اسعار العربيات هتنزل جامد بعد الكريسماس

[memoo9999]

موديلات 2009 بسبب الركود العالمى والمحلى والتراجع باسعار النفط ومديونيات بعض الشركات الكبيره زى اوبل
واكيد المستعمل هينزل
ياريت ارائكم وملاحظاتكم
وشكراا

[thh777]

ياريت كلامك يتحقق بس ده حلم صعب جدا لان اقتصاد مصر دايما مختلف دائما ودايما القواعد الاقتصادية مش بتتطبق فى مصر يعنى لو تلاحظ اسعار السلع بره نزلت جامد تعالى شوف مصر هتلاقى الاسعار منزلتش ابدا زى بره مع ان المفروض اننا نلاقى تغير كبير فى الاسعار لكن انا لغاية دلوقتى مش شايف تغير وبعدين مشكلتنا اننا نقدر نغلى الحاجة بسرعة جدا لكن نرخصها ببطئ جدا وهتفضل تسمع عن انخفاض قريبا وهبوط حاد فى الاسعار ومش هتشوفه لغاية لما الاسعار تغلى تانى بره وساعتها هتلاقى كل حاجه غليت اكتر من الاول اما بالنسبة لموضوع السيارات فى مصر ينطبق عليه نفس القاعده برده يعنى فعلا فى شركات كتيير جدا خسرت مع الانهيار الاقتصادى لكن مش هتشوف نزول فى اسعار السيارات الا نزول طفيف جدا ده لو حصل ويارب تكون وجهة نظرى غلط وكفاية كده عشان انا سودتها قوى وشكر على الموضوع الرائع وتقبل مرورى

[memoo9999]

نزول الاسععار بيحصل هنا بس بطئ والزياده اللى حصلت نتيجه جشع بعض التجار واول ميخلص المخزون السعر هينهاااااااااار

[super_225]

نزول الاسععار بيحصل هنا بس بطئ والزياده اللى حصلت نتيجه جشع بعض التجار واول ميخلص المخزون السعر هينهاااااااااار
انا متفق معاك في الموضوع دا

ودا اللي مخليني مأجل اني اشتري عربيه لحد بعد الكريسماس
مش خسران حاجه لما انتظر وادينا بنعيش ونشوف معجزات

[abakodama]

بسبب الجشع ذي مابتقول الاسعار هاتفضل زي ماهي
واشمعني بعد الكريسماس يعني علشان لما بابا نويل ييجي ويرمي فلوس علي البلد
البلد دي حالها واقف ولو فيه اي خير او راحة فمن نصيب الطبقة العليا والحيتان لكن السلمون الي زي حالاتنا هايفضل ياكل في طفيليات البحر وحسبنا الله ونعم الوكيل

[aymo_on]

معتقدش يا باشا فيه اسعار تنزل, لو نزلت ممكن يبقى فى جنرال موتورز لكن اليابانى او الاسيوى معتقدش, و النزول مش حيبقى فيه فرق كبير اخرها الف و لا الفين مش حيحصل زى اللى حاصل فى امريكا اشترى سيارة و خد التانية مجانا, يا راجل ده فيه ناس منتظرة الجات تتفعل, و جه الراجل بتاع الجمارك فى البيت بيتك و قال انها فعلا حتتفعل فى 2010 بس كل سنة بقة حيفعلو 10% يعنى عليك بخير بقة لغاية 2020 عشان يطلع المسؤل يقول مفيش جمارك و الحمد لله حررنا الاقتصاد, بس لو جيت تبص على القانون الجديد بتاع المرور و التراخيص, حتلاقى اللى حينقصوه فى الجات, حيخلوك تدفعو فى الضريبة, هى هى يا باشا , و حتى لو بصيت على التوكيلات اللى فى مصر كيف مانا سامع توكيل تويوتا زود اسعار الياريس 2009, و البافاريه زودت اسعار البريليانس بعد ما الناس كانو حجزينها بمبلغ لما استلموها اطبق عليهم الزيادة ده اللى وافق يعنى و اسمها صينى يا عمنا, فمعتقدش و الله انها حتنزل, يا ريت تنزل اتمنى و الله يا صاحبى خير للى حيشترى و عامة انشالله خير, ده حتى اللى عايز يقسط منهم العبد لله دلوقتى بعد الازمة الملية بيقولو فى اهرام الجمعة اليوم انهم من اول السنة الجديدة فى البنوك حيعملو نظام جديد بالنسبة للضمانات و حيغيرو اساليب الاستعلام عن العملاء او طالبى القروض يعنى حتبقى فيه بيروقراطية اكتر و خنقة اكتر, فربنا يسهلها للناس كلها و الله و مصر كلها تركب عربيات

