المساعد الشخصي الرقمي

مشاهدة النسخة كاملة : مــدرســــــــــة الــحـــب (اللهفة)

dead man walken
28-02-2009, 07:56 PM
السلام عليكم و رحمة الله و بركاتة

طبعاً كتير مننا متفقين ان علاقة ادم و حواء
هي من اجمل العلاقات اللي بنمر فيها في حياتنا
كل طرف من ادم و حواء بيفكر في الطرق اللي ترضي الطرف التاني
و عن طريق الحب و التفاهم بيوصلوا للسعادة المنشودة بين الطرفين

لكن طبعاً بيكون في مشاكل في العلاقة
و اللي بيكون فيها شد و جذب بين اطرفين

هنحاول كل اسبوع نمسك مشكلة من المشاكل
نعرض فيها اراءنا و نناقشها مع بعض
لغاية ما نوصل لحل وسط بين ادم و حواء...
dead man walken
28-02-2009, 08:01 PM
الحلقة الاولي
(الماضي)

عندما يقبل الطرفين علي الارتباط
دايماً بيكون في سؤال عن الماضي
و كان في ارتباط ولا لا؟؟؟
و اذا كان في ، طيب اية كان سبب الانفصال؟؟؟
و ندخل في اعترافات و متاهات ممكن تخلي العلاقة تخلص قبل ما تبدأ !!!

طيب الحل اية نقول ولا مانقولش
و لا نحكي في حدود المعقول؟؟؟؟

اتمني الموضوع يعجبكم
و منتظر تفاعلكم...
©® Del Piero ®©
28-02-2009, 08:32 PM
السلام عليكم ورحمة الله وبركاتة

موضوع حلو يا جميل , بالنسبة لسؤالك عندما يقبل الطرفين علي الارتباط بيكون في سؤال عن الماضي

أعتقد الأنسان (الولد والبنت ) لازم يكون صريح و دة أريح لأن الى انتا مش هتقولهولها هيا هتعرفة
سواء عن طريقك أو بطرقها الخاصـة ههههه

ثـم فى بلدنا قبل الأرتباط فية حاجة أسمها هنسأل عنكوا الأول

يعنى الى انتا مش هتقولة الجيران هيقولوة
matador_sinator
01-03-2009, 12:13 AM
موضوع جامد بجد يا وليد ...
واكيد الماضي دة بيبقي ملك لصاحبة اللي قبل العلاقة....
يعني انا ميهمنيش قوي اني اعرف الماضي للبنت اللي هرتبط بيها بعد كدة...
دة لاني هكون واثق فيها قوي..
تقبل تحياتي,,,,
fuooz
01-03-2009, 12:34 AM
ياموضوعاك ياوليد
لا موضوع جامد فعلا
بس مش الاحلى لو خلينا نطاق ادم وحواء
تحت مسمى الزواج يبقى اجمل بمراحل من اى علاقات تانية
اولا فى حديث لمصطفى عليه صلاه وسلام فيما معناه مش متذكره بتاتا
ان من الواجب عدم اى ذكر من العروسين الراجل والمراه ذكرياتهم لبعض
عشان هتحصل اثاره شكوك مابينهم واضطراب فى اول حياتهم وتوتر فى علاقتهم
وكل طرف فيهم ينسى اللى فات ويخليه مع طرف تانى وبس بقلبه وروحه وعقله وكيانه عشان ربنا يباركلهم فى حياتهم
2006mariam
01-03-2009, 12:40 AM
موضوع جامد يا وليد اهنيك عليه
بالنسبه للموضوع الحديث عن الماضى
شوف احنا فى مجتمعنا بنسأل كويس على الواحد قبل الارتباط ولو فى حاجه وحشه بتبان
انا من وجهه نظرى أن المصارحه عن الماضى شئ مطلوب بين الطرفين بس لما يكونوا عاقلين ومتفهمين لبعض مش مجانين يعنى هههههههه
لا بجد يعنى مينفعش اقول للانسان اللى هارتبط بيه ايه علاقاتك قبلى واول ميصارحنى عن الحاجه اللى المفروض انها انتهت اروح امسك فى خناقه
انا مع المصارحه ولكن بحدود يعنى اى شئ يثير الغيرة فى قلب الطرف الآخر يتخفف شويه او ميتقلش كل واحد على حسب شخصيته
وبعدين الاهم من الماضى الحاضر والمستقبل لانه ملكى فى وقت مقررت الارتباط بيه لكن قبل كده مليش حق فيه
ده رأى الخاص فى الموضوع
وشكرا على التوبيك اللى يجنن ده
pink rose
01-03-2009, 07:15 PM
موضوعك رائع جدا شكرا لك
انا أكيد مع ان البداية لازم يكون فيها مصارحة بين الطرفين بس أكيد لازم تكون فى حدود معينة لأن الماضى شىء فات وعدى وانتهى ولازم ميكنش هو محور حوار أو نقطة بداية لتكوين رأى ولأنه ممكن يسبب تأثير سيىء على الطرفين
dead man walken
01-03-2009, 11:03 PM
السلام عليكم ورحمة الله وبركاتة

موضوع حلو يا جميل , بالنسبة لسؤالك عندما يقبل الطرفين علي الارتباط بيكون في سؤال عن الماضي

أعتقد الأنسان (الولد والبنت ) لازم يكون صريح و دة أريح لأن الى انتا مش هتقولهولها هيا هتعرفة
سواء عن طريقك أو بطرقها الخاصـة ههههه

ثـم فى بلدنا قبل الأرتباط فية حاجة أسمها هنسأل عنكوا الأول

يعنى الى انتا مش هتقولة الجيران هيقولوة



هي اللعبة في انها هاتعرفة بطريقتها دي
و هنا في سؤال لو هي عارفت حاجة الطرف التاني مش حاكيها
ده ممكن يهز الثقة اللي بينهم
و في نفس الوقت لو حكي كده كل حاجة
اكيد هي هاتقارن بينها و بين اللي قابلها و تسأل كتير
و كل ما تكتر الاسألة ممكن تكتر معاها الغيرة او المشاكل
لو انت رأيك اية؟؟؟

