هام لكل اصحاب السيارات المستعملة

[amgad nader]

أرجو تثبيت الموضوع للأهمية
أنا متعود من حوالى 3 سنين أنى بنزل سوق السيارات بشكل منتظم لكن الى حصل من شهر كوم والى حصل النهاردة كوم تانى من المعروف ان سوق السيارات المستعملة والجديدة نزل حوالى 5 الاف جنية للسيارة
:thumbdown:ودة كان بسب تخفيض الجمارك على السيارات الكبيرة فئة الديزل وبالتالى السوق كله نزل
لكن بعد قانون المرور الجديد والغاء رخص الأجرة لغاية سنة 83 وطبعا الناس اصحاب الموديلات القديمة خافوا جدا وكل الناس بتحاول تبيع عربيتها بأى شكل وباى سعر لدرجة أن مصر كلها كانت فى السوق النهاردة والله كان النهاردة السوق فيه حوالى 300 ألف عربية والأسعار فى الأرض انا بصراحة كنت سعيد وفى نفس الوقت زعلان سعيد لأن الغلابة هيركبوا عربيات و حزين لأن فى ناس خسرت فلوسها فى عربياتها
والاسباب بعا معروفة
1- قانون المرور الجديد
2- اختفاء بنزين 80 وارتفاع سعر بنزين 90
3- الغاء رخص سيارات الأجرة القديمة وطبعا هيتبعها الملاكى:15:
4- غلو اسعار قطع الغيار والزيوت وأجرة الميكانيكية:53::53:
و طبعا الناس خايفة تشترى
وأنا اسف على الأطالة ولو اى حد عايز يستفسر عن اى سعر عربية بس العربيات الشعبية زى الفيات بأنواعة و اخر اسعارة فى السوق يتفضل وأنا عينيا ليكوا

[black evil62]

ياريت لو تقولي هيونداي اكسل موديل 97 كاملة المواصفات مانيوال تعمل كام

[amgad nader]

من 32الف وانت طالع لغاية حدود ال40 الف وحسب الحالة طبعا

[woody123]

لو سمحت كنت عايز أشتري عربية مستعملة بس تكون موديل جديد يعني بعد 2000 ويكون سعرها مش غالي أوي
فحضرتك تنصحني بأيه ؟؟؟

[amgad nader]

بص بصراحة انا لو مكانك اشترى واحدة من الاتنين
اما دايو لانوس
او هيونداى اكسنت وخصوصا الاكسنت لانى من عشقهاوالسعر هيبقى من 40الى 50الف لو لغاية موديلات 2004 وحسب الحالة اما لو بعد 2004 فبتكون اعلى من 50 وبرضة حسب الحالة

[msa1512]

ربنا يكرمك على الموضوع ده والمعلومات ديه

[amgad nader]

ربنا يكرمك على الموضوع ده والمعلومات ديه

الشكر لله وحدة وكل سنة وكل اعضاء المنتدى بخير ورمضان كريم
كما ارجو تثبيت الموضوع لأن بصراحة اصحاب السياات القديمة فى المنتدى بيطلبوا اسعار فلكية فياريت العارض او الشارى ينزل السوق قبل ما يكتب اى عرض او اى سعر وانا ممكن اسعر العربيات بس فى حدود علمى فقط فى الموضوع دة

[NO LOVE AGAIN]

فعلا موضوعك مهم ويستحق التثبيت
انا من اسبوعين كنت عايز انزل اشترى عربية 131 من السوق وكل الناس نصحتنى انى بلااااااااش اشترى مستعمل الايام دى لان سعرة هينزل تانى وكل الناس بتدور دلوقتى على الجديد وبتبعد عن القديم لان البنوك بقت بتقدم تسهيلات مغرية والصين هتغرق السوق خلال السنوات الجاية هى والهند
انا متهيقلى ان العربيات كمان شادة شوية الايام دى انما بمجرد دخول المدارس الاسعار هتنزل كمان وكمان:42::thumbdown:

[momo100010]

عربيه بتكييف وباور فى حدود ال 20000-25000

[amgad nader]

