فكرة جديدة للجميع ((أرجو التثبيت)) [الأرشيف] - موقع الدي في دي العربي

the_smarter

11-03-2005, 01:22 PM

السلام عليكم و رحمة الله و بركاته

ملاحظة: لقد ترجمت هذا الموضوع بناء على طلب الأعضاء

في البداية أحب أن أقول لكم أن الفكرة التي سأقدمها لكم هي حلم يراودني منذ كنت صغيرا

ببساطة, أود أن أكون فريق من الخبراء و المتخصصين في مجال الجرافيك و البرمجة لنتعاون سويا و نقوم بتصميم أول لعبة عربية عالمية تكون علي مستوي لمنافسة الألعاب الغربية بل و تكون مؤهلة للفوز بالجوائز الدولية في مجال الألعاب

صدقوني الموضوع ليس صعبا و لكنه يحتاج إلى صبر و جهد كبيرين

كل ما أطلبه هو أن يسجل كل من يرى نفسه قادرا أن يساهم بشكل أو بأخر في تنفيذ ذلك المشروع كي يكون حقيقة اسمه في هذا الموضوع و ما سوف يقوم به من مشاركة (فكرة-لحن-برمجة-تصميم-كاميرا-اضاءة-.....)

نحن نملك الامكانيات (الأفكار و الخبراء) و لكن ينقصنا الإرادة و المبادرة.

أرجو أن نبدأ انجاز ذلك العمل في أقرب وقت ممكن..

في انتظار ردودكم و لكم جزيل الشكر

ستكون مراحل العمل على النحو التالي:

1- تكوين الفريق
2- الاستقرار على الفكرة
3- تحديد المتطلبات
4-بدء العمل (بإذن الله)

MO2KILL

11-03-2005, 01:34 PM

انا سأكون من اول المشجعين لك فى هذا الموضوع الذى تأخرنا فيه كثيرا ولكن اظن حان الوقت للبدأ فيه الان وكنت اود لوكان لدى من الخبرة ما استطيع تقديمه لكم ولكن ادعو الله لكم بالتوفيق و الى الامام وفى انتظار مشاركة الجميع لتكتمل الصورة.

kokoeffect

11-03-2005, 01:49 PM

اخي the_smarter انا اول من يؤيدك في ذلك الموضوع الرائع وانا اتكلمت فيه قبل كده ومفيش غبر 3 بس كانوا معايا . لو كده انا ممكن ابعتلهم رسائل واضمهم لينا . وعموما انا PROGRAMER . واعتبرني من اول المتطوعين .وياريت تذكر مجال خبرتك . علشان نبقي عارفين شكل الفريق هيكون عامل اذاي .

واشكرك علي اعادة تاهيل هذه الفكره الممتازه ...........

the_smarter

11-03-2005, 02:02 PM

أنا متشكر جداااااا
فعلا انتوا حمستوني أوي
و أنا قي انتظار المزيد من المشاركات في هذا الموضوع
و أنا اكون شاكر أوي يا kokoeffect لو ضميت إلينا من تعرفهم
واضح إننا حنبدأ فعلا
أما مجال خبرتي فهو (جميع برامج معالجة الصور و الأكشن سكيبت)
بالاضافة إلى العمل على برامج تصميم الموسيقي و المؤثرات الصوتية و المونتاج

d-virus

12-03-2005, 02:16 AM

والله فكره جامده اوى وانا اقدر اساعدكم فى
graphics design

director

اسماعيلاوى اوى

12-03-2005, 03:06 AM

استاذى الفاضل
انت بتتكلم عن نفسك ولا بتتكلم عنى
انا عندى 18 سنة ومن 5 سنين وانا حلم حياتى نعمل شركة مصرية وحتى بقالى 3 سنين كل ما استب ويندوز جديد بسمى الشركة (company) بكتب : Egyptian 3D Work
وحتى كاتب الاسم ده بالخط العريض بشكل كبير عندى فى الاوضة ولما حد بيسالنى ايه الجملة دى بقوللهم اى حاجة

انا من زمان حلم عمرى فى الحاجات دى وبدات اتعلم جرافيكس بسببها
انا على فكرة واخد كورسين 3D Maxs وكنت ضمن اول دفعة فى مصر تتعلم الماكس 6 اللى لسة مانزلش فى السوق وكان بيتدرس فقط فى الجيش والجامعة الامريكية وانا خدت كورسات فى الجيش
ومن حبى للمجال ده تفوقت فيه بشدة لدرجة ان الراجل اللى كان بيدرسلنا عرض عليا اشتغل معاه لما اخلص كورسات وانا لسة بفكر فى الموضوع ده لانى عاوز اخد الاول كورس Visual C و Basic عشان اقدر اعمل بقى العاب عالية اوى

