حد يعرف شركه تربل بتروليم

[taher441]

الشركه د بعتتلى ايميل بيقولولى هتعمل انتر فيو

هى الشركه دى بتاعت ايه اساسا فى ناس قالولى انها بتدرب وتاخد فلوس

لو حد يعرف يقول علشان مايتنصبش علينا

[herohok]

تصدق بعتولي برضه ودخلت ع النت دورت علي اي موقع ليهم ماقيتش...ع العموم هانروح وربنا يسهل نشوف ايه نظام الشركه ده وياريت لو اي حد يعرف معلومات عن الشركه ساريت يدلنا عليها

[seeker4truth]

السلام عليكم ورحمه الله وبركاته
الشركه دى شركه خدمات بتروليه وعاوز ناس تسافر ديى
عاوزين عماله لشركه الحفر ومشرفبن على العمال هناك
انا روحت وعملت الانتر فيو وطلبو منى شهادة خبرة فى مجال الاشراف عشان كل الموهلات العليا هتشتغل مشرفين
وبصراحه واضح انها شركه محترمه والناس هناك بجد محترمين جدا
عنوانها ابراج الشرطه برج رقم 1 الدور الرابع شارع حافظ ابراهيم رمضان اول مكرم عبيد يمين امام سيتى سنتر
اللى اتبعتله على اميله يروح وربنا يفوق الجميع بجد ان شاء الله تكون فرصه كويسه للناس

[wael alaa elden]

ايميل الشركة اية يا جماعة على شان ابعتلهم

[tweetytweety]

triple_petrolcv@hotmail.com
هوة دوة الإميل بس مش مهم تبعت ممكن تتصل علطول
معلش هتلاقى التليفون مشغوول كتييييير انا قعدت اتصل يومين
TEL : +202 22731976

[sherif gamal]

يا جماعة احنا عايزين تفاصيل اكتر يعنى مرتبتهم ايه و ظروف العمل ايه و ايه هى اسئلة المقابلة مثلا لمحاسب انا بعتولى ايميل بصراحة ومرحتش فا يا ريت حد يوضح اكتر وايه هى تفاصيل المقابلة
جزاكم الله خيرا كثيرا

مستنى الرد فى اسرع وقت لكى احدد هل هروح ولا لا

[taher441]

نروح من غير مانحدد معاد معاهم يعنى الايميل بس كفايه

طيب اللى يعرف ايه هى الاسئله يقول ياشباب

[seeker4truth]

السلام عليكم ورحمه الله وبركاته
يا جماعه انتو هتروحو الاول وتملى ابليكيشن وبعدين هتقدمه
شويه وهيندة عليك وهتكلم معاك فى اللى انته كاتبه فى الابليكيش بالظبط ويعد كدة هيتكلم معاك ف شويه حاجات بسيطه وبالعربى
وبعدين هو يشرحلك طبيعه عملهم ايه بالظبط وبجد زى ما قولت قبل كدة المهندس اللى هيعمل معاك الانتر فيو محترم جدا
ملحوظه (فى خانه الراتب فى الابليكيش اكتب مرتب فوق 1500جنيه )يعنى عشان دة هيبقى سفر فى دبى
روحو يا جماعه لان اخر ميعاد بكرة الخميس وربنا يوفق الجميع

[herohok]

