هااااااااااااااااام جدا اريد آراء جميع البنات والسيدات هنا .... رجاءا !!!! [الأرشيف] - موقع الدي في دي العربي

wamo2008

14-04-2009, 01:53 AM

السلام عليكم على كل الأعضاء في
هذا القسم الجميل

اولا قبل ما أتكلم عن موضوعي
هاأقول حاجة صغيرة قوي

انا ياجماعة باخد كورس انجليزي
تابع جمعية المستقبل

واللي اخد هذه الكورسات عارف
بيبقى مطلوب منه والفريق اللي معاه
عمل فكرة او مشروع بيقدمها في نهاية الكورس
كمشروع متكامل

علشان كده انا بطلب في هذا الموضوع
ارآئكم وخاصة آراء البنات لأن فكرة مشروعي
بخصوصهم.....
ومشروعي هو عن:

"تاكسي خاص للسيدات"

http://img2.imageshack.us/img2/641/tax1.jpg (http://img2.imageshack.us/my.php?image=tax1.jpg)

اولا:

"تشير أحدث الإحصائيات إلى أن الإقبال على استخدام سيارات الأجرة يزداد وفق وتيرةأعلى بكثير من الوتيرة السريعة لتزايد أعداد السيارات الخاصة في الدول المتقدمةويمكن إرجاع هذه الظاهرة لعدة أسباب من أهمها الاكتظاظ المتزايد للشوارع بالسياراتونقص أماكن توقيفها في المدن الكبرى وزيادة تكاليف تشغيل السيارات وخاصة بعد ارتفاع أسعار المشتقات النفطية.

وبالرغم من ظاهرةالانفتاح الاجتماعي الواضحة التي عرفت عن المجتمعات الغربية من ناحية اختلاط الرجال والنساء ضمن مختلف أماكن العمل والنشاط، إلا أن النساءكثيراً ما يتعرّضن للاعتداء أو المضايقات عندما يضطررن إلى استخدام سيارات الأجرة. وغالباً ما يأتي الخطر من سائق السيارة ذاته.

وفي كل عام تسجّل المئات من حالات الاعتداء الجسدي أو الاغتصاب أو السرقة للنساء أثناء تنقلهن من مكان إلى آخر وخاصة في المناطق المنعزلة خارج المدن".

تاكسي خاص بالسيدات فقط .. الفكرة ليست جديدة، فهي موجودة بالفعل في الإمارات منذ 2007 وفي لبنان اوائل هذه السنة .."تاكسي السيدات" هو عبارة عن تاكسي تقوده سيدة وركابه أيضا من السيدات فقط، الفكرة لم توجد من أجل الاختلاف فقط، لكنها تهدف في الأساس إلى مقاومة التحرش الجنسي التي تحدث داخل التاكسي من قبل السائقين تجاه الراكبات والتي قد تصل إلى حد الاختطاف والاغتصاب..

http://img2.imageshack.us/img2/8330/10818570.png (http://img2.imageshack.us/my.php?image=10818570.png)

فهل يمكن نرى الفكرة في مصر على غرار عربات المترو المخصصة للسيدات؟،
وهل هناك من توافق على العمل سائقة تاكسي؟
اذن سيدتي هل توافقين ام لا ؟

ارجو من كل البنات والسيدات المشاركة برأيهم
ورجاء من كل من تبدي برأيها طلب بسيط
تكتب سنها كام واذا كانت طالبة بتشتغل
واذا كانت بتشتغل تكتب عملها من غير تفاصيل
زي "موظفة , محاسبة , سكرتيرة "

مش عايزة اكتر من كده

ويارب يعجبكم الموضوع وفي انتظار آرائكم

romanza

14-04-2009, 02:43 AM

وعليكم السلام ورحمة الله وبركاته

هي المشكلة هتبقى في إن مثلا المترو بيكون حاجة واحدة على بعضها بتلاقي مكان لدة ولدة

