ايه اصعب يوم فى حياتك؟ وايه احلى يوم؟

[monnem82]

السؤال هو:
ايه اصعب يوم مر عليك؟:gasp:
وايه اجمل يوم مر عليك؟:37:

حبدأ بنفسى:
اصعب يوم مر على هو يوم ما اكتشفت خيانة حبيبتى الاولى:33:
اما اجمل يوم فى حياتى هو اول يوم اشوف فيه الكعبة:clap:

مستنى ردودكم ويا سلام لو تخلوا الموضوع منظم وتعملوا لون اجابة اليوم المهبب بالاسود..ولون اليوم الحلو بالاخضر:lol:

[romanza]

أوك يا مصطفى - مش مصطفى برضه وللا إيه انا مش متأكدة D :
موضوع جميل وخلليني أرد عليك

أصعب يوم في حياتي لما والدي ووالدتي سافروا الحج مع بعض وسابوني مع أخواتي وكمان مسافرين وهما زعلانين مني
كان يوم ما يعلم بيه إلا ربنا (كانت فترة مش يوم واحد بصراحة)
والواحد بيكون خايف دول مسافرين بلد تانية للحج وزعلانين وزعل الوالدين مش هين
لو واحد فيهم التاني هيهدي الأولاني لكن ده الاتنين


أحلى يوم في حياتي أول يوم قابلت فيه جوزي (أول يوم شوفته فعلا)
وبرضه بعدها هنقول فترة كلها حلو الحمد لله مش بس يوم (ما شاء الله)

[weldomran]

احلى يوم فى حياتى ....امممم ........امممممممم...........................؟ مافيش

اصعب يوم فى حياتى ياه انا محتار اقول انى واحد دول كتير قوى ياناس لدرجة انى بحاول انسى

[memo33]

والله موضوع بيفكر الواحد ببلاوى
اضحكوا
اسوا يوم في حياتى
قبل كتب كتابي بيومين بالظبط رجلي اتكسرت ههههههههههه
مقدرتش اجللوا لانى كنت عزمت الناس واتفقت في الجامع
واطريت انى اروح كتب كتابي وانا متجبسة وبحجل علي رجل واحدة ومتسندة
الاسؤ منه بقي ان الدنيا كملتها عليا ومطرت سيول في اليوم دا ما هى كانت ناقصة اصلها
الاسؤ والاسؤ بقي ان اهلي واهل جوزى اتخانوا خناقة لرب السما بعد كتب الكتاب طبعا
والا كان ابويا فشكل الحكاية من اولها لاخرها
شوفتوا الجمال
لا واية كل دا يوم كتب الكتاب
ولغاية يومنا دا الاهلين مش بيكلموا بعض وانا اللى غرقانة ما بينهم
احلي يوم بقي بحق ربنا يوم ما عرفت انى حامل في ولد
اصلي بصراحة كنت خايفة ان الحمل يتاخر "دا تفكير كل البنات"
والاحلي بقي انه ولد اصل اخت جوزى قرارة ومتحبليش الخير ابدا وهى ودلت ولد من كام شهر بس وكانت هتفرح فيا
والاكيد من كدا انها كانت مخبيه علي الاكل انها اساسا حامل في ولد علشان كدا اكدتلي ان نيتها سودا
بس الحمد لله الروس اتساوت
جهل المصرين زى ما هو مهما اتعلموا
طولت معلش بس الموضوع بتاعك قلب المواجع

[monnem82]

انا مشفتش نحس زى كده!! قصة مضحكة جدا .. فعلا شر البلية ما يضحك

[totaa_bas]

احلى يوم او احلى فتره لما كنت بعمل العمره وخصوصا اليوم اللى عملت فيه العمره والطواف نفسه

اسؤا يوم يووووووووة متعدش

[حلمنا]

انا مشفتش يوم حلو فى حياتى
حياتى كلها نكد فى نكد
كله زى بعضه الحلو زى الوحش
والوحش زى الحلو

