مطلوب مهندس كمبيوتر

[bahaa yousry]

بسم الله الرحمن الرحيم
مطلوب مهندس كمبيوتر لإنترنت كافيه بالهرم يجيد التعامل مع الإنترنت وصيانة سوفت وهارد وير والشبكات وبرامج Photo shop - Auto cad -Word ويفضل من له خبرة سابقة بالعمل بالسيبرات .
الراتب : 300 جنيه وقابل للزيادة حسب الخبرة + نسبة في الصيانة الخارجية
فترة العمل : من 10 صباحا إلي 6 مساء ( 8 ساعات )
يفضل من سكان الهرم لقرب العمل من السكن والله ولي التوفيق
التليفون : 5210208 / 010 - 1174328 / 014

[The man who Unbowed]

ربنا يكرم ياباشا

[prosecutor.mohamed]

عايز مهندس كمبيوتر يشتغل فى سيبر وكمان ب 300 جنيه ؟؟ عمار يامصر

[khalefa14]

حضرتك مش شايف انك طالب مهندس كمبيوتر

يجيد التعامل مع الكمبييوتر - صيانة سوفت وهارد وير -الشبكات -برامج Photo shop - Auto cad -Word - خبرة سابقة بالعمل بالسيبرات

كله ده والمرتب 300 جنيه حتى لو ليه نسبة فى الصيانه الخارجيه ؟؟

[wesamany]

عايز مهندس كمبيوتر يشتغل فى سيبر وكمان ب 300 جنيه ؟؟ عمار يامصر

يعنى وعايزينا نجوز ابقى قابلنى ههههههههه

المفروض تقول عايز واحد فالثانوية العامة يضيع وقتة او يشتغل فالصيف او تقول واحد فالكلية وعايز يصرف على موبايلة هههههههههه

[eng.nahla]

يا استاذ بهاء هو حضرتك عايش معانا في الدنيا برضه ولا ايه
مهندس كمبيوتر شاطر يجيب ال 300 جنيه دول في يوم

[mode1985]

دة حتى اغلبية الوقت بيقولوا عاوزين شاب يشتغل فى سيبر نت وبيبقى كمان المرتب 650 وبيكون ادارة السيبر مش اكتر تخيل بقى انت عاوز مهندس يجيد التعامل مع الإنترنت وصيانة سوفت وهارد وير والشبكات وبرامج Photo shop Auto cad -Word ويفضل من له خبرة سابقة بالعمل بالسيبرات

يعنى مدام مهندس يبقى مرتبة مش هيقل عن 1500 جنية قبل ما تعمل اعلان ابقى فكر الاول وباين عليك لسة فاتح سيبر ومش ليك خبرة عجبت لك يا زمن

[bahaa yousry]

والله أنا بشكر كل اللي إطلعوا علي الموضوع بصراحه وأشكرهم كتير علي ذوقهم في الرد علي موضوعي وأحب أعرف حضراتكم إني مش طالب حد يكون إشتغل في مايكروسوفت قبل كده يعني وبعدين انا اللي بيتكلم وبيقول إن انا باين عليا جديد ولسه فاتح سايبر انا عندي 2 مهندسين كمبيوتر ومحتاج واحد كمان معاهم عشان المحل عندي مفتوح 24 ساعة وأحب أعرفه إني فاتح من 4 سنين مش لسه جديد زي ما حضرته بيقول وأحب أوضح لحضراتكم وللي بيقولي إني مش عايش معاه في الدنيا وكل واحد بيتكلم وبيقولي مش أقل من 1500 جنيه ده واللي بيقولي مش عايش معانا في الدنيا لما أنا أدي مرتب 1500 جنيه السايبر بيعمل كم عشان أدي مرتب زي ده انا لو المحل بتاعي بأه عشان أدي لكل واحد 1500 جنيه كان زماني فاتح شركة بأه مش سايبر والمهندسين اللي عندي دول شغالين بنفس الراتب واللي مشي قبليهم ده كان شغال بنفس الراتب وبعدين انا قلت ده مرتب مبدئي وقابل للزيادة يا ريت اللي مش عايز ميعلقش تعليق ملوش لازمة وأشكركم مره تانيه علي ذوقكم في الرد علي موضوعي

[golden mask]

