ايه رايكم لو صنعنا وظيفتنا بايدينا ؟

[hanny_moon25]

السلام عليكم
انا بحكم اني بحاول الهجرة من مصر زرت منتديات ومواقع غربية كتير عشان اشوف وسيلة للهجرة الى اي بلد
وانا في احد المنتديات الخاص بدولة مولدفيا وجدت موضوع رائع جدا
المنتدى مختص بالمغتربين المولدفييون في اوروبا الغربية
وفي احد اقسام هذا المنتدى قصم باسم اصنع وظيفتك او اصنع شغلك
اد ايه الناس عمليين فعلا
ما علينا نكمل
الناس دي قالت بدل شركات الوهم بتاعة الانترنت متيجوا نشتغل بجد ونستغل الانترنت
كل واحد عنده فكرة او دراسة جدوى لمشروع يعلن عنها ويطلب ويشوف هو عايز اد ايه من الشباب سواء شركاء اوعاملين والناس دي ساكنة فين وبعدين يتثبت الموضوع لغاية ما يجمع الناس
وبيجتمعوا وبيتفقوا على كل حاجة وبعدين يبدوا البحث عن تمويل ومكان لاقامة المشروع
وفي الموقع اكثر من عشر مشاريع تمت بالفعل
ولصعوبة الترجمة مقدرتش اكمل الموضوع ولكن خدت الفكرة وقولت اعرضها هنا
يا اخوانا صدقوني احنا عندنا امكانيات كثيرة جدا بس مش بنعرف نستغلها
احنا لو استغلينا النت صح هنعمل بيه البدع
دي وسيلة سهلة جدا انك تجمع ناس وتقنعهم بفكرة كعينة من غير ما تتعب في البحث عنهم
لو كل شاب استغل النت صح وجمع عشر شباب من منطقته او قريبين منه وعملوا مشروع بسيط او حتى قدموا على قرض كبير بضمانات او بدون هيقدروا يعملوا كثير
الغرب ناجح لانهم متعاونين مع بعض
يعني فيه في مصر مشاريع لو عملتها لوحدك ممكن تفشل لكن لو عملتها مع مجموعة هتعمل امبراطورية في زمن قياسي
انا عن نفسي عامل مشروع تربية ارانب ولكنه على قدي لكن لو معايا خمس اشخاص مثلا وكل واحد دخل ب خمسة الاف جنيه
بقى معايا 30الف جنيه وهنوفر اشراف لو فيهم واحد خبرة وهنوفر مكان لو حد عنده مكان
ممكن الثلاين الف دول مثلا يجيبوا 300ام ببطارياتهم ويفيض فلوس لمصاريف التربية
النظافة هتبقى سهلة لاننا ستة شغالين وكذلك العلاج
لو فرضنا ان الام الواحدة هتديني 5 نتاج في البطن الواحدة اي في الشهر
بقى عندي 1500 نتاج قولوا هيموت منهم 500 واحد وده احتمال ضعيف جدا
بقى عندي الف نتاج وبعد شهر مصاريف هيوصل وزنهم لكيلو ونصف مثلا
يعني بقى عندي 1500 كيلو
لو فرضنا ان الكيلو ب 10 جنيه وده اقل سعر ليهم
بقى معانا 15000 الف جنيه
شيل منهم 5 الاف مصاريف
بقى معاك 10 الاف جنيه صافي يعني في ثلاث شهور او اربعة هتغطي مصاريفك
لكن انا لوحدي مثلا هيبقى عندي نقص مثلا في علاج ام
هاكسل مرة في النظافة
شفتم ان احنا عندنا امكانيات بس مش بنعرف نستغلها
ارجو تثبيت الموضوع لفترة بسيطة حتى تصل الفكرة الى معظم الشباب
ولو نجحت ارجو من مشرفي المنتدى تخصيص قسم للمشاريع التعاونية بين الاعضاء
ارجو ان تعجبكم الفكرة وتشرعوا في التطبيق

[ahmed_ali688]

