الموضوع: موضوع هام جداً:اسئلة الانترفيو لفودافون خدمة العملاء, كله حيخرج من الموضوع شغال هناك

السلام عليكم و رحمه الله و بركاته

ازيكم يا شباب .. الموضوع ده عشان ربنا يوفقكوا زى ما وفقنى و اتقبلت فى فودافون و قلت لازم مابخلش بأي معلومه و احنا كمان فى ظروف صعبه فلازم كله يحضر نفسه قيل ما يروح اي حته عاوز يشتغل فيها
و ان مش حطول عليكوا ...
زى ما العنوان بيقول انا حقول على معظم الاسئله اللى فى انترفيو شركه فودافون للعمل فى خدمه العملاء و اجابتها ازاي

ملحوظه اتدرب قبل ما تروح على كل الاسئله و الاجابات بالانجليزي

البس كاجوال فى الانترفيو فى فودافون (قميص و بلوفر على جينس ساده)

1- عرف نفسك ؟ can you introduce your self
الاجابه تكون بالترتيب : الاسم-وظيفة الاب-محل السكن-خريج من اى كليه و من اى جامعه و التخصص و التقدير - لو واخد كورسات قلها كلها ايه هي و فين - لو اتدربت قبل كدة فى اي مكان و فى قسم ايه - لو اشتغلت قبل كده فين و فى قسم ايه ؟

2-ماذا تعرف عن خدمة العملاء - what're you know about customer service ?
الاجابه : خدمه العملاء دي عمل لخدمة احتياجات العملاء عن طريق السماع لهم لمعرفة متطلباتهم و مساعده العملاء على فهم عمل المنظمه و سياستها (organization's system) و الشرح لهم كيفيه عمل المنظمه حتى لا يكونوا مرتبكين او غير صبورين

3-لماذا فودافون ؟ او ليه عاوز تشتغل هنا ؟ why vodafone ?
الاجابه : فودافون شركه عالميه (multinational) - ازود خبراتي و احسن مهاراتي-فودافون حتخلينى اتعلم ازاي اتعامل مع انواع مختلفه من الناس

4-عاوز تبقى ايه بعد 3 سنين ؟
الاجابه : teamleader

5-عاوز تبقى ايه بعد 5 سنين ؟
الاجابه: supervisor

6-لو قابلت عميل غاضب حتعمل ايه ؟
الاجابه : الاول حهديه (حخليه هادي يعنى) - و بعدين اعرف ايه هي المشكله الرئيسيه - و فى الاخر احل المشكله بقدر الامكان

7-لو صديق لك فى العمل طلع معلومه غلط للعميل حتعمل ايه ؟
الاجابه : الاول اصحح المعلومه له - لو كررها اقول للـ team manager ---( ليه بقى ؟ ) عشان ممكن يكون هو جاهل بالمعلومه فى الاول و محتاج يتدرب اكتر على فهم المنتج و دى حاجه طبعا ليها علاقه بسمعه الشركه

8- ما هى المؤهلات اللى نختارك عشانها تشتغل فى فودافون او ليه نختارك انت او ايه هى مؤهلاتك اللى انت شايفها انك من حقك تشتغل هنا ؟
الاجابه: مرن-مساعد بشكل كبير للناس-صبور-مستمع جيد

9-ما هو اكتر موقف حرج تعرضت له ؟
الاجابه : دي بقى انت اللى تحددها و تكون ليها علاقه بخدمه العملاء ... زى مثلاً كنت بتشترى حاجه (يبقى انت كده عميل) او انت اللى بتبيع - او حتى فى مطعم كنت بتاكل فحصل مشكله .... كدة يعنى

10-ما هي نقطه ضعفك ؟

11-ما هى نقطة قوتك ؟
الاجابه: ممكن تقول نفس مؤهلاتك للعمل : مرن - صبور .... الخ

12-ازاى تحسن نفسك ؟
الاجابه : اخد كورسات ادعم نفسي فى مجال خدمه العملاء

محدش ينسي يدعيلى :)

جزاكم الله خيرا

المشاركة الأصلية كتبت بواسطة safety82

جزاكم الله خيرا

و جزاكم .. اهم حاجه الشباب يستفيد و شكرا لردك :)