استاذى العزيز
لو انت هاتعمل الموضوع ده
انا اول واحد هاشاركك فيه ولو عاوز هاشارك بالفلوس كمان بل ده انا هابقى قبل اول واحد حتى
ومنتظر ردك

اسماعيلاوى اوى

12-03-2005, 03:12 AM

وياسيدى لو عاوز تعرف تخصصى بالظبط كان بيبقى فى اللعب بالجرافيكس وعمل الشخصيات الكارتونية وتحريكها (وعمل افلام قصيرة)

lord ahmed

12-03-2005, 04:07 AM

الله كان فين الكلام دا من زمان وانا اول واحد اؤيدك لانى حلم حياتى هو صنع لعبه من انتاج مصريين وانا اعرف واحد صاحبى بعمي حاجات كويسه جدا على 3d ستوديو ماكس انا هعرض عليه الفكره واخليه ينضم ليكم
وانا كان نفسى فعلا انضم معاكم بس معنديش غير شويه افكار ينفع ..... بجد انا متشكر جدا ليك داحلم حياتى فعلا اننا نعمل لعبه
ولو الموضوع اتنفذ فعلا انا مستعد اخد دورات من دلوقتى

lord ahmed

12-03-2005, 04:10 AM

والموضوع فعلا ممتاز بل اكثر من ممتاز ويستحق التثبيت

GENNI

12-03-2005, 05:11 AM

بقى كده يا عم the_smarter؟ ... تسيبني في الموضوع اللي هناك و تيجي انت هنا؟ ... :p

لا مؤاخذة بقى يا رجالة .. أنا أول واحد في المنتدى ده رد على الراجل (في الموضوع قبل الترجمة :D) ...

أنا هاقول تاني خبرتي ... أنا بافهم كويس في البرمجة (++C و #C) ... لكني ماعرفش اي حاجة في الـ Graphics سواء 3D أو 2D ... و ماعرفش كمان إزاي هانربط البرمجة بالجرافيكس ... بس أنا عندي أفكار كويسة ... و مستعد للمشاركة بس في الأجازة بس :o ...

jeeto_sf

12-03-2005, 09:38 AM

i want in i want in
well i'm not a graphic designer or something like that
but i think i can give ya ideas and i can handle the music stuff
i can choose music for the game or create ones
count on me and u'll never regret
ok we can make it guys
i know we can

the_smarter

12-03-2005, 12:10 PM

يا جماعة
ردودكم بجد ردت فيا الروح... انتوا ادتولي أمل كبير أوي
أنتوا كلكم مشتركين معايا سواء كان دوركم كبير أو صغير
أحنا كنا محتاجين الفعة دي أوي
ألف شكر ليكم
يا ريت نبدأ أول مرحلة في خلال الاسبوع دة
يعني اننا نكون الفريق
و أنا طالب منكو أن حماسكم ميقلش و انكم تتابعوا الموضوع دة كل يوم
و إن شاء الله المشرف بثبتوا ويكون بداية حقيقية لشغلنا

the_smarter

12-03-2005, 12:14 PM

و يا genni باشا أنا لا يمكن اسيبك...
دنتا من أكتر الناس اللي حيكون ليهم دور في المشروع بإذن الله

gazoline

12-03-2005, 12:25 PM

فكرة بمليون جنيه .... بس امتى التنفيذ ...؟؟

lord ahmed

12-03-2005, 02:30 PM

ياريت يكون قريب انا مشتاق جدا
واوعدكم انى اكون اول واحد يلعب اللعبه دى .. ويقول رايه ..هاهاهاها

fymo

12-03-2005, 07:09 PM

أنا على أتم استعداد
ومجال خبرتى يا عم فى لغات البرمجة بردة ++C و Flash MX
وأنا جاهز وتحت أمركم بس يكون الموضوع جدى ومنكسلش

the_smarter

12-03-2005, 07:55 PM

يا جماعة الموضوع دة جد جدا جدا جدا جدا جدا...........
و واضح اننا حنبدأ اسرع مما توقعت
و عشان تتأكدوا إن الموضوع دة جد حقيقي
أنا بدأت أحط الجدول الزمني للمشروع
المرحلة الأولى تحديد الفريق
سيتم اعلان فريق تصميم المشروع الأساسيين بعد 7 أيام من الان
و حرسل لكل واحد فيهم رسالة خاصة
و حنكون شبكة داخلية بيننا للإتصال
[b]كما ارجو أيضا البدء في وضع اقتراحتكم عن طبيعة اللعبة التي سيتم إنشاءها!
أنا في انتظار المزيد