لكن التاكسي مش هتلاقيه في كل مكان

إلا مثلا لو كان بالاتصال برقم ساخن زي تاكسي العاصمة مثلا ده سهل

وخدي بالك من حاجة أهم
ان نسبة السائقات المحترفات مش كبيرة في مصر

والمحترفات هيبقوا عندهم عربيات بالتالي مش هيسوقوا تاكسي

يعني الموضوع عايزله مؤسسة كاملة تعلم سائقات تعليم كويس أوي

لمدة لا بأس بها

وفي الآخر برضه هقولك ان مواعيد العمل مش هتبقى زي الرجال

يعني مافيش واحدة هتفضل تشتغل طول اليوم زي سائق التاكسي

معلش أنا مش عايزاكي تتشاءمي من كلامي

بس مش كل اللي بيحصل برة ممكن يحصل في مصر

والله أعلم يمكن تلاقي حد له رأي تاني برضه

safaa2010

14-04-2009, 02:53 AM

السلام عليكم ورحمة الله وبركاتة الحقيقة راى من راى رومانزا هية اوجزت كلامها صحيح مية فى المية البنت اوالسيدة مش ممكن حتشتغل الاوقات المسائية وثانيا مش حتتواجد التاكسبات بشكل كبير حتبقى نادرة جدا ولكن فكرة جميلة اوى لو وجد من توافق على القيام بالمهمة وربنا يوفقك ان شاء الله

whiteangel241

14-04-2009, 03:07 AM

وعليكم السلام ورحمة الله وبركاته

اولا بالتوفيق يا ولاء فى الكورس باذن الله

وفكره حلوه جدا وزى ما هى موجوده فى الامارات ولبنان انا كمان بشوفها عندنا هنا فى مصر
بس قليل يعنى اعتقد انها موجوده بنسبة 1 فى الالف

وعموما المرأه نجحت فى معظم المجالات وكتير تفوقت فى بعض المجالات
و مش عارفه ليه بتعتبر المهنه دى بالذات رجالى وغير مسموح بها للنساء
والنظره بتكون لهم غريبه

بما انى بعشق السواقه فانا مؤيده للفكره بس المفروض لو اتعممت يكون لها قواعد
معظم القواعد دى لازم تتماشى مع دينا اولا وعادتنا وتقاليدنا ثانيا
جميل لما تكون السائقه بنت بس تكون الراكبه كمان بنت ويكون لوقت مش متاخر
وتراعى كمان uniform

منتظره بقية الاراء وبالتوفيق يا ولاء باذن الله

m noona

14-04-2009, 03:08 AM

بصراحة أنا شايفة الفكرة جميلة جدا
ليها عيوبها و مميزاتها

أكبر المميزات هو الاحساس بالأمان
أنا مش باشعر بالأمان لما باركب ترام اسكندرية
إلا لما باركب عربة السيدات
مهما كانت الدنيا الزحمة
و مهما كان الترام فاضي عند الرجال عمري ما أحس بالأمان أبدا

عيوبها :
غير موضوع الفترات ده أعتقد مش هيبقى مشكلة قوي
لأن أهم فترة هي الفترة الصباحية
ده غير في بنات ممكن تشتغل فترة مسائية زي المصانع أو أتيليهات التفصيل

لكن المشكلة في التعامل مع شرطي المرور و الخناقات اللي بتحصل
هل هتقدر عليها المرأة

و كمان بما اننا شعب غوغائي و مش اتعلم النظام
هل اللي في الشارع هيفرق بين ده تاكسي للرجال و الا للنساء
و لو حد راجل ركب غصب كده و فتونة مين اللي هيقفله؟!!

و قبل ما أنهي كلامي
في فعلا سيدات في مصر بيشتغلوا سواقين تاكسي
و اتعمل معاهم كذا لقاء

برافو عليكي يا ولاء يا جميلة
موضوع مفيد و هيفتح باب التقاش

harrypotter4

14-04-2009, 03:14 AM

عزيزتي وامو
سعيدة بأن أشارك معكِ في مشروعك
فكرتيني بأيام الدراسة هههههههههِ

اولا : فيه بالفعل سيدات يقودن التاكسي و كان لي الحظ إني ركبت مع إحداهن زمان أيام الجامعة ، و الغريبة إني مبركبش تاكسيات خالص مهما حصل بسبب خوف أهلي عليّ منهم ، لكن لما لقتها وحد ست ركبت و أنا في منتهى السعادة و الإطمئنان .

ثانيا: الستات في مصر ممكن يشتغلوا أي حاجة لو الظروف أجبرتهم على الشغل و بالتالي ممكن ستات كتير توافق على الموضوع ده ، لكن الأفضل طبعا إنهم يكونوا ضمن شركات علشان يكون فيه نظام بمعنى إن الناس في الشارع يبقوا عرفين إن التاكسي ده للستات فقط و بالتالي ميكونش فيه غلاسة من بعض الرجال .

رغم ان الفكرة لا تخلوا من بعض المخاطر على السائقات و خصوصا في الاوقات الليلة ، لكن ممكن تلافيها ببساطة ببعض التخطيط المنظم.

