ما تيجو نحكى احلامنا وازاى انتصرنا على الزمن او ازاى اتهزمنا

[dalila7777]

كلنا كلنا كان عندنا حلم فى مننا اللى الزمن هزم حلمه وفى مننا اللى القدر كان ليه بلمرصاد فى تحقيق الحلم وفى مننا اللى قدر يتغلب على ظروفه ماتيجو ا نفضفض شويه عن احلامنا و يمكن كلنا نقدر نفيد بعض ونطلع بنتيجه على فكره كلنا جوانا النصر والهزيمه جوانا العزيمه والتخاذل امنيتى كلنا نحكى لبعض وبصدق يمكن كلامنا يكون طاقة نور ولو بحرف لحد عنده فكره وحلم ما تيجو نحكى احلامنا وازاى انتصرنا على الزمن او ازاى اتهزمنا

[dalila7777]

حبدء بنفسى وده بصراحه انا ما كنتش حكمل تعليمى وكانت امنيتى انى اكمل مش لسبب مادى لكن لانى كانت صحتى ضعيفه جدا ووالدى من وجهة نظره ان القرايه حتتعبنى اكتر مع انى ومش كلام كنت الاولى على مدرستى لكن كان خايف اوى عليه على فكره كان بيتمنى اخد مؤهل متوسط وافعد فى البيت زى بنات كتير فى بلدنا لكن ربنا كان شايلى الاحسن على فكره انا ووالدى كنا اصدقاء اوى لكن كان بيزعل المهم تمر الايام انا النهارده تلاتين سنه بفتكر كل اللى حصل كانه شريط سينما انا فعلا كملت تعليمى واخدت اكتر من مؤهل عالى ووالدى كان فخور بيه لحد اخر لحظه من حياته وكتير بيعتبرونى مثلهم الاعلى لكن صدقونى وبامانه يا رتنى كنت سمعت كلام والدى لانى اخدتها تحدى و نسيت اهم حلم فى حياة اى بنت وساعات كتير بفكر هل انا انتصرت ولا مهزومه وبصراحه لما بشوف زميلاتى ومعاهم اولادهم ورغم انى مرتبطه بندم انى طموحى العملى والعلمى منعنى من تحقيق حلم نسيته او تناسيته الا وهو اعظم حلم عند اى بنت انها تكون ام وصدقونى انا محتاره هل انا اللى هزمت نفسى ولا اقول ان دى قسمه ونصيب بصراحه دوشتكم لكن بجد كلامى من القلب لان مهما الانسان على او تقدم فى احلام بسيطه
اوى بس عدم تحقيقها وده بجد اكبر هزيمه من اى حلم يكون من بعيد عظيم فى خيالنا

[lyly777]

بجد موضوعك حلو اوى
ومبسوطه كتير انى اول حد يكون ليه تعليق على موضوعك
بصى بقى انتى مش هزمتى نفسك ولا حاجه بالعكس كويس جدا ان انتى عملتى اللى انتى عايزاه مش تندمى على حاجه فاتت كل حاجه قسمه ونصيب وفكرى على طول ان ربنا ليه حكمه انك تكونى كده عارفه جدتى على طول بتقولى ( ما يصيبك الا نصيبك )

يعنى مثلا انا كان حلمى انى ادخل فنون جميله لانى كنت بعشق الرسم والالوان وكنت حاسه انى هكون من الفنانين المشهورين لكن حصلت ظروف ايام امتحانات ثانوي وانتى عارفه بقى دور مكاتب التنسيق فى هدم اى حلم لمستقبل اى حد ودخلت خدمه اجتماعيه و كنت كارها حياتى جدا لما دخلتها ولحد دلوقتى مش عارفه عديت اول سنه ازاى بس بعد كده قبلت بالامر الواقع والحمد لله بقى معايا بكالوريوس خدمه اجتماعيه وناويه اكمل درسات عليا لانى بجد حبيت اوى المجال ده ولاقيت نفسى فيه
يعنى حلم دخولى لفنون جميله اتحول الاول بكابوس بدخولى خدمه اجتماعيه بس الحمد لله ربنا وفقنى وقبلت الواقع ودلوقتى حلمى انى اكمل درسات عليا فى الخدمه الاجتماعيه

وده رايى :
- ان اهم حاجه الرضا بالامر الواقع
هى الاحلام مش غلط بالعكس دى بتكون الباور لمستقبلنا
بس مش نضيع وقت من عمرنا على ندم من احلام مش اتحقق
بالعكس المفروض اننانخلق حلم من الواقع اللى هزم الحلم
- اننا نعرف قدرتنا كويس جدا على تحقيق اى شى
لان لمااى حد يحلم بتحقيق حاجه معينه مش يحس ان ده مستحيل او صعب لانها بيسعى لتحقيق شى فى حدود قدراته

( وعسى أن تكرهوا شيئا وهو خير لكم وعسى أن تحبوا شيئا وهو شر لكم والله يعلم
وأنتم لا تعلمون ).