عربيه بتكييف وباور فى حدود ال 20000-25000

ممكن فيات 131

[aly_elhawary]

ممكن سعر 128 2006

[amgad nader]

ممكن سعر 128 2006

حوالى 38 الف بس انصحك تجيب هيونداى اكسيل أحسن بكتيــــــــــــر

[momo100010]

ممكن فيات 131

مشكور اخى الكريم على الرد السريع

[khhip]

فيات تمبرا ايطالي موديل 91 cc1400 جميع الكماليات (باور - تكيف - زجاج كهربائي) حالة جيدة سعرها يعمل كام؟
وشكرا

[amgad nader]

فيات تمبرا ايطالي موديل 91 cc1400 جميع الكماليات (باور - تكيف - زجاج كهربائي) حالة جيدة سعرها يعمل كام؟
وشكرا

35 ألف تقريبا لو ممتازة

[dr_mask]

عربية بيجو 505 موديل 81 باور - زجاج كهرباء 4 أبواب -فتحة سقف كهرباء بحالة جيدة جدا جدا
و معدلة إكصدامات أمريكي
مجددة بالكامل من سنه

تعمل كام من فضلك على حسب السوق دلوقتي
و شكرا

[rostom_3_2]

موضوع جااااامد قوى من شخص رائع شكرا خاص لصاحب الموضوع وكنت عايز اعرف فين سوق العربيات ولو اعرف اجيب فيه عربيها اقصى حاجه 30000 موديل حلو كده فى التسعينات يعنى اكسيل او حاجه ؟ ولا ايه؟

[rostom_3_2]

اه وايه رائيك فى السويفت لعائله ؟ او الاسكودا؟ بس فى السعر الى انا قايل عليه؟

[زيدان26]

ادامي عربيه 128 مو 76 بيضا فيها رخصه ل 2011
تشتريها بكام؟؟

[amgad nader]

عربية بيجو 505 موديل 81 باور - زجاج كهرباء 4 أبواب -فتحة سقف كهرباء بحالة جيدة جدا جدا
و معدلة إكصدامات أمريكي
مجددة بالكامل من سنه

تعمل كام من فضلك على حسب السوق دلوقتي
و شكرا

البيجو دى تعمل حوالى 40 الف وممكن توصل لغاية 43 الف لو مش محتاجة حاجة وممتازة

[amgad nader]

موضوع جااااامد قوى من شخص رائع شكرا خاص لصاحب الموضوع وكنت عايز اعرف فين سوق العربيات ولو اعرف اجيب فيه عربيها اقصى حاجه 30000 موديل حلو كده فى التسعينات يعنى اكسيل او حاجه ؟ ولا ايه؟

سوق السيارات موجود فى مدينة نصر الحى العاشر وبيبقى يوم الجمعة بس وفى هناك بنزينة للكشف عن العربية بالكمبيوتر ونصيحة ما تشرتريش عربية حالة الموتور والعفشة اقل من 75%
وممكن تشترى اكسيل هاتشباك أوعادية فاضية(بدون تكيف)
وممكن تجيب اسكودا فيليشيا برضة وهى عربية ممتازة

[amgad nader]

اه وايه رائيك فى السويفت لعائله ؟ او الاسكودا؟ بس فى السعر الى انا قايل عليه؟

بصراحة السوفيت مسمينها (سوزوكى زيفت) مشكلتها العفشة ضعيفة جدا وغير عائلية بالمرة
الاسكودا 100% بس قطع غيارها غالية خاليك فى الأكسيل بس الهاتشباك لأنها أحسن من العادية

[amgad nader]

ادامي عربيه 128 مو 76 بيضا فيها رخصه ل 2011
تشتريها بكام؟؟

يعنى بالكتير لو ممتازة
12الف ونص 13 الف
ممكن تجيب مو 80 هتبقى افضل و ب15 الف

[ali_baba]

هل يعتقد احد ان الحكومه المصريه قادره على اصدار قانون يمنع سير السيارات الملاكى ويحدد موديلات لاعوام معينه