lord ahmed

12-03-2005, 11:54 PM

انا عندى اقتراح للعبه انا بحلم بيها من زمان بس على انها لعبه عربيه
ان تكون اللعبه 3d لو اللعبه استراتيجيه هتسقط
ثانيا تكون واقعيه يعنى شويه من الخيال بس خفيف جدا
ثالثا انها تحكى عن قصه لفارس مصرى
ومش لازم تكون اللعبه مقتبصه عن قصه حقيقيه
ممكن تبقى اى قصه تانيه زى قصص بكار مثلا كان واقعى وفى نفس الوقت مش قصه حقيقيه
دا كان اقتراحى

GENNI

13-03-2005, 01:34 AM

و أنا معاك يا معلم ...
و أحب أضيف رأيي إننا مش هاينفع نبتدي جامد قوي ... لازم ناخد السلم درجة درجة ... و طبعا لازم نعتمد على التاريخ المشوق بتاعنا عشان نجذب الناس للعبة ...

يعني مثلا ... أنا باشوف لعب بتكون بسيطة جدا و لكنها فيها ذكاء جامد جدا و بتقدر تشد الواحد و تلهيه عن اللعب العملاقة ...

يعني الخلاصة إنها لازم تكون لعبة معتمدة على الذكاء أكتر منها على الجرافيكس و الإمكانيات ...

kokoeffect

13-03-2005, 02:05 AM

سبقتوني بردكم الرائع هو ده اللي كنت عايز اقوله . بي ليه بقي . لان اللعبه لما بتكون فيها الغز وتكون الالغاز بتاعتها حلوه ده بيخليك تنسي اي حاجه . يعني مثلا في لعبه انا بلعبها دلوقتي والحقيقه الجرافيك بتاعها . اسف في اللفظ تعبان جدااااااااااااااااااااااااااااااا.... بس لعبتها وقربت اقفلها علشان جمال الالغز والموسيقه . وده في نفس الوقت بيبقي اسهل من الالعاب الاكشن . علشان انت عارف طبعا الاكشن بيحتاج هو و الاستراتيجي مجهود كبير علشان المِثرات الكبيره اللي بتضاف ليه .

اما عن قصة اللعبه فانا زمان وانا صغير كنت مالف قصص كتير قوي . هرجعلها . ولما الموضوع يمشي هقولكم عليها انشاء الله ............

tornadoo

13-03-2005, 02:12 AM

الفكره دى جامده جامده جامده جامده و انا عارف واحد استاذ استاذ استاذ انا ممكن ابقى اقوله يشترك معاكم و انا و الله لو كنت كبير شويه كنت اشتركت معاكم بس انا عندى 17 سنه بس و مش بفهم اوى يعنى فى الحوارات دى بس نصحه يعنى لو اللعبه مش جامده اوى من ناحيه كل حاجه يبقى بلاش منها احسن عشان بس تاخد اسم و منظر حلو

the_smarter

13-03-2005, 12:20 PM

تعليق على الاقتراحات المقدمة:
في البداية أشكر كل من ساهم بأي اقتراح لأنها كلها تسعى للصالح العام
من ناحية أخرى
على كل من يريد الانضمام لفريق تصميم اللعبة فليس هناك أى شروط أو قيود في ذلك مع التحفظ على أن من ينضم بقدم اضافة و لوكانت بسيطة
يا جماعة
تصميم لعبة مش بس برمجة و تصميم و رسوم...
دى حجات كتير أوي
دة cast ضخم في مجالات متعددة و متشعبة كلهم ليهم دور بشكل أو بأخرفى نجاح اللعبة
و أكيد كلكم عارفين الكلام دة

the_smarter

13-03-2005, 12:23 PM

ملحوظة هامة جدا::
فاضل 6 أيام و يتحدد الفريق الأساسي للتصميم
و على كل من يريد الانضمام يرسل لي رسالة خاصة و دوره الذي سيتولاة
مع العلم ان في اعضاء محترمين جدا دخلوا معايا خلاص من خلال ردودهم و أنا لى الشرف انى اشتغل معاهم
و أنا اشكرهم بشدة