[50faces@1person]

الثانوية العامة طبعا......فكرت انتحر
و بصراحة ندمت انى منتحرتش
لان الايام الى بعدها كانت كلها اسود من الزيتون الاسود نياهاهاهاها

[profilerpasha]

السلام عليكم جميعا
موضوع حلو بجد

احلى ( يومين فى حياتى )

1- اول مرة شوفت زوجتى فى المطار بعد وصولها لمصر بعد فترة 9 شهور من بداية تعارفنا
2- يوم ولادة ابنى ..ساعتها نادولى فى وحدة الاطفال حديثى الولادة و قاللولى شيل ابنك يا استاذ
معرفتش اتمالك نفسى و بكيت و انا شايله

اصعب موقف او يوم فى حياتى
لسه ما شوفتوش بس اعتقد لما اسافر و اسيب مصر مش عارف اللحظة دى هبقى عامل ازاى

ربنا يستر
شكرا على الموضوع الجميل

[بيرو بيرو]

موضوعك لذيذ جدا
أسوأ يوم فى حياتى اليوم اللى عرفت فية انى منجحتش فى امتحان احد البنوك ودى كانت اول خطوة ليه فى البحث عن عمل ومن يومها كل اما يجيى اليوم ده كأنة بيمر علية كأنة لاول مرة أسوأ يوم يمر علية تانى لما اللى كان حبيبى اتصل بيه وقالى انه هايخطب واحدة تانية من نفس بلدة
أحلى يوم انا لسه بستناه يمكن يجيى فى يوم من الايام

[mnvcxv]

اسوء يوم هو النهارده لما ات***ر التمثال اللي نحته بقلبي ودمي قصاد عيني
اجمل يوم مش شايف من حياتي غير ذكريات حزينه لحب جميل ضاع

[العنتبل]

أسوأ يوم في حياتي
يومين أسوأ من بعض
واسعد يوم في حياتي
يوم ما ربنا من عليه وهداني للتوبة
واليوم التاني لسه ماجاش وهو لما ربنا يرزقنا بحاكم عادل يحكم مصر بشرع الله وينضف البطانة الفاسدة

[memo33]

مش ملاحظ كدا ان الناس مليانة نكد اكتر من الايام الكويسة
يعنى مش انا لوحدى اللى منحوسة
شكرا علي ردك عليا
ونصيحة اهتم بالموضوع هتلاقي ردود اكتر من كدا
الناس مليانة بلاوى

[monnem82]

اكيد مش كل الايام بتبقى وحشة..لو بس فكرنا شوية حنلاقى ان زى ما فى ايام وحشة فى ايام حلوة كتيرة برده بس احنا اللى دايما نبص على نص الكباية الفاضى..وحاولوا تتبسطوا ومتضيعوش لحظة سعادة والوحش انسوه او تجاهلوه متحبوش النكد يا جماعة ومتعودوش نفسكم عليه..خليكم دايما اقوى..والطريق لكده حاجة واحدة وبسيطة..توكل على الله واقتنع ان اللى اصابك ما كان ليخطأك وما لم يصيبك ما كان ليصيبك..ولو علمتم الغيب لاخترتم الواقع

[بيبسى84]

بص يامصطفى اصعب يوم فى حياتى يوم ما بابا اتوفى وخصوصا اننا كنا فى مصر وهو كان هناك لوحده فى السعودية ومشفتوش ويوم 31/12 يبقى بابا بقاله 13 سنة متوفى
احلى يوم فى حياتى يوم ما اروح اعمل حج او عمرة وساعتها اروح ازوروا واقرأ الفاتحة نفسى بجد ربنا يكتبهالى
ادعولى كلكم




لا اله الا الله الملك الحق المبين
استغفرك اللهم الذى لا اله الا انت الحى القيوم واتوب اليك
اللهم ارحم موتانا وموتى المسلمين