[dalila7777]

اولا اشكرك على انك حكيتى اللى جواك اللى اكيد اكيد حيكون ولو طاقة نور لاى حد بيحاول ينتصر على انكسار جواه على الاقل من مكتب التنسيق وكمان اشكرك لمرورك لكن الانكسار اللى جوانا مش هزيمه اد ما هو وقت مر ما عملناش فيه حاجه وقت مر وليه اشياء بتتعمل فيه ومعملنهاش كل شىء ليه ميعادوكل شىء قسمه ونصيب ولعلمك اغلب البنات ما بيهمهاش اى حاجه قدر كلام الناس اللى دايما يسالوا هى حتترهبن هى خلاص زهدت الدنيا حتقضيها علم ولما بنت بتتخطب وهى كبيره وصدقينى بتعتبرها فرصه عشان تريح دماغها حتى لو فى الشريك الاخر عيوب بتتناساها لانها عارفه ان العمر بيجرى ولازم ترمى القربان للمجتمع اللى شايف فيها انها مش ناقصها الا الجواز مع انها مرتاحه اوى من غير زواج عارفه رغم ان حلمى يكون عندى اطفال بس بصراحه امنيتى انى ما اترميش قربان للارضاء المجتمع ومش تقولى كلام انى اعمل اللى جوايا لاننا بنات فى مجتمع ما بيغفرش بسهوله للبنت اقل خطا ولا كلمت لا انا هزمنى طموحى وحطنى امام اختيارات ضئيله لما حبيت ما قدرش اسيبه مهما كانت عيوبه لانى مش حستنى تلاتين سنه تانيين عشان احب تانى بجد يمكن انا غلط بس واللهى بتكلم وانا بكل صدق معرفش ليه كل تلميذاتى امنيتهم يكونوا نسخه منى عايزه اقلهم لا ارجوكم انا مهزومه اوعوا تكون زى والوقت يعدى والزمن يسرق منكم حاجات ما تتقدرش بتمن وهى سنين حلوه ما عشتش فيهم لا الشباب ولا المراهقه كل صحابى كانوا الكتاب والكمبيوتر وده خلانى احس كتير انى معقده ارجوكم اوعوا العمر يسرقكم تصدقوا بعيط وانا بكتب الكلام دع لانه بحد صادق لوى

[eng_shadyahmed]

دليله عايز اقولك على حاجه مهمه
محدش بياخد من الدنيا دى كل حاجه
هتاخدى شوية حاجات انتى اختارتيها
يبقى لازم هتضحى بحاجات تانيه
بعيدا بقى عن المجتمع ونظرته بس صدقينى زى
مابقولك كده
طب مانتى كنتى ممكن تاخدى بالك من نفسك
وكان ممكن تكونى دلوقتى عندك اولاد و...
مين قالك انك وقتها بقى ماكنتيش هتندمى
انك ماخدتيش بالك من تعليمك
كنتى هتندمى صدقينى انك ماتعلمتيش كويس
ومخدتيش شهادات عاليه
الاهم بقى انك تتكيفى مع وضعك الحالى
وماتحسيش باى ذنب ناحية نفسك وتدعى ربنا
يوفقك فى حياتك من جميع نواحيها
وبالنسبه لموضوع انك تتحملى عيوب الطرف الاخر
خدى بالك لو العيوب بسيطه يبقى اوك
لكن لو عيوب صعبه اوعى تسكتى عشا هتتعبى اكتر بعدين
وربنا يسعدك ياستى

[el rayk gedan]

حبدء بنفسى وده بصراحه انا ما كنتش حكمل تعليمى وكانت امنيتى انى اكمل مش لسبب مادى لكن لانى كانت صحتى ضعيفه جدا ووالدى من وجهة نظره ان القرايه حتتعبنى اكتر مع انى ومش كلام كنت الاولى على مدرستى لكن كان خايف اوى عليه على فكره كان بيتمنى اخد مؤهل متوسط وافعد فى البيت زى بنات كتير فى بلدنا لكن ربنا كان شايلى الاحسن على فكره انا ووالدى كنا اصدقاء اوى لكن كان بيزعل المهم تمر الايام انا النهارده تلاتين سنه بفتكر كل اللى حصل كانه شريط سينما انا فعلا كملت تعليمى واخدت اكتر من مؤهل عالى ووالدى كان فخور بيه لحد اخر لحظه من حياته وكتير بيعتبرونى مثلهم الاعلى لكن صدقونى وبامانه يا رتنى كنت سمعت كلام والدى لانى اخدتها تحدى و نسيت اهم حلم فى حياة اى بنت وساعات كتير بفكر هل انا انتصرت ولا مهزومه وبصراحه لما بشوف زميلاتى ومعاهم اولادهم ورغم انى مرتبطه بندم انى طموحى العملى والعلمى منعنى من تحقيق حلم نسيته او تناسيته الا وهو اعظم حلم عند اى بنت انها تكون ام وصدقونى انا محتاره هل انا اللى هزمت نفسى ولا اقول ان دى قسمه ونصيب بصراحه دوشتكم لكن بجد كلامى من القلب لان مهما الانسان على او تقدم فى احلام بسيطه
اوى بس عدم تحقيقها وده بجد اكبر هزيمه من اى حلم يكون من بعيد عظيم فى خيالنا

أولا انا معرفش الدعوة عامه ولا لأ لكن انتى محدتيش الموضوع للبنات ولا الولاد

لكن على العموم مش عارف أقولك أيه انا مبسوط انك وصلتى فى الاخر للحقيقه ان فعلا بالنسبه للأولويات عند البنت
أولا بيت جوزها و اذا كان عندها وقت فراغ كبير وحبت تشتغل اوكى
لكن لو مفيش وقت فراغ يبقى ليه تتعب نفسها مش أحسن تأعد فى مملكتها الى هو بيتها , ويجيلها كل حاجه لحد عندها صح ولا أيه ؟