انا لا اعتقد ذلك لانه فى هذه الحاله ستكون الخسائر فادحه فى الاقتصاد المصرى

ولا ننسى ان الحكومه ستتحمل تكاليف كثيره حتى يحل محل تلك الموديلات سيارات حديثه

فالعقل يقول ذلك واذا استطاعو ايقاف تراخيص الاجره فلن يستطيعو ايقاف تراخيص الملاكى

فأمريكا صاحبه اقوى قوانين مرور على مستوى العالم لها خصائص معينه فى رخصه السيارات الخاصه ولكنها لم تستصدر قانون مثل ذلك

[momo100010]

كلامك جميل يا علي سواء التوقيع او الموضوع نفسه
انا اؤيدك

[amgad nader]

انا لا اعتقد ذلك لانه فى هذه الحاله ستكون الخسائر فادحه فى الاقتصاد المصرى

ولا ننسى ان الحكومه ستتحمل تكاليف كثيره حتى يحل محل تلك الموديلات سيارات حديثه


وهى الحكومة هتبقى زنبها أيه الحكومة مش هتتكلف جنية بالعكس دة الحكومة ممكن تشوف ان القرار دة هيبقى فى صالحها لأنها هتدخل عربيات جديدة هتاخد من وراها جمارك بالهبل ورجال الأعمال أصحاب النفوذ القوى هيفرحوا لأنهم هيدخلوا عربيات جديدة وهيملوا كروشهم بالارباح والبنوك هتلم فوايد بالعبيط والناس الغلابة الى عايزة عربيات تحميهم من قرف المواصلات هما الى هبيقوا كبش الفدا

[ASHAESHO]

أنا معاك في كلامك يا أستاذ علي وكلامك مية مية وشايف أن رأي الاستاذ أمجد لا أساس له من الصحة ولو كان كدة ماكانوش سمحوا للتاكسي القديم يحول ملاكي أصلا

[amgad nader]

أنا معاك في كلامك يا أستاذ علي وكلامك مية مية وشايف أن رأي الاستاذ أمجد لا أساس له من الصحة ولو كان كدة ماكانوش سمحوا للتاكسي القديم يحول ملاكي أصلا

بص انا هقولك ليه الأجرة بيحول ملاكى لأن أى دولة بتكون المواصلات فيها من البنية التحتية(المواصلات العامة) لذلك لازم الدولة توفر المواصلات للناس بأى شكل فعلشان كدة الأجرة بيحول ملاكى علشان يقدر يبيع الملاكى ويجيب أجرة جديدة أنما بعد ما هتم عملية احلال وتبديل للأجرة هيبدأوا فى الملاكى فورا:31::53:
والنسبة للملاكى الدولة هتتبع معاة نظام الغاوى ينقط بطاقيتة او الى معاهوش مايلزموش ودة طبعا بعد ما هيوفروا وسائل نقل جديدة ومريحة

[amr5500]

ممكن اعرف لادا 2107 روسي مو 98 بحاله جيدة تعملها كام
والف شكر

[amgad nader]

ممكن اعرف لادا 2107 روسي مو 98 بحاله جيدة تعملها كام
والف شكر

تعمل حوالى 35 الف بس نصيحة اخوية هات هيونداى اكسيل احسن وأنعم وأكبر
لأن اللادا خشنة

[amgad nader]

أنا كنت فى السوق النهاردة بشترى عربية لنفسى لا قيت فيورا 2 باب موديل 84 ممتازة دواخل فابريقة لا تحتاج لمسمار تخيلوا هدفع فيها كام لأنى لسه ما خلصتش وان شاء الله لو حصل نصيب فيها هرفع الصور أنا سايب لكوا التسعير المرة دى كفزورة رمضان

[ابو ضاحى]

اولا شكرا على الموضوع ثانيا وداه الاهم احنا النهارده عايزين نشترى عربيات وانا عن نفسى بفكر اشترى سياره بالرغم من اننى بحب وبعشق قياده الموتسيكلات وعندى موتسيكل المهم علشان اركب عربيه كويسه ورخيصه تنصحنى اشترى ايه واللى موجود معايه من 10 الى 15 بس خايف اشترى اى حاجه واجى بعد كده اخصر وعلشان كده حددت المبلغ علشان لو حصل فى الامور امور مكنش خصرت كتير رائيك ايه