Marilyn Manson

14-03-2005, 03:19 AM

انا معاكوا بأفكاري انا عندي شويه جناااااااااااااااان

اسماعيلاوى اوى

14-03-2005, 06:44 AM

حماسى ما يقلش؟؟؟؟؟؟؟؟؟؟
حماسى مايقلش؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ده انا بقالى خمس سنين بقوللك بدور على مشاركين ليا فى النظام ده وفعلا بدانا نخطط مع بعض بس هما انشغلوا بالدراسة اكتر فسبتهم

ببساطة
انا لو مااشتركتش ممكن يجيلى صدمة عصبية و اتشل

the_smarter

14-03-2005, 07:52 PM

[/u]يا جماعة تنبية هام:[/u]
[/u]5 أيام فقط على تكوين الفريق
أرجو المشاركة السريعة عشان الأيام بتفوت بسرعة
و اتأكدوا إن الموضوع دة جد 100%
أنا مستنيكم و مستني اقتراحتكم و تصويتاتكم و مشاركتكم

d-virus

14-03-2005, 09:30 PM

يا اخ smarter انا حضرت شويه افكار بس لازم يتكون الفريق بسرعه علشان ان شاء الله نبتدى نعمل ANALYSIS ونحدد الخطوات وعندى فكره جامده اوى بس سايبها مفاجئه

:5shocking :5shocking :5shocking :5shocking :5shocking :5shocking :5shocking :5shocking :5shocking :5shocking :5shocking

the_smarter

15-03-2005, 06:37 PM

4 أيام فقط يا جماعة
على من يريد التسجيل
أرجو السرعة

elmavya

15-03-2005, 07:20 PM

فكرة جامدة موت
بس فى حد بيفهم فى برمجة الالعاب او حتى بيشتغل على برنامج تصمييم الالعاب ؟

محمد شفيق

16-03-2005, 12:01 AM

فكره جميله جدا يا جماعه وانا عندى افكار جباره فى الموضوع ده فعلا الأفكار اللى عندى هاتكسر الدنيا لو اتعملت وعلى فكره انا عندى خبره كويسه فى ال Graphic 3d 2d وانا معاكم فى اى حاجه بس ابدؤا ومتكسلوش

jeeto_sf

16-03-2005, 09:43 AM

don't forget about me i said i'm in

movieman

16-03-2005, 11:59 AM

ايه يا جماعه هي كوسه ازاي تعملوها من غيري على العموم انا معاكم وانا كويس في 3دي استوديو ماكس وفي حاجه تانيه بدل ما انتم تعملو حاجه على برنامج 3 دي ماكس و تنقلوها لبرنامج سي ++ في برامج تانيه كتيره وانا كنت شارح واحد منهم و ادي الوصله للموضوع بتاع البرنامج
http://www.dvd4arab.com/forums/showthread.php?t=39792
وانشالله هاجيبلكم برامج تانيه

jeeto_sf

16-03-2005, 07:29 PM

hey smarter u have to put rules so we can pick the right members of the group coz i think that this will be a great project

the_smarter

16-03-2005, 08:03 PM

:::هــــــــــــــــــــــــــــــــام:::
في البداية يجب أن أوضح بعض الأمور:
1- المشروع الذي سنقوم به هو عمل يتطلب فريق عمل كبير نسبيا لكثرة المهام التي تتطلبها عملية التصميم و هذا بالطبع يحتاج لعدد كافي لبداية العمل و حتى الأن - بكل صراحة و مع احترامي لكل من طلب الاشتراك- لم يتوفر ذلك العدد
2- لا تعتقدوا أن عملية تصميم لعبة شئ صعب... اعلم اننا لسنا محترفين و لكن هذا لا يمنعننا من المحاولة
3- أرجو من كل من طلب الاشتراك أن يكون بالفعل مستعد كي يكون معنا في كل وقت و أن يكون ملتزما في البداية و إلى النهاية دون الشعور بالملل أو اليأس فالمشروع ليس وليد ليلة و لكنه جهد يحتاج إلى صبر و اتقان في العمل (و على كل حال انا أعتقد أن في خلال 6-10 شهور نكون أنجزنا معظم العمل, لتنطلق اللعبة في بدايات العام القادم)
4- أما عن الضوابط و القواعد الخاصة بالاشتراك فأنا لا أطلب سوي أن من يشترك يكون قادرا على المساهمة في أي مجال سواء كان في البرمجة أو الأفكار و السيناريو...)
5- أما عن كيفية الاتصالات بين المشتركين و طرق العمل فهي مرحلة لاحقة لحين التعرف على كل الأعضاء المشتركة
و الاستقرار عليهم

