ما هي حقوقي عند كمائن البوليس اللي في طريق شرم الشيخ

[TIMOKRATES]

السلام عليكم
أنا أعمل كمرافق مجموعات سياحية و أرجع ليلا في أتوبيس الشركة فاضي و يريد كل كمين أن يركب معانا ناس و احنا بنرفض الا انه في احدي المرات قام الأمين بالغتاته علينا و قام بطلب كارنيهات الغرفة السياحية ثم البطاقة
ثم أراد أن يأخذ البطاقة ليعمل بحث جنائي عليها مع أني في أتوبيس الشركة وليس أتوبيس عام و كارنيه الغرفة بأسم نفس الشركة.....................
نزلت للظابط طلع أنيل من الأمين ومش محترم و قالي احنا بنتغاضي عن شغلنا معاكو عشان تركبوا معاكو ناس و بما أنكم مش راضيين هنتبع معاكم الاجراءات و كلام خايب كده من بتاعهم

المهم أنا عايز أعرف ايه يضمن لي أنه ما يلصقش في أي تهمة بحجة تشابهه الأسماء و يعطلني بأي شكل من الأشكال الوسخه بتاعتهم ......
وهل من حقه أنه يعمل بحث جنائي ع البطاقة كده بدون مقدمات
وهو مش المفروض أنه شرطة السياحه هي اللي تتعامل معايا مش الأمن العام
هل من حقي أن أرفض أن أعطيه البطاقة...........................................
و شكرا ليك مقدما
وربنا ع الظالم

[amokashy]

__________________
البط شال عدي الجبال و البحور ....... ياما نفسي أهج احج ويا الطيور.......أوصيك يارب لما أموت والنبي ......ماتودنيش للجنة للجنة سور............../

5bouncy:


للاسف ماقدرش افيدك بس ممكن لو سمحت تشيل الجمله اللي انتا حاططها في التوقيع دي عشان اخر جملتين دول مش عارف اقولك ايه بس بعد اذنك يعني
وعامه في موضوع الكمين ده حتي لو ليك حقزق مش حتعرف تسلك مع الضباظ حتقولهم كاني و ماني حيحطوك في دماغهم و طبعا الطريق مفتحولهم بعد حوادث شرم و قانون الطوارئ
فنصيحتي ليك
1- ماتوجعش دماغك لان البوليس عندنا مالهمش كبير
2-ما توصلوهم هما بياخدو بنزين يعني
سلام

[TIMOKRATES]

أنا كمان مش مستريح لهم
مع أنه شعر عمنا الكبير صلاح جاهين عن الحريه والاستبداد والقهر
و شكراا ع الرد

[TIMOKRATES]

فييين الرد القانوني يا أهل القانون

[m_elmogy]

سيدي الفاضل /
مصر الآن تحت مظلة قانون الطوارئ بحيث يجوز للضابط التحري في أي وقت عن المواطنين و مراكهم القانونية ولا يمكن أن ترفض إعطاء الضابط بطاقتك فذلك يعرضك امخالفة السير بدون تحقيق شخصية ولابد أن تعرض على النيابة بعد أن تبيت يوم في القسم طبعا ، وعموما إتكلم مع الضباط بحزم ووريهم بطاقتك وحاول متديش حد منهم فرصة أن يفتئت على حقوقك ويزعجك ..
والله المستعان

[TIMOKRATES]

شكرااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااا

[m_elmogy]

عفوا ياسيدي ... و إبعد عن الكمين وغني له ..

[morbid-angel]

... و إبعد عن الكمين وغني له ..
وزى ما حضراتكو شايفين ادى سيادة القانون فى البلد ............انا محامى تحت التدريب وليا سوابق فى الخناقات مع المخبرين والمقدمين ومرة اتخانقت مع مأمور قسم وكان حيحبسنى بعد ما المخبرين ولاد الزززز .........روقونى


فى حدود معلوماتى اللى ليه حق الاضطلاع على البطاقه هوة الظابط لا الامين ولا المخبر والمفروض يشوفها وهيا فى ايدك لان ممكن يقطعها
والتفتيش برضه فى حاله التلبس بس ..............المفروض يكون من الظابط .....مش عارف بقه ايه مواضيع الاشتباه وبعد 3 بالليل