وبعد أذنك يعنى انا عايز أهدى الكلام ده لأختى كوكى kokolina عشان معجبهاش كلامى أما الكلام ده نابع من فكر بنت زيها وأكيد هيوصلها بسرعه

وشكرا يا دليله على التوبيك

[dalila7777]

اولا شكرا لردك باشمهندس شادى وكمان ردك استاذ رايق وكل كلامكم بجد دافع لانى اسالكم انتم علقتم بس كان نفسى اسمع حلم اتحقق او حلم ما اتحقش ظروفه نفسى اعرف لما بتسمع لامال اتحققت او امال مكسوره بتهون وصدقنى عليك كتير وممكن تبقى طاقة نور وصدقونى الدعوه عامه ما كلنا بنحلم وفينا اللى فاز واللى لسه بيحاول واللى انهزم ما تيجو نحكى احلامنا نحكى اهم لحظات فرحنا ولحظه عدت كانت دموع فيها انكسارنا والمنا مش كلام اغانى اد ما هو طاقة نور لكل اللى بيقرى تجربة الاخر وشكرا لكم اخواتى لمروركم الكريم

[takki]

انا حلمي اتشهر وابقي مشهور
وابقي مؤلف او ملحن او الاتنين
نفسي اقعد مع كبار المؤلفين والملحنين
نفسي اشتري عربية هامر وشقة في مصر الجديدة
نفسي اسافر هولندا وكندا

كل دة متوقف علي اول حلم الشهرة ....ولسة بحلم

[dalila7777]

يا رب يحقق حلمك ولو انه بقى بسيط فى عهد الفضائيات بجد وللعلم الفن الراقى بيفرض نفسه والحمد لله ان حلمك سهل فى ناس كتير احلامهم مستحيله اوى بس وحيات ربنا اميتى يحقق كل احلامنا وعمرنا ما ننهزم ادام احلامنا ونعمل من هزيمتنا نصر جديد انا بتمنى وبهدى امنيتى لكل اللى كسرته الاقدار ومش بيستسلم للحلم بلشفاء لكل مريض احلامنا كلنا سهله الا المرض والفراق فهى احلام الامل فيها حياه والانكسار موت يا رب حقق لينا احلامنا ولا نقول عمرنا ان المرض والبعد هزمنا

[SALLY_MO]

موضوووووووووووووع رائع

انا بطلت احلم من زماااااااااان احيانا بقعد ابص لنفسي وافكر احس انى معنديش امل فالحياه وانى ضايعه

دخلت الكليه اللى كنت بحلم بيها ...... اشتغلت فالمجال اللى انا عوزززززاه .......اتجوزت الراجل اللى حبيته ....ولادى الحمد لله كويسين

بس المشكله انى حسه ان فى حاجه غلط فين مش عارفه

اللهم ارحمنا يا ارحم الراحمين وعافنا واعفوووو عنااااااا

[mesk_islam]

السلام عليكم
انا كان نفسى انى اعمل حاجة او اخترع اختراع نفع بيه العالم والمسلمين
ونفسى اكون عالم ذو فكر متميز
ونفسى قبل كل ده انى اكون معيد فى الكلية بتاعتى واللى هتفتحلى المجال الاكبر بس المشكلة انى متعثر شوية فى المذاكرة ياريت توضحيلى
وتدعولى كلكم انى اذاكر كويس واحقق الى بتمناه مش عشان نفسى بس عشان الى بحبها وعشان بابا وماما الى بيصرفوا دم قلبهم عليا

[eng_shadyahmed]

عارفه ياسالى ايه الغلط انك وصلتى لكل حاجه
انتى عايزاها
انا شايف ان لذاذة الحياه وحلاوتها بتيجى من
3 حاجات
اولهم اننا نحلم احلام كتيره
ثانيهم ان بعض احلامنا تتحقق
ثلاثهم ان البعض التانى مايتحققش

لو حاجه من التلاته دول ماحصلوش فى حياتنا
يبقى فعلا حياتنا هتبقى ممله

[dalila7777]

الحب والعلم والمهنه المرموقه هدف اما لو حققنا احلامنا ولقينا نفسنا من غير حلم بتتحول حياتنا لملل انا مع الاخ عمرو واكد فى موضوع ان الاحلام تحقيقها كله شىء بيفقد الحياه لذتها بس معرفش دا طول عمرى بحلم حتى الحلم بيخلينى معرفش ارسى على بر امنيتى ما ابطلش احلم اما الاخ اللى احترمت اوى حلمه اوى اللى بيحلم انه يشتغل ويبقى عالم عشان حبيبته الله لما نحلم عشان غيرنا انت جميل اوى اوى وربنا يزيدك امنيتى اكون زيك انت بتحلم عشانك وعشان غيرك الله لما الحلم بيكونله شركا غيرنا ممكن اقلك على حاجه انا اتعلمت منك حاجه حلوه اوى انى احلم لنفسى عشان غيرى بجد انا بيتهيالى ده اجمل واحسن حلم ويا رب تبقى احسن واكبر عالم فى الدنيا

[HiL@Ry]

موضوع جميل جدا يا قمر ويستحق بالفعل المناقشه

مزيدا من التقدم لكى دائما يا سكره ..تم التثبيت لفتره

تحيتى لكى ..فى رعايه الله

[mesk_islam]