أنا في انتظار المزيد من المشاركات و الاشتراكات
خلال الـــــ3 أيام القادمة
و ارجو على من يريد أي استفسارات أو اقتراحات أخرى ألا يتردد في ذكرها لي
و تذكروا دائما أن هذا المشروع ليس مشروعي وحدي
و الله الموفق

jeeto_sf

16-03-2005, 10:10 PM

that's what i'm talking about
yeah man

jeeto_sf

16-03-2005, 10:13 PM

that's what i'm talking about
yeah man
u'r right about everything u said

bluestinger

16-03-2005, 10:42 PM

مفيش حد ممكن يتصور الفرحه اللي أنا فيها دلوقت,ياما كان نفسي في حد يقوم بالخطوه الجريئه دي ,عموما أنا مابعرفش برمجه و علي قدي في الجرافيكس بس مش 3ds max انا بعرف شويه maya بس علي العموم انا نفسي أشارك بأي حاجه .
أنا عندي شويه أفكار مش بطاله وليه أصدقاء كويسين في برامج الصوت والمونتاج وأكيد لو قلتلهم هيوافقوا علي طول.
وبالنسبه لي انا لو أحتجتوا لأي حاجه غير البرمجه او الجرافكس حتي ولو فلوس هشحت وجيبها.
ومين عارف احتمال أساعدك في جرافيكس اللعبه اللي جايه انشاء الله , وتمنياتي للجميع بالتوفيق بئذن الله

the_smarter

17-03-2005, 07:29 PM

يا جماعة فاضل يومين 2 و أنا مش شايف تقدم كبير
لو سمحتم اهتمام أكبر من كدة...
مفيش حد تاني عايز يشترك؟
مفيش حد يقولنا اقتراحات تانية

the_smarter

17-03-2005, 07:29 PM

أرجوووووووووووووووووكم
الموضوع جدي و لن أكرر ذلك

kokoeffect

17-03-2005, 09:22 PM

لا تقلق اخي smarter انشاء الله الموضوع هيمشي علي خير . ومتنساش ان في ناس كتير عندها اقتراحات بس مثتنيه لما نبداء علشان نكون كلنا مع بعض . والحمد لله ان احنا معانا كذا واحد ليه في كذا تخصص . وانا ليه يا سيدي اقتراح بس هو مش مجاله دلوقتي بس هقوله .
انا بقترح ان احنا لما نبتدي في عمل اللعبه انشاء الله وتظهر بعض معالمها . ان احنا نعلن عنها . هنا في المنتدي . كشهره لها كما يحدث في الالعاب الاخري .وده في حد ذاته هيشجع ناس كتير جدا علي الاشتراك
ومش هقول في اللعبه دية . بس انشاء الله في المجموعات القادمه . ده احنا بعد كده احتمال نعملهم test علشان نقبلهم يا راجل :D
انا مستني معاد البدء بفارغ الصبر واشكر كل من يحاول المساهمه في هذا العمل ولو بقدر ضئيل . وربنا يوفقنا جميعا ويكون هذا العمل بدايه لفاتحه جديده في العالم العربي ... امين يا رب العالمين .

the_smarter

17-03-2005, 09:47 PM

شكرا على ردك الجميل يا kokoeffect

bluestinger

18-03-2005, 04:38 AM

انا ببعتلك وبقولك ماشاء الله ربنا يقويك , ماتتصورش أنا فرحان قد ايه .
عموما انا مابعرفش برمجه ولسه ماخلصطش كرس الجرافيكس بس عموما أنا نفسي أشارك في الموضوع بأي حاجه حتي ولو فلوس هتصرف و اجيبهالك وعندي شويه افكار مش بطاله .
ياريت اشارك معاكوا في الموضوع و انت بكده تكون خدمتني , لأني كنت بحلم بحاجه زي دي من زمان و الe-mail بتاعي bluestinger007@msn.com

olla_zeer

18-03-2005, 12:55 PM

اولا احب اقول انى مبسوط جدا من الموضوع ده وان شاء الله ان شاء الله هايكمل

كل اللى شاركم فى الموضوع ده انا متاكد يا the master فيهم نفس حماسك وانا زيهم وزيك

بص كلنا ان شاء الله هانعمل كل اللى نقدر عليه وازيد سواء مديا او عمليا بس احب اضيف اننا نحاول نبدا فى اسرع وقت علشان الموضوع مايمتش بالنسبه للكميه هاتزيد ان شاء الله انا باقترح ان كل المشاركين فى الموضوع ده يكتبوا ايميلاتهم على الماسنجر او ال البالتووك ويفضل التانى ونحدد معاد نجتمع فيه كلنا على النت فى نفس الوقت ونبدا ننظم الموضوع