سعيد جداً بردك
و منور الموضوع...
dead man walken
01-03-2009, 11:25 PM
موضوع جامد بجد يا وليد ...
واكيد الماضي دة بيبقي ملك لصاحبة اللي قبل العلاقة....
يعني انا ميهمنيش قوي اني اعرف الماضي للبنت اللي هرتبط بيها بعد كدة...
دة لاني هكون واثق فيها قوي..
تقبل تحياتي,,,,

الماضي ملك صاحبة
و هانبدأ من جديد
و اللي يهمني تصرفاتها من اول ما عارفتها
كل ده كلام تمام اوي اوي
انما مش هاتسأل خالص؟؟؟
دي وجهة نظر

طيب هي لو سألتك هاتقولها بردة
ان الماضي بتاعي و المهم ان انا معاكي دلوقتي
ولا هاتتصرف ازاي؟؟
و لو انت قولتلها انك كنت بتحب بنت أو اتنين
و قتها بردة مش هاتسألها ولا هاتقول اعرف زي ما هي عارفت؟؟؟

منور الموضوع يا اشرف
و سعيد اوي انه عاجبك...
dead man walken
01-03-2009, 11:30 PM
ياموضوعاك ياوليد
لا موضوع جامد فعلا
بس مش الاحلى لو خلينا نطاق ادم وحواء
تحت مسمى الزواج يبقى اجمل بمراحل من اى علاقات تانية
اولا فى حديث لمصطفى عليه صلاه وسلام فيما معناه مش متذكره بتاتا
ان من الواجب عدم اى ذكر من العروسين الراجل والمراه ذكرياتهم لبعض
عشان هتحصل اثاره شكوك مابينهم واضطراب فى اول حياتهم وتوتر فى علاقتهم
وكل طرف فيهم ينسى اللى فات ويخليه مع طرف تانى وبس بقلبه وروحه وعقله وكيانه عشان ربنا يباركلهم فى حياتهم

ازيك يا بكر

اول حاجة احنا مش بنتكلم علي الناس اللي بتلعب
ممكن نقول اننا بنتكلم علي حاجات بتقابلنا في فترة الخطوبة
او لو في فترة حب قبل الخطوبة
او حتي ممكن تحصل بعد الجواز...

تاني حاجة انت قولت رأيك و دللت علي بحديث شريف
فلازم احترمة جداً

منور يا بكر...
dead man walken
01-03-2009, 11:45 PM
موضوع جامد يا وليد اهنيك عليه
بالنسبه للموضوع الحديث عن الماضى
شوف احنا فى مجتمعنا بنسأل كويس على الواحد قبل الارتباط ولو فى حاجه وحشه بتبان
انا من وجهه نظرى أن المصارحه عن الماضى شئ مطلوب بين الطرفين بس لما يكونوا عاقلين ومتفهمين لبعض مش مجانين يعنى هههههههه
لا بجد يعنى مينفعش اقول للانسان اللى هارتبط بيه ايه علاقاتك قبلى واول ميصارحنى عن الحاجه اللى المفروض انها انتهت اروح امسك فى خناقه
انا مع المصارحه ولكن بحدود يعنى اى شئ يثير الغيرة فى قلب الطرف الآخر يتخفف شويه او ميتقلش كل واحد على حسب شخصيته
وبعدين الاهم من الماضى الحاضر والمستقبل لانه ملكى فى وقت مقررت الارتباط بيه لكن قبل كده مليش حق فيه
ده رأى الخاص فى الموضوع
وشكرا على التوبيك اللى يجنن ده


عارفة موضوع يكونوا عاقلين مش مجانين
ممكن اقول عليه ان اللي يطلب حاجة لازم يكون قدها
بس انت شايفة مين بيكون معرض اكتر للجنون
لما بيعرف الماضي ادم ولا حواء؟؟؟

اننا بااه نحكي في حدود المعقول
انا متفق مع الرأي ده تماماً
و كفاية كمان خطوط عريضة بس
عشان مايحصلش مقارنات و حاجات ممكن تكون مش حلوة...

شكراً لردك يا مريم
و منورة التوبيك...
dead man walken
02-03-2009, 12:02 AM
موضوعك رائع جدا شكرا لك
انا أكيد مع ان البداية لازم يكون فيها مصارحة بين الطرفين بس أكيد لازم تكون فى حدود معينة لأن الماضى شىء فات وعدى وانتهى ولازم ميكنش هو محور حوار أو نقطة بداية لتكوين رأى ولأنه ممكن يسبب تأثير سيىء على الطرفين


عاجبتني اوي جملة (ميكنش هو محور حوار أو نقطة بداية لتكوين)
بس متهايألي ان السؤال بيكون بعد ما حصل تفاهم بين الطرفين
و الدنيا ماشية كويس و الطرفين شايفين ان الحب ده اخرة جواز
فنقدر نقول انه عشان الصورة تكون واضحة تماماً
و مايحصلش مفاجأت مش حلوة في المستقبل
و متفق تماماً ان لازم الكلام يكون في هدوء اوي
و يكون خطوط عنواين بس مش تفاصيل كتير...

شكراً لردك الجميل
و منورة التوبيك...
©® Del Piero ®©
02-03-2009, 03:43 PM
هي اللعبة في انها هاتعرفة بطريقتها دي
و هنا في سؤال لو هي عارفت حاجة الطرف التاني مش حاكيها
ده ممكن يهز الثقة اللي بينهم


السلام عليكم و رحمة الله وبركاتة

و هيا دى أهم حاجة .. ان يكون بينهم ثقة و مصارحة و بدل ما تعرف من برة يبقى تعرف منة هو أحسن


و في نفس الوقت لو حكي كده كل حاجة
اكيد هي هاتقارن بينها و بين اللي قابلها و تسأل كتير
و كل ما تكتر الاسألة ممكن تكتر معاها الغيرة او المشاكل
لو انت رأيك اية؟؟؟

سعيد جداً بردك
و منور الموضوع...