الحب والعلم والمهنه المرموقه هدف اما لو حققنا احلامنا ولقينا نفسنا من غير حلم بتتحول حياتنا لملل انا مع الاخ عمرو واكد فى موضوع ان الاحلام تحقيقها كله شىء بيفقد الحياه لذتها بس معرفش دا طول عمرى بحلم حتى الحلم بيخلينى معرفش ارسى على بر امنيتى ما ابطلش احلم اما الاخ اللى احترمت اوى حلمه اوى اللى بيحلم انه يشتغل ويبقى عالم عشان حبيبته الله لما نحلم عشان غيرنا انت جميل اوى اوى وربنا يزيدك امنيتى اكون زيك انت بتحلم عشانك وعشان غيرك الله لما الحلم بيكونله شركا غيرنا ممكن اقلك على حاجه انا اتعلمت منك حاجه حلوه اوى انى احلم لنفسى عشان غيرى بجد انا بيتهيالى ده اجمل واحسن حلم ويا رب تبقى احسن واكبر عالم فى الدنيا

جزاكم الله خيرا ونفعنا الله بكم وبأرائكم

[dalila7777]

شكرا يا اخت هيلارى وميرسى لاطرائك على الموضوع وشكرا لمرورك يا اسلام لكن يا هيلارى اسلام حكى واللهى جد اشتقدت منه فين رايك فين كلامك انتى كمان عايزين كل اصدقائنا يشاركوا لان بجد بجد انا استفدت اوى واتعلمت من اسلام ازاى احلم ما تيجوا نحكى كلنا لبعض اللى جوانا كلنا حنفيد بعض نخلى كلامنا طاقة نور لبعض وشكرا لكل اخواتى فى المنتدى

[Wanna Help]

أنا بقي حلمي كبييييييير أوي
أنا نفسي أكون أغني شخص في العالم ومعايا حوالي 100 مليار يورو بس
الفلوس دي هاعمل بيها شوية حاجات
أول حاجه هاعمل مشاريع استثماريه زي اني ناوي ابني مدينه كامله متكاملة بمدارسها ومستشفاياتها في الصحراء وهاجيب الشباب بس يسكونوا فيها مع تسهيلات مريييييييحه بجد في السداد مقابل انهم هايشتغلوا في مصانعي ومدارسي ومستشفياتي وجامعاتي وكل المرافق اللي في المدينة وبكدا أبقي حليت جزء من مشكلة البطالة ووفرت مسكن للشباب وكمان زوجتهم
تاني حاجه في المدينه دي هاولد الطاقه من مخلفاتها وهاعتمد عليها وهاخد المخلفات من المدن المجاوره وهاعمل منها الطاقه الخاصة بمدينتي
تالت حاجه هاعمل قسم خاص بالشركه بتاعتي اللي هاتدير المدينه والمشاريع بتاعتي كلها يضم مجموعه من أفضل الشباب المتميزين في الفكر الشباب دول هاصرف عليهم في كل حاجه هاسكنهم في أفضل فيلا ت وهأكلهم أفضل أكل وأفضل وسائل الترفيه هاتكون تحت أمرهم واكبر مرتب ممكن يحلموا بيه هايخدوه مقابل أنهم يفكروا بس مش عاوز أكتر من تفكيرهم في التطوير والمشاريع الجديده ودراسة الجدوي وكل حاجه وادارة المشاريع كمان تحت اشراف مجموعه أفراد من زوي الخبره لكي يرشدوا ويوجهوا فكر هؤلاء الشباب
رابع حاجه أنا من خلال زكاة مالي وأعتقد انها هاتكون حاجه جباره جدا جدا هاعمل بيها في كل مدينه من مدن مصر يعني كل سنه لما أطلع زكاة مالي هابني شارع بحاله للمساكين والفقراء بايجار رمزي وبعد خمس سنين الفقير أو المسكين يكون شاف له شغل عندي واشتغل وجاب فلوس ويطلع من الشقه ويجي واحد تاني مكانه وكده يعني
خامس حاجه ممكن أشتري كرسي في مجلس الشعب من أجل اصلاح الفساد الموجود في بلدنا ولو بفلوسي أصلح الفساد دا
يعني الحلم كبير ولسه له بقيه
الموضوع جميل كدا يا ريت الكل يشارك ويحكي اللي جواه هايحس باحساس رائع جدا
حتي اسألوني انا

[dalila7777]

بجد بجد حلم جميل اوى عارف اغنية على الحجار لو مش حتحلم معايا مضطر احلم بنفسى لكنى فى الحلم حتى مش ممكن احلم بنفسى انا مبسوطه اوى حلمك ليك ولغيرك يا رب يا رب كل اللى حقق حلمه يكون زيك كنا بقينا اعظم الامم لكن بيك وبلى زيك اللى عندهم حب للخير مشاعر صافيه زى ضوء الفجر وزى مياه النبع الصافى بتحسسنى ان الدنيا بخير ربنا يديك امنياتك يا رب يا رب يا رب كل الخير ليك وللى زيك وكلنا نقول راينا فى احلام بعض لان حلم اخونا حلم اى انسان طموح ومش بعيد كمان كام سنه نلاقيه محقق حلمه بس ربنا يحميه هو واللى زيه اللى بيحلموا وبيحاولوا يحققوا اى شىء ولو ببدايه بسيطه بس عارفين احلامنا حلوه اوى ونقيه اوى احنا ابرياتء اوى كده ياه ماحدش فينا حلم بشىء وحش او انى اوى بجد حلمى خلانى اخجل واحس انه كان انانى فاهمنى بتعلم من احلامكم ان الحلم يبقى حلم لو حيعود على غيرى بفايده لو بفكر بغيرى ولو مش حتحلم معايا مضطر احلم بنفسى لكنى فى الحم حتى مش ممكن احلم بنفسى ربنا يحقق كل احلامنا ونحكى كلنا اللى حلمنا بيه والعوه عامه ما تيجوا نحكى كلللللللللللللللللللل احلامنا ايه اللى كسرنا وايه الحلم اللى انتصر على المنا