والله انا مش عارف اقولك ايه غير

جزاك الله خير

وانا موجود وهفضل متابع وانا فاضى يعنى ممكن اى حد لو عايز اى حاجه كمشروع صغير يعنى نقعد مع بعض ونتكلم وربنا يكرم الجميع

[hanny_moon25]

تكملة لمشروع الارانب
ممكن نقسم الشغل بينا مثلا اربعة يهتموا بالتربية والنظافة والعلاج وواحد للتسويق وواحد لشراء المستلزمات
وطبعا لنجاح المشروع لابد اولا من صياغة عقد شراكة يحمي كل واحد من غدر الاخرين
لان سبب نجاح الغرب ايضا هو عدم ثقته في الطرف الاخر ولابد ان يتم كل شئ قانوني حتى يحمي نفسه ويحمي شريكه
وشغل بقى المشاعر وده اكتر من حبيبي وعيب ان اكتبوا على عقد كل ده هيادي لفشل المشروع لان الانسان ضعيف
ممكن في حالة الفشل يخلع ويسيب الباقي يغرق
وممكن في حالة النجاح يطمع وهكذا
ومع كبر حجم المشروع نستطيع ايضا ان نوفر ثمن الادوية لانك هتشتريها جملة لان عندك عددكبير هيستهلك
وممكن تصنع علفك بنفسك وتوفر
ولابد من وضع خطة طموحة للمشروع اي مع قيام المشروع بالفعل يتم البحث عن ارض فضاء مثلا وبناء مزرعة ومعلف ومجزر وزراعة البرسيم وتسطيع ان تقوم بالبحث في ارض فضاء رخيصة بالقرب من المكان الذي تعيش فيه انت والمجموعة وتقوم ببناء المزرعة وبناء استراحة بجوارها
وهكذا يتم التفكير في التحسين الى ان تصل الى الدخل الذي يناسبك انت ومجموعة العمل معك
ده مشروع انا عرضته
ارجو من الاخوة حين التفكير ان يعرض الافكار بالكامل هو ومجموعته حتى يستفيد منهم من ليس لديه افكار
اعتقد انه موضوع يستحق القراءة
انا كتبت هذا الكلام بدون ترتيب واعذروني لانها افكاري الغير مرتبة ولكن ممكن ان تفيد غيري
بالتوفيق للجميع

[hanny_moon25]

ايه يا جماعة ما شوفتش حد قدم فكرة يعني او اقترح مشروع وطلب ناس معاه
الفكرة مش كويسة ولا ايه

[tatababe]

السلام عليكم ورحمه الله وبركاته
اولا الف شكر ليك الموضوع جميل جدا
واساسا نجاح المشاريع بيعتمد على فكره كويسه وتوفيق من الله وامكانيات
بس الامكانيات اليموين دول انت عارف يعنى مثلا علشان تقسم مشروع معين هتبقى محتاج 5 الاف او 10 الاف
هيتجابوا منين اذا كان انت وراك التزامات تانيه
واعتقد ان فكره القرض حراااااااااااااااااااااااااااااااااااااااااااااااا ااااااااااااااااام شرعا
ده كلام العلماء الثقات ذى محمد حسان و محمد حسين يعقوب و ابو اسحاق الحوينى ربنا يغفر لهم وينفعنا بيهم ويطول فى عمرهم ويدخلهم فسيح جناته
هيبقى سا عتها الحل ايه
هو انا اساسا ادامى فكره مشروع كويسه مع اصحابى بس انا ورايا التزامات ومش عارف اجيب الفلوس
فانا كنت عايز اتتاكد عن حكايه القرض ده حرام ولا حلال والعمل ايه لو حرام
لازم ندور على مصدر تمويل تانى
المصدر ده هيكون منين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وربنا يوفق الجميع

[hanny_moon25]