مش عيب لو قارنت لو عايزة تكون أحسن من البنت الأولانية

لكن لو قارنت بطريقة غير عقلانية بين خطيبتة القديمة و بينها يبقى بتضيع ارتباطهم و هتنكد على نفسها وعلية من غير سبب

لازم البنت تعرف زوجها كان مرتبط أو خاطب قبلها انسانة معينة خصوصا لو من عيلتة بيبقى الموضوع حساس اوى و فيه ناس بتستغل المواقف دى للوقيعة بينهم

و لو راجل أكيد يحب يعرف مين الى كانت مرتبطة بية مراتة قبلة عشان ميسبش فرصة حد يوقع بينة وبينها

شكرا تانى على الموضوع يا وليد
matador_sinator
03-03-2009, 03:34 PM
الماضي ملك صاحبة
و هانبدأ من جديد
و اللي يهمني تصرفاتها من اول ما عارفتها
كل ده كلام تمام اوي اوي
انما مش هاتسأل خالص؟؟؟
لا هرمي ماضيا وماضيها كله ورا ضهري
دي وجهة نظر

طيب هي لو سألتك هاتقولها بردة
ان الماضي بتاعي و المهم ان انا معاكي دلوقتي
ولا هاتتصرف ازاي؟؟

لا والله هقول مفيش بالنسبالي اي مشكلة

و لو انت قولتلها انك كنت بتحب بنت أو اتنين
و قتها بردة مش هاتسألها ولا هاتقول اعرف زي ما هي عارفت؟؟؟
مش هتفرق كتير اني اعرف المهم اني و انا معاها متعرفش حد غيري

منور الموضوع يا اشرف

و سعيد اوي انه عاجبك...

ربنا يخليك يا وليد ...
ايوة كدة هي دي المواضيع الجامدة...
ومنتظر كل جديد منك....
تحياتي,,,,
™Möhammed Ëzz
04-03-2009, 08:45 PM
موضوع جميل ياوليد وليه اسم سينمائي شوية.
وموضوع المصارحة بالماضي ده امر ضروري جدا وبالاخص للبنت، يعني ممكن الراجل ميصارحش بكل ماضيه لكن لازم البنت تصارح بكل ماضيها لان دي من الحاجات اللي دايما مش بتتغفر من الراجل خاصة لو كان سئلها.
توفي السعوديه
04-03-2009, 08:53 PM
مشكور كثيييييييييير
mř ДňĢỀĿ™
04-03-2009, 09:30 PM
موضووووووووووووووع جميييييييييييييييل


مشكووووووووووووووور جدا
dead man walken
05-03-2009, 01:46 AM
السلام عليكم و رحمة الله وبركاتة

و هيا دى أهم حاجة .. ان يكون بينهم ثقة و مصارحة و بدل ما تعرف من برة يبقى تعرف منة هو أحسن




مش عيب لو قارنت لو عايزة تكون أحسن من البنت الأولانية

لكن لو قارنت بطريقة غير عقلانية بين خطيبتة القديمة و بينها يبقى بتضيع ارتباطهم و هتنكد على نفسها وعلية من غير سبب

لازم البنت تعرف زوجها كان مرتبط أو خاطب قبلها انسانة معينة خصوصا لو من عيلتة بيبقى الموضوع حساس اوى و فيه ناس بتستغل المواقف دى للوقيعة بينهم

و لو راجل أكيد يحب يعرف مين الى كانت مرتبطة بية مراتة قبلة عشان ميسبش فرصة حد يوقع بينة وبينها

شكرا تانى على الموضوع يا وليد





موضوع المقارنة العقلانية ده
بيأكد الرأي انهم يكونوا عاقلين
و مايعملوش مشاكل بعد ما يحصل كلام عن الماضي
و حلوة اوي النقطة بتاعة ان الناس ممكن تتدخل
و هنا ممكن تيجي الثقة في كلام الطرف التاني
عشان كمان الناس ساعات بيكون قصدهم مش كويس

منورني بردك
و اتمني تتابع الموضوع في الاسابيع الجاية...
dead man walken
05-03-2009, 01:47 AM
ربنا يخليك يا وليد ...
ايوة كدة هي دي المواضيع الجامدة...
ومنتظر كل جديد منك....
تحياتي,,,,

جميل اوي رأيك يا اشرف
و حاسس ان فية برائة بجد حلوة

منور التوبيك...
dead man walken
05-03-2009, 01:51 AM
موضوع جميل ياوليد وليه اسم سينمائي شوية.
وموضوع المصارحة بالماضي ده امر ضروري جدا وبالاخص للبنت، يعني ممكن الراجل ميصارحش بكل ماضيه لكن لازم البنت تصارح بكل ماضيها لان دي من الحاجات اللي دايما مش بتتغفر من الراجل خاصة لو كان سئلها.