[*ROSE*]

اولا بشكرك اختى على موضوعك الرائع

بالنسبالي انا كان نفسي ادرس النفس البشريه لانها كانت بتمثلي غموض رهيب
والحمدلله دخلت الكليه اللي كان نفسي ادخلها وعرفت رموز كتيرة اوي لعلم النفس
كان اجمل وقت وقت وجودي في المستشفى مع المرضى وكنت مبسوطة اوي اني بحاول افهم اصعب حاجة ربنا خلقها
واكيد طبعا ربنا مش بيدي كل حاجة للانسان عشان يسمع صوت دعائه دايما
فالحمدلله دائما وابدا

وجزاكي رب العالمين كل خير

روز

[Wanna Help]

بصراحه الموضوع متميز وشيق
ليه يا شباب محدش اشترك
يلا شجعوا الموضوع وشاركوا
إكتب حلمك لو انت معرفتش تحققه غيرك ممكن يحققه
شكرا

[lyonaids]

ماأقدرش انكر ان الموضوع جميل جدا

بس انا ماأخدتش بالي منه غير من فترة قليله ولذلك اتأخرت في المشاركة


اولا كل سنه وانتو طيبين كلكو ولاد وبنات

مفيش شك ان الزمن او الظروف بتهزمنا كتير جدا في اوقات وبننتصر عليها اوقات تانيه ...!! بمعني ان الموضوع كله جولات ومعارك مع الظروف والزمن مش حرب بتنتهي من جولة واحده ..


بمعني ممكن يبقي عندي حلم اتهزمت في جولات في تحقيقة وانتصرت

اقع واكمل ..وانجح واقع تاني لغايه ما انتصر !!



انا عن نفسي من وانا صغير كان حلمي ابقي صحفي او كاتب الناس تقرالي اللي بكتبه..

حرمت نفسي من حاجات كتير اوي من وانا صغير علشان اجيب القصص اللي اتطورت لكتب دلوقتي ...هزمتني الظروف النفسية في الاول ..

لما جالي هاجس ..ان مافيش حد بيقرا ...!!

بس انا قلت انا اكتب واقول رايي وخلاص ...ومش يهمني اي حاجة ولا اي حد...

ورغم اني مش خريج اداب ولا اعلام ...ومعيش واسطة !!!

الا ان انا شفت ان واسطتي اكيد ربنا اللي مراقب وشايف الكل ..

واسلوبي هو السكة اللي هروح بيه اي مكان ..!

وفعلا دخلت كذا جرنان من غير دعوة ليا !! ولا اي طلب ..

من نفسي وفرضت نفسي بمعني اصح لاني شفت اني استاهل ابقي ليا مكان...

اتمرنت فترة في جريده كبيرة ..وسبتها لان الظروف الاسرية عندي هزمتني وحطمتني فترة ..جالي فيها اكتئاب حاد..!

ماسبتش الموضوع لسا ورحت جرنال تاني اصغر ...وفترة وبردو سبته بعدها نتيجة ظروف منهم هما....

وبردو الموضوع في دماغي والحمد لله هاقدم كلية اعلام جامعه مفتوحة
السنه دي ..

وانا بتمرن ..وبأذن الله ابقي حاجة أرضي بيها عن نفسي الاول وارضي ربنا وادافع عن الفقرا ..اللي ما بيعرفوش يطالبو بحقوقهم ولا مطالبهم ..
ومستحملين الهم ومش عارفين يتكلمو ..

وفي نفس الوقت خايف من البهدلة اللي بيتعرض ليها الصحفيين ..

والسجن والاعتقالات والتشريد ...

ادعولي ربنا يقف معايا واقدر اعمل اي حاجة ...

[dalila7777]

بصراحه يعنى هنا لما بنفضفض عن احلامنا بنلاقى حاجات جوانا حلوه اوى وبنعرف بعض اكتر الحلم اللى جوانا هو اسهل طريقه للتعرف على ما بداخل نفس كل واحد فينا ولا انتى مش معايا يا اخت روز اولا اول طريق النجاح الحلم واول طريقه الفشل الياس من احلامنا عندنا كلنا بكره بنحلم بيه واتمنى ليكى يا استاذه روز انك تكونى الافضل دايما لان الباحث عن المتاعب فى مهنه مرهقه زى دى اكيد انسان عند القدره على الاستماع للاخر والاحاطه بمشاكله ربنا يزيدك علم وتدى فى مجالك كمان وكمان اما انت يا ليو فربنا معاك بجد لان مهنت الصحفى الشريف مهنة البحث عن المتاعب ومش حقلك حلمك بقى سهل اد ايه لان هنا بنقرى كلنا ارائك وبنعقب عليها وقرائك متواصلين معاك كمان عايز ايه اكتر ولعلمك الغيث يبدا بقطره وانت فى الطريق الصحيح على ما اعتقد ولا ايه يا شباب وبلتوفيق دايما لينا كلنا يا رب وبجد بجد كلنا نحكى كل الاحلام اللى جوانا وبصراحه كلنا بندعم بعض ولو بكلمه وكلنا ندعو بعض نحكى احلامنا وبينى وبينكم واحنا بنحكى مع بعض بكتشف ان مفيش حد هزمنا