انا موافقة تماما على الفكرة ده و خصوصا إنه حاليا فيه كافيهات للنساء فقط

نور ، مهندسة

Ms NeSma

14-04-2009, 03:16 AM

ازيك يا ولاء يارب تكون تمام
فى بدايت الموضوع ربنا يوفقك فى كورس
وانا رائىء من راىء رومانزا وصافى
ان وقت العمل موش هتبقى مناسبة يعنى تشتغل الصبح وبليل لا
امممممم برضو صعبة وكمان اة المراة بقيت فى كل مجالات
بس لا يعنى موش فى كل حاجة تعمل فيها راجل وبسبع رجالة
وانا شايفة انى الست تشتغل سائق تاكسى صعبة شوية فى زمن دة
بالتوفيق يا قمر

romanza

14-04-2009, 03:24 AM

أول مرة أدخل موضوع أحس انه موضوع بناتي لذيذ من زماااااااان

والكل دخل شارك كده علطول

ميرسي أوي يا لولو

honeycomb

14-04-2009, 04:11 AM

وعليكم السلام ورحمة الله وبركاته

رغم أن رأيي لن يفيدكِ لكنّي سأكتبه ^^

المرأة السعودية هي الوحيدة على مستوى العالم الممنوعة من السواقة
وهذا الأمر لا زال قيد النقاش في مجلس الشورى بعد أن تم الرفض هناك محاولات بجعله بشروط محدودة كأن يكون للمرأة الموظفة أو لربة المنزل من عمرٍ محدد فما فوق ( الله يفرج علينا )

أكبر معاناة حين تحتاج المرأة من يوصلها في حين أنها من الممكن لها جداً شراء سيارتها الخاصة وسياقتها لكن قانون الدولة لا يسمح بذلك
هناك استغلال كبير لنا من النواحي المادية، يستغلون حاجة المرأة للمواصلات ويبالغون في سعر التوصيل

أنا مؤيدة جداً لتاكسي تسوقه المرأة، وسأشعر بالأمان الكبير إن ركبتُ معها :love:

HiL@Ry

14-04-2009, 07:10 AM

وعليكم السلام ورحمه الله وبركاته
موضوعك جميل جدا
هو من حيث الامان هبقى مستريحه اوى وانا فى التاكسى وكل حاجه احسن من اى وسيله تانيه ( طبعا سيارتك الخاصه اولا :he:)
بصى يا قمرايه المشكله فى الموضوع تتخلص فى كذا نقطة كالأتى :
************************************************** *******
1 - لو على كلامك هنحاول نطبقه عملى فى مصر عندنا يعنى يبقى لازم يبقى فى تنظيم للفكره نفسها بمعنى يكون مشروع ويكون فى اداره للمشروع ككل
وبما ان المشروع نسائى تبقى برضه الاداره نسائيه ( مش تفرقه ولا حاجه بس
يبقى نسائى 100 % ) . :present:
2- نيجى لنقطة الوقت ودى أهو نقطة فى الموضوع كله ..لو عملت مثلا المشروع غلى فترتين ( صباحيه ومسائيه ) برضه هتبقى فى حدود معينه يعنى انا شايفا هيبقى اخر الفتره الساعه 10 مساءا مثلا علشان برضه البنت مش ينفع تلف فى الشوارع لاكتر من كدا انا عارفا ان دا عملها بس برضه احنا مجتمع شرقى
بس ممكن نخلى حكايه الفتره المسائيه الاتصال يعنى زى فكره تاكسى العاصمه
دا لو بعد الساعه 10 مساءا .
3- طبعا التاكسى النسائى كل ركابه نساء وميمنعش ان برضه هنلاقى الزوجه والزوج ممكن يركبوا ما هو فى ناحيه نسائيه فى الموضوع برضه
يعنى باختصار من الناحيه دى لازم يكون مع اللى هيركب التاكسى بنت
( ودا اللى حاصل فى لبنان مثلا راجل وخطيبته او الاخ واخته او الزوج والزوجه ...الـخ ) بس النقطه هنا هل البنت السائقه فى آمان من المعاكسات او قطاع الطرق واحد يقطع عليها الطريق وهى سائقه ما هو دا بيحصل مع البنت مع سيارتها الخاص فايه اللى هيخليه ميحلصش مع البنت سائقه التاكسى فنحن شعب غريب الاطوار :shutup:وع فكره هيبقى اكتر فى التاكسى النسائى المشادات الكلاميه والمعاكسات وقله الادب اكتر من السيارات الخاصه لان هنلاقى سائق التاكسى هيقول حتى الشغلانه دى مش سايبنا فى حالنا وطبعا عارفين الباقى :rofl:
4- أخر حاجه وانا عايزاكم تجاوبو انتو ( هل البنت لو شغاله على التاكسى نظره المجتمع المصرى ايه ( المصريات يجابو :9:) مع ان الشغل مفهوش اى عيب ولا حرام بس نعمل ايه بقا فى كلام الناس مش هنخلص :aww:
من الاخر صعب جدا انه يطبق فى المجتمع المصرى لازم فى الاول نغير من نفسنا الاول علشان نعرف نعمل حاجه صح بجد ودا مش تشائم ع فكره انا متفائله جدا بس واقعيا علشان الموضوع كفكره كويسه اوى بس ع الورق بس اما لو اطبق عملى هتحصل مصايب ربنا يحفظنا ..
تحيتى لكى يا قمرايه ومنوره ومعلش جاوبت على السريع كدا
راجعه تانى للمناقشه ان شاء الله ..فى رعايه الله