هو ليه اتنقل الموضوع للسيرة الذاتيه ؟؟؟ ده موضوع وظيفه لفودافون ؟

شكرااااااااااااااا بس عاوزين نعرف انت نزلت 888 يعنى وتبع شركة ايه ايكو ولا وصله ولا اسناد وقدمت ازاى ياريت تفاصيل اكتر وربنا يوفقك وجزاك الله كل خير

المشاركة الأصلية كتبت بواسطة mido_2006_egypt

شكرااااااااااااااا بس عاوزين نعرف انت نزلت 888 يعنى وتبع شركة ايه ايكو ولا وصله ولا اسناد وقدمت ازاى ياريت تفاصيل اكتر وربنا يوفقك وجزاك الله كل خير

العفو يا باشا و انا نزلت 888 ايوا و طريقة التقديم عن طريق وصله بتروح تقدم الاول السي في فى الفرع اللى فى برج التطبيقيين و بعدين بيكلمك حد بعديها و يعمل انترفيو فى التليفون بالانجليزى و هما سؤالين عرف نفسك و تعرف ايه عن خدمة العملاء و بعدين بيقوللك تعالى فرع وصله فى مدينه نصر الحي العاشر بتروح هناك تعمل انترفيو تاني و يديك ميعاد للانترفيو النهائى فى فرع فودافون المعادي و هناك بيبقى اسهل من انترفيو وصله و لو اتقبلت بتنزل تدريب فى فودافون و بعد كده بتشغل عادي و ربنا يكرم ان شاء الله.

بس هو ميين قال انك تلبس كاجوال يعني استحاله طبعا انت لازم تكون لابس فورمال وتكون كل حاجه مظبوطه
وبعدين في نقطه تانيه مفيش حاجه اسمها team manager
اللى بتقول انك هتروح تقولوا

موضوعك رائع جدا.....لكن انا بعد اذنك عندى سؤال انا لسه طلب فى الجامعة والنجلش بتاعتى تماااااام الحمد لله والكمبيوتر كمان فهل ينفع اقدم ولا ايه ؟؟؟

المشاركة الأصلية كتبت بواسطة laughing_mohame

بس هو ميين قال انك تلبس كاجوال يعني استحاله طبعا انت لازم تكون لابس فورمال وتكون كل حاجه مظبوطه
وبعدين في نقطه تانيه مفيش حاجه اسمها team manager
اللى بتقول انك هتروح تقولوا

حرد على سؤالك الاول (هو مين قالك تلبس كاجوال) ؟ انا محدش قاللى حاجه عشان انا اللى رحت لابس كاجوال و كل اللى هناك معايا ساعة الانترفيو لابسين كاجوال بس زى ما قلت كاجوال نضيف (قميص على بلوفر على جينس ساده) و اصلا اللى بيشتغلوا فى فودافون خدمة عملاء بيلبسوا كاجوال


السؤال التانى (مفيش حاجه اسمها team leader ) ؟؟ انت بقى ميين اللى قالك مفيش حاجه اسمها team leader ؟؟؟؟؟؟؟

المشاركة الأصلية كتبت بواسطة giims

موضوعك رائع جدا.....لكن انا بعد اذنك عندى سؤال انا لسه طلب فى الجامعة والنجلش بتاعتى تماااااام الحمد لله والكمبيوتر كمان فهل ينفع اقدم ولا ايه ؟؟؟

اسأل هناك فى برج فودافون زهراء المعادي لو عاوزين طلبه ... انا كل اللى اشتغلوا معايا متخرجين

التعليق اللى انا حكتبه ده للعلم فقط لا اكثر ... الموضوع ده اسمه اسئله الانترفيو يعنى ملهوش علاقه بحد و انا قلت الاسئله اللى اتسئلتها واللى عاوز يستفيد اهلاً و سهلاً واللى مش عاوز ميخشش اصلاً على الموضوع ... عشان بجد فى ناس اسمها عدوة النجاح زى بنهاوي ده داخل يرزع كلام هو اصلا مش فاهم بيقول ايه ؟

