير بيتراوح سعرها من 40 كورونا لحد بقى 60 كورونا ده فى السجاير الطبيعيه زى اللى فى مصر ماركات متشابها و ماركات زياده عشان كم الاجنب المهول يعنى اللى ب 40 دى اسمها بالم ميل حاجه كده و اللى ب 60 دى المارلبورو
السيجار بقى والكلام ده معرفش سعرهم كام
اه معلومه السجاير هنا ممنوع تداولها بأى شكل من الاشكال منعا باتا الا او فى تصريح رسمى يعنى مش سهل خالص انك حتى تتاجر فيهم او تعمل ناصح وتجيب معسل و انتا جاى عشان تبيعه منتجات التبغ هنا مفهاش تهريج قوانين صارمه و غاليه بطريقه بشعه يمكن من اغلى دول العالم
وده يفسر ليه ان السويد اقل نسبه سرطان رئه فى الرجال فى اوروبا و قريت انها كمان فى العالم كله بس مش متأكد لكن متأكد من اوروبا ده تقرير رسمى
ازازه المياه المعدنيه او الميا يعنى ب 20 كورونا لو ضربت بيتزايه مش هاتعمل اقل من 70 كورونا طبعا وسط البلد عموما كل حاجه غاليه هنا مفيش سعر ثابت حتى السجاير الشركه بتكتب عليها اقى سعر ممكن توصله او يعنى اقصى رقم المحل يقدر يبيع بيه لكن ممكن تاخده اقل من الرقم ده فى مكان ميكونش فى وسط البلد
ما عالينا يعنى
لو رحت الملاهى هنا جميله جدا لو اسره صغيره تلات افراد مش اقل من 2000 كورونا هاتتصرف فى اليوم ده
كل الارقام اللى كاتبها انا و محمد اتأكدنا منها و اصلا كلهم من تجارب شخصيه لينا و خبره من الفتره اللى قضيناها هنا طبعا مع اختلاف المدينه بتختلف الاسعار بس احنا كاتبين الاسعار اللى فى يوتيبورى يعنى مدينه كبيره فالاسعار ممكن تكون اعلى شويه لكن على العموم دى فكره عامه تقدر تفهم نظام الحياه ايه هنا
السويد مش جنه
نسبه الانتحار اللى المتخلفين بيقولك بسبب ارتفاع مستوى المعيشه ده كلام هراء و كلام فارغ
نسبه الانتحار اللى بيتكلموا عليها دى بسبب الاكتئاب بلد مفهاش صيف و الشمس بتيجى زياره و الليل فى الشتا طويل جدا يعنى المغرب فى الشتا بيدن تلاته و نص و نا كمان فى مدينه جنوبيه يعنى يعتبر توقيتى مناسب لباقى العالم تخيل انتا لو فى الشمال مش هاتشوف نور لمده ست شهور فلو فيه انتحار ده بسبب الاكتئاب مش بسبب ارتفاع مستوى المعيشه
هنا فى شحاتين برضه و فيه ناس بتنام فى الشارع و فيه سكارى و فيه اللى بيلم كانزات البيبسى والبيره من الزباله و يروح يبدلهم فى المحلات بفلوس او بحاجه ياكلها او بخمره يطفحها
فى ناس هنا مديونه وفى ناس برضه بتسرق يعنى معاه و مبيدفعش و بياخد من خير البلد و بيستنزف مواردها و بيجيب اجهزه و مبوايلات ويرمى !!!! ابسط مثال الساكن اللى كان قبلى فى الشقه اللى انا فيها عليها 29 الف كورونا و جوابات البنوك و الدائنين بتجيلى على العنوان و سابت البلد وهربت و عليها ايجارات بالهبل و حتى لما رحت اعمل اشتراك الكهربا لقيت عليها فلوس فى الكهربا برضه 4000 كورونا مدفعتهمش و و اسأل العمال يقولوى لا دول كان عندهم عفش جديد و بتاع يعنى حراميه و بيسرقوا حاجه مش حقهم و هما ماشيين خربوا البيت حتى الارضيات خرموها و حرقوها.
فى ناس من النوع الحقير ده كتير و ده السبب فى ارتفاع اسهم التيارات و الاحزاب المتطرفه و ان الاوربين بقوا يلجؤا للاحزاب دى لانها الملاز من التتار دول فى سبيل انهم يخلصوهم منهم او على الاقل يسطروا عليهم عاملين زى يأجوج و مأجوج يعنى و فى الاخر يقولك بيعاملونا وحش لا منبى وانتا بتعامل البلد بما يرضى الله
منتا متبقاش جاى بلد ناس و هما مستواهم محترم و تفضل تخرب فى البلد و عايزهم يحبوك كفايه انك خسرتهم مزايا كتير بسبب تصرفاتك منها سهوله الاقتراض و الفوايد و الضريبه
يا راجل حتى التأمين على الاجهزه بقى فيهتلاعب بياخدوا الحاجه يعملوا بيها عزومه و يفرجوا الاقارب على المشترايات و بيوظوها و يرجعهوا يقولك مش شغاله او بعد ما يخلص العزومه يروح يرميها فى المحل يقوله مش عاجبانى و ميدفعش
عموما الناس اللى من النوع ده هو السبب الرئيسى للمشاكل كلها اللى بتواجه اى حد بيتقدم فى سفاره و اى حد بيحاول يجى يعيش حياه كويسه و يدور على لقمه عيش و فى الاخر ععامل الناس زى ما تحب ان تعامل عشان ربنا يفتحها عليك و يكرمك
و التوفيق يا رب لكل واحد نفسه يعمل حاجه كويسه لمستقبله فى السويد او فى اى مكان و لو فى معلومات تانيه تحب تعرفها يا ريت تبقى هنا على العام بلاش الخاص عشان الكل يستفيد لو حاجه شخصيه تحت امرك على الخاص