(تثبيت الموضوع لاهميته صحيح مادام نسائى 100 %:he:)

bentmnmisr

14-04-2009, 08:31 AM

اشكرك أختي العزيزه علي الموضوع و فكرته

فكره جديده بس زي ماكتير مننا قالوا الفترات المسائيه حتكون صعبه علي البنات

هي فكره كويسه و طبعا بتدي خصوصيه للبنت و ممكن تكون عن طريق الإتصال بخط ساخن بس يردوا

انا اسمي ياسمين عندي 34 سنه و بشتغل طبيبة اسنان و بتمنالك التوفيق في المشروع بتاع التخرج من الدوره

eng.asmaa

14-04-2009, 09:01 AM

السلام عليكم
اولا ربنا يوفقك ياولاء في الكورس
الموضوع بتاعك بقي ياجميل
احنا كلنا مجمعين تقريبا اننا هنحس بأمان اكتر لو ركبنا التاكسي النسائي
وقولنا السبب علشان هنحس بالامان
كلام جميل جدا
طيب السائقة دي ازاي تحس هي بالأمان؟؟
مع الأسف شغلانة كلها مخاطر
من حوادث لمضايقات لتحرشات لقطاع طرق لمعاكسات
وفوق كل ده لما تشتغل فترة صباحية واحيانا مسائية
حياتها الخاصة هتبقي عاملة ازاي؟؟؟
بيتها جوزها اطفالها
الموضوع مش بالسهولة دي ابدا
وفوق كل ده هتبقي العين عليها بس لمجرد انها عاملة حاجة جديدة
مختلفة الناس مش متعودة عليها
بصراحة موضوع زي ده مااعتقدش اني انصح اي واحدة بيه
اي شغل في مكان آمن وفي وسط معارف واكتر من شخص هيبقي آمن اكتر
وبلاش نفكر من زاوية الراكب وبس المفروض نفكر برده من زاوية السائقة نفسها
موضوع جميل ياولاء
بالتوفيق ياقمر

اسماء 21 سنة مبرمجة

pink rose

14-04-2009, 08:23 PM

موضوع رائع وفكرة جميلة جدا
وأعتقد انها تهمنا كلنا ويارب تتحقق
بس انا شايفة انها صعب جدا تتطبق فى مصر
أعتقد ان ده خارج شوية على نطاق التقاليد
وصعب على المرآة انها تتحمل الضغوط اللى حواليها من السواقين التانيين والوقت مشكلة كبيرة جدا لو واحدة فكرت تشتغل سواقة ازاى حتوفق بين حياتها وشغلها فى الحالة دى وكمان ازاى حتواجه المجتمع من حولها
مجتمعنا مش مفتوح لهذه الدرجة واعتقد ان الدنيا لازم تتغير كتير عشان الموضوع ده ينفع ..

Gh@deer®

14-04-2009, 08:47 PM

الســ,ــلآلآم عليــ,ــكم و رحمــ,ــة الله و بركـــ,ـــآته

أولا أحييكي أختي على إختياركي الموفق للموضوع

و الآخوات و الآخوة ذكروا الكثير من نقاط مهمة

مجتمعنا العربي محافظ على حدود معينة قد يطلق عليها اسم العادات والتقاليد..!

قد تتغير هذه الحدود على حسب الظروف المحكمة

فمثلا:

كانت المرأة أمية لآ تفقه من العلم شيء و الآن تنال أعلى تعليم و شهادات

في الحقيقة هذه المقدمة لآ تعني أني أؤيد هذه الفكرة

إنما تحدثت على وجه العموم..