يعنى اللى عندك دول مهندسين كومبيوتر ولا مش مهندسين وبيعرفو يعملو شغل الصيانه
مهندسين من كليه الهندسه ومعاهم كارنيه النقابه يعنى قولينا الله يكرمك ؟

[shabab2go]

لا تعليق ولا بلاش

[eng_shadyahmed]

ممكن تقول فنيين كمبيوتر مش مهندسين

[m_hassan_k]

wllahy z3ltny kmhnds eny ashof 7d bytlb mhnds wkman 8 sa3at b 3oo pound laih dol mykfosh 3yl fe kg1 >>>>>

[Thunderboy7000]

With my fully respect to you
Are you talking seriously
You need an Engineer knowledgeable with these programs & fields to work for 8 hours a day for 300 LE
even if he isn't graduated yet he'll not apply for your offer
Think about your offer or the profession you're asking for
Or you would like to purchase the GOLD with DUST

[mode1985]

يا جماعة تلاقية مشغل معاة فنينن معاهم ثانوى صنايع واوهمهم انهم مهندسين وهوة فى سيبر بيحتاج 3مهندسين يشغلوا دة المهندس يشغل خط انتاج لوحدة مهنة الهندسة عمرها ما توصل للمستوى اللى بتقول علية دة وتلاقى اللى عندك مغلوبين على امرهم ومش من هنا ولا هنااا دول من عالم تانى عالم سمسم وعجبى عليك يا زمن

[bahaa yousry]

يا جماعة تلاقية مشغل معاة فنينن معاهم ثانوى صنايع واوهمهم انهم مهندسين وهوة فى سيبر بيحتاج 3مهندسين يشغلوا دة المهندس يشغل خط انتاج لوحدة مهنة الهندسة عمرها ما توصل للمستوى اللى بتقول علية دة وتلاقى اللى عندك مغلوبين على امرهم ومش من هنا ولا هنااا دول من عالم تانى عالم سمسم وعجبى عليك يا زمن

لا تعليق بجد علي كلامك ومش قادر أفهم أنت غرضك إيه بكلامك ده هل أنت مثلا داخل تستهزأ بالناس وبشغلهم ولا إيه يعني بالظبط ؟ وحسست الناس إن ظالم الناس اللي شغالين عندي يعني مش عارف أقولك إيه بصراحه غير متشكر جدا علي أسلوبك ذوق ذوق ذوق يعني بأمانة ولا تعليق في النهاية

[bahaa yousry]

دة حتى اغلبية الوقت بيقولوا عاوزين شاب يشتغل فى سيبر نت وبيبقى كمان المرتب 650 وبيكون ادارة السيبر مش اكتر تخيل بقى انت عاوز مهندس يجيد التعامل مع الإنترنت وصيانة سوفت وهارد وير والشبكات وبرامج photo shop auto cad -word ويفضل من له خبرة سابقة بالعمل بالسيبرات

يعنى مدام مهندس يبقى مرتبة مش هيقل عن 1500 جنية قبل ما تعمل اعلان ابقى فكر الاول وباين عليك لسة فاتح سيبر ومش ليك خبرة عجبت لك يا زمن

طيب أقول لحضرتك علي حاجه بدام أنت شايف إن المهندس لازم ميكونش مرتبه أقل من 1500 جنيه طيب متشوفلي أنت شغلانه معاك يا عم بلاش 1500 شغلني معاك ب1000 جنيه وانا موافق أشتغل فترة تانيه حتي لو هشتغل في سايبر أنا موافق وأجي المحل بتاعي وقت ما أخلص شغلي ها إيه رأيك أصلي مبحبش الناس اللي تخش وتعد تألف كلام من عندها الناس بتتفور دلوقتي من شغلها وبيصفولهم مرتباتهم وبيمشوهم وأنت تقولي 1500 جنيه أنت مش عايش ولا إيه ومش عارف إن في إختراع إسمه الأزمة العالمية دلوقتي ولا إيه مأثر علي العالم كله

[khalefa14]

يا اخ بهاء اهدى كده وصلى على النبى محدش يقصد حاجة

بس مش معقول مهندس هيشتغل فى سايبر وياخد 300 جنيه اكيد محدش هيقبل لان المرتب قليل اوى وبعدين مفيش مهندس بيشتغل فى سيبر المهندسين بيشتغلو فى شركات صيانه بيكون شغلها اكبر ومرتبها اكبر طبعا