شوف يا اخي انا لي راي في موضوع القرض ده مع احترامي لكل العلماء الاجلاء
الاسلام حرم الزنا وجعل بديل له الجواز
وحرم السرقة وجعل بديل لها العمل
وايام سيدنا عمر لما الناس سرقت عشان تاكل لم ينفذ فيهم الحد
السبب لعد وجود البديل الاسلامي
طالما مفيش قرض اسلامي خلاص مفيش حل
لكن شيوخنا الاجلاء يوفره لنا قرض اسلامي من بنك اسلامي
لكن البنك بيبقى اسلامي في الفائدة بس
لكن شروطه في القرض بتبقى افظع من البنوك الربوية
فهذا رايي وسيبك من اللي بيتكلم وبس ويقول حرام
اديني البديل ولو انا خدت من الربوي يبقى معاك الحق انك تقول حرام
واحنا مضطرين والضرورات تبيح المحذورات والله اعلم

[alaadin10]

اعتقد ان الفكرة كويسة جدا لكن ينقص هذا الاختلاف الذى يمكن ان يحدث بين الشريكين فما بالك عندما يكونوا خمسة اعتقد ان التفكير لازم يكون بتأنى وبدراسة اكبر وارجو من الاخ هانى توضيح مشروع الارانب اذا كان قد نفذه فهل هو مشروع ناجح ام لا وما هى اسس النجاح فى مشروع مثل تربية الارانب وجزاك الله خيرا

[tatababe]

طيب انت تعرف ايه عن قرض الشباب
او حتى انا ممكن اخد قرض ازاى
اعمل ايه
يا ريت توضح لى الفكره دى
مع العلم مفيش ضمان لا مرتب ولاغيره
مستنى ردك

[hanny_moon25]

اعتقد ان الفكرة كويسة جدا لكن ينقص هذا الاختلاف الذى يمكن ان يحدث بين الشريكين فما بالك عندما يكونوا خمسة اعتقد ان التفكير لازم يكون بتأنى وبدراسة اكبر وارجو من الاخ هانى توضيح مشروع الارانب اذا كان قد نفذه فهل هو مشروع ناجح ام لا وما هى اسس النجاح فى مشروع مثل تربية الارانب وجزاك الله خيرا

شكرا لردك
وانا معك انه لابد من وجود خلاف ولكن المهم ان يتفقوا
فاعتقد ان الشباب عندنا دماغه كبيرة وبيعرف يتغلب على المشاكل البسيطة دي
اما بخصوص مشروع الارانب انا بالفعل اعمل فيه منذا اكثر من سنة
هو مشروع رائع ولكن كما ذكرت في المشاركة الاولى لو معي مجموعة هيبقى المقابل اعلى والشغل افضل والخسارة اقل
وبدل ما انا استنى سنة كمان عشان اكبر مشروعي لو معايا ناس تانية هنكبر بسرعة
اما اسس نجاح المشروع
فيوجد موضوع متكامل في منتدى المشروعات الزراعية يفيدك واذا احتاجت معلومات ارسل لي رسالة خاصة وهابعت لك مواقع هتفيدك جدا في كل المشاريع الانتاجية الحيوانية والزراعية
ربنا يوفقك

[wael20019]

شكرا يا خى وربنا معاكم كلكم ويوفقنا الى هو حلال وطيب وربنا معانا جميعا لكى نرفع علم الاسلام

[DEMONARUNDO]

موضوع جيد ..

[ابن عفان]

السلام عليكم ورحمة الله وبركاته
أولاً : الموضوع راااااااااائع وجزاك الله خيراً يا اخى hanny_moon25 وفعلا لازم كلنا نتحرك

ثانياً : لى ملاحظين على المشاركة
شوف يا اخي انا لي راي في موضوع القرض ده مع احترامي لكل العلماء الاجلاء
الاسلام حرم الزنا وجعل بديل له الجواز
وحرم السرقة وجعل بديل لها العمل
وايام سيدنا عمر لما الناس سرقت عشان تاكل لم ينفذ فيهم الحد
السبب لعد وجود البديل الاسلامي
طالما مفيش قرض اسلامي خلاص مفيش حل
لكن شيوخنا الاجلاء يوفره لنا قرض اسلامي من بنك اسلامي
لكن البنك بيبقى اسلامي في الفائدة بس
لكن شروطه في القرض بتبقى افظع من البنوك الربوية
فهذا رايي وسيبك من اللي بيتكلم وبس ويقول حرام
اديني البديل ولو انا خدت من الربوي يبقى معاك الحق انك تقول حرام
واحنا مضطرين والضرورات تبيح المحذورات والله اعلم