[lyonaids]

يا خرابي ...:mdr:

والله يا دليلا مش عارف اقوللك ايه بكلامك الجميل ده اللي اداني ثقة بنفسي ..وشجعني زياده ...بجد ميرسي ليكي اوي ...وفكرتك حلوة بجد

وتستاهل التثبيت فعلا ..مبروك ..



وكل سنة وانتي طيبة وبسعاده وخير...

[Wanna Help]

ربنا معاك يا ليو وتعرف تحقق حلمك
اصبر علي ابتلائك ولعلمك لما تحقق حلمك بعد كل المشاكل دي هاتكون قوي جدا جدا أمام المواقف لأنك مريت بيها وانت في مقتبل العمر

[kokilina]

مبروك التثبيت حبيبتى دليله والموضوع جميل فعلا ..اما عن الاحلام ..يااااااه..فيه جمله كنت سمعتها زمان ..حلمك ده يا اما بيكبر فبيبلعك جواه ومتشوفوش يا اما يفضل يصغر لحد ما متشوفوش ..تقريبا ده حصل معايا..فيه احلام عندى كبرت اوى لحد ما بلعتنى جواها واحلام تانيه صغرت لحد ما مبقتش شايفاها ومبقتش موجوده فى حياتى اصلا..ده كل اللى اقدر اقوله بس فى العموم انا حققت جزء من احلامى وهو انى درست الحاجه اللى بحبها وقربت اخلص دراستى فيها باذن الله ..قدرت اهزم نفسى فى كل تحدى ..كل مره كنت الاقى حاجه الناس تقولى مش هتقدرى عليها كنت بعملها لمجرد انى اثبت لنفسى انى اقدر اعملها...لسه بقى حلمى الكبير انى اريح اهلى بعد ما تعبوا السنين دى كلها عشانى ..نفسى اوى اوى يتحقق

[mesk_islam]

مبروك التثبيت حبيبتى دليله والموضوع جميل فعلا ..اما عن الاحلام ..يااااااه..فيه جمله كنت سمعتها زمان ..حلمك ده يا اما بيكبر فبيبلعك جواه ومتشوفوش يا اما يفضل يصغر لحد ما متشوفوش ..تقريبا ده حصل معايا..فيه احلام عندى كبرت اوى لحد ما بلعتنى جواها واحلام تانيه صغرت لحد ما مبقتش شايفاها ومبقتش موجوده فى حياتى اصلا..ده كل اللى اقدر اقوله بس فى العموم انا حققت جزء من احلامى وهو انى درست الحاجه اللى بحبها وقربت اخلص دراستى فيها باذن الله ..قدرت اهزم نفسى فى كل تحدى ..كل مره كنت الاقى حاجه الناس تقولى مش هتقدرى عليها كنت بعملها لمجرد انى اثبت لنفسى انى اقدر اعملها...لسه بقى حلمى الكبير انى اريح اهلى بعد ما تعبوا السنين دى كلها عشانى ..نفسى اوى اوى يتحقق
ربنا يوفقك ان شاء الله وعجبتنى اوى جملة ان الحلم يبلعنا
ربنا يجعل ان شاء الله كل احلامنا كده
وجزاكم الله خيرا

[dalila7777]

ازيك يا كوكو وحشتينى وبلتوفيق فى امتحاناتك وشكرا يا اسلام على تعليقك لكن سوال بيطرح نفسه كلنا بنحلم
اجلام ممكن تكون طاقة نور وممكن تكون زى النداهه اللى بتنادى من بعيد اوى واول ما نقرب ليها ونبقى فيها تاخدنا فى عالم تانى الحلم لو لينا لوحدنا حياخدنا لعالم بعيد وحيد بارد لكن الحلم وفى حد ليه او بيشاركك حلمك بيبقى دافى وجميل زى الطبيب بيحلم لمريضه بلشفاء والمدرس اللى بيحب تلاميذه وبيساعدهم على الاستيعاب وكمان المهندس بس مش بيكبر فى مجاله عشان نفسه والا حلمه حيكبر وهو حيكبر بس حيبقى كهف مظلم كهف جدرانه الماده اما لو بيحلم وحواليه حبايبه و اللى بيحلم ليهم وبيهم وبيشاركوه حلمه بيتهيالى بيبقى فى حلمه مش وحيد وحواليه ناس كتير اوى اوى اصلى بحس ان الفشل الوحده مرادف ليه مهما كان الانسان محقق من مكاسب ماديه وادبيه و امنيتى احلامنا تدينا ما تاخدش منا و كلنا كلنا نحكى احلامنا ايه منها اللى ادام نفسنا خلانا انتصرنا او خلانا ادمها اتهزمنا وبحبكم كلكم والتوفيق لينا كلنا يا رب

[blckyoligy]

[CENTER] طبعا الموضوع جامد انا بقه حلمي بسيط حلمي اني ....






