محتاج نصيحه . هل اشتغل اى حاجه ولا استنى ؟؟؟

[THE FREE KNIGHT]

بسم الله الرحمن الرحيم


انا محتاج نصيحه من الناس ذوى الخبره .

انا مخلص تجاره انجليزى دفعه 2006 تقدير جيد


انا بحب المحاسبه جدا وجايب فيها تقديرات كويسه الحمد لله .


ودلوقتى المعروض عليا شغل ساليز مبيعات يعنى او خدمه عملاء وكلام كده مش محاسبه يعنى .

وانا عارف نفسى مبحبش الكلام ده لانى مش اجتماعى اوى .


فهل تنصحونى اشتغل اى حاجه ؟؟؟؟؟

ولا استنى اشتغل الحاجه اللى بحبها وحاسس انى هنجح فيها ؟؟؟؟؟



وياريت لو حد له تجربه فى الموضوع ده يحكيها


وشكرا

[tatababe]

انا عن نفسى عايز اقولك حاجه مهمه لازم تحطها فى دماغك
احسب حياتك كمان عشر سنين واعرف انت عايز تكون فين
يعنى لو انت عايز فلوس وخلاص اشتغل بس اعرف ان الناس دى ممكن تسيبك فى اى لحظه
السلز ممكن يكون دخل جامد اوى بس مش دايم او ممكن ما تحصلش حاجه خالص
انا من رايى ان انت تفكر انت عايز حياتك كمان عشر سنين تكون عامله ازاى واحسبلها كل حاجه بالضبط
يعنى مثلا انت تجاره انجليزى وتقدير كويس انا من رايى تكمل شهادات الcma و ال cpa وتقوى نفسك فى الانجليزى ده مجالك ولو لقيت وقت فاضى استثمره فى شغل حتى يجبلك مصرفك
بس المهم انك تعد نفسك كويس جدا جدا جدا للوظيفه الى انت بتحلم بيها لان ان شاء الله هتيجى الفرصه وساعه لما تيجى تكون انت قدها
انا على فكره متخرج دفعه 2005 ولسه نفس حكايتك بس انا عندى الامل وعملت الى عليا ومستنى فرج ربنا انه يفتحلى طريق احقق فيه طموحى

[wael20019]

بص يا سيدى الفاضل اناهختصرك كل حاجه فى كلمتين

حب ما تعمل حتى تعمل ما تحب

اخوك وائل

وربنا معاك ومع الجميع

[gatmom2002]

2ana 2ashta3'al 2ay 7aga badal 2al 2a3dah fe 2al bet

[fahdof]

السلام عليكم يا اخي ..... مفيش حاجه اسمها تستنى علشان متعرفش اولا انت حتستنى اد ايه ... تاني حاجه كفايه اللي اهلك صرفوه عليك .... تالت حاجه اشتغل ولكن مش اي حاجه طبعا ,, يعني شغل في مكان محترم ومرتب الا حد م كويس ..... وأهم من ده كله انك تتقي الله في كل حاجه تعملها

[THE FREE KNIGHT]

شكرا لكل الناس اللى ردت عليا .

بس ياريت حد يحكى عن تجربته الشخصيه علشان الاستفاده تكون اكبر وبعدين يقول النصيحه .

واخص بالشكر الاستاذ طاطا بيبى لان وجهه نظره قريبه جدا منى .

وردا على سؤالك انا عايز ابقى ايه بعد عشر سنين عايز ابقى محاسب كبير يعد ميزانيات الشركات و القوائم الماليه .

بس هل الحلم ده هيتحقق ولا احنا فى زمن الاحلام بس ؟؟؟؟

[THE FREE KNIGHT]

وأهم من ده كله انك تتقي الله في كل حاجه تعملها

انا علشان تقوى الله بحاول ابعد عن البنوك لان فيها شبهه حرام .

والله اعلم

[amryano]

انتوا عايشين فى مصر معانا ولا اية؟
يبنى اشتغل اى حاجة ولما يجيلك احسن سيب الشغل

[meso2005]

انا رأىى أنك تشتغل الحاجة الى انتا بتحبها لانها هاتخليك تخلص فى شغلك وتنجح فية , واصبر بس فى نفس الوقت اسعى ودور على المجال الى انتا حابة لحد ما ربنة يكرمك بوظيفة الى انتا عايز تشتغلها
لانى فى نفس التجربة الى انتا بتمر بيها ( وربنا يوفقنا جميعا )

[awad434]

بص ياباشا ان خريج دفعه 2006 بس عربى اول ماخلصت واحد صاحبى جابلى شغل سيلز فى اديداس فعلا مرتب حلو كبدايه 800 جنيه ودلوئتى زاد بئه 1000 بس انا ماستحملتش اكتر من شهر وسبته لانى عن نفسى حسيت ان ده م مجالى حشتغل سنه سنتين طب وبعدين عملت فلوس بس انا ولا حاجه فى الاول وفى الاخر بياع وناس اقل منك تتامر فيك وتتحكم فيك وكمان اللى بيدخلوا يشتروا منك بيملكوك لانهم داخلين بفلوسهم وانت ماتقدرش تفتح بئك معاهم لان فى اى لحظه بالسلامه وكمان لاقدر الله لو تعبت ماعندهمش رحمه مافيش حاجه اسمها تعب ليك يوم وبس والله واحد قالها لواحد يوم ماشوفك بتموت ساعتها اديك يوم تانى فانا خلعت من الموضوع ده وروحت مكتب محاسبه اينعم اخدت اول ماروحت 50 جنيه بس فعلا اتعلمت حاجات كتير اوى دلوئتى زدت بئيت 150 بس اتسجلت فى سجل المحاسبين والمراجعين وبعد 3 سنين افتح مكتب يكون بتاعى وبعمل ميزانات واقفل حسابات وشغل فعلا جامد عدى 8 شهور اهو والايام بتعدى فانت لو عايز فلوس وبس روح السيلز اما لو عايز تتعب شويه وفعلا بعد كده حيكون عندك فلوس كويسه من مكتبك وربنا يوفئك انا حبيت بس احكيلك تجربتى يمكن تفيدك وانت تختار والسلام ختام

[inmyhart1]

انا تجاره انجليزى اسماعليه
بس انا من بورسعيد
انا دى اخر سنه ليا البكالريوس
بص يا اخى
مفيش دكتور دخلنا الا وقال الكلمتين دو
ماتقولش اى حاجه اى شغل لا استنى وضور وجهز نفسك بكورسات واتعب وفى الاخر هتلاقى الى
يقدرك والشغل الى تحس فيه ان تعبك مش على الفاضى انا لغايه دلوقتى تقديرى جيد جدا
ادعيلى
انا اميلى
inmyhart1@hotmail.com