الأولى جملة ( شوف يا اخي انا لي راي في موضوع القرض ده مع احترامي لكل العلماء الاجلاء )

أخى فى الله
قال الإمام على ( كرم الله وجهه ) " لو كان الدين بالرأى لكان المسح على باطن الخف أولى "
فأذكر نفسى واخوانى أن الدين ليس لنا فيه رأى
إنما هو أمر الله وليس لنا إلا الامتثال له مهما بدا لنا صعباً

الثانية ( السبب لعد وجود البديل الاسلامي
طالما مفيش قرض اسلامي خلاص مفيش حل )
نحن لا نسأل الله عن البديل لكل محرم
" لَا يُسْأَلُ عَمَّا يَفْعَلُ وَهُمْ يُسْأَلُونَ " الأنبياء 23


وكما انه يوجد البديل فعلاً
وانت قلته كبديل السرقة وهو العمل
إخوانى العمل كثير ولكننا ( مستعجلين ) شوية
فيها ايه لما أقدم على شغل لا يحتاج أى مؤهلات ويمكنه تحقيق حتى 300 جنيه شهرياً
أو مشروعك الصغير لا تستهلك منه أرباح لمدة سنة مثلاً
وقبل كل هذا استعن بالله واسأله أن يوفقك لأنك تركت الحرام ابتغاء مرضاته سبحانه
وإن كنت صادقاً معه فكن على يقين أنه لن يخذلك
وكما قلت الموضوع محتاج صبر كبير جداً

أعلم ان الظروف تخنق
والاحوال صعبة جداً
ولكن هنا امتحان من الله عز وجل لنا
فإن لم يظهر الايمان فى الشدة
فلا أظنه يظهر فى الرخاء

فى النهاية
أسأل الله أن يوفقك يا أخى الغالى و أن يسدد خطاك
ولولا إنى ماليش فى موضوع الارانب ده انا كنت شاركتك ( ولو إنى ماملكش رأس مال برضه )
آسف على الاطالة
وأرجوا أن تكون فهمت وجهة نظرى
وجزاك الله خيراً على طرح الموضوع المهم جداً
والسلام عليكم ورحمة الله وبركاته

[osama elshamy]

جزاكم الله كل خير على افكاركم الجميله واتمنى فعلا ان احنا نحاول نفكر فى افكار لمشاريع بحيث كل الشباب يستفيد وبالنسبه ليا انا صراحه لسه ما فكرتش فى حاجه معينه لاكن ان شاء الله لما اتوصل لاى فكره ان شاء الله هاشاركم بيها الرأى واتمنى من الله ان يوفقنا جميعا

[lovle2]

بجد ربنا يحميكم ويوفقكم يارب هى فعلا المشكلة دلوقتى التمويل فى شباب زكية جدا وعجزهم الوحيد هو التمويل ربنا معاهم يارب ومعانا وربنا يوفقنا كلنا

[wael20019]

ايه يا شباب وقفتم ليه ان تكمله الموضوع اين الناس يا جماعه احنا عايزين المسلمين يعلو قيمتهم فى هذا العالم الذى اصبح الماده فيها كل شئ يا جماعه لازم نحدد اهداف وننفذه مهما يحصل مهما يحص يا جماعه حرام والله العظيم حرام
اللى احنا فيه ده حرام مجتمع فاسد

لازم نغيره لازم ومش بالكلام وبالفعل مان عشان الاسلام مش كلام وبس ده فعل كمان


انا اسف على الاطاله اخوكم وائل