[msa1512]

يا باشا الأبيزا 94 أو 98 تعمل كام وهل السوق فيه أبيزا نظيفه ولا لآ وأيه رأيك فيها بخلاف قطع الغيار الغاليه

[abeerbalah]

128 lموديل 80 رخصه سنتين كاوتش وبطاريه جديده رش دواخل وخوارج حالتها جيده تبقى بكام؟

[derma2009]

مشكور على المعلومات

[ghost_tito]

Opel/ corsa/ manual /1600cc /2005/ 67000km

[ghost_tito]

Opel/ corsa/ manual /1600cc /2005/ 67000km

[زيدان26]

طيب انت بتشتري؟؟
يعني ممكن تشتري ال 128 دي؟
او عندك حد يشتريها؟

[amgad nader]

اولا شكرا على الموضوع ثانيا وداه الاهم احنا النهارده عايزين نشترى عربيات وانا عن نفسى بفكر اشترى سياره بالرغم من اننى بحب وبعشق قياده الموتسيكلات وعندى موتسيكل المهم علشان اركب عربيه كويسه ورخيصه تنصحنى اشترى ايه واللى موجود معايه من 10 الى 15 بس خايف اشترى اى حاجه واجى بعد كده اخصر وعلشان كده حددت المبلغ علشان لو حصل فى الامور امور مكنش خصرت كتير رائيك ايه


هات 127 أو128
ودة رينج اسعار ال128 وال127 حالة جديدة جدا بترتيب الموديلات علشان محدش يسأل تانى
اولأ ال128
1-1970-1975 أقصى سعر 12 الف
2-1976-1979 أقصى سعر 14 ألف
3-1980-1988 أقصى سعر 17 ألف
3-1989-1992 أقصى سعر 22 ألف
4-1993-1997 أقصى سعر 27 ألف
5-2006-2007 أقصى سعر 40ألف
6-2008 و2009 زيرو طبعا 44 ألف
أما ال127 نبدا بالقديمة الايطالى
ودى تعمل من 8500 جنية موديلات لغاية 1975 مثلا لغاية 11500جنية موديل 1979
اما الاربعة باب منها تعمل 12500 جنية ودة بالنسبة للتوب الألمانى والايطالى
و ثالثا النصر والفيورا 127
ودى بالنسبة لل2 باب توصل لغاية 13500 جنية
وال4 باب توصل لغاية 17000 الف

[amgad nader]

يا باشا الأبيزا 94 أو 98 تعمل كام وهل السوق فيه أبيزا نظيفه ولا لآ وأيه رأيك فيها بخلاف قطع الغيار الغاليه
الابيزا لو 94 تعمل حوالى 33 الف
وال98 تعمل 37 الف
وفيه منها نضيف جدا فى السوق وهى بصراحة عربية شبابى جدا جدا بس للشباب الاوربى فقط لأن قطع غيارها رخيصة هناك اما هنا فى مصر انصحك ب الاكسيل الهاتشباك زى الابيزا بالضبط

[amgad nader]

128 lموديل 80 رخصه سنتين كاوتش وبطاريه جديده رش دواخل وخوارج حالتها جيده تبقى بكام؟

من 14.500 الف لو جديدة جدا لأنها رشة دواخل

[amgad nader]

طيب انت بتشتري؟؟
يعني ممكن تشتري ال 128 دي؟
او عندك حد يشتريها؟

للأسف انا ما بعبعش لانى مش سمسار سيارات اكتب عرضك فى المنتدى وربنا يوفقك فى بيعها

[amgad nader]

Opel/ corsa/ manual /1600cc /2005/ 67000km

بصراحة أنا ماليش فيها اوى بس هى ممكن تبقى فى حدود ال70 الف وزيادة

[ISLAMCLERK]

ممكن اعرف نوع البنزين المستخدم مع السيارات المرسيدس فئة 190 و موديلات تبدا من 1983 و ماسبب انخفاض اسعار الفئة دى بالذات عن 200 سى سى موديل اقل و معلش سؤال اخير هل تستخدم الفئة 190 او 180 رشاشات ولا بوجيهات و اى فئة تنصحنى بها انا معى خنزيرة و اريد تغييرها بالانسب
مع الشكر و كل عام و انتم بخير