لكن لن أستطيع إعطائكِ رأي في هذا الموضوع كمواطنة مصرية

انا سعودية الجنسية ولا أستطيع أعطاء رأيِ من ناحية المجتمع المصري بلـ السعودي

وأي سيكون كأضافة معلومات جانبية فقط

تعقيباً على رد أختي honeycomb

انا معكِ في أن السياقة المرأة أمر ضروري في تلبية الحاجات عند عدم توفر رجل

لكن سأتحدث عن الموضوع بواقعية أكثر وأذكر العيوب قبل المميزات لكثرها

لكن ما سأذكره لآ يعمم أبدا على جميع الشعب السعودي انما هي فقط مجرد أفكار وما يترتب عليها..

الفتاة السعودية تعلم جداً صعوبة التعيين في المدارس . لآنها توظف الفتاة في مدن وقرى بعيدة عن المنزل قد تضطر الفتاة للعيش بعيداً عن اهلها مع محرم طبعاً

فمثلاً إذا سمح بقيادة الفتاة فربما البعض يتكاسل عن موضوع المحرم بحجة الطريق مجرد 4 ساعات ذهاب و إياب!!!!

كما تعلمن السعودية منطقة صحراوية وهنالك بعض القرى لآ تصل لها الكهرباء لآنها بعيدة عن المدن الرئيسية

فشيء مؤكد الطريق لهذه القرى غير معبدة و وعرة

فحين سير هذه الفتاة لوحدها على هذه الطريق قد تعاني من مشاكل في السيارة في حين عدم إلمامها بمكانكية هذه المركبة

وهذه المشكله تتفرع منها عدة مشاكل منها قد لآ تجد يد العون في هذه الطرقات الشبه مهجوره في حين أن شبكة الهاتف ضعيفة .

وقد يعترض لها بعض من قطاع الطرق . والفتاة كائن ضعيف لآ تستطيع المقاومة!!

وإن وجدت مساعده . لا فائدة من سياقتها !!!! لآنها ستجدها من رجل

ومشكله اكبر وأخطر من كلامي السابق

هي قد تطالب بعض الفتيات بخلع النقاب أو الحجاب الشرعي مما سيخلق العديد والعديد من الفتن

هذه وجهة نظري في الموضوع من ناحية المملكة العربية السعودية

قد لآ تعجب البعض :004_ssleepy: لكن أحب الوقائع أكثر من الآهواء

آخيراَ أعتذر على الإطالة والتطرف عن الموضوع الآصلي

تقبلوا تحيتي

honeycomb

14-04-2009, 10:06 PM

أختي غدير
مجرد رؤيتي لاسمك كنتُ متيقنةً أنّ ردكِ عليّ لعلمي أننا من موطنٍ واحد ^^

أنا مؤيدة لسياقة المرأة لمدى الحاجة الشديدة لها
وأتمنّى أن يتمّ تصريحها لنا ضمن ضوابط معيّنة، والمثال الذي ذكرتِه هو خارج هذه الضوابط

ماذا لو تمّ السماح به في المدن الكبيرة والرئيسية، ومنعه في القرى والهجر والمناطق النائية ؟

في الظهران، السواقة مسموحة
ألا ترينه استثناءً مُجحف بحقنا؟

مشواري من البيت للعمل ربع ساعة فقط بالسيارة، ولكنّي (أتورط) كثيراً لظروف أتعرض لها ولا أجد من يوصلني أو يأخذني من مقر عملي، أنا أعاني جداً ><

والحجاب الشرعي أو حتّى النقاب ليس مانعاً أبداً عن السواقة، والكثير من النساء والفتيات السعوديات هكذا يتمتعن بالسواقة في البحرين، كمثال

أختي ولاء،
نعتذر لإنحرافنا عن موضوعك
دعواتي لكِ بالتوفيق والنجاح

اعتبريها فضفضة فتاة تُعاني ><
وتحلم بأن تقود السيارة بنفسها ولو لأجل العمل

art-mind

14-04-2009, 10:39 PM

هي فكرة حلوة طبعا وعلى الرغم من ان ممكن يكون ليها مشاكل أو عيوب بس ليها مميزات كتير .. أنا شخصيا أؤيد بشده وجود مواصلات مخصصة للسيدات مش بس التاكسي لكن في جميع المواصلات .. يعنى أنا مثلا دايما اركب في عربية السيدات في مترو الانفاق .. بصراحة الركوب مع الرجالة بقى شيء لا يطاق وحقيقي في رجالة كتير غير محترمين ما بيفرقوش بين واحدة محترمة وواحدة غير محترمة .. وكمان وقت الزحمة الصبح أو الضهر كلنا عارفين الزحمة ممكن يحصل فيها مضايقات كتير.. انا دايما مش بشجع الاختلاط في المواصلات لانه احسن كتير للبنت.