ازيك يا محمد اخبارك اية
طيب انا هاسأل سؤال صغير
انت قلت ان البنت لازم تحكي كل حاجة
و الراجل مش مهم اوي
طيب لو هي كانت سألة الراجل و خبي عليها
و قتها الموقف هايكون عامل ازاي؟؟؟
هنا عدم مصارحة و هنا عدم مصارحة
مش كدة ولا اية؟؟؟؟

منورني يا محمد بردك الجميل...
dead man walken
05-03-2009, 01:54 AM
مشكور كثيييييييييير

موضووووووووووووووع جميييييييييييييييل


مشكووووووووووووووور جدا


شكراً علي الرد الجميل
و منورين التوبيك...
dead man walken
07-03-2009, 12:19 PM
(2) الاحتياج للحب

كتير مننا بيمروا بمرحلة الاحتياج للحب
او مرحلة الفراغ العاطفي

الاحتياج للحب هو ان الإنسان بيكون عايز حد يهتم بية
حد يسأل علية كل شوية
حد يكون هو قلقان علية
حد يكون محور حياتة
يكون جانبة و حاسس بية في كل الاوقات

و المرور بمرحلة الفراغ العاطفي اسبابة كتير
انما اعتقد ان من الاسباب الرئيسية
هي الوحدة او انتهاء علاقة حب

الوحدة من الاحاسيس القاتلة اللي بنحس بيها
و بتكون نتيجة فراغ او عدم وجود هدف في الحياة
او عدم رضا عن طريقة تعامل الناس المحيطة بينا
كل ده ممكن يسبب الوحدة و اللي بتخلي الانسان
يشعر بالاحتياج للحب...

كمان الوحدة ممكن تكون وحدة قلبية
بمعني ان ممكن يكون انسان عندة اصدقاء و شغلة كويس
و علاقة بأفراد عائلتة كويسة
انما ناقصة الاحساس بالطرف التاني
ناقصة ان يكون في انسان يهتم بية و يحبة و تكون العلاقة بينهم
غير علاقتة بعيلتة او اصدقائة...

السبب التاني و هو الخروج من قصة حب
و هنا بيكون الإنسان خارج من قصة حب
و عايز يعوض الحبيب بشخص تاني يعيش معاة
و هنا بيدور علي اي حد يقولة كلمة حلوة
و ساعات كتير بيقع في علاقة وهمية بيسميها حب
و بيكتشف في الاخر انه راح ضحية
تجار القلوب اللي بيغشوا باسم الحب...

او ممكن يكون الطرف التاني حبة بجد
انما حبة هو بيكون بسبب الاحتياج
و طبعاً بيكون حب ناقص و بينتهي بمرور الوقت
و هنا هو بيكون تسبب في جرح انسان كل ذنبة انه حبة بجد...

طيب الحل اية دلوقتي؟؟؟
لازم مايكونش في عندنا فراغ نهتم بدراستنا و شغلنا
و نحاول نكون مميزين في المجال بتاعنا اياً كان
عشان مانكونش في يوم موجودين في دايرة الوحدة او الفراغ

كمان لازم يكون في فترة هدنة بعد اي علاقة حب فاشلة
عشان ولا نتجرح ولا نتسبب في جرح حد...

في الاخر عندي كام سؤال

-مريت بمرحلة الفراغ العاطفي ولا لا؟؟؟
-خرجت منها ازاي؟؟؟
-كانت اية اسبابها؟؟؟

-نصيحة تقول لاي حد بيمر بالمرحلة دي؟؟؟
-شابف اية الاسباب اللي تخلي الانسان يدخل في مرحلة الفراغ العاطفي
الاسباب العامة مش الشخصية؟؟؟
™Möhammed Ëzz
07-03-2009, 03:03 PM
ازيك يا محمد اخبارك اية
طيب انا هاسأل سؤال صغير
انت قلت ان البنت لازم تحكي كل حاجة
و الراجل مش مهم اوي
طيب لو هي كانت سألة الراجل و خبي عليها
و قتها الموقف هايكون عامل ازاي؟؟؟
هنا عدم مصارحة و هنا عدم مصارحة
مش كدة ولا اية؟؟؟؟

منورني يا محمد بردك الجميل...

شكرا ياوليد، وانا مكنش قصدي مثلا ان الراجل المفروض او الصح انه ميكنش صريح بس اللي فصدته ان لو كان الراجل مش صريح 100% مش زي البنت لو مش صريحة 100%.
لكن طبع الصراحة مطلوبة للراجل ولو هي سألته المفروض يكون صريح في كل حاجة.
dead man walken
07-03-2009, 04:03 PM
شكرا ياوليد، وانا مكنش قصدي مثلا ان الراجل المفروض او الصح انه ميكنش صريح بس اللي فصدته ان لو كان الراجل مش صريح 100% مش زي البنت لو مش صريحة 100%.
لكن طبع الصراحة مطلوبة للراجل ولو هي سألته المفروض يكون صريح في كل حاجة.

متفق معاك
ان الصراحة بتكون مطلوبة عند البنت اكتر
عشان طبيعة المجتمع اللي احنا عايشين فية
و طبعاً زي ما انت قلت ان الصراحة مطلوبة من الطرفين مع بعض
منورني برأيك
و مستني اعرف رأيك في موضوع الاسبوع ده...
syllvster
17-04-2009, 08:47 PM
انا عن نفسى بعدت عن الحب والنساء بسبب موضوع الماضى ده بس ربنا وضع فى طريقى واحده ربنا يباركلى فيها بلا ماضى مع اى احد يمكن كتير من الناس تعتبرنى مجنون بس انا متمسك بموضوع ان البنت لازم تحافظ على نفسها حتى تجد من يخافظ عليها فى الحلال
..(ReD RoSe)
20-04-2009, 05:18 PM
الاحتياج للحب

اللى اتعود على حبيب وبعدين العلاقة تنتهى بيكون صعب انة يفضل وحيد
يعنى تخييل علاقة بين اتنين فضلت سنين .. ومفيش نصيب وحصل انفصال
لك ان تتخيل كمية الوحدة اللى بيعانيها كل واحد منهم
كل واحد بيحاول فى الظروف اللى ذى دى انة يسد الفراغ دا
والغلط انة يملاة بحب جديد
اولا لانة حيتخيل الحبيب الجديد هو القديم
يعنى بيحط روح الحبيب القديم فى صورة شخص جديد
والكارثة انة ممكن يحبة كانه حبيبة القديم فعلا وينسى ان الانسان الجديد دا لية مشاعر لية احساس حرام دا يحصل فيه
الفراغ حاجة صعبة اووى ..
لازم نحاول نملاة بشغل اكتر .. اصحاب اكتر .. اى حاجة مفيدة تانية
matador_sinator
21-04-2009, 05:41 PM
فعلا يا وليد دي من المراحل اللي بمر بيها دلوقتي...
وحاسس اني محتاج جدا لحبيبة ...
وفعلا بحاول اني اهتم باهلي و دراستي او اصدقائي..
لكن برضو في حاجة ناقصة....
ميرسي جدا يا وليد علي الموضوع الجميل...
وتقبل تحياتي,,,
starsong
22-04-2009, 06:28 PM
ايه يا وليد المواضيع النار دى بجد مش عارف ليه موضوعك ده مش مثبت !!
لا تعليق صراحة !!