انا باذن الله هاشارك فى كل حاجه تصميم وافكار وموسيقى مش انا لوحدى طبعا انا اعرف ناس ممتازين جدا فى المواضيع دى

وبالنسبه للدعم المادى اعتقد كلنا عايزين نجاح مش فلوس يعنى اعتقد مش فى حد هايبخل على الموضوع ده بحاجه عنده وانا اولكم ان شاء الله

والله الموفق

Thantos

18-03-2005, 01:22 PM

فكره رائعه كان نفسي اني اشارك فيها جدا جدا خصوصا ان انا عندي خلفيه كويسه عن برامج الجرافيك ودرست اكتر من برنامج وكمان كل المشاركين اصدقائي بس للاسف انا دلوقتي هاخش كمان اسبوعين في امتحانات الميد تيرم وبعديها التيرم فمش هابقى فاضي غير اوقات قليله جدا لو ينفع اني ادخل معاكوا في اول شهر 6 ومش هاعمل حاجه غير مساعتكم علشان اعوض الوقت اللي فاتني ده وابقى بذلت مجهود قريب منكم علشان ميبقاش في الموضوع ده ظلم لحد انا مستني الرد من صاحب الموضوع ولو ينفع ان شاء الله هتلاقيني معاكوا في شهر 6 واي حاجه اقدر اعملها مش هاتأخر

the_smarter

18-03-2005, 02:01 PM

غدااااااااااااااااااااااااااااااااااااااااا
بإذن الله تعالى
سأعلن عن قائمة الأعضاء الأساسيين المكونيين لفريق التصميم
على كل من يريد الاشتراك بعد ذلك يمكنه ارسال رسالة خاصة لي
و غدا سيتم تحديد موعد لكافة الأعضاء المشاركين على Msn ((متفق علية مسبقا))
و بعد التأكد من موافقة ثلثي الأعضاء على الموعد المقرر سيتم اللقاء و تبليغ نتائجة لباقي الأعضاء اللذين تعذر بهم المشاركة..

أرجو تكثيف المشاركات و التصويتات اليوم
كما أرجو متابعة الموضوع غدا بإذن الله
في انتظار المزيد من التفاصيل
و شكر خاص لكل من شارك في هذا الموضوع و قدم أفكاره
إلى اللقاء غدا

اسماعيلاوى اوى

19-03-2005, 07:39 AM

خلاص ان شاء الله ماشى

jeeto_sf

19-03-2005, 12:28 PM

ok i'm with u man

movieman

19-03-2005, 01:54 PM

يا جماعه انا معاكم ولا لا انا ممكن اشتغل على البرامج ديت :

3d studio max
3d game studia

وممكن اساعد في عمل الاصوات ......الخ الخ الخ

AERO

19-03-2005, 06:11 PM

Go On Boy U Have Our Support And Blessing :)))))

d-virus

19-03-2005, 06:49 PM

iam waiting

the_smarter

19-03-2005, 07:27 PM

:::هام:::
*إعلان قائمة فريق التصميم*

بسم الله الرحمن الرحيم

مما تقدم لى من طلبات و مما ارسل لي من رسائل,,,
أود أن اعلن اليوم عن اعضاء الفريق المصمم للعبة و هم على النحو التالي ((وفقا لأسبقية الاشتراك)):

Genni
Koko Effect
D-virus
اسماعيلاوي اوى
Lord Ahmed
Jeeto_sf
Fymo
Marilyn
محمد شفيق
Movieman
Bluestinger
Olla_zeer
Thantos
و أنا The_smarter

و هكذا نكون 14 عضوا

و لكن ملحوظة هذة هي القائمة الابتدائية
فلمن يود ألا ينضم إلى الفريق أو يود الانسحاب فاليرسل لي رسالة خاصة تفيد بذلك
و من يود ان يظل موجودا فاليرسل لى رسالة خاصة لتصديق انضمامه مع ذكر مجال خبرته بالتفصيل و الايميل الخاص به

و ذلك خلال ثلاثة أيام من الأن...

و بعد مرور الثلاثة ايام سأعلن عن القائمة النهائية في الموضوع ذاته..

شكرا لكم مقدما و أجو أن أكون عند حسن ظنكم بي

GENNI

20-03-2005, 03:56 AM

يا باشا أنا بعت لك رسالة خاصة من زماااااااااان ...