ayotaaaaaaaaaa

15-04-2009, 12:06 AM

يشرفنى انى اشارك معاكى يا جميل
وسعيده بمعرفتكك يا ولاء
الفكرة جميله اوى الصراحه ويا ريت تتعمل
بس انا شايفه ان مش فى التاكسى وبس
نفشى تتعمل كمان فى العربيات العادية
يعنى مثلا العربيات اللى بتودينى الجامعه
انا واصحابى بنبقى مضايقين ومش واخدين راحتنا
لما تبقى قاعده وواحد جنبك بتبقى قاعده مش واخده راحتك خالص
ببقى نفسى الطريق يخلص و أوصل باى شكل
يعنى ليه ميبقاش اماكن معينه فى العربيه للسيدات بس؟؟؟
العربيه بيبقى فيها كراسى على الناحيتين
ليه ميبقاش ناحيه للسيدات وناحيه للرجال؟؟؟
والله بتخنق من الجامعة ومش بحب اروحها بسبب الطريق t__t
ربنا يعدى السنتين دول على خير واخلص
لان شكل المشكله دى مش هتنتهى هههههههه
انا مش بعقدك بس الصراحه صعب يحصل اللى بنقوله ومش هيتم مره واحده
ده هياخد فتره كبيرةه جدااااااا لحد ما يتنفذ
بس على العموم انا مؤيده جدا للفكرة ربنا معاكى
ومع اللى بيحاولوا ينفذوها متستسلميش يا قمر
وجزاكى الله خير على الموضوع الجميل

وردوياسمين

15-04-2009, 01:23 AM

مساء الخير عليكن جميعا

ولاء باتمنالك التوفيق في موضوع الدراسة او المشروع المطلوب منك

الحقيقة انا قبل ما ارد اتشرفت بقراءة جميع الآراء
وبالطبع لاحظت ان مشكلتنا جميعا كبنات عربيات مهما اختلفت جنسياتنا هي نفس المشكلة

نظرة المجتمع للمرأة ...

انا معنديش اي مشكلة انى اركب تاكسي مع سائقة سيدة ولكن ...

هل هيبقا سهل ان سيدة تقود تاكسي مساء او في وقت متاخر؟؟
نظرة المجتمع هينظرولها ازاي؟؟ هينظر لها باستنكار ودة للأسف ...

غير ذلك السؤال دة وقفت قدامة ...

طبيعة عمل المراة وخصوصا في بعض الوظائف بتجبر المراة انها تتاخر في العودة من العمل ...

هل لو تم تخييرها مابين الاتصال بتاكسي العاصمة أوتتصل بشركة تاكسي للسيدات فقط لتوصيلها في هذا الوقت المتأخر ...

ايهما ستفضل ؟؟

اتكلم عن رايي الخاص هافضل اني اتصل بتاكسي العاصمة بالرغم من ان سائقة رجل ...

موضوع اني اقول انا هاركب سيارة مخصصة للسيدات وهاركب باص مخصص للسيدات وعربة في المترو مخصصة للسيدات وكل شيئ مخصص للسيدات

ييبقا لما اطلب اني ادخل كلية اقول انا عاوزة كلية خاصة بالبنات وعمل مخصص للسيدات يبقا زميلي في الكلية مايتواجدش معايا في نفس المكان وزميلي في الشغل مايتواجدش معايا في نفس المكتب!!!

بأي منطق اني اطلب اتعلم واشتغل واتساوى بالرجل في فرص العمل وفرص الترقي والعلاوات وانا باطالب اني اقسم المجتمع سيدات ورجال ...

واقول هاركب مع سائق رجل والا سائقة سيدة ...

أعتقد موش هتفرق كتير اني اركب مع سائق او سائقة ...

على الأقل موش هتبقا مشكلة الراكب هتبقا مشكلة السائقة نفسها ونظرة المجتمع لها ....

رأيي ووجهة نظري

شكرا جزيلا وخالص تحياتي لكن جميعا

واحترامي لجميع الآراء المطروحة...

wamo2008

15-04-2009, 01:28 AM

طبعا ياجماعة انا بشكركم من كل قلبي
على تلبيتكم دعوتي بالرد في الموضوع
وابداء رأيكم

خلوني بس قبل اي كلام اوضح بعض النقط اكتر
حول الموضوع

اولا: انا شخصيا ياجماعة مش من مؤيدي تقليد
اي دولة او اي حاجة لمجرد التقليد او انها حاجة كويسة
وخلاص وعايزة اقلدها من وجهة نظري وبس