خلينا فى الموضوع الجميل بتاعك ..

- بالنسبه للقضيه الاولى اللى انت ناقشتها .. يا ترى نخبى ماضينا و لا

نحكى لبعض عن كل حاجة .. رأيى اننا لازم نستخدم العقل جامد اوى فى

الموضوع ده لأنه فعلا فعلا عامل زى المشى على الحبل .. و اى سوء تقدير

ممكن معناه يكون نهايه العلاقة !

مبدئيا معروف فى التجارة و البيع و الشرا أنك لازم توضح عيوب الحاجة

اللى انت بتبيعها لأن ده من الشرف و من الامانه .. نفس الكلام ده

بينطبق على الشراكة بين ادم و حوا ، لو فيه حاجة كبيرة حصلت لك

فى ماضيك لازم تقولها للشخص التانى و هو اما يتقبلها و يتقبلك كده زى

ما انت و الا مفيش نصيب كل واحد من سكة ، لان المسائل الكبيرة دى لو

اتكشفت بعدين هتكون النهاية الحتميه فى 99% من العلاقات

حاجة كبيرة فى الماضى زى مثلا علاقة مش سويه فى الماضى خصوصا لحوا ، للأسف

كتير من البنات دلوقتى بتتجوز عرفى ايام الكليه و الموضوع يتقفل لغايه

ما البيه المغفل المنتظر يستر عليها و هو مش دريان !!! ده اسم غش لا اقبله

حاجة كبيرة تانيه مثلا ادم كان مدمن فى الماضى ، حاجة مينفعش تستخبى

عن شريكتك اللى المفروض انها اقرب ليك من نفسك و عيب انها تعرف حاجة

زى كده بعدين .. الخ الخ الخ


- العلاقات الاساسيه فى حياتنا فى الماضى لازم تتقال باختصار .. مثلا كنت

مرتبط ببنت ايام الكليه لمدة سنتين و محصلش نصيب .. و خلاص كده مفيش

تفاصيل تانيه انت عملت اللى عليك و حكيت عن الحدث .. لو سالتك طيب

ايه سبب فراقكم اكيد ممكن تقولها باختصار برضوا لان ده حقها انها تعرف

اسباب الانفصال علشان تحاولوا تتلاشوا هذه الاسباب فى علاقتكم ..

بالمناسبه حوا ، اى حوا لو بتحب بتكون غيورة جدا و هيتعبها اوى انها

تسمعك تشكر كتير فى حبك القديم انها كانت و كانت و كانت ، صدقنى انت كده

بتبعدها عنك و بتخوفها و انت مش دارى !! اياك ثم اياك

- طبعا لازم من الاول تكونوا متفقين ان ماضى كل واحد ملك ليه هو بس

يعنى مفيش زعل طالما ان احداث الماضى دى لا تلقى بظلالها على الحاضر و

المستقبل !! حاضركم و مستقبلكم هو ملككم انتوا الاتنين يعنى من حق

كل واحد حساب الاخر بدون خنقه و لو الامر استدعى ذلك !


انتظر ردى على الفراغ العاطفى فى مشاركة اخرى و اسف على الاطالة
dead man walken
22-04-2009, 08:15 PM
انا عن نفسى بعدت عن الحب والنساء بسبب موضوع الماضى ده بس ربنا وضع فى طريقى واحده ربنا يباركلى فيها بلا ماضى مع اى احد يمكن كتير من الناس تعتبرنى مجنون بس انا متمسك بموضوع ان البنت لازم تحافظ على نفسها حتى تجد من يخافظ عليها فى الحلال


هاقولك علي حاجة موضوع ان البنت تحافظ علي نفسها
لغاية ما تيجي ترتبط بجد بتكون حاجة نسبية
خليني اقولك ان اي ارتباط بتكون نسبة نجاحة مش مضمونة 100%
عشان بتكون قايمة علي طرفين مش طرف واحد يعني ممكن اوي البنت يكون قصدها
ارتباط حقيقي و يستمر علي طول انما يكون الشاب هو اللي بيلعب
و طبعاً انت عارف ان في ناس اساتذة في اللعب
و في الاخر بتمني يباركلك في ارتباطك
و بتمنالك التوفيق و منور الموضوع...
dead man walken
22-04-2009, 08:24 PM
الاحتياج للحب

اللى اتعود على حبيب وبعدين العلاقة تنتهى بيكون صعب انة يفضل وحيد
يعنى تخييل علاقة بين اتنين فضلت سنين .. ومفيش نصيب وحصل انفصال
لك ان تتخيل كمية الوحدة اللى بيعانيها كل واحد منهم
كل واحد بيحاول فى الظروف اللى ذى دى انة يسد الفراغ دا
والغلط انة يملاة بحب جديد
اولا لانة حيتخيل الحبيب الجديد هو القديم
يعنى بيحط روح الحبيب القديم فى صورة شخص جديد
والكارثة انة ممكن يحبة كانه حبيبة القديم فعلا وينسى ان الانسان الجديد دا لية مشاعر لية احساس حرام دا يحصل فيه
الفراغ حاجة صعبة اووى ..
لازم نحاول نملاة بشغل اكتر .. اصحاب اكتر .. اى حاجة مفيدة تانية