لان على حسب ماعرف ان قانون الطوارئ مش فا ضل منه غير بند واحد بس هوة اللى شغال (حاله وجود خطر على الامن العام) ودى معموله عشان خاطر امن الدوله .......ا

على العموم انا ححاول اجيب تفاصيل اكتر...........بس الظباط حتى لو انتا عارف حقوقك ممكن يفتروا علييك

[m_elmogy]

أهلا بك مشاركا في قسمنا المتواضع ، وربنا يقدرك على المشاكل
حقيقة الأمر إنه فعلا الضابط لو عنده رغبه إنه يضاقك فهو قادر على ذلك ، ويساعده في ذلك قانون الطوارئ اللى أنا شايف إنه ملهوش لزمة ...
لكن طبعا بصفتك محامي ، وحتى لو مش محامي ممكن تقوم الدنيا عليه ومتقعدهاش ...

[abozeedm]

موضوع رائع

[m_elmogy]

شكرا وياريت نشوف مشاركاتك

[TIMOKRATES]

شكراااااااا يا مترررررررررر

[m_elmogy]

عفوا ياباشا

[yalaa13]

معلش اصبر ومصر ماشيه على درب الديمقراطيه وهنوصل قريب بعد حوالى 900سنه هانت
علشان احنا خلاص قلنا
نعم نعم مدى الحياه

[m_elmogy]

إنشاء الله أقل من 900 سنة بكتير ، يمكن الجيل اللى حاي أو اللى بعده يكون حظه أفضل من حظنا

[businessteam86]

مش اوي كده يا جماعه متديش حد اكبر من حجمه انت لو مثلا صورته فيديو من غير ما يعرف حيبقي معاك دليل تقدر تبهدله بيه بس ده طبعا بعد ما تجيب اذن بالتصوير واسألني انا ليا صولات وجولات مع الناس ديه والحمد لله كلها في المحاكم اللي احنا بنتساوي فيها ظابط ولا مش

[m_elmogy]

طبعا لو جبت إذن بالتصوير وظبطت قضية حلوة حتجيب نتيجة ، لكن مابالك بالمعاملات اليومية ؟؟

[mody21]

يا باشا انا صيدلى يعنى ماليش فى الاجرائات القانونيه بس شايف ان الموضوع ليه تكمله على ما اظن ابحث تانى يمكن تلاقى حقوق اكتر من كده و فعلا" ابعد عن الكمين و غنيله و الكمين الى يجيلك منه الريح فلسع منه و استريح
هههه

[m_elmogy]

عموما ، طول ماإحنا تحت وطأة قانون الطوارئ محدش حيعرف يآخد حق ولا باطل من الشرطة

[العمده دقرم]

يا باشاوات فى البلد دى اللى واخد حقه الصايع الضايع اللى مافيش حاجة يخاف عليها مثلا تيجى فى قسم الشرطة عندما يكون هناك شخص محترم يتبهدل بمعنى الكلمة من اصغر عسكرى للمأمور اما الباشا الصايع ما بيهموش حاجة ويمكن تلاقى الضابط بيقول ابعد يا واد عن الشر وغنيله كمان امناء الشرطة والصولات يخافوا يتكلموا مع الصايع نص كلمة طبعا انا مبتكلمش على الصايع الهفأ لا لا انا بتكلم عن الصايع اللى ليه وزنه اللى ممكن يخرج ويجرى ورا الضابط او اي فرد من الشرطة
ملحوظة تانية انت ماشى فى عز الظهر تلاقى مخبر ولا ظابط يوقفك ويطلب منك تحقيق الشخصية بس لو كان جدع يعدى فى نص الليل فى الشتاء سايبينها سمك لبن تمر هندى
يا عم قول يا باسط وامشى جنب الحيط ومتقولش حق دستورى ولا حق قانونى ولا حتى حق لائحى وان قدرت تمشى جوه الحيط يبقى احسن
هو احنا احسن ولا اقوى من المستشارين اللى اتسحلوا
ربنا يسترها معانا يا رب
وسلمى على الحقوق

[m_elmogy]

يا جماعة بدون الدخول في تفاصيل وإبراز الفروق بين الصايع والمحترم إبان تعاملهم مع الشرطة
أنا رأيي إن اللي ملوش تعامل مع الشرطة يتحاشى الإحتكاك بهم ، واللى له تعامل - زي حالاتنا - يخلص مهمته ويمشي بكل أدب وذوق عشان ميحصلش إحتكاك