يعنى ايه عزومة مركبيه؟؟؟؟؟!!!!!!

[eng_shadyahmed]

أنـــــــا : انت انهارده يامعلم هتتغدى معايا,اعمل حسابك على كده

صـــــاحبى : لا ياعم ألف شكر ياسيدى

أنــــــا : يابنى بتكلم بجد, دى مش عزومة مركبيه.

(عزومـــــة مركبيه) بنقول الكلمه دى دايما فى المواقف اللى شبه الموقف
اللى حكيته بينى وبين واحد صاحبى معرفوش.

طب سألت نفسك قبل كده ليه( عزومة مركبيه)؟؟؟؟
ليه مش عزومة عربجيه؟؟ صيادين؟؟ ميكانيكيا؟؟هندسيه؟؟فلزيه؟؟نوويه؟؟

مستنى ارائكم

[lyonaids]

ههههههههههه...والله سؤالك جميل جدا لاننا بنقول الكلمة دي كتير فعلا..
وانا مبسوط اني اول واحد رد لأني عارف معناها:mdr:

شوف يا إكسلانس ...:


عزومة المراكبية عند المصريين ..مصطلح انشأة طائفة المراكبية نفسهم ..بفهلويتهم الجامده جدا..

خاصة اولئك الرفاق مراكبية النيل عالخصوص ..وايضا الاخوة بتوع مراكب الصيد في اسكندرية..:

تلاقي الواحد فيهم ماشي بالمركب بتاعته في وسط المية ..وبعدين يلمحه صاحبه ..او واحد يعرفه من علي الشط..

عمنا المراكبي هنا بعد السلام عليه ..وازيك عامل ايه .....: يعوز يخلص منه يقوله اتفضل شاي معايا هنا (عالمركب يعني .!)..:mdr:

تعالي اتغدي ...اتفضل نورني وأقعد معايا ..!! ( طب ازاي يا عم الحج وانت في وسط الميه !!)..

عشان كدا نشأ المصطلح ده ..واتاخد مثال علي العزومة بدون طعم أو العزومة بدون نفس ..والظروف مش

مساعداها بالمرة ....!!

بالضبط وانت بتكلم حد كدا ..والظروف مش مساعده نهائي تقوم تقوله تعالي نورني في بيتنا !!

اشرب حاجة عندي ..وانت مثلا بتكلمه وقتها من البيت ..وهو بيكلمك من مدغشقر كدا :mdr:


المعلومات دي كلها سمعتها من واحد مراكبي اصيل يعني ..وكلام أكيد ...وأي خدمة ..!










بقوللك يا شادي ...:

ما تيجي تشرب شاي بقي يا أخي ..؟؟ :mdr:



.

[eng_shadyahmed]

انا كنت حاسس من اول ماقريتلك فى المنتدى
انك مراكبى اصلا وسؤالى ده كان اختبار عشان
اكشف بيه حقيقتك هههههههه
شكرا اوى على ردك وانا والله توقعت ان ده السبب برده

[lyonaids]

عاوز ايه يا واكد ؟:mdr:


مش كفاية تعبت نفسي في الشرح ده ..وفي الاخر تقول عليا مراكبي ..

ماشي ياض انتا !! بردو مش هتشرب شاي عندي في البيت ..!!!

واتفضل بقي شاي هنا للصبح :mdr: انا مراكبي بأه

[الساهر48]

iiiiiiiiiiiiiههههههههه
حلوه و القصه مقنعه جدا

ثانكس عالمعلومه القيمه دي

[magicmay]

عزومة المراكبية عند المصريين ..مصطلح انشأة طائفة المراكبية نفسهم ..بفهلويتهم الجامده جدا..

خاصة اولئك الرفاق مراكبية النيل عالخصوص ..وايضا الاخوة بتوع مراكب الصيد في اسكندرية..:

تلاقي الواحد فيهم ماشي بالمركب بتاعته في وسط المية ..وبعدين يلمحه صاحبه ..او واحد يعرفه من علي الشط..

عمنا المراكبي هنا بعد السلام عليه ..وازيك عامل ايه .....: يعوز يخلص منه يقوله اتفضل شاي معايا هنا (عالمركب يعني .!)..

تعالي اتغدي ...اتفضل نورني وأقعد معايا ..!! ( طب ازاي يا عم الحج وانت في وسط الميه !!)..

عشان كدا نشأ المصطلح ده ..واتاخد مثال علي العزومة بدون طعم أو العزومة بدون نفس ..والظروف مش

مساعداها بالمرة ....!!

بالضبط وانت بتكلم حد كدا ..والظروف مش مساعده نهائي تقوم تقوله تعالي نورني في بيتنا !!

اشرب حاجة عندي ..وانت مثلا بتكلمه وقتها من البيت ..وهو بيكلمك من مدغشقر كدا


المعلومات دي كلها سمعتها من واحد مراكبي اصيل يعني ..وكلام أكيد ...وأي خدمة ..!


mokne3a el 7ekaya de fe3lan w shokran lekm el mawdo3
w lyonaids enta 3ayez leh tanta7er?

[el rayk gedan]

فعلا ياليو كلامك مظبوط انابخرج أصتاد فى النيل كتير وكنت سألت واحد من الصيادين بالقوارب هناك نفس السؤال وكانت أجابته زى اجابتك

[romanza]

بصراحة Lyonaids

ماسابليش حاجة أقولها

أنا برضه بقول ان ده السبب

وبالمناسبة اللي أكدلي الكلام ده

الإعلان بتاع شريف منير بتاع اللبن الرايب
لما عدى على مراكبي بيقوله اتفضل

[lyonaids]

ميرسي لك يارايق..ورومانزا..ومي ...والشكر اصلا لصاحب الموضوع شادي لأنه السبب اننا ندور علي حاجة زي كدا...

ميرسي لك يا شادي...ودايما للأمام ...

[eng_shadyahmed]

شكرا لكل ردودكم
وشكر خاص ل الاكسلانس

[elemprator]

اذا عرف السبب بطل العجب

شكرا جزيلا على الموضوع

[P.R.E.S.T.I.G.E]

انا اسكندرانى ومعرفتش الا دلوقتى

ابقى تعالى صيف عندنا