اعيش بني ادم في البلد القذره ديه....حلمي اني احس اني بني ادم عشان اقدر احلم

[BEDO210]

يا جماعة انا عاوز اكتب حلمى هنا عشان لما احققه ان شاء الله ابقى ارجع للموضوع ده وافتكر انه كان من الحاجات اللى شجعتنى على تحقيق حلمى انا حلمى انى اخد السى بى ايه (الزمالة الامريكية فى المحاسبة)واثبت للامريكان والغرب ان المسلمين متفوقين برضه ويمكن اعلى منهم كمان لو اتيحت لهم الامكانيات دعواتكم بقى يا خوانا

[BEDO210]

عندى حلم تانى برضه ومش هزار والله انى مركبش ميكروباص(وفى رواية اخرى ميكروباز) عقبالنا جميعا

[dalila7777]

احلام مشروعه بجد بس بلدنا مش وحشه ومش قذره يا اخى الفاضل البلد احنا واحنا مش وحشين وسورى الكلمه صعبه اوى هان عليك ازاى تقولها مصر مش الحكومه بكل سلبياتها مصر انا وانت وابويا وابوك وامى وامك وقرايبنا مصر الناس الطيبه اللى بتشقى وبتكدح اما يا صديقى اصحاب المواكب مش هى دى مصر ولو فيهم شرفاء كتير لكن احنا طول ما بنعافر ونقول لا لاى ظلم ولا لاى غلط بجد مش مهم انك قادر تقول رايك واتناقش معاك ده حق ادمى مشروع مش بلكلام الحاد حنتقدم بلعلم يا اخى لو عندك مقدره تشيل حجر من الطريق لو اى حاجه فى ايدك اعملها وصدقنى فى حياه ادميه فى مصر لكل اللى بيعافر الظروف واحنا شعب مش مرفه لكن بنحمد ربنا لاننا بلد طاهر الناس نقيه اما النفوس الضعيفه ما نجمعهاش بينا ونسميها البلد البلد انت وانا اما بخصوص موضوع الميكروباص با اخى العزيز انا نفسى الاقى الميكروباص يا بختك بجد يا بختك مش قر ده نق بس بجد انا فاهمه الحلم اننا نكون بنتعامل كادميين زى امريكا واوربا ما بيعاملوا ولادهم لكن بامانه وبكل رضا بقلك ان حالنا حال دول كتير وندعى ربنا ان بلمتعلمين الشرفاء نكون احسن واعرق شعب بينا بس البلد حتتقدم مش بلكلام الحاد ولا بلمقت الشديد للبلد والهروب منها البلد دى احسن من غيرها حتى لو لغوا الدعم والاسعار ولعت نار
بس بلدى وبحبها بص عمنا صلاح جاهين قال ايه
على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها وعيت
على اسم مصر
مصر السما الفزدقي وعصافير معدية
والقلة مملية ع الشباك .. مندية
والجد قاعد مربع يقرا في الجرنال
الكاتب المصري ذاته مندمج في مقال
ومصر قدامه اكتر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال
على اسم مصر
صلاح جاهين
بجد بحلم ان كلنا تبقى نسبة الاميه صفر ونكون كلنا شعب متعلم بنعرف بكره شكله ايه بجد شعب متعلم حيبقى عنده درايه بكل شىء حواليه وحلو انك بتحلم بتغيير الاحوال ويا رب حقق احلامنا كلنا وقلل من هزايمنا وشد ازرنا وعيد سعيد علينا كلنا

[mesk_islam]

بسم الله
بالنسبة للأخ الى اتكلم عن البلد
احب اوضحلك حاجة بس
احنا بلدنا دى احسن بلد فى الدنيا وفيها موارد وخيرات اكثر مما تتخيل
بس عارف المشكلة فى ايه؟؟؟
المشكلة مش فى حكومة ولا سياسة ولاغيره
المشكلة باختصار فى التعليم والعقول
طب استحلفك بالله تقولى ايه الى فى عقلك
ومنين حكمت على البلد؟؟؟ دخلت السجن قبل كده ولا حصلك حاجة ولا احنا بنسمع وننقل بس
اهم حاجة التفكير
والاحلام مرتبطة بالتفكير يعنى عشان ممكن نكون بنفكر وحش يبقى بنحلم بحاجات وحشة مينفعش نعملها وكمان مكن نحلم ان اى حد احنا مش بنحبه يحصله حاجة وحشة ده بقى يبقى اسمه ايه اسمه تفكير سلبى لانك لازم تفكر كويس عشان احلامك تبقى ايجابية
هات ورقة وقلم واقعد اكتب كل احلامك واحذف منها الوحش
وعلىالعموم انا همت انا كل احلامك مادية زى الفيلا والعربية وكده طيب ومين فينا مش كده؟؟؟ بس اهم حاجة تحلم بهدف وتفكر كويس
والسلام عليكم

[blckyoligy]

بالنسبه للاستاذ اللي عايز يعرف ايه الي في عقلي وجبت كلامي عن البلد القذره ده منين يا ريت تشوف موضوعي ده بس تقرا كله وانت هتصدم وهتعرف ان انت عايش في مستنقع من الظلم مش في بلد



مصر لييييه....رساله من واحد مخنوق ( http://www.dvd4arab.com/showthread.php?t=624150)

[/QUOTE]
[/CENTER]

[أ. علاء محمود]