رأيي ان الحالة دي هي اصعب انواع الاحتياج
لأنها بتكون احتياج و حرمان مع بعض
و حلها طبعاً زي ما قولتي اننا نملي الفراغ
بأي صورة و يكون في بالنا اننا في فترة هدنة
بين حب قديم و اي علاقة حب ممكن ندخل فيها
عشان مانسببش اي جرح لإنسان كل ذنبة انه حبنا
شكرا لردك الجميل و منورة التوبيك...
dead man walken
22-04-2009, 08:48 PM
فعلا يا وليد دي من المراحل اللي بمر بيها دلوقتي...
وحاسس اني محتاج جدا لحبيبة ...
وفعلا بحاول اني اهتم باهلي و دراستي او اصدقائي..
لكن برضو في حاجة ناقصة....
ميرسي جدا يا وليد علي الموضوع الجميل...
وتقبل تحياتي,,,

طب تعالي نتناقش
اعتقد ان اي حد في متوسط السن بتاعنا
بيكون عايز يرتبط و بيكون عايز حد يهتم بية
انما تعالي نفكر ممكن الارتباط ده يكون رسمي و يحصل زواج امتي؟؟؟؟؟
عندنا جامعة و ممكن جيش و بعدان شغل
ممكن نقول من 3لــ5 سنين!!!

عارف قد ما انا شايف ان وجود الحب شيء مهم عشان يكون دافع
للانسان عشان يتقدم في دراستة او شغلة
انما كمان شايف ان اهم من الدخول في علاقة الحب
هو اختيار وقت الدخول في العلاقة
عشان ماندخلش في علاقات بدري و بتكون استهلاك للمشاعر
او ملء فراغ حاول قبل ما تدخل في علاقة حب تختار وقتها كمان

حاول تشغل وقتك و ماتخليش في وقت فراغ
انما ماتندمجش كل الاندماج في حياتك العملية عشان ماتنساش نفسك
منور التوبيك يا اشرف...
dead man walken
22-04-2009, 09:03 PM
ايه يا وليد المواضيع النار دى بجد مش عارف ليه موضوعك ده مش مثبت !!
لا تعليق صراحة !!

خلينا فى الموضوع الجميل بتاعك ..

- بالنسبه للقضيه الاولى اللى انت ناقشتها .. يا ترى نخبى ماضينا و لا

نحكى لبعض عن كل حاجة .. رأيى اننا لازم نستخدم العقل جامد اوى فى

الموضوع ده لأنه فعلا فعلا عامل زى المشى على الحبل .. و اى سوء تقدير

ممكن معناه يكون نهايه العلاقة !

مبدئيا معروف فى التجارة و البيع و الشرا أنك لازم توضح عيوب الحاجة

اللى انت بتبيعها لأن ده من الشرف و من الامانه .. نفس الكلام ده

بينطبق على الشراكة بين ادم و حوا ، لو فيه حاجة كبيرة حصلت لك

فى ماضيك لازم تقولها للشخص التانى و هو اما يتقبلها و يتقبلك كده زى

ما انت و الا مفيش نصيب كل واحد من سكة ، لان المسائل الكبيرة دى لو

اتكشفت بعدين هتكون النهاية الحتميه فى 99% من العلاقات

حاجة كبيرة فى الماضى زى مثلا علاقة مش سويه فى الماضى خصوصا لحوا ، للأسف

كتير من البنات دلوقتى بتتجوز عرفى ايام الكليه و الموضوع يتقفل لغايه

ما البيه المغفل المنتظر يستر عليها و هو مش دريان !!! ده اسم غش لا اقبله

حاجة كبيرة تانيه مثلا ادم كان مدمن فى الماضى ، حاجة مينفعش تستخبى

عن شريكتك اللى المفروض انها اقرب ليك من نفسك و عيب انها تعرف حاجة

زى كده بعدين .. الخ الخ الخ


- العلاقات الاساسيه فى حياتنا فى الماضى لازم تتقال باختصار .. مثلا كنت

مرتبط ببنت ايام الكليه لمدة سنتين و محصلش نصيب .. و خلاص كده مفيش

تفاصيل تانيه انت عملت اللى عليك و حكيت عن الحدث .. لو سالتك طيب

ايه سبب فراقكم اكيد ممكن تقولها باختصار برضوا لان ده حقها انها تعرف

اسباب الانفصال علشان تحاولوا تتلاشوا هذه الاسباب فى علاقتكم ..

بالمناسبه حوا ، اى حوا لو بتحب بتكون غيورة جدا و هيتعبها اوى انها

تسمعك تشكر كتير فى حبك القديم انها كانت و كانت و كانت ، صدقنى انت كده

بتبعدها عنك و بتخوفها و انت مش دارى !! اياك ثم اياك

- طبعا لازم من الاول تكونوا متفقين ان ماضى كل واحد ملك ليه هو بس

يعنى مفيش زعل طالما ان احداث الماضى دى لا تلقى بظلالها على الحاضر و

المستقبل !! حاضركم و مستقبلكم هو ملككم انتوا الاتنين يعنى من حق

كل واحد حساب الاخر بدون خنقه و لو الامر استدعى ذلك !


انتظر ردى على الفراغ العاطفى فى مشاركة اخرى و اسف على الاطالة


افهم من كلامك ان المصارحة تكون في شكل عناوين رئيسية
او خطوط عريضة بس من غير الدخول في تفاصيل مالهاش اي لازمة
عشان التفاصيل ممكن يكون اثرها سلبي علي العلاقة الجديدة
وان الاحداث كبيرة هي اللي تتقال بتفاصيل
اعتقد ان دي انسب طريقة للمصارحة عن الماضي

لكن مسألة ان الطرفين يكونوا فاهمين ان الماضي عدي و المهم المستقبل
دي بتكون عند الناس العاقلة
و بتكون عايزة ثقة في النفس
و في الطرف التاني
شكرا علي ردك الجميل و طول زي ما انت عايز
و مستني مشاركتك في الموضوع التاني...
matador_sinator
25-04-2009, 07:50 PM
طب تعالي نتناقش

اعتقد ان اي حد في متوسط السن بتاعنا
بيكون عايز يرتبط و بيكون عايز حد يهتم بية
انما تعالي نفكر ممكن الارتباط ده يكون رسمي و يحصل زواج امتي؟؟؟؟؟
عندنا جامعة و ممكن جيش و بعدان شغل
ممكن نقول من 3لــ5 سنين!!!