الشغل فى فودا و اتصالات و موبينيل .. دلوقتى مش بيعينوا حد staff بس بيعينوا عن طريق الـ contact center زى وصله و ايكو و اتصال .. بتبقى شغال مثلاً فى فودا اسمك Out source يعنى جي من برة .. بس عقدك مع الشركه عادي و كمان فى تأمينات اجتماعيه و صحيه و لو عملت high performance بيدخلو ناس من الـ out source للـ staff

و انا مش عاوز حاجه من حد انا مش ببخل بأى معلومه عن حد اتعرضت ليها و ربنا هو اللى بيجزى مش العباد و ربنا بجد يشفى الناس اللى زى بنهاوي ده

المشاركة الأصلية كتبت بواسطة organizerman

حرد على سؤالك الاول (هو مين قالك تلبس كاجوال) ؟ انا محدش قاللى حاجه عشان انا اللى رحت لابس كاجوال و كل اللى هناك معايا ساعة الانترفيو لابسين كاجوال بس زى ما قلت كاجوال نضيف (قميص على بلوفر على جينس ساده) و اصلا اللى بيشتغلوا فى فودافون خدمة عملاء بيلبسوا كاجوال


السؤال التانى (مفيش حاجه اسمها team leader ) ؟؟ انت بقى ميين اللى قالك مفيش حاجه اسمها team leader ؟؟؟؟؟؟؟

بص انا هقولك على حاجه انا شغال في فودافون ورحت الانترفيو ولازم يكون فورمال لو روحت كاجوال مش هتتقبل وبعدين انا ما قلتش مفيش حاجه اسمها team leader
انا قلت مفيش حاجه اسمها team manager
عشان انت كنت كاتب كده فوق وبعدين قوللى لو انت اتقبلت فعلا انت اتقبلت فى اى department
في ال call center
انا اقصد بس انى عايز اوصل معلومه صح للناس وقوللى عملت الانترفيو فين بالظبط وبتاخد training
فين
وما تزعلش منى عشان انا برضه عايز اوصل معلومه صح للناس

المشاركة الأصلية كتبت بواسطة organizerman

اسأل هناك فى برج فودافون زهراء المعادي لو عاوزين طلبه ... انا كل اللى اشتغلوا معايا متخرجين

طب بعد اذنك ممكن رقم تليفون اتصل بدل ما اروح واسال اصل المشوار بعيد عليا اصل انا من الشرقية ؟
لوك جزيل الشكر

المشاركة الأصلية كتبت بواسطة laughing_mohame

بص انا هقولك على حاجه انا شغال في فودافون ورحت الانترفيو ولازم يكون فورمال لو روحت كاجوال مش هتتقبل وبعدين انا ما قلتش مفيش حاجه اسمها team leader
انا قلت مفيش حاجه اسمها team manager
عشان انت كنت كاتب كده فوق وبعدين قوللى لو انت اتقبلت فعلا انت اتقبلت فى اى department
في ال call center
انا اقصد بس انى عايز اوصل معلومه صح للناس وقوللى عملت الانترفيو فين بالظبط وبتاخد training
فين
وما تزعلش منى عشان انا برضه عايز اوصل معلومه صح للناس

هههههههههههههههههههه لأ انا مش زعلان والله بس انا فعلاً غلطت اصلي كنت بكتب بسرعه و كده اسمها team leader و اسف على الغلط

انا اتقبلت كوميد فى الكول سنتر عشان ده اللى كان مفتوح

والله موضوع اللبس ده .. كلنا كنا لابسين smart casual مش بدله خالص وكان الانترفيو فى فرع زهراء المعادى (برج فودافون)

المشاركة الأصلية كتبت بواسطة giims

طب بعد اذنك ممكن رقم تليفون اتصل بدل ما اروح واسال اصل المشوار بعيد عليا اصل انا من الشرقية ؟

لوك جزيل الشكر

والله ما معايا اى ارقام تليفونات لبرج فودافون لأنى رايح تبع وصله اللى فى مدينة نصر و قدمت لها عن طريق مكتبها اللى فى برج التطبيقيين العباسيه

ينفع بقه تكتبلنا الاجابات اللي بتكون موحده عند كل الناس بالانجليزي :)