الفكرة دي انا حاسه انها لو اتعملت في مصر بجد ممكن تنجح

ثانيا: هاوضح لكم نقط انا شايفة مناسبة ممكن
تتنفذ في المشروع من مشروع دبي ومشروع لبنان

بالنسبة لدبي:
هيا شركة خاصة تشرف عليها وزارة المواصلات العامة بدبي
مدربين السائقات على القيادة وكيفية التعامل مع الجمهور
والسيدات والأطفال والحالات الحرجة وكيفية الوصول لمقار المؤسسات الحكومية والمواقع السياحية والترفيهية

(لو الموضوع ده انطبق في مصر هايبقى على السائقات
معاهم رخصة قيادة وقبل عملهم هايكون فيه تدريب ليهم على معرفة الطرق في كل الأحوال)

اما بالنسبة للبنان:
هي كمان شركة خاصة تشرف عليها وزارة السياحة اللبنانية
واسمها شركة "بنات تاكسي"

السائقات ليهم Uniform وهو بنطلون اسود قميص ابيض
ومعاها ربطة عنق زهرية ووردة زهرية في شعرهم
وده واضح في صورة البنت في اول الموضوع

صاحبة الشركة نفسها لما فكرت تعمل المشروع
افتكرت انها هاتلاقي صعوبة في ايجاد سائقات
لأنها شغل الرجال فقط انما لما وضعت
اعلانات في الصحف وجدت عشرات الطلبات للشغل
من نساء يردن الوظيفة.

(واعتقد ان ده مناسب في مصر بالنسبة ليونيفورم
للسائقات ايضا لكن مع بعض الأختلاف)

طبعا بعضكم اتكلم على موضوع تحرش السائقين
لو اشتغلت السيدات بالتاكسي

انا هاسألكوا عن حاجة يعني البنت لو سايقة عربيتها الخاصة مش بتتعرض لنفس المضايقات ؟!!!!! انا من وجهة نظري هاتبقى هيا .... هيا لو اشتغلت في السواقة.

اما بالنسبة لموضوع الزحمة والعربيات

موضوع الزحمة ده مش بأدينا نحله لأنه محتاج حل جذري
والناس مش هاتبطل تشتري عربيات علشان الزحمة!!!!!!
انما ازاي نقدر تتعامل معاها وتحترم المرور .

اما بالنسبة للوقت ومتأخر ولا..... لأ
لأن كلكم اجمعتم على موضوع الوقت ده

على فكرة انا قبلكم فكرت في النقطة دي
لأني طبعا بنت وعارفة ايه معنى التأخير

هو هاتبقى فترتين والفترة الثانية طبعا ودي اهم حاجة اخرها الساعة 10
وطبعا فيه حاجات تانية ناوية افكر فيها اكتر في المشروع

طبعا انا سؤالي دلوقتي محدد اكتر ........

هل تقبلين ان تعملي سائقة تاكسي لو اتيحت لكي الفرصة؟

وارجوكم ياجماعة اللي يرد برأيه ده
يكتب سنه (يعني كلنا في العشرينات و مش هاننكسف نكتبه)
ويكتب هو بيعمل ولا لسة بيدرس(يعني طالب)
معلش ده مهم جدا بالنسبة لي

romanza

15-04-2009, 02:07 AM

كلنا في رينج العشرينات يا ولاء

من 20 لـ 26

ĶởĶĶάħ

15-04-2009, 02:18 AM

وامو اولا ازيك
ثانيا وحشتيني خالث
ثالثا ربنا يوفقك يارب
رابعا بقا
بصي هي فكره حلوه و ياريت تبقي موجوده فعلا لان في بنات كتير بتخاف تركب التاكسي و انا منهم
بخاف اركب لوحدي و في كتير كده
بس انا شايفاها انها صعبه اوي انها تبقا موجوده في مصر

و انا سيني 16 و نص و طالبه في 3 ثانوي بعيد عنك

و ميرسي يا وامو علي الموضوع ده
و ربنا معاكي

wamo2008

15-04-2009, 02:22 AM

أول مرة أدخل موضوع أحس انه موضوع بناتي لذيذ من زماااااااان

والكل دخل شارك كده علطول

ميرسي أوي يا لولو

ميرسي يارومانزا على ردك الجميل
العفوووووووووو
ويارب يعجبك

(تثبيت الموضوع لاهميته صحيح مادام نسائى 100 %:he:)