انا عاوز اشارك واقول حلمي وعقدتي
انا مؤهل متوسط 32سنة
طيب فين المشكلة ؟؟
الناس بتبص للمؤهل المتوسط على انه جهل
وعلى فكرة انا قريت كتير جدا وفي كل شيء وعندي ثقافة عامة كويسة
علشان كده بحاول اثبت ده ولقيت ان مشاركتي في المنتدى بتعوضني
انا شاركت في موضوعات كتير ورفعت كتب وكتبت مواضيع وبحاول اثبت نفسي
وحلمي ان تعبي في المستقبل ييجي بفايدة ونفس موضوع واحد ليا يلفت الانباه
وشكرا

[dalila7777]

هاى يا اخ علاء يالى بتقول موهل متوسط اولا انا ححكيلك حكايه من اختك تثبت ان موضوع الموهل ده فى دماغ ناس عفى عليهم الزمن انا كنت فى اولى معهد ورحت شركه اجنبيه وفاكره كويس كانوا محتاجين مندوبين تسويق الكلام ده سنة 1997 من زمن يعن صراحه 96 بس بحب اصغر نفسى المهم ما كنتش فارقه الموهل اللى قعد واشتغل كمبيوتر ونجح فى اختبارات اللغه اشتغل واللى معاهم الشهاده خدوها يبرززوها اخى الموهل المتوسط مش عيب يا اخى انت ما قرتش الموضوع من اوله العيب قلت العلم وانت على قدر من الثقافه طبعا مش فى ثقافتى المتواضعه ولعلمك انا من قراء ميكى اخى العزيز كل اللى حيقرى موضوعك حيشهد بنضوج فكرك وبتواجه نفسك بلى جواها ومش معقدكمان وان كان اوى مضايقك الموهل المتوسط وحضرتك مثقف والنبى امنيه تيجى تتفرج على الطلبه عندى اللى اغلبهم موهلات عليا ومش بيكتبوا كويس الحروف زى واللهى بص الموهل مش مقياس المقياس العقل وبلحق واسئل اى حد شغال فى مكان محترم المهارات اللى بتتتطلب ولا الموهل عارف بيجيلنا من شرق اسيا ناس بيشتغلوا بمرتبات خياليه لان مهاراتهم اعلى مننا واغلبهم يا دوب بيقرى يا خويا بطل افكار زمان واستهدى ب لله وخلى عندك ثقه بنفسك الدنيا ابسط من كده ثم ان ماله الدبلوم يا ريته كان دام ما علينا ما تقلبش علينا المواجع مانا لو كنت اكتفيت بلدبلوم كان زمان معايا عشر عيال بلا تعليم بلا هم يلا قلبت عليه المواجع الله يسامحك
اخواتى ما تيجوا نحكى احلامنا ايه والنبى ما فاكره فكرتنى بايام يا ريتها دامت ما علينا ماتيجوا نحكى احلامنا ايه اللى اللى انتصرنا فيه وايه اللى مع الوقت والزمن هزمنا يلا اعده بلعافيه وبجد بتشرفنى صداقت حد بنضوج عقلك بس بلاش والنبى تصنف نفسك حسب المؤهل

[أ. علاء محمود]

طبعا انا شاكر ليكي ردك الجميل وانا مش مهم على فكرة عندي المؤهل
انا الحمد لله بشتغل كويس تخيلي بشتغل إيه؟ مهندس كمبيوتر !!
ده لقب طبعا انا بشتغل في تركيب وصيانة الكمبيوتر
بس قصدي نظرة الناس
والف شكر على ردك وموضوعك الهايل ده
تقبلي تحياتي
علاء محمود

[dalila7777]

[شكرا على انك بجد افادتنا بكلامك يا اخ علاء

[dalila7777]

كل عام وكل اصدقائى والبشر جميعا بخير يا رب

[magicmay]

mawdo3ek begad begad gameel mesh t3ady

kon ba7lam awy awy eny ab2a modefa 3shan ba7eb el safar
wba7eb el taghyeer laken ma3reftesh l2en el mawdo3 sa3b awy awy blnsbale delwa2ty ana khalast derasa w 7astaghal modaresa ll atfal yareet l2ny ba7bohom awy

[an an]

اولا شكرا علي موضوعك
ثانيا انا لما كنت في الكليه كانت صعبه جدا وكنت نفسي اجيب الامتياز بصراحه كانت مامتي و بابايا و اخواتي بيشجعوني لكن الكليه كانت اصعب اوي من اي سنه تانيه و الابحاث كتير و الدكاتره بزيدو في تعقيدنا و حسيت انه من الصعب اني اجيبه بس حاولت وعملت اللي عليا وجه وقت الامتحان وكان عباره عن دمار مش اختبار من الاخر كانو بيقوللولنا انسو الامتياز
بس مع المذاكره وتوفيق ربنا اولا حصلت عليها وكان ترتيبي السادسه مع مرتبه الشرف الحمد لله

[dalila7777]

اولا مبروك طبعا ثانيا كلنا نتمنى نكون فى مثابرتك وتصميمك على تحقيق املك ونتمنالك التوفيق يا جماعه لسه الامانى ممكنه ادام عندنا صبر وامل ويا رب حقق لينا احلامنا والامتياز دايما يكون هدف نوصله كلنا

[an an]

شكرا لردك واتمني لكي الامتياز في حياتك كما انتي ممتازه في موضوعاتك