[amgad nader]

ممكن اعرف نوع البنزين المستخدم مع السيارات المرسيدس فئة 190 و موديلات تبدا من 1983 و ماسبب انخفاض اسعار الفئة دى بالذات عن 200 سى سى موديل اقل و معلش سؤال اخير هل تستخدم الفئة 190 او 180 رشاشات ولا بوجيهات و اى فئة تنصحنى بها انا معى خنزيرة و اريد تغييرها بالانسب
مع الشكر و كل عام و انتم بخير

بصراحة أنا ماليش فى المرسيدس نهائى وكنت حابب اخدم وممكن حضرتك تسأل فى الورشة
من هناا (http://www.dvd4arab.com/forumdisplay.php?f=322&order=desc)

[alaa alamein]

اولا موضوعك شيق جدا ولكن يعيعب عليه عدمم توافر كثير من المعلومات سواء عن حالة العربية او اسعارهاوانا لا اعيب عليك شخصيا هذا العيب طالما انك ذكرت انك ليس تاجرا
ولكن لنا ممكن اساعدك فى بعض المعلومات وخاصا السيارات اللى عالية شوية او الزيرو
ودا مش لانى تاجر لكن بعض اصحابى بيشوفوا انى بعرف شوية فى السيارت وبحكم انى اشتريت لهم ومعاهم اكثر من عربية
كما اننى غيرت اكثر من عربية وركبت فئات كثيرة منها 128 ، والشاهين ، والبرايد ، والفليشيا ، والشاهين ، والانسر ، واخيرا الكورسا
وانا دلوقتى عرضها للبيع من خلال موضوعك الجيد والمفيد فى كل الاحوال

[elkomanda2]

موضوع هايل ياباشا ... انا كنت ناوى اشترى 128 نضيفه او 131 بس الحمد لله انى شفت موضوعك وعملت موضوع فى الورشه اسال فيه هل فعلا سعر العربيات هينزل بعد موضوع الاحلال والتجديد بتاع التاكس بس محدش عبرنى
فا ايه رايك اشترى ولا استنه على ما ال3 سنين بتوع الاحلال والتجديد بتاع التاكس يخلصم وقتها يكون كل شى بان

[amgad nader]

موضوع هايل ياباشا ... انا كنت ناوى اشترى 128 نضيفه او 131 بس الحمد لله انى شفت موضوعك وعملت موضوع فى الورشه اسال فيه هل فعلا سعر العربيات هينزل بعد موضوع الاحلال والتجديد بتاع التاكس بس محدش عبرنى
فا ايه رايك اشترى ولا استنه على ما ال3 سنين بتوع الاحلال والتجديد بتاع التاكس يخلصم وقتها يكون كل شى بان

اتوكل على الله واشترى بس حاجة تكون موديل تمانيات زى كدة وابعد عن ال128 لأن مشاكلها كتير وشائعة وخليك فى ال127 بجد معايا بقالها 10 أيام موديل 82 فايريقة كانت مرفوعة شاريها ب15000 الف بس 100/100 عامل بيها حوالى 1000 كيلو لغاية دلوقتى وزى ما بمشى بيها برجع بيها هى مشكلتها ان لازم تكون رجلك خفيفة وتعاملها معاملة حريمى شوية وبراحة عليها فى المطبات شوية
والعربية لا بتاكل زيت ولا مية كل يوم بحطلها حوالى نص كوباية ميه بدون مبالغة والله وبنزينها معقول جدا ومتاكلش بنزين وأنت بتجرى بس التسارع بتاعها بطئ شوية غير اليابانى طبعا ولعلمك أنا شديدت بعربيتى مع 128 مو92 1300 سىسى وأنا على الرابع وهو على الخامس وجبتة وكمان هاف باور يعنى ناعمة جدا جدا وخفيفة وانت فاكر الموضوع الى أنا كتبتة فى الورشة وأنت رديت عليا فيه طبعا بتاع الفرامل وبعدين العربية علشان صغيرة فأى حاجة بسيطة بتعملها فيها بيبان عليها ومدام هتبقى بتاعتك لوحدك ومش لأسرة فهى أحسن من 128 بس ال131 افضل من ال127 وال128 طبعا