عارف قد ما انا شايف ان وجود الحب شيء مهم عشان يكون دافع
للانسان عشان يتقدم في دراستة او شغلة
انما كمان شايف ان اهم من الدخول في علاقة الحب
هو اختيار وقت الدخول في العلاقة
عشان ماندخلش في علاقات بدري و بتكون استهلاك للمشاعر
او ملء فراغ حاول قبل ما تدخل في علاقة حب تختار وقتها كمان

حاول تشغل وقتك و ماتخليش في وقت فراغ
انما ماتندمجش كل الاندماج في حياتك العملية عشان ماتنساش نفسك
منور التوبيك يا اشرف...

عندك حق فعلا يا وليد...
وقت الدخول في علاقة من اهم الاشياء اللي لازم الواحد يهتم بيها...
وميرسي جدا علي النصائح الجميلة دى...
تقبل تحياتي,,,,
mshmsh_sh
28-04-2009, 12:11 AM
موضوع هائل المصارحة مطلوبة وعلى الطرف الاخر التفهم للامر
dead man walken
28-04-2009, 07:59 PM
موضوع هائل المصارحة مطلوبة وعلى الطرف الاخر التفهم للامر

شكرا لمرورك و ردك الجميل...
dead man walken
04-05-2009, 11:03 AM
اللهفة هي سر الحب الداخلي
وجود اللهفة هو العلامة الرئيسية لوجود الحب

و ان كانت الغيرة هي دليل الحب اللي بيكون واضح للطرف التاني
فاللهفة هي سر الحب اللي بنحتفظ بية لنفسنا

في بداية علاقات الحب او الخطوبة بتكون اللهفة و المشاعرالملتهبة
هي السمة الرئيسية للعلاقة
و ممكن نقول انها بتبدأ تقل مع طول فترة العلاقة!!!
و هنا لب الموضوع لية بتضيع اللهفة او بتقل او حتي بتختفي
من علاقات الحب كل ما الفترة تكون اطول
لية اللهفة بتقل اكتر كل ما العلاقة تاخد شكل رسمي اكبر
خاصةً بعد الزواج بكام سنة اللهفة بتتبدل
بالعشرة و عادات الحياة اليومية وبيكون مكانها محجوز لحاجات تانية

طيب هو الحب ينفع يكون موجود من غير لهفة؟؟؟
ينفع يكون في تبادل مشاعر و اللهفة مش موجودة؟؟؟
و السؤال الاهم اللهفة هاتكون موجودة ازاي و الطرفين موجودين مع بعض
كل يوم و حياتهم شغالة مع بعض 24 ساعة في اليوم؟؟؟

طيب ازاي هانحافظ علي اللهفة و مشاعر الحب الماتهبة قبل و بعد الجواز، و عايزين الجواز يكون بداية جديدة للحب
بعيداً عن مقولة و انتهت قصة الحب بالجواز...


سر استمرار اللهفة في التجديد
يعني الحياة تكون بعيدة عن الروتين بكل انواعة
عشان نبعد عن الملل
كمان لازم الطرفين يزيد بنفسهم بعد الزواج
عشان دي من المشاكل الاساسية اللي بتكون عند الطرفين بعد الزواج
البنت تهمل في نفسها و شكلهاو الشاب يكون (بكرش)
و الدنيا يكون شكلها صعب اوي!!!!

عشان كدة لازم نحافظ علي نفسنا و مناخدش الطرف التاني
انه حاجة مضمونة و انه مش هايسبنا مادام اتجوزنا
لازم نفضل نخطط للحفاظ علي الحب
زي ما كنا بنعمل ايام الحب و الخطوبة

كمان المفاجأت و الهدايا البسيطة
من الحاجات السهلة اللي نقدر نحافظ بيها علي الحب


علاقة الزواج هي حياتنا و هي مستقبلنا
فأكيد هي علاقة تستاهل اننا نتعب اويعشان نحافظ عليها
و عشان نحافظ علي الحب اللي هي اساسة

اتمني الموضوع ينال يعجبكم...
matador_sinator
04-05-2009, 10:08 PM
كلام جميل جدا يا وليد ودي من اهم الحاجات اللي فعلا الواحد ممكن يقابلها في العلاقات...
واللي بعد الزواج ممكن غياب اللهفة يخلي الحياة جحيم ...
و ممكن في نفس الوقت الحفاظ عليها يخلي الحياة جنة بين الزوجين..
موضوع رائع..
تقبل تحياتي,,,
starsong
06-05-2009, 03:17 PM
(2) الاحتياج للحب

كتير مننا بيمروا بمرحلة الاحتياج للحب
او مرحلة الفراغ العاطفي

الاحتياج للحب هو ان الإنسان بيكون عايز حد يهتم بية
حد يسأل علية كل شوية
حد يكون هو قلقان علية
حد يكون محور حياتة
يكون جانبة و حاسس بية في كل الاوقات

و المرور بمرحلة الفراغ العاطفي اسبابة كتير
انما اعتقد ان من الاسباب الرئيسية
هي الوحدة او انتهاء علاقة حب

الوحدة من الاحاسيس القاتلة اللي بنحس بيها
و بتكون نتيجة فراغ او عدم وجود هدف في الحياة
او عدم رضا عن طريقة تعامل الناس المحيطة بينا
كل ده ممكن يسبب الوحدة و اللي بتخلي الانسان
يشعر بالاحتياج للحب...

