عنوان الرابط المتبادل
حول الروابط المتبادلة
السلام عليكم ورحمة الله
ياخوننا انا كنت واقف امبارح مع واحد صاحبى محامى وكننا بنتكلم عن دفعة المساعدين وكده وقلتله ماتروح تقدم فيها يمكن ربنا يكرمك فالكلام جاب بعضه وبصراحة انا اتعقدت وقلتله ماتروحش يابنى احسن لك
واللى اتقال والكلام ليه طبعا ان عشان يتاخد فى النيابه لازم لازم لازم يكون له فى كل مكان من الاماكن اللى هايتسال عليه فيها واسطه وواسطه جامده يعنى لازم يكون ليك قريب ظابط يخلصلك التحريات الجنائيه وكمان واحد فى امن الدوله عشان تحرياتهم بتاعت الامن القومى وكمان واحد فى المخابرات ولازم يكونوا قرايبك عشان فعلا هايتعبوا عشان يعملوا عنك تقارير كويسه اما اللى خلانى اقوله سيبك منها طريقة الاختيار النهائيه لما قاللى فى الاخر خالص لما سالوا القاضى رئيس اللجنه اللى بتصفى الناس دى كلها وتختار منهم انت بتاخد الناس وكلاء النيابه على اى اساس فرد وقال بافتح الدوسيه بتاعه واشوف عيلته وقرايبه ومراكزهم واشوف امواله واملاكه اد ايه كانه جاى يتقدم لبنتى لو كويس وفى المستوى هاقبله وان ماعجبنيش برفضه
طب بالله عليكم ابن الناس المحترمين بس متوسطين يروح فين واللى احنا كلنا تقريبا منهم والمتوسطين دول اللى عنهم عربيتهم المعقوله وحتة ارض على شقه وشكرا وان نقص حاجه من دول مافيش مشكله يبقى قولولى الناس اللى حاططه امل دى وبتزاكر تروح فين وتعبهم يروح فين وعلمهم اللى اتعلموه يروح فين دانا الدم ضرب فى نافوخى لما عرفت انهم مره رفضوا اول كلسة حقوق عين شمس واخدوا اللى بعده عشان قال ايه مش مستوى ماياما اولاد بشوات حراميه وشمامين واللى ماعندوش اخلاق واللى مستهتر واللى مايعتمدش عليه وياما اولاد ناس على ادهم بس فعلا ولاد ناس اهاليهم قبل مايعلموهم ربوهم والاواحد فيهم يشيل جبل ولا يشتكيش وعاقل وعمره ماصرف قرش فى سجاير او خمره او فى الهلس لان فلوس اهله حلال وربنا هاديه ومقدر كل قرش بيتصرف عليه وقصاد كل جنيه ابوه بيدفعهوله كان بيسهر يذاكر قصاده ليله كامله هى دى النيابه بقى والقضاء اللى مثال العدل بين الناس التفرقه على اساس الطالب مالوش ذنب فيه يبقى عدل فى حد فى الدنيا دلوقتى بيشغل حد عشان ابوه فلان وجده علان يعنى ايه مش فاهم هو اللى هايشتغل ولا همه هايقوموا من قبرهم يشتغلوا ويساعدوه ولا لما وكيل النيابه يقول انا كان ابويا فلان ولا جدى علان العداله هاتتحقق لوحدها والمجرمين هايخافوا
والله الواحد ماعارف يقول ايه
بس انا عن نفسى مش محتاج ولا مستنى النيابه تقولى ان كنت ابن ناس ولا لآ لان انا عارف نفسى انا ابن ناس ةان كان على التربيه والتعليم فانا ابن ناس وقوى كمان وان كانت النيابه مش هتاخدنى عشان علمى وشخصيتى وسيرتى اناقبل كل شىء يبقى ماتلزمنيش ولو جاتلى على طبق من دهب