[amgad nader]

اولا موضوعك شيق جدا ولكن يعيعب عليه عدمم توافر كثير من المعلومات سواء عن حالة العربية او اسعارهاوانا لا اعيب عليك شخصيا هذا العيب طالما انك ذكرت انك ليس تاجرا
ولكن لنا ممكن اساعدك فى بعض المعلومات وخاصا السيارات اللى عالية شوية او الزيرو
ودا مش لانى تاجر لكن بعض اصحابى بيشوفوا انى بعرف شوية فى السيارت وبحكم انى اشتريت لهم ومعاهم اكثر من عربية
كما اننى غيرت اكثر من عربية وركبت فئات كثيرة منها 128 ، والشاهين ، والبرايد ، والفليشيا ، والشاهين ، والانسر ، واخيرا الكورسا
وانا دلوقتى عرضها للبيع من خلال موضوعك الجيد والمفيد فى كل الاحوال

شكرا على ردك الجميل الذيذ وخليك معايا علشان الموضوع مش هيكمل الا بحضرتك

[Dr.Medooo]

اولا بحييك على موضوعك الجامد ده
كنت عايز اسال على سعر 132 موديل 77 1600 مش رشة دواخل نهائى فابريقة فعلا وعاملة عمرة ستاندارد من 3 سنين وكاوتش جديد
وشكرا

[menakiddes]

كنت عايز اسال حضرتك الادا اوكا
فى معروض منها للبيع
و عاملة كام ؟
شكرا لتعبك و موضوعك الرائع

[NO LOVE AGAIN]

كنت عايز اسال حضرتك الادا اوكا
فى معروض منها للبيع
و عاملة كام ؟
شكرا لتعبك و موضوعك الرائع

يعنى توصل لغاية 20 الف انا اتباعت ادامى وحداة ب 18 مو2000 بس كانت تعبانة شوية

[NO LOVE AGAIN]

اولا بحييك على موضوعك الجامد ده
كنت عايز اسال على سعر 132 موديل 77 1600 مش رشة دواخل نهائى فابريقة فعلا وعاملة عمرة ستاندارد من 3 سنين وكاوتش جديد
وشكرا

تعمل 22 الف لو ممتازة بالكتير اوى

[محمد علاء الدين]

ماشاء الله ماشاء الله تفاعل هايل يا استاذ امجد بجد استاذ ورئيس قسم وبحب اشكرك على الموضوع الجامد دا وكنت عاوز أرخم عليك واسألك شوية حاجات كدة لأني ميييييييييييييييييييح ف العربيات :)
انا ان شاء الله كنت داخل الجامعة وكنت عاوز عربية صغنووونة كدة ففكرت في البيتلز فكنت عاوزك تنصحني بإيه مميزاتها وعيوبها وقطع الغيار وكدة وأسعارها في السوق ايه دلوقتي ....والأحسن أجيب عربية واشدها أنا وأصرف عليها ولا اجيبها مشدودة وكدة وشكرا وآسف عالإطاله ةالرخامة
آه صحيح ...سؤال صغنون كدة هو انا ساكن ف أخر الدنيا والجامعة في آخر الدنيا الناحية التانية يعني انا ساكن في حلوان والجامعة في التجمع الخامس ف العربية دي هتستحمل ولا هتقرفني وكل شوية تقف وكدة وجزاك الله خيرا يا أخي

[محمد علاء الدين]

ايه يا عم أمجد انتا روحت فيــــــن مش شايفينك يعني ان شاء الله يكون المانع خيــــر

[amgad nader]