انت ممكن تشوف طالب لسة بيدرس ويشتغل معاك انما مهندس ومعاه بكارليوس هندسة ومرتب 300 جنيه بس

تمنياتى لك بالتوفيق فى شغلك

[kOpra]

فرصة عمل هايله جداً
بس مع الاسف ماليش خبره فى الـ Auto cad
يلا مش مشكله تتعوض
خالص تحياتى لك
عادل :)

[H A Z € M]

فرصة عمل هايله جداً
بس مع الاسف ماليش خبره فى الـ auto cad
يلا مش مشكله تتعوض
خالص تحياتى لك
عادل :)


معلش يا عادل وخاصة ان انت من الهرم كمان يعنى كنت هتحوش ال300 جنيه كلهم يلا تتعوض.

[deathseason]

ياباشا حضرتك طالب حاجات كتير اوى مثلا ذى الاوتو كاد دة
اظن شغل السيبر مش محتاج اوتو كاد
شكرا وتقبل مرورى

[kOpra]

معلش يا عادل وخاصة ان انت من الهرم كمان يعنى كنت هتحوش ال300 جنيه كلهم يلا تتعوض.



مش مشكله يا حازم بقى تتعوض ^^
ربنا يكرم
:arf:

[™DIESEL]

هل وفقت في ايجاد المهندس المطلوب ؟؟

على فكرة انا مش بتريق انا بجد بسألك هل وجد مهندس كمبيوتر بالمواصفات المطلوية ؟؟

[bahaa yousry]

بسم الله الرحمن الرحيم يا جماعة ليه كلكم متخيلين إني طالب مهندس بمواصفات خيالية إذا كان اللفظ مش عاجبكم انا ممكن أغيره متفهموش إني بطلب مهندس يبأه لازم يكون خريج هندسه يعني أقصد مهندس ممارس أو زي ما أنتم تسموها فني - طالب - معهوش مؤهل خالص مش مشكلة يعني أيا كان المسمي الوظيفي انا اللي يهمني إنه يكون ليه خلفية في الصيانة والإنترنت الفوتو شوب بيتهيألي ده مش كتير يعني سيبكم بأه من الأوتو كاد إذا كان مدايئكم وأشكرك جدا يا أخ خليفة لإحترامك كلامي وموضوعي وعدم الإستهزاء بيه زي الناس التانيه و برده بشكر كل اللي إطلعوا علي الموضوع وإستهزؤا بالكلام وبرد علي الأستاذ الفاضل اللي بيسألني إذا كنت لقيت حد ولا لسه فانا لسه ملقتش حد وأحب أوضح بس نقطة أخيرة عشان بصراحه انا زهقت من كتر الرد علي الموضوع ده الراجل اللي مشي من عندي بلاش نقول مهندس لحسن بتزعلوا أوي من الكلمة دي وهو ماشي كان مرتبه 500 جنيه غير نسبة الصيانة الخارجية وأول ما إبتدي معايا إبتدي ب 300 جنيه برده وكان في زيادة بإستمرار .
أرجو من الناس اللي بتخش تعلق دي وتمشي وتستهزأ بالكلام وبالموضوع يا ريت من أخ ليكم بلاش التصرفات دي والكلام اللي ملوش لازمة ده

[Thunderboy7000]

يا استاذ بهاء
أحنا مش بنستهزأ بك أو بموضوعك
كل ما فى الموضوع إن طريقة عرضك للطلب بإستخدام كلمة مهندس كانت وبدون زعل مبالغ فيها شويه.
هى المشكله إن إحنا فى مصر اى حد دلوقت ممكن تقوله يا باشمهندس حتى لو كان سواق ميكروباص اى ان اللقب بيستخدم فى غير محله.

كمان برضه لازم تعذرنا كمهندسين لما نلاقى إن حد طالب مهندس ب 300 جنيه أكيد هنضايق

على العموم ربنا يوفقك فى العثور على شاب يكون بنفس المواصفات التى تطلبها
ويا سيدى لا تزعل مننا ولو فى حد امامى هكلمك.