أنا كان نفسي أخش معاكم لمن للأسف مش هاقدر ... زي ما قلت لك في أول كلامي أنا مزنوق جدا في الدراسة ... بس بإذن الله في الأجازة كده كده ناوي اتعلم #C ... و ده هايفيدنا كتير قوي ...

kokoeffect

21-03-2005, 09:32 PM

اين ذهبت يا اخي Smarter . طمنا عليك ان انت بخير

اسماعيلاوى اوى

22-03-2005, 05:53 AM

؟؟؟؟؟؟؟؟؟؟؟؟

jeeto_sf

22-03-2005, 07:57 AM

don't worry i'm sure he's just busy with u know
choosing team

the_smarter

22-03-2005, 12:24 PM

صباح الخير...

انا كنت غايب الثلاث ايام إللي فاتوا عشان كنت مستني لحد ما المدة تخلص

في الحقيقة مش كل النس ردت علية و دة زعلني شوية...

انتك عارفين اننا قليلين و انا محتاج لكل واحد معايا...

عموما انا حبعت لكل واحد فيكم رسالة خاصة فيها الايميل بتاعي و معاد اجتمعنا و إللي مش عايز يدخل هو حر لكن لو كان مش حينفع يدخل ياريت يبلغني.. احنا بس عايزين نجمع و لو مش حيفع نبدأ دلوقتي عشان الدراسة مش مشكلة ممكن نتفق على ميعاد مؤجل المهم اننا منسبش الموضوع؟

شكرا koko اسماعيلاوي & jeefo

DeMoN

22-03-2005, 05:31 PM

انا حاسس انى متأـخر بس يا ترى ممكن أشتغل معاكم
انا بأعرف أشتغل على game maker و ممكن أساهم بالأفكار و السيناريو

the_smarter

25-03-2005, 01:09 AM

اخبار تفرح

بسم الله الرحمن الرحيم

احب اقولكم اننا الحمد لله اجتمع معظمنا امبارح و و اتناقشنا حولين المشروع و كانت النتائج مبشرة جدا

بجد دي تعتبر اول خطوة ايجابية ربنا وفقنا فيها

غير ان العدد زاد قوي الحمد لله (( حاجة تفرح ))
و إن شاء الله حنجتمع تاني و حكتب الميعاد قبلها و إللي نفسوا يشترك معانا يبعتلي على نفس الموضوع
و مرحبا بالجميع

و يا جماعة انتظروا خلال يومين المفاجاة الكبيرة اوي؟؟؟

the_smarter

25-03-2005, 01:10 AM

Demon مرحبا بك معنا عضو جديد

lord ahmed

25-03-2005, 01:21 AM

ايوا يا جماعه فعلا احنا اجتمعنا امبارح
وتقريبا قدرنا نوصل لفكره اللعبه هتبقى عباره عن ايه
صدقونى الموضوع جادى جدا بس محتاج شويه حماس منكم
والله هنعمل احلى شغل
والعدد فعلا بدا يزيد
صدقونى المشروع ناجح ميه فى الميه
وانتظرو المافجأه قريبا

the_smarter

25-03-2005, 03:37 AM

لكل من يهمة الأمر

الاجتماع القادم يوم الجمعة 25 الساعة 6:30 مساء علي msn

jeeto_sf

25-03-2005, 09:46 AM

ok man i'm

jeeto_sf

25-03-2005, 09:47 AM

ok man i'm in

7BOOOB

25-03-2005, 08:59 PM

الفكرة رهييييييبه الله يقويكم

mgodaegs

25-03-2005, 09:55 PM

اؤيد هذا المجال لكن ليه اقتراح ان تكون اللعبة عبارة عن رحلة لاستكشاف عالم المصريات لانكم لو عملتم لعبة لكشن هتكون المسالة محتاجة امكانيات عالية
the way to pyramids

lord ahmed

26-03-2005, 02:26 AM

فعلا احنا فكرنا فى كدا
واللعبه ممكن هتكون تاريخيه ..يعنى من الاخر لازم يكون لها هدف
وربنا يسهل ان شاء الله

mgodaegs

26-03-2005, 05:03 PM

شدوا حيلكم اى لعبة تحتاج ناس كتيرة واهم ما فى الألعاب هو الأخراج
وكذلك ال control
والاهم ان تكون غير مكررة

kokoeffect

26-03-2005, 06:28 PM

يا شباب لقد تم وضع القصه الخاصه باللعبه وتم اللاتفاق عليها حيث اني مسكت الجزء الخاص بالقصه والسيناريوا
حتي الان فقط . ولهذا اريد ان اطلب منكم طلب . انا هقول الفكره العامه للقصه قريبا . وهقول اول فصل منها هيحتوي علي ايه وانا بطلب من اللي عنده مقدره انه يقوم بمساندتي في عمل السيناريوا ان يقوم بكتابة السيناريوا الخاص باول فصل في اللعبه ولو كان تمام يبقي هيتم اختياره ضمن الفريق . والف شكر للاهتمامكم بالموضوع ....