ماشاء الله ماشاء الله تفاعل هايل يا استاذ امجد بجد استاذ ورئيس قسم وبحب اشكرك على الموضوع الجامد دا وكنت عاوز أرخم عليك واسألك شوية حاجات كدة لأني ميييييييييييييييييييح ف العربيات :)
انا ان شاء الله كنت داخل الجامعة وكنت عاوز عربية صغنووونة كدة ففكرت في البيتلز فكنت عاوزك تنصحني بإيه مميزاتها وعيوبها وقطع الغيار وكدة وأسعارها في السوق ايه دلوقتي ....والأحسن أجيب عربية واشدها أنا وأصرف عليها ولا اجيبها مشدودة وكدة وشكرا وآسف عالإطاله ةالرخامة
آه صحيح ...سؤال صغنون كدة هو انا ساكن ف أخر الدنيا والجامعة في آخر الدنيا الناحية التانية يعني انا ساكن في حلوان والجامعة في التجمع الخامس ف العربية دي هتستحمل ولا هتقرفني وكل شوية تقف وكدة وجزاك الله خيرا يا أخي

بص بصراحة البيتلز حلوة بس النضيف منها الى هو اول ما تبدى العربية تتحرك تسمع صوت صفير زى بتاع الطيارة بس قطع غيارها غالية وموتورها انتيمونيا يعنى لو حصل فيه حاجة صعب يتعمر لان المسمار الى بيتفك ما بيرجعش تانى زى الاول وبعدين موديلاتها قديمة اوى و صوتها مزعج وشكلها من جوة تحس انك عايش فى سنة 70 ولو بصيت جمبك على عربية مو2000 مثلا هتخنق من نفسك
انا مثلا عربيتى 127 مو82 بس مريحة جدا وقطع غيارها رخيصة جدا وعربية صغيرة ولذيذة وبلف بيها لف شديد كل يوم 100كم ومفيش مشاكل واسئال اى حد ال127 احسن من 128 بكتير بس عايزة رجل خفيفة ومعاملة حريمى شوية
انا برضة فى كلية الزراعة فى شبرا وساكن فى مدينة الشروق يعنى 80كم كل يوم وكله صحراوى ودائرى يعنى جرى على 90 والعربية ماشية كويس
اما بالنسبة لحالة العربية الى هتشتريها لازم تكون ممتازة يعنى سيبك من الى بيرش اسكين ومركب كاسيت بايونير وعامل تعديلات وديفل وكلام فاضى والعربية بتبقى من برة ...................ومن جوة يعلم الله
اهم حاجة فى العربية الموتور والشاسية والعفشة غير كدة مقدور عليه وربنا يوفقك ان شاء الله وممكن تجيب 128 بس موديلات90 فيما فوق بس خلى بالك من الكبالن

[محمد علاء الدين]

يعني اصرف نظر تماما عن البيتلز ...أصل الصراحة انا ركبتها مع واحد صاحبي فعلا العربية واسعة من جوة وكنا ماشيين على 120 وواللهي كان ماشاء الله ثبات فظيع وكنت مقتنع بيها جدا بس مش عارف بعد رأيك دا ممكن أفكر تاني وبرده مجاوبتنيش على سؤالي انا يعني لو هجيب عربية اجيبها مشدودة ولا اجيبها واشدها على ايدي

[amgad nader]

يعني اصرف نظر تماما عن البيتلز ...أصل الصراحة انا ركبتها مع واحد صاحبي فعلا العربية واسعة من جوة وكنا ماشيين على 120 وواللهي كان ماشاء الله ثبات فظيع وكنت مقتنع بيها جدا بس مش عارف بعد رأيك دا ممكن أفكر تاني وبرده مجاوبتنيش على سؤالي انا يعني لو هجيب عربية اجيبها مشدودة ولا اجيبها واشدها على ايدي

بص علشان تبقى عارف كل العربيات بتجرى حتى السيات انما البيتلز عربية حلوة بلا شك لكن قطع الغيار غالية وموديلاتها قديمة
وطعا لما تجيب عربية لازم تكون مشدودة على الاخر لان المشكلة مش فى قطع الغيار المشكلة فى المصنعية وهى دى المشكلة الحقيقة والى بيقع فيها اى حد بيشترى عريبة مستعملة لاول مرة لذلك تلاقى واحد شارى عربية 10 الاف وصارف عليها 8 الاف وهو لوكان جابها 100/100 كانت هتبقى ب12الف مثلا وهو هيبعها بنفس السعر
تخيل امباح كنت فى الحرفين لمجرد تظبيط اللمبات بتاعة العربية اشتريت حاجات ب20 جنية بس وركبتها ب60 جنية مصنعية
ومشكلة العربيات ان مصاريفها ما بتخلص لذلك هات عربية مشدودة وشدة جامدة كمان بس الشد العادى خالص زى الموتور والعفشة مش شادة فى الاكسسوارات وربنا يوفقك فى الشراء باذن الله