[Professor ABBAS]

ياخساره انا بعيد اوى عن الهرم

وكتر خير يا استاذ بهاء على الموضوع

حد لاقى شغل فى البلد دى

ما حنا اهو شباب زى الورد قاعد عالمنتدى 24 ساعه

مافيهاش حاجه لو هايستثمر 8 ساعات ب 300 جنيه فى الشهر قابلين للزياده

لو ينفع يا استاذ بهاء انا ممكن اشتغل استشارى بالمبلغ اللى تحدده

واهو اللى يجى فى الريش بقشيش

[ajeeb24]

والله العظيم حتشلونا
انا من يومين كنت باعمل مقابلة فى سيبر برده ولقيته بيقولى 300 جنيه
مقدرتش امسك نفسه وهزقته بالطريقة زى الاخوة اللى ردوا على الموضوع بالضبط
وكــــــله فـــــى المـــــوانى يـــــــــــانى

[golden mask]

بسم الله الرحمن الرحيم يا جماعة ليه كلكم متخيلين إني طالب مهندس بمواصفات خيالية إذا كان اللفظ مش عاجبكم انا ممكن أغيره متفهموش إني بطلب مهندس يبأه لازم يكون خريج هندسه يعني أقصد مهندس ممارس أو زي ما أنتم تسموها فني - طالب - معهوش مؤهل خالص مش مشكلة يعني أيا كان المسمي الوظيفي انا اللي يهمني إنه يكون ليه خلفية في الصيانة والإنترنت الفوتو شوب بيتهيألي ده مش كتير يعني سيبكم بأه من الأوتو كاد إذا كان مدايئكم وأشكرك جدا يا أخ خليفة لإحترامك كلامي وموضوعي وعدم الإستهزاء بيه زي الناس التانيه و برده بشكر كل اللي إطلعوا علي الموضوع وإستهزؤا بالكلام وبرد علي الأستاذ الفاضل اللي بيسألني إذا كنت لقيت حد ولا لسه فانا لسه ملقتش حد وأحب أوضح بس نقطة أخيرة عشان بصراحه انا زهقت من كتر الرد علي الموضوع ده الراجل اللي مشي من عندي بلاش نقول مهندس لحسن بتزعلوا أوي من الكلمة دي وهو ماشي كان مرتبه 500 جنيه غير نسبة الصيانة الخارجية وأول ما إبتدي معايا إبتدي ب 300 جنيه برده وكان في زيادة بإستمرار .
أرجو من الناس اللي بتخش تعلق دي وتمشي وتستهزأ بالكلام وبالموضوع يا ريت من أخ ليكم بلاش التصرفات دي والكلام اللي ملوش لازمة ده
يا سيدى الفاضل احنا مش بنسهزأ ولا حاجه بس انت لازم تظبط كلامك من الاول انت هنا فى منتدى مليان مهندسين كومبيوتر واتصالات مش لازم تقول مهندس كومبيوتر انما انت محددها باللفظ انت اللى غلطان من الاول هو اى حد بيعرف يسطب ويندوز يبقى خلاص مهندس فين الحق والعدل وعدم المبالغه
وبعدين لو انت مهندس ممكن تلاقى شغل ب 1000 جنيه زى ما انت عايز وكمان احنا وخدين بالنا من الازمه الاقتصاديه كويس جدا متخفش علينا
ربنا يوفقك وتلاقى اللى انت بتدور عليه

[KHΛLΣD]

بعد التحيات والأشواق/
يــــــــــــــــــــــــــــــاه
كــان نفسى والله بس أنا مش بفهم فى الـWord و الـAUTO CAD و الـPHOTO SHOP
بس أنت لو عايز تشغلنى شغلنى أهو هتكسب فيا ثواب مش عـايز خيــر وبركـة مش أول مـرة أترفض
تحياتى وأشواقى
ملحوظة : مافيش مهندس بيشتغل بـ300 جنيـة ف الشهر حتى لو ساقط هندسـة وبيعيد للسنة الـعشريم
http://photos-h.ak.fbcdn.net/photos-ak-snc1/v1915/4/9/111284310390/n111284310390_5276367_7867.jpg

[prins samy]

مهندس كمبيوتر ب 300 جنية فى الشهر وعندك 3 عيال فى الشهر ههههههههة

http://www.sha7ad.com/files/image/3a-23467347854578.JPG