وبالتوفيق للجميع بأذن الله

موضوع رائع ومتابعين معاك ياباشا

تسجيل متابعه

والله موضوع اكثر من رائع ^__^انا متابعــة معاك و عايزة اعرف عنها كل حاجة كل حاجة
لآن انا فاضلى كام شهر و اجى السويد فا انت بجد خلتنى مشتاقة اجى انهارضة قبل بكرة ^__^

الشكر لله من قبل و من بعد و للاستاذ KING و السيد ribery_france_22 رفيق الكفاح هنا فى السويد

متشكر لكل الردود و ان شاء الله هاحاول اشرح كل التفاصيل بأذن الله تباعا ,ويمكنكم الاطلاع على المشاركات الجديده التى تم اضافتها بالاعلى

السلام عليكم ...بصراحة موضوع ممتاز جدا و يعتبر انك لميت جانب كبير من الحياة فى السويد و بالارقام فا دى حاجة ممتازة جداا لاى حد مقبل على السفر للسويد و شكرا لمجهودك الكبير فى كتابة الموضوع و مشاركة بقية الاعضاء بخبراتك و تجاربك الشخصية!
بس بعد اذنك انا عندى كذا استفسار....ما هو الحد الادنى للمرتبات ؟ طبعا الشعب السويدى معروف عالميا بمستوى المعيشة المرتفع و الحياة المرفهة بس بعد ما قرأت الموضوع دة حسيت ان كل دة كلام و الناس بتعانى جامد من غلاء الاسعار انا بصراحة اتصدمت!! فهل دة صحيح؟؟

شكرا علي المعلومات المفيده والمفزعه في نفس الوقت هو بعد كل الاسعار اللي الواحد قراها دي الواحد لازم يكون بيعمل 30الف ودول ولا حاجه برضه ههههههههه
وشرط انه ميكونش نظره ضعيف(انا -7 يعني تقريبا اعمي:) ولا سنانه
توجعه وده مستحيل :)
دلوقتي انا بفكر بجد اني اجي السويد ومعنديش مشكله ان شاء الله اني اتعلم سويدي
والانجليزي بتاعي تمام
انا في بكالريوس هندسه مدني السنه دي ادعيلي اخلص علي خير
دلوقتي انا ازاي ممكن اجي السويد بعد ما اتعلم اللغه طبعا
هل ممكن ادرس مثلا كورس mpa او لغه
وهل لازم اعمل معادله للشهاده عشان اشتغل
وهل هعرف اشتغل اصلا كعربي مسلم كاجنبي عامة (اكيد الشركات مش هيجرو ورايا عشان اشتغل عندهم)
يعني من الاخر كده اعمل ايه عشان اشتغل مهندس في السويد باقامه؟؟؟؟؟؟؟؟؟؟؟ :)
معلش انا عارف ان السؤال غلس شويتين
بس مستني رد حضرتك بجد
Tack pa forhand

بسم الله ماشاء الله
معلومات رائعة ومجهود اروع
كويس موضوع الاسعار ده علشان مفكرش فى السويد