[CoMpUtEr_1]

lada 2105 model 94 fabrika mn gwa mesh m7taga masareef t3ml kam?

[amgad nader]

lada 2105 model 94 fabrika mn gwa mesh m7taga masareef t3ml kam?
t3ml 25 alf lao (soo good) y3ni momtaza

[kotoz99]

موضوع جميل اوى والله يا برنس
كنت عاوز اعرف اسعار العربيات المنطقة حرة بورسعيد ولو معايا 15 الف اجيب اية منطقة حرة
ارجو سرعة الرد لو سمحت

[amgad nader]

الصراحة ماليش فى حوار المنطقة الحرة اعمل موضوع فى الورشة بتاعت الاستفسارات

[Dr_tango]

أرجو تثبيت الموضوع للأهمية
أنا متعود من حوالى 3 سنين أنى بنزل سوق السيارات بشكل منتظم لكن الى حصل من شهر كوم والى حصل النهاردة كوم تانى من المعروف ان سوق السيارات المستعملة والجديدة نزل حوالى 5 الاف جنية للسيارة
:thumbdown:ودة كان بسب تخفيض الجمارك على السيارات الكبيرة فئة الديزل وبالتالى السوق كله نزل
لكن بعد قانون المرور الجديد والغاء رخص الأجرة لغاية سنة 83 وطبعا الناس اصحاب الموديلات القديمة خافوا جدا وكل الناس بتحاول تبيع عربيتها بأى شكل وباى سعر لدرجة أن مصر كلها كانت فى السوق النهاردة والله كان النهاردة السوق فيه حوالى 300 ألف عربية والأسعار فى الأرض انا بصراحة كنت سعيد وفى نفس الوقت زعلان سعيد لأن الغلابة هيركبوا عربيات و حزين لأن فى ناس خسرت فلوسها فى عربياتها
والاسباب بعا معروفة
1- قانون المرور الجديد
2- اختفاء بنزين 80 وارتفاع سعر بنزين 90
3- الغاء رخص سيارات الأجرة القديمة وطبعا هيتبعها الملاكى:15:
4- غلو اسعار قطع الغيار والزيوت وأجرة الميكانيكية:53::53:
و طبعا الناس خايفة تشترى
وأنا اسف على الأطالة ولو اى حد عايز يستفسر عن اى سعر عربية بس العربيات الشعبية زى الفيات بأنواعة و اخر اسعارة فى السوق يتفضل وأنا عينيا ليكوا


موضوع جميل بارك الله فيك
انا كنت عايز اعرف حاجه لو حبيت اجيب عربيه في حدود 55 الف
اجيب تويوتا عيون ولا ميتسوبيشي كريستاله ولا bmw موديل اديم شويه


وكنت عايز اعرف اخر موديل bmw كاربيراتير كان انهي موديل

تسلم يا جميل

[قمقم]

شكرا يا بركة عالمعلومات الفشخ دي

[alaa alamein]

شكرا على ردك الجميل الذيذ وخليك معايا علشان الموضوع مش هيكمل الا بحضرتك
الله يخليك يأستاذ امجد معلش اتأخرت عليك فى الرد شوية الموضوع على فاكرة ماشى تمام وانتى والحمد لله ربنا موفقك فى الردود وانا تحت امرك لو عزت اى استشارة وسماحنى فى الرد اللى رديتة عليك فى موضوع شقق اكتوبر

[ahmedmok]

ممكن اعرف سعر العربيه الادا 2107 موديل 2003 بها تكييف و بحاله الزيرو روسى تعمل كام داوقتى