كمان الوحدة ممكن تكون وحدة قلبية
بمعني ان ممكن يكون انسان عندة اصدقاء و شغلة كويس
و علاقة بأفراد عائلتة كويسة
انما ناقصة الاحساس بالطرف التاني
ناقصة ان يكون في انسان يهتم بية و يحبة و تكون العلاقة بينهم
غير علاقتة بعيلتة او اصدقائة...

السبب التاني و هو الخروج من قصة حب
و هنا بيكون الإنسان خارج من قصة حب
و عايز يعوض الحبيب بشخص تاني يعيش معاة
و هنا بيدور علي اي حد يقولة كلمة حلوة
و ساعات كتير بيقع في علاقة وهمية بيسميها حب
و بيكتشف في الاخر انه راح ضحية
تجار القلوب اللي بيغشوا باسم الحب...

او ممكن يكون الطرف التاني حبة بجد
انما حبة هو بيكون بسبب الاحتياج
و طبعاً بيكون حب ناقص و بينتهي بمرور الوقت
و هنا هو بيكون تسبب في جرح انسان كل ذنبة انه حبة بجد...

طيب الحل اية دلوقتي؟؟؟
لازم مايكونش في عندنا فراغ نهتم بدراستنا و شغلنا
و نحاول نكون مميزين في المجال بتاعنا اياً كان
عشان مانكونش في يوم موجودين في دايرة الوحدة او الفراغ

كمان لازم يكون في فترة هدنة بعد اي علاقة حب فاشلة
عشان ولا نتجرح ولا نتسبب في جرح حد...

في الاخر عندي كام سؤال

-مريت بمرحلة الفراغ العاطفي ولا لا؟؟؟
-خرجت منها ازاي؟؟؟
-كانت اية اسبابها؟؟؟

-نصيحة تقول لاي حد بيمر بالمرحلة دي؟؟؟
-شابف اية الاسباب اللي تخلي الانسان يدخل في مرحلة الفراغ العاطفي
الاسباب العامة مش الشخصية؟؟؟


الاحتياج فى الحب .. يسلام يا أسامه قصدى يا وليد على عنوان المقال :37:

هقولك رأيى بصراحة يا وليد ، الاحتياج للحب ملهوش دوا غير انك تلاقى

حبيبك اللى يحس بيك و تشكيله همومك و تشاركه افراحك و احزانك

لكن كل الحلول التانيه زى شوف اصدقاء كتير ركز فى شغلك مذاكرتك و خلافه

ده كله كلام جميل و مفيد لكن مش بيعالج المشكله دى للأسف لكنه فقط

((( مخدر ))) و لما ترجع تختلى بذاتك و تنام بالليل على سريرك هتلاقى

قلبك تعبااااااان بيشكى من الوحدة !!

و على فكرة انت بنفسك أكدت الكلام ده فى تعريفك لسبب الاحتياج للحب

لما قلت :

كمان الوحدة ممكن تكون وحدة قلبية
بمعني ان ممكن يكون انسان عندة اصدقاء و شغلة كويس
و علاقة بأفراد عائلتة كويسة
انما ناقصة الاحساس بالطرف التاني
ناقصة ان يكون في انسان يهتم بية و يحبة و تكون العلاقة بينهم
غير علاقتة بعيلتة او اصدقائة...


هو ده يا وليد بالزبط صعوبه المشكله .. و داونى بالتى كانت هى الداء !


بالنسبه للفراغ العاطفى هقولك هى بتختلف من شخص للتانى كله حسب

طبيعته ، يعنى فعلا ممكن تشوف انسان عنده 35 سنه اعزب و محبش قبل كده

ابدا فى حياته !!! ( متسالنيش ازاى ) و فى الاخر تحس مش فارقة معاه اوى

يحب و لا لا ، جايز بيدور على زوجه تخدمه و تسهل له حياته و تنظمها و

بس !! لكن احتياج للحب مفيش ! اكيد و انت فى كليتك بتشوف ناس معاك

عاملين زى الروبوت محاضرات سكشن مذاكرة امتحانات و دماغه مش على باله

اى حاجة تانيه !! بصراحة بحسد النوعيه دى

فيه ناس تانيه للأسف بطبيعتها بتكون محتاجة لشريك ، و اللى بيصعب

الموضوع أكتر لو حصل ارتباط سابق و قوى و بعدين محصلش نصيب و كل واحد

مشى من طريق ! ده يا وليد أصعب لحظات الاحتياج شخص كان متعود على

جرعات عاليه من الحنان و المشاعر و فجأة بح خلاص كله راح !! حاله

زى دى البنى ادم لازم هيعيش تعبان طول عمره لحد ما يقابل حب تانى

يعوضه عن حبيبه الأاول و هو و حظه بقى لو قابل الشخص المناسب و لا !!


الحل الاول و الأأخير اللى برشحه للناس اللى بتحب بعنف و بصدق و بعدين الحبيب ده يروح و الناس دى بتعيش تعبانه اوى و بتتعذب جدا و متقدرش تنسى حبها ده ، مفيش حل غير انك توجه كل طاقة الحب دى لذات الله عز و جل و تتقرب جدا لربنا و تسأله انه يريح قلبك لأان القلوب بين اصبعين من اصابع الرحمن يقلبهما كيف يشاء ..
dead man walken
06-05-2009, 07:43 PM
كلام جميل جدا يا وليد ودي من اهم الحاجات اللي فعلا الواحد ممكن يقابلها في العلاقات...
واللي بعد الزواج ممكن غياب اللهفة يخلي الحياة جحيم ...
و ممكن في نفس الوقت الحفاظ عليها يخلي الحياة جنة بين الزوجين..
موضوع رائع..
تقبل تحياتي,,,

طيب انت رأيك اللهفة بتختفي لية
و ازاي نقدر نرجعها تاني.

منور يا اشرف الموضوع
و سعيد انك متابع مل المواضيع...