يا جماعه الخير السلام عليكم....
انا لسه راجع النهارده من الشركه ده وللاسق حسيت كده والله اعلم ان الحوار كله نصب في نصب....اولا ده شقه في برج سكني شقه عاديه جدا اول ماتدخل تلاقي سكرتيره كده قاعده ولا بتعمل اي حاجه (وشكلها مش بترووول خااالص ولا حتي بوتيك) المهم ما علينا.....هاتملي سيادتم ابليكيشن كده ولا ليه اي تلاته لازمه والله ...وبعدين تنقل علي المكتب اللي لازق في الاخت السكرتيره ده وتستني لحد ما يشرف واحد كده (بيقول انه مهندس والله اعلم) ....وبصراحه انا قعدت شويه كده لا يوجد اي شئ في المكتب يدل علي انها اساسا شركه بترول ولا ملفات ولا دوسيهات ولا تلفونات حتي ولا تكيفات والمراوح شغاله وحاجه اخر عجب فعلا...المهم قعد اتكلم مع المهندس المذكور قالي انت تدربت فين قولتله كذا وكذا ...قالي طيب معاك كورسات سيفتي Safty المهم قلتله لأ ...قالي اه يبقي انت كده لازم تاخد كوري سيفتي عندنا..قلتله وماله (انا اساسا من ساعه ما دخلت وانا مقلق) المهم..قالي تيجي بكره وهانديك كورس السيفتي ده قلتله طيب عباره عن ايه ...قالي عباره عن ملزمه (جابلي ورق متصور كده فكرني بالمكتبه بتاعه التصوير اللي جنب الكليه)..وقالي تاخد الورق ده تذاكره وتيجي بعد اسبوع تمتحن فيه...قلتله جميل (مستني بقي اعرف بكام الكورس العجيب ده ) ...المهم ربنا ما خيبش ظني وقلتله طيب الكورس ده مجاني قالي لا طبعا هاتدفع 500 جنيه مصاريف ..ده حتي في الجامعه الامريكيه بياخدوه ب 1500 دولار...قلتله يااه ده انتو جامدين قوي ..طيب بعد الكورس ده هايكون ايه الوضع ...قالي سيادته ان المهندس الخبير الامريكاني اللي متعاقدين معاه بتاع شركه البترول اللي في دبي هاييجي وينظر في الطلبات وطبعا اللي واخد الكورس هو اللي هايتعين ...المهم المهندس الجميل ده ماسألنيش اصلا انت خريج ايه ولا معاك ايه ولا كليه ايه ولا تخصصك ايه ( اي بتنجان يعني)...قالي في الاخر انت مهندس باور وكده قلتله لا انا انتاج قالي مافيش مشكله (اي كلام ياعم الحج كله بيفتي) ...قلتله ينفع اشتغل يعني قالي طبعا والخبير الامريكاني ودبي وكله تمام واخر حلاوه.....
والله يا جماعه بجد حسبي الله ونعم الوكيل في اللي بيتاجر باحلام الشباب وطموحاتهم وعايزكم بجد تروحو بنفسكم وتشوفو الوضع هناك عامل ازاي (وحسبي والله ونعم الوكيل )

[bayoumisoft]

بالوضع اللى انت بتقول علية

طبعا ده نصب فى نصب

[sherif gamal]

ربنا يكرمك يا هيرو على انك نورتنا بدل ما كنا نوقع فى حفرة ملهاش ارار متشكرين جدا على ردك ده وانشاء الله ربنا هيكرمط بعمل كويس

[taher441]

احسن حاجه عملتها بدل ماكنا ضربنا مشوار على الفاضى بس انا عاوز اعرف الناس دى ماعندهاش دين ولا ايه

حسبى الله ونعم الوكيل

[herohok]

ربنا يكرمك يا هيرو على انك نورتنا بدل ما كنا نوقع فى حفرة ملهاش ارار متشكرين جدا على ردك ده وانشاء الله ربنا هيكرمط بعمل كويس

ربنا يخليك يا شريف ومتشكر جدا علي ردك الذوق ده ...وربنا يجازيك ويجازينا كل خير ان شاء الله...
ولو عايز تروح بنفسك ياريت تروح وتشوف كل شئ علي الحقيقه بجد الواحد مش عارف يقول ايه غير (حسبي الله ونعم الوكيل)

[herohok]

احسن حاجه عملتها بدل ماكنا ضربنا مشوار على الفاضى بس انا عاوز اعرف الناس دى ماعندهاش دين ولا ايه

حسبى الله ونعم الوكيل

الف شكر ليك يا طاهر وربنا يكرمك ان شاء الله...وانا فعلا عايزك تروح تشوف الوضع هناك عامل ايه ...صدقني والله ولا اي شئ يدل انها شركه بترول اساسا وروح كده اسمع الاخ اللي هناك ده هايقولك ايه....وخليك معاه للاخر عشان تصدق بنفسك