بالتوفيق يابرنس ان شاء الله فى حياتك
وجزاك الله خيرا على الموضوع

موضوع رائع جداً ومفيد لاقصى درجة ويشمل كل شىء
والاروع انه خلاصة تجارب شخصية من وقت قريب
ورغم انى عايش فى السويد من فترة كبيرة الا انى استفدت من الموضوع
حقيقة وبدون مبالغة اللى يقرأ الموضوع كويس ويفهمه هيوفر على نفسه شهور بل سنين علشان يفهم الحياة هناك
اى مغترب جديد فى السويد محتاج فترة كبيرة لحد ما يفهم الحياة ماشية ازاى
وموضوعك اختصر كل الوقت ده..
وانصح اى شخص بيفكر فى السفر للسويد انه يقرأ موضوعك كويس وياخده بعين الاعتبار
أشكرك على الموضوع وأتمنى لك التوفيق والنجاح بأذن الله

متشكر يا استاذ كينج وبرضه ارجع و اقولك ميجيش اى حاجه فى اللى حضرتك ساعدت بيه الاعضاء طول السنين اللى فاتت دى كلها مش عن السويد بس

عندى فكره بقى طالما كل واحد هايسأل عن حاجه محدده فى دماغه انا هارد عليه بالشرح و التفصيل عن الحاجه دى و بكده يبقى هانغطى مجالات اكتر بكتير جدا من مجرد انى اكتب من دماغى اكيد هانسى و اتلغبط و متشكر لكل الردود و الاهتمام بالمتابعه

المشاركة الأصلية كتبت بواسطة diaa4free

بسم الله ماشاء الله
معلومات رائعة ومجهود اروع
كويس موضوع الاسعار ده علشان مفكرش فى السويد

بالتوفيق يابرنس ان شاء الله فى حياتك
وجزاك الله خيرا على الموضوع

تعالى انت بس يا ضياء وملكش دعوة بالاسعار,
الغالى يرخصلك :)

الاول هاضيف رد جديد عشان نوضح بعض الحاجات التانيه لما بتيجى بقى السويد و خلاص هاتقول يا هادى طبعا بعد ما تطلع البرشون نومر من السكات وده مصلحه الضرايب هنا و بعدين تعمل البطاقه بتاعتك وتخلص ورق الميجراخون مصلحه الهجره يعنى بتبقى جاهز بقى للتفاعل مع المجتمع
طبعا اول حاجه اللغه قبل اللغله بس هاضيف نقطه و هى معادله الشهاده بتاعتك : دى سهله لو شهاده جامعه بتبعتها ل Hogskoleverket وده وزاره التعليم العالى يعنى الجامعى ولو شهاده ثانويه عامه تبعتها ل -verket for hogskoleservice ودى مختصه بكل الشهادات ما قبل التعليم العالى يعنى الاندر جراتويد و الثانويه و اى بروجرام تانى ميكونش ليه بكالريوس على الاقل بترجم الشهادات انجلش و تبعتها و الرد بيجى فى خلال تلات شهور بالمعادله للاستندارد السويدى بالنسبه للثانوى لازم تكون مقيم فى البلد لكن بالنسبه لشهاده الجامعه مش مهم حتى لو بعتها من بلدك للسويد مفيش مشكله كله مجانا دوس على كل كلمه عشان تشوف الموقع الرسمى
اللغه بقى
بتروح تقدم فى الكومفيكس و ده مصلحه تعليم الكبار و بتشمل اى حد بلغ عشرين سنه تحت العشرين ليهم اجرائات تانيه بيروحوا المدرسه و كده ولما بتروح الكومفكس بتقدم على كورس الاسفى SFI و ده ترجمه حرفيه للسويديه للاجانب و بتخش الكورس ده
الكورس ده مكون من اكتر من مرحله اول حاجه ليفل بدائى و هو السى C وده على حسب الكورس بياخد من تلات شهور الى سنه او اكتر انتا بقى و دماغك و بعدين ليفل D و ده برضه نفس الفتره من تلات شهور لحد سنين و بعدين بعد ما بتخلص دول بتبقى خلصت الكورس لو خلصت الاتنين ليفل دول و خدت الشهاده فى خلال 12 شهر و اقصى حاجه تكون داخل البلد من 15 شهر من ضمنهم ال 12 شهر بتوع الكورس بتاخد فلوس مكافئه بتساوى 12 الف كورونا دول معفى من الضرايب و ملهومش دعوه خالص بأى حاجه تانيه حتى لو بتاخد مساعدات برضه بتاخد الفلوس دى بس ليهم شروط معينه غير الوقت و هى مثلا ميكونش الفيزا بتاعتك فيزا عمل و و ليها ظروف تانيه بس بتتغير اصراحه و اللى بيقرر هو الكوميون اذا كنت هاتاخد الفلوس دى ولا لا
بعد ما بتخلص الكورس ده محدش برضه هايشغلك لازم تاخد كورس تانى متقدم بقى اسمه SAS A+B الكورس ده ترجمته السويديه كلغه ثانيه ليفل اول وتانى دول مستوى الجامعه بقى متقدرش تدرس اى حاجه على المستوى الجامعى او حتى الثانوى بدون الكورس ده و ده برضه فترته بترجعلك انتا الا طبعا لو كورس الجامعه انجلش ده بتحتاج بقى تويفل او ثانويه يكون الانجلش فيها درجته عاليه
فى بقى كزا نوع من كورسات السويدى

