عرض جديد من موبينيل بس فيه شئ غريب اوى

[!Yalla]

بسم الله الرحمن الرحيم

صباح الورد والفل على كل الناس الحلوه الموجوده هنا ,, ايه الاخبار يارب تكونوا بخير

امبارح كنت بتصل بخدمة العملاء بسألهم على شئ وبصدفة سمعت في العروض عرض عبارة انك تختار رقم موبينيل وتكلمه طول اليوم مجاناً ده طبعاً لعملاء ستار باقة 1000 وفيما فوق .

طبعاً انا على طول ماكدبتش خبر وروحت مكلم خدمة العملاء وغيرت نظامي لستار 1000 انهارده بالصدفة وانا على موقع موبينيل بشوف نظام 1000 لقيته كويس عليه 1000 دقيقة كل شهر وعليه 400 رسالة لموبينيل فقط وعليه العرض بتاع الرقم المجانى . لحد كده كويس

نزلت تحت فى الصفحة لقيت ملحوظة مكتوب فيها " يطبق على خدمة الرقم المجاني و الرسائل القصيرة المجانية سياسة موبينيل للاستخدام المعتدل " لبس فى وشك :31:

طبعاً على طول كلمت خدمة العملاء وطبعاً اكيد انتو عارفين كالعادة فى خدمة عملاء موبينيل حطين شوية مش عارفين الالف من كوز الدرا اقولهم انتو كاتبين كذا يقولوا لا تتكلم 24 ساعة فى اليوم لو عايز من غير ولا مليم .

فقولت اكتب الموضوع ده هنا يمكن حد جرب العرض ده وعرف ايه النصباية اللى فيه قبل انا ما ابدا فيه لاني هايبدا عندي من اول الشهر ومش عايز ادفع فاتورة من فواتيري اللى تجيب السكر ..

مستني الرد ....

[!Yalla]

يانهار ابيض ياجدعان ع النصب بتاع الشركة دي فعلاً والله انا قولتها زمان موبينيل بتنصب عليك من غير ما تحسسك انها بتنصب عليك اه والله زي زمان كده لما حولت لنظام ستار ويارتني ما حولت اولاُ الدقايق المجانية مش بتتحسب اقسم بالله العظيم ما بتتحسب انا كل شهر بعمل العداد بتاع الموبايل بتاعي واللى ببئى عامله بعدد الساعات هو نفسه بيطلع حساب الفاتورة غير ان على كل 100 جنيه بتدفع 15 جنيه ضريبه ..

المهم اخيراً واحد ابن حلال طلع فاهم فهمني ايه النظام المعتدل ده ,, بيقولك ايه بئى لو فاتورتك طلعت بمثلاً 300 جنيه اخر الشهر لازم ما تكلمش الرقم المجاني ده اكتر من 1200 جنيه يعني 4 اضعاف الفاتورة لو كلمته اكتر من 4 اضعاف الفاتورة يبئى هاتتحاسب عليه زي اى رقم عادي فهمتوا بئى اللعبة فين يعني مثلا الواحد يشترك ويقعد يكلم الرقم المجانى طول اليوم فى اخر الشهر يلاقى فاتورة بـ 4000 جنيه زي الفل .. والراجل بتاع خدمة العملاء قالها لي بالحرف اتعامل مع الرقم المجانى زي اى رقم عادي لا تتكلم فيه كتير اوى ولا قليل اوى ..

يعنى كله ينسى العرض ده وينفض له لانه عرض نصب × نصب وكل الظروف دلوقتي هاتخليني احول لاتصالات او فودافون بنفس الرقم بس سمعت ان ناس عملتها من موبينيل وقفوا لهم الخطوط :d

الموضوع ده علشان الناس تستفيد منه وكمان نتعلم اى عرض نسال عنه بكافه الطرق قبل ما نشترك فيه علشان نتجنب الخطأ ..

والسلام ختام

[م.عمرو]

كلام خدمة العملاء وسياسة الاستخدام الخاصة بالرقم المجاني صحيحة تماما

اصل انت احسبها بنفسك لو الرقم الي بتختاره ده مجاني فعلا بمعنى الكلمة هتفتح في الكلام بدون اي حدود مش بعيد تنام وتسيب الخط مفتوح جنبك منت مش خسران حاجة لكن هما هيشيلوا عنك تكلفة المكالمات للرقم ده بصفتك عميل مميز عندهم بس بشرط تستخدمه صح من غير افترا

ونفس النظام ده برده متطبق في فودافون في خاصية الفري نمبر تختار رقم وتكلمه ببلاش بس بشروط معينة غالبا التكلفة متتعادش ضعف الفاتورة الخاصة بيك

[kujee]

يا جماعة بالنسبة لخدمة الرقم المجانى على باقات ستار 1000 و 2000 و 4000 فقط وأحب بس أوضح للأخ أن فعلا أول مانزل العرض بتاع الخدمة ماكانش فى وقت محدد للمكالمات المجانية مع ال رقم المجانى لكن فعلا بعدها بفترة حصل عليها تعديل مع الأستغلال الشديد للرقم المجانى وبقى ليها حدود بعدد من الدقايق طبعا أنا مش فاكر عدد الدقايق ومش هفتى بس على الأقل نفس النظام دة فى خطوط فودافون أنا عن نفسى شايف العرض دة مش بطال وكمان مناسب فعلا للأستهلاك لأن غير المكالمات المجانية للرقم دة فى الدقايق أصلا بتاعة الخط اللى برضو ببلاش أتمنى أكون قدرت أوضح شوية عن العرض وطبعا المعلومات دى جبتها من موقع موبينيل يعنى دى معلومات أكيدة