ميرسي جداااااااا جدااااااا ياهيلاري على التثبيت

أختي ولاء،
نعتذر لإنحرافنا عن موضوعك
دعواتي لكِ بالتوفيق والنجاح

اعتبريها فضفضة فتاة تُعاني ><
وتحلم بأن تقود السيارة بنفسها ولو لأجل العمل

اعتذار على ايه يافاطمة
بالرغم اني مش اعرف حاجة عن طبيعة الحياة في السعودية

لكن اعقد ان شاء الله النقطة دي ممكن
تحصل في يوم من الأيام
زيها زي تعليم المرأة ونزولها
للحياة العملية واتحقق ده فعلا بعملها

اكيد فيه حاجات كتير اتغيرت للأحسن في مجتمعكم
بالنسبة للمرأة
وبإذن الله يتحقق حلمك بسواقة عربيتك الخاصة
وتغيروا حاجت تانية كتير ان شاء الله

sindrella_99

15-04-2009, 01:21 PM

السلام عليكم
اولا ربنا يوفقك يا ولاء فى الكورس
موضوعك جميل يا ولاء
وانا معاكوا كلكم انه كويس لينا واكيد حيبقى فى امان اكثر
لكن مع ان المراءه قدرت انها تتساوى مع الرجل فى بعض الاشياء
الا ان الموضوع ده من راى انها مش حتعرف تاديه
يعنى لو تعرضت للمضايقه والتحرش ودى حاجه هيه فى غنى عنها دا غير الحوادث وحاجات كتير
ده غير ان البنت دى حتبقى ليها حياتها الشخصيه ازاى حتقدر تساوى بين الاثنين
معاكم ان الموضوع اتنفذ فى اماكن ثانيه لكن معتقدش انه عندنا بالذات ممكن يتنفذ وحتى لو اتنفذ 100% بعده حتحصل كوارث
فانا من راى انه لا يمكن عمل المشروع ده فى مصر نهائى.
وبالتوفيق يا ولاء

dr/yh

19-04-2009, 08:01 PM

اولا احب احييكى على الموضوع الجميل دة
والله بدون النظر لمساوىء الموضوع
انا شيفاها فكرة جميله جدا تكفى انها تعطى الراكبه بالامان
مجتمعنا كمجتنع عربى شويه فهمه بطىء بيتقبل ديما الامور كامر واقع
لا يتقبلها بالمناقشه هيستغرب الفكرة فى الاول
بس بعد كدة هيتم التعامل مع عيوبها واصلاحها
وبعدين بالنسبه لمشكله الموعيد الى اثروها بعض الاعضاء فى ردودهم
انا شايفه ان مواعيد عمل السائقه (البنت يعنى )
اكيد هتتوافق مع مواعيد ركوب الراكبه
يعنى مفيش بنات بتكرب تكسيات متاخر ومفيش بنات هتسوق متاخر

yu_jin

20-04-2009, 03:44 AM

موضوع جميل جداااااااااااا
بالرغم من ان الفكره حاسه انها ممكن تبقى غريبه شويه علينا
بس الفكره جميله جدا وياريت انها تتعمل فعلا فى مصر
وخصوصا ان البنات تفوقوا فى مجالات كتير اوى

mshmsh_sh

25-04-2009, 01:57 AM

wamo2008

27-04-2009, 01:34 PM

ميرسي يابنات على الردود الجميلة

وان شاء الله قريبا
هاتعرفوا كل جوانب المشروع

وهاتكون في الموضوع ده

cooldancer85

06-05-2009, 08:12 PM

اى نعم انا ولد مش بنت عشان ارد على الموضوع...بس اسمحيلى اقول راى بصراحة لان الموضوع عجبنى وشدنى اوى

هو مشروع جميل

بس اعتقد ان مش كل شخصيات البنات تنفع فيه....يعنى بعضهم

دة غير انه مش هيشتغل فى كل الاوقات طبعا...زى بالليل او كدة

وانا راى ان اهم نقطة فى الموضوع دة عشان ينجح

اولا: تحديد الاماكن اللى ممكن يمشى فيها التاكسى دة...عشان ما يحصلش مواقف مش لذيذة هى فى غنى عنها

ثانيا: اى زبون البنت تشك فيه....تقول لا والله انا مستنية نبونة او زبون دلوقتى...عشان تنقذ نفسها من اى حد تشك فيه يكون نيته مش كويسة مثلا
دة غير ان ممكن يشتغل بالطلب يعنى خصوصى زى بعض التاكسيات

دة غير ان اى فتاة تعمل المشروع دة لازم تحترم جدا
لانها بتسعى على شغلها بالحلال وبطريقة مفيدة للمجتمع

احترامى الشدبد لصاحبة الموضوع واى بنت تنفذه

s-yyy89

06-05-2009, 10:10 PM