واحد سريع جدا اسمه هوج سكول سبورت (للاسف المنتدى مش بيقبل الحروف السويدى مش عارف اكتب الكلمه) ده كورس باكج مع بعضه بتاخد ال SFI و SAS A+B مع بعضهم فى فتره قياسيه بتخلص الاول ست شهور لو جبت درجه كويسه فى النتيجه بتخش على طول الصاص بياخد منك ست شهور كمان او اقل انتا وشطارتك وده انجاز فى ناس عشره و 15 سنه مخلصوش الكورس ده و ده طبعا بسبب انهم عايشين على المساعدات فمش عاوزين يخلصوا عشان مكتب العمل يقولهم يلا دوروا على شغل
( الكورس ده مش فى كل حته فى السويد كانت جامعه واحده اللى بتعمله اسمها فولك يونفيرستيت و دلوقتى فى شركتين دخلوا معاها لكن برضه لسه مش منتشر لانه من اختراع الجامعه دى و بتبيعه للكوميون يعنى الكوميون بيدفعلهم على كل طالب مبلغ معين )
لو مجبتش درجه كويسه فى الكورس الاول بتخش صاص بس جروند يعنى اساسى تانى و ده بياخد فتره زياده بيخش فى سنه او اقل على حسب شغلك برضه
و النوع التانى هو SFI Intensiv 1 وده برضه كل يوم مكثف و يعتبر كورس كامل يعنى دوام كامل و فترته مشابهه للاول بس على حسب تقدمك برضه
و بعدين بقى الكورس العادى بتاع اصحابنا الحلوين وده بياخد معاهم سنين ما شاء الله بيحبوا العشره هما بقى
فى خلال الكورس ده ليك الحق فى طلب انك تنزل براكتيك تدريب يعنى و ده بيساعد على تنميه مهاراتك اللغويه و بيفرق التدريب على حسب تخصصك و طبعا على حسب الكوميون لان لو الكوميون غنى بيبقى هو اللى بيتحايل عليك تنزل تدريب و تاخد فلوس لكن لو كوميون فقير كحال كل المدن الكبيره منبى لو اتنطط مش هايدوك حاجه هايقولك دور انتا و ابقى قابلنى لو حد قالك تعالى الا لو عاوز يستغلك و بالطبع مش هايكون سويدى هايكون من اصحابنا الحلوين و طبعا مش هاتتكلم سويدى لانه مريض بطبعه و عاوز يستغلك فمش هايعلمك اصلا حاجه !! ربنا يحميك منهم و يبعدهم عن طريقك
بعد ما بتخلص الكورس ده بتشوف بقى الخطوه الجديده ايه
عندك اختيارات كتير اوى تختار منها منهم انك تتعلم حرفه معينه او تخش تدرس ماستر لو معاك بكالريوس من بره السويد او تشوف شغل لو انتا جاهز ( وده غالبا مش هايبقى هو الحال للاسف لازم تخش النظام بتاعهم الاول)
لو فكرت فى تعليم
عندك بقى الجامعى و فى حاجه جميله اوى اوى و اسمها YRKESUTBILDNING دى بلا منازع الانضف على مستوى العالم من وجهه نظرى اصراحه و ده لانها موجهه بالتحديد لتأهيلك لسوق العمل مش دراسه اكاديميه و فيها كل المجالات حتى الغطس و الطيران المدنى و الهليكوبتر و كله لدرجه فيها برضه لو حبيت تبقى مدرب كوره يعنى جميله جده دوس على الكلمه و شوف كميه الكورسات المتاحه فى كل مجالات الدنيا تتخيلها و كورسات مكثفه فى المجال بتاعها بس مفيش اى دراسه بعيده عنها و كمان الاحلى من كده انك اجباريا الكورس بيبقى على سنه او اتنين و لازم على الاقل نصهم يكون فى مكان العمل نفسه يعنى جوه المصنع نفسه او فى المكان نفسه اللى بيقدم الكورس و المدرسين كمان بيكونوا اصلا شغالين الشغلانه دى فى المصانع و الشركات و بيوريك عمليا كل حاجه تتخيلها و تعملها بنفسك جوه مكان العمل الحقيقى مش نظرى خالص
ده غير الشركات المشتركه فى التعليم ده هى اكبر شركات فى العالم فى المجالات دى يعنى فولفو- اريكسون - تيليا و غيرهم كتير كتير جدا اكبر اسماء فى العالم
الكورس ده فى الاغلب مجانا و بيبقى فيه ضواط اختيار للطلبه صعبه شويه لكن لو انتا عندك خلفيه عن المجال كويسه هايختاروك و طبعا يكون مخلص صاص اللى قولنا عليه بتاع اللغه و بعض الكورسات بتطل منك كمان رياضه وانجلش و كيميا و فيزيا على حسب المجال يعنى
للعلم كورس الطيران ده مش مجانا ده بفلوس بيتكلم حوالى مليون كورونا فى الكورس و مش بتشتغل بيه اول ما تخلص الا على طيارات مش كوميرشيال بتشتغل على طيارات صغيره و سياحه لازم تأجر طيار و طياره عشان تعمل ساعات طيران بقى عشان تعرف تلاقى وظيفه كويسه و انتا وحظك ممكن شركه تقولك تعالى و تبقى كوبايلوت فتره و كده مفهمش فى التفاصيل بس هما كاتبين كده عموما اقروا بنفسكوا و اعرفوا كل حاجه فى الموقع
بالنسبه للفلوس ممكن الحكومه تدفعهالك و كمان بتبعتك تتعلم فى امريكا و بيصرفوا عليك لحد ما تخلص و بترجع الفلوس تانى بالتقسيط المريح على سنين طويله من مرتبك لما تشتغل
و نوع التعليم بقى الجامعى و ده مش محتاج شرح كلنا عارفين نظامه ايه
و البقيه تأتى ان شاء الله