the_smarter

26-03-2005, 07:34 PM

:: تنوية ::

الاجتماع الثالث يوم الجمعة 1/4/2005 الـسـاعـة 6:30 مساَء

مع الشكر...

lord ahmed

26-03-2005, 09:19 PM

تمام يا فندم

d-virus

26-03-2005, 09:25 PM

الف شكر يا اخ the_smarter عملتو 3 اجتماعات و انا كل ده مستني رساله خاصه منك ول على الماسنجر زى ما كان الأتفاق ارجو مراسلتى على MOHAMMEDABDELHAI@HOTMAIL.COM

اسماعيلاوى اوى

26-03-2005, 10:01 PM

استاذى العزيز سمارتر
انت نسيتنى ولا ايه؟

jeeto_sf

27-03-2005, 01:22 AM

ok got it man
and i hope this meeting be more useful

the_smarter

27-03-2005, 02:42 PM

استاذى العزيز سمارتر
انت نسيتنى ولا ايه؟

مين قال كدة بس؟

DeMoN

27-03-2005, 03:28 PM

الإيميل بتاعي
moustafanabil@hotmail.com
أي حد يضيفني و هاحاول أدخل الساعة 6:30 بس فى الوقت ده النت بيبقى بطىء جداً عندي

the_smarter

31-03-2005, 07:28 PM

الاجتماع غدا في السادسة و النصف 6:30

ترقبوا المفاجأة الكبري...

lord ahmed

31-03-2005, 08:19 PM

تمت اضافتك يا مصطفى
ياسلام عليك ياشادى وعلى مفاجأتك
ايوا كدا

Mohammed Lotfy

31-03-2005, 08:34 PM

فكرة جامدة أوى و ربنا معاك يا باشا

the_smarter

01-04-2005, 01:08 AM

فكرة جامدة أوى و ربنا معاك يا باشا

الف شكر يا باشا

محمد العلمي

01-04-2005, 01:30 AM

فكره جميله جدا وأتمنى لكم التوفيق.

Digitalx1

01-04-2005, 01:35 AM

ربنا معاكم يا جماعه انا كان نفسى ابقى معاكم بس الدراسه تحكمنى
ان شاء الله هحصلكم

اسماعيلاوى اوى

01-04-2005, 04:00 AM

يظهر انك نسيتنى يا عم سمارتر

kala

01-04-2005, 04:35 AM

معكم للامام

kokoeffect

02-04-2005, 12:12 AM

بسم الله الرحمن الرحيم

الي اعضاء المنتدي الاعزاء اقدم لكم كل تحيه وتقدير من كل قلبي ..........
اليوم يا شباب سوف يتم الاعلان عن قصة اللعبه ووضع الصور الاوليه للعبه . ونرجوا جميعا ان تنال اعجابكم .......
وسوف يتم عمل ذلك في موضوع مستقل تمام . وسوف يكون خاص بالتجديدات الخاصه باللعبه ...

مع تخصيص ذلك الموضوع لالشتركات الخاصه بمن يريدون الانضمام للفريق مثلاما قال اخي العزيز SMARTER .....

وفي النهايه اشكر اخي SMARTER علي اعادت الحياه لهذا الموضوع مره اخري .واشكر كل من انضم اللينا ومن يريد ان ينضم . شكرا لكم جميعا.......

محمد ابراهيم

02-04-2005, 01:35 AM

للاسف لم ار هذا الموضوع الى الان و هو موضوع كان بمثاية الحلم بالنسبة الى

على العموم انا اتمنى الانضمام الى الفريق

و خبراتى هى

تصميم مواقع الانترنت و اعتقد انكم سوف تحتاجون لمثل هذا الموقع للعبة

و كذلك خبرة ليست كبيرة فى بعض برامج الرسوميات

و خبرة قليلة بالبرمجة بالفيجوال بيسك و لكن انا اتقدم فى دراستة الان

ايميلى
miahegypt@hotmail.com