[msa1512]

والله حرام اللي بيحصل في مصر ده حسبي الله ونعم الوكيل
بس أنا معتقدش أن فيه حاجه هترخص علشان الحكومه مش عايزه العربيات تغرق البلد وبكره نشوف

[hug4love2002]

طيب ممكن أعرف اشمعنه يعني بعد الكريسماس؟

[ايمن البورسعيدى]

على فكرة كلمة الاسعار هاتنزل دى كلمة غلط او مصطلح خاطىء الصح بقى ان الاسعار نزلت او انهارت وخصوصا فى امريكا اما اوروبا فبتحاول تقاوم لكن اليورو نزل من 7.95 فى العيد الصغير اللى فات الى 7.0 الان غير ان الاسعار نزلت فعلا بس مش زى امريكا لكن الاسعار مانزلتش فى مصر لان سعر السيارة بالنسبة للجمرك يعتبر قليل جدا يعنى مثلا الجولف 3 فى المانيا سعرها بدل 1600يورو اصبح 1000يورو لكن المشكلة فى مصر هى الجمارك اولا وثانيا مش هانقول جشع التجار لكن اللى بيحصل كالتالى بيكون عند التاجر بضاعة تسوى مثلا 1000جنيه ولما الحاجة تزيد عايز يبيعها بالسعر الجديد لكن لما ترخص عايز يبيعها بالسعر القديم اما بالنسبة للسيارات لما تزيد الجديدة 5% القديمة تزيد 50% ولما تنزل الجديدة يقولك (وايه علاقة نزول اسعار السيارات الجديدة بالسيارات القديمة) وعلى فكرة جميع التجار يتمنوا ان الاسعار تنزل لان غلو الاسعار يسبب الركود حسبى الله ونعم الوكيل واسف للاطالة

[عدو القانون]

انا متغق معك انا الاسعار فى مصر يستحيل تنزل بالدلائل الاتيه :-
1- المصانع الامريكيه التى انهارت ليس لها وجود فى مصر تقريبا
2- خروج السيارات الامريكيه من المنافسة بالخارج سيؤدى بعد فترة الى نقص المعروض من السيارات بالخارج نتيجة غلق المصانع الامريكيه او افلاسها وبالتالى زيادة الاسعار وليس العكس نتيجة ثبات الطلب على السيارات ونفض المعروض
3-اتفاقيه الجات التى تتحدث عنها فى مصر لن يتم الاستفادة منها الى سنه 2020
4-اصحاب التوكيلات الكبرى فى مصر لن يسمحوا بتقليل الاسعار
5-الذين بأعوا سياراتهم بالخسارة فى الايام السابقة كانوا اما تاجر يشترى ويبيع فى اسبوع او واحد محتاج فلوس اقوى
6-انا حاولت انزل معارض سيارات مستعمله فوجودت الاسعار هى هى يعنى المستفيد من هذه الاشاعات هم اصحاب معارض المستعمل عندما تريد ان تبيع سيارة يقولوا لك ان الاسعار انهارت كما فعلوا لصديق لى عرض سيارته بيجو 504 على معرض فقال له 10000 يعنى لوا صديقى باع ابواب سيارته فقط فى ميت عمر تعمل 3000
7- لا يوجد اى فاعدة للسيارات المستعمله فى مصر فى سنه 2002 كانت السيارة 128 بتعمل 7000 وبعدها فى بدايه 2003 عملت 15000

[mindvision]

يرجي ذكر مصدر لهذا الخبر في خلال 24 ساعة او يتم حذف الموضوع

[mindvision]

تم الاكتفاء بغلق الموضوع واي خبر اخر بدون ذكر مصدره الرسمي سيتم التصدي له ولصاحبه بتطبيق العقوبات