المشاركة الأصلية كتبت بواسطة karim monir

السلام عليكم ...بصراحة موضوع ممتاز جدا و يعتبر انك لميت جانب كبير من الحياة فى السويد و بالارقام فا دى حاجة ممتازة جداا لاى حد مقبل على السفر للسويد و شكرا لمجهودك الكبير فى كتابة الموضوع و مشاركة بقية الاعضاء بخبراتك و تجاربك الشخصية!
بس بعد اذنك انا عندى كذا استفسار....ما هو الحد الادنى للمرتبات ؟ طبعا الشعب السويدى معروف عالميا بمستوى المعيشة المرتفع و الحياة المرفهة بس بعد ما قرأت الموضوع دة حسيت ان كل دة كلام و الناس بتعانى جامد من غلاء الاسعار انا بصراحة اتصدمت!! فهل دة صحيح؟؟

الشكر لله يا باشا الحد الادنى للمرتبات دى كلمه بتاعت جرايد والناس بتوع السياسه مش بتاعت ناس عاوزه تاكل عيش دى بتاعت افلام مش اكتر يعنى المفروض انه 12000 كورونا بعد خصم الضريبه ولو ده مرتبك ليك الحق فى مساعدات من الدوله بس فى اعتبارات كتير يتغير الارقام دى
مفيش حد ادنى لان فيه طرق كتيره للدخل مختلفه عن المرتب بس فمحدش يقدر يديك رقم لان كل واحد ظروفه مختلفه عن التانى لكن المهم انك مش هاتبقى جعان ولا قاعد فى الشارع حتى لو مش شغال و عندك ظروف قاسيه
بالنسبه لمستوى الحياه المرتفع دى حقيقه ملموسه هنا فى كل حاجه انا لسه متكلمتش على مميزات البلد خليك متابع و انتا تشوف بنفسك وهاحاول اجيب صور على قد ما اقدر
المعاناه سببها الازمه العالميه مش اكتر لكن بغض النظر عن الازمه الاقتصاد السويدى قوى جدا و فلت بطريقه ناجحه جدا جدا من الازمه العالميه لم ينهار و مفيش ديون ولا حاجه ده